Amuzumanane Kwiiya Zintu Zipya Kuzwa Kunjiisyo Zyantalisyo Zyamu Bbaibbele

1. Ino twakagwasyigwa buti ciindi notwakaiya njiisyo zyantalisyo zyamu Bbaibbele?

NJIISYO zyantalisyo zyamu Bbaibbele zyakacinca buumi bwesu. Mucikozyanyo, ciindi notwakazyiba kuti Leza ulijisi zina lyakuti Jehova, twakabweza ntaamu yakuba acilongwe anguwe. (Is. 42:8) Mpoonya ciindi notwakazyiba ciimo cabantu bafwide, twakaleka kulibilika kuti bayandwa besu ibakafwa balapenga. (Muk. 9:10) Kunze lyaboobo, ciindi notwakaiya cisyomezyo ca Leza ca Paradaiso anyika, twakaleka kulibilika kujatikizya buumi bwesu bwakumbele. Nkaambo twakaba alusyomo lwakuti tuyoopona kwaciindi cilamfwu ikutali buyo myaka iili 70 naa 80 pele mane kukabe kutamani.—Int. 37:29; 90:10.

2. Mbuti lugwalo lwa 2 Petro 1:​12, 13 mbolutondezya kuti nobaba Banakristo basimide kumuuya balakonzya kugwasyigwa anjiisyo zyantalisyo zyamu Magwalo?

² Tatweelede kuluba kujatikizya mboziyandika kapati njiisyo zyantalisyo zyamu Bbaibbele. Mucikozyanyo, mwaapostolo Petro wakalembela Banakristo lugwalo lwakwe lwabili, balo ‘ibakaimvwi kale nji mukasimpe.’ (Amubale 2 Petro 1:​12, 13.) Nkaambo nzi? Nkaambo aciindi eeco kwakali bamayi bakubeja mumbungano ibakali kuyanda kupa bamwi kuleya mukasimpe. (2Pet. 2:​1-3) Aboobo, Petro wakali kuyanda kugwasya bakwesu abacizyi kutegwa batayungwi anjiisyo zyakubeja eezyo nzyobakali kuyiisya bamayi aaba. Wakacita oobo kwiinda mukubayeezya njiisyo zimwi nzyobakazyi kale zyalo izyakali kuyoobagwasya kuzumanana kusyomeka kusikila kumamanino.

3. Nkaambo nzi Banakristo boonse ncobeelede kuzinzibala kuyeeya kujatikizya njiisyo zyantalisyo nzyobakasaanguna kwiiya? Amupe cikozyanyo.

³ Nokuba kuti twamubelekela Jehova kwamyaka minji, tulakonzya kuzumanana kugwasyigwa anjiisyo zyantalisyo zyamu Bbaibbele. Mucikozyanyo: Muntu uucibwene kujika alimwi ayooyo wiiya buya, balakonzya kubelesya zintu zikozyenye kubamba cakulya cimwi. Pele akaambo kakuti muntu uucibwene kujika wali kucita oobo kwamyaka minji, ulakonzya kubelesya zintu nzimunya kubamba cakulya cipya alimwi cibotu. Mbubwenya buyo aabo ibamubelekela Jehova kwamyaka minji, balakonzya kwiiya ziiyo zimbi zipya kuzwa kunjiisyo zyantalisyo zyamu Bbaibbele kwiinda baabo bazwa aakutalika kwiiya Bbaibbele. Nkaambo nzi ncotwaambila boobo? Nkaambo kakuti ambweni bukkale bwesu naa zintu nzyotucita mumulimo wa Jehova zyacinca kuzwa ciindi notwakabbapatizyigwa. Aboobo ciindi notuyeeya kujatikizya njiisyo zyamu Bbaibbele nzyotwakaiya kaindi, tulakonzya kubona nzila zipya mbozikonzya kutugwasya mazuba aano. Lino amuleke tulange-lange ncobakonzya kwiiya Banakristo basimide kuzwa kunjiisyo zyamu Bbaibbele zyantalisyo zyotatwe.

JEHOVA NGO MULENGI

4. Ino kuzyiba kuti Jehova ngo Mulengi kwatugwasya buti?

⁴ Bbaibbele lyaamba kuti: “Ooyo wakapanga zintu zyoonse ngu Leza.” (Heb. 3:4) Tulizyi kuti nyika azintu zyoonse zili mulinjiyo zyakalengwa a Mulengi musongo alimwi ulaanguzu kapati. Mbwaanga ngowakatulenga, ulituzyi kabotu-kabotu kwiinda mbotulizyi tobeni. Alimwi ulatubikkila maano kapati. Kunze lyaboobo, ulizyi zintu zikonzya kutugwasya. Aboobo kuzyiba njiisyo eeyi yakuti Jehova ngo Mulengi, kwatugwasya kupona buumi bubotu alimwi bulaampindu.

5. Ninjiisyo nzi iikonzya kutugwasya kuba abube bwakulicesya? (Isaya 45:​9-12)

⁵ Njiisyo yakuti Jehova Mulengi, ilakonzya kutugwasya kuba bantu balicesya. Mucikozyanyo, ciindi Jobu naakalibikkila maano lwakwe alimwi abantu bambi, Jehova wakamuyeezya kuti Mulengi singuzuzyoonse. (Job. 38:​1-4) Eeci cakamugwasya Jobu kubona kuti inzila zya Jehova zilisumpukide kapati kwiinda zyabantu. Kujatikizya kaambo aaka, kumbele musinsimi Isaya wakalemba kuti: “Sena bulongo bweelede kwaambila Mubumbi wambubo kuti: ‘Ino upanga nzi?’”—Amubale Isaya 45:​9-12.

6. Ndilili nociyandika kapati kuzinzibala kuyeeya mbwali musongo alimwi ambwali singuzu Mulengi wesu? (Amubone azifwanikiso.)

⁶ Ciindi umwi naamubelekela Jehova kwaciindi cilamfwu, ulakonzya kutalika kusyoma maano aakwe muciindi cakusyoma Jehova a Jwi lyakwe. (Job. 37:​23, 24) Pele ino kuzinzibala kuyeeya busongo anguzu nzyajisi Mulengi inga kwamugwasya buti? (Is. 40:22; 55:​8, 9) Kuzinzibala kuyeeya njiisyo eeyi kulakonzya kumugwasya kuzumanana kuba muntu uulicesya alimwi akubona kuti mizeezo ya Jehova njiiyandika kapati kwiinda yakwe.

7. Ncinzi mucizyi Rahela ncaakacita kutegwa akuzumine kucinca kwakapegwa ambunga?

⁷ Ikuyeeya kaambo kakuti Jehova ngo Mulengi, kwakamugwasya mucizyi Rahela uukkala ku Slovenia kuzumina kucinca kwakapegwa ambunga. Wakaamba kuti: “Zimwi ziindi tacili cuubauba kulindime kuzumina kucinca kupegwa abaabo basololela. Mucikozyanyo, nokuba kuti ndakayeebelela Lipooti Yakabunga Keendelezya #8 Yamu 2023, ndakagambwa ciindi cakusaanguna nondakabona mukwesu ulaamalezu kapa makani. Aboobo, ndakapaila kuli Jehova kutegwa andigwasye kuzumina kucinca ooku.” Mucizyi Rahela wakayeeya kuti mbwaanga Jehova ngo Mulengi, ulizyi nzila mbotu yakusololela bantu bakwe. Aboobo ikuti naa cilamuyumina kuzumina kumvwisya kupya naa kucinca kupya, amuzinzibale kuyeeya mbwali musongo ambwali singuzu Mulengi wesu.—Rom. 11:​33-36.

KAAMBO LEZA NCAZUMIZYA KUPENGA

8. Ino kuzyiba kaambo Leza ncazumizya kupenga kwatugwasya buti?

⁸ Nkaambo nzi Leza ncazumizya kupenga? Bantu bamwi ibatabuzyi bwiinguzi bwamubuzyo ooyu, balamunyemena Leza akutalika kuyeeya kuti tako. (Tus. 19:3) Mukwiimpana ambabo, swebo tulizyi kuti Leza tali nguwe uupa kuti katupenga. Pele tulapenga akaambo kacibi alimwi akutalondoka nkotwakakona. Kunze lyaboobo, tulizyi kuti kukkazika moyo kwa Jehova kwapa kuti mamiliyoni aabantu bamuzyibe alimwi akuzyiba mbwayookumana kupenga. (2Pet. 3:​9, 15) Aboobo kuzyiba kaambo Leza ncazumizya kupenga, kulatuumbulizya alimwi kwapa kuti tube acilongwe anguwe.

9. Muubukkale buli buti motuyandika kuzinzibala kuyeeya kaambo Jehova ncazumizya kupenga?

⁹ Tulizyi kuti tweelede kukkazika moyo ciindi notulindila kuti Jehova akakumane kupenga. Pele ciindi swebo naa bayandwa besu nobajana mapenzi, nobacitilwa cakutalulama naa kufwidwa, tulakonzya kulibuzya kaambo Jehova ncatabwezi ntaamu cakufwambaana. (Hab. 1:​2, 3) Mubukkale buli boobu, inga caba cabusongo kuzinzibala kuyeeya kaambo Jehova ncazumizya bantu baluleme kupenga.a (Int. 34:19) Kunze lyaboobo, tweelede kuzinzibala kuyeeya makanze ngajisi aakuyookumana kupenga koonse.

10. Ncinzi cakagwasya mucizyi Anne kuliyumya ciindi naakafwidwa banyina?

¹⁰ Kuzyiba kaambo Leza ncazumizya kupenga kulakonzya kutugwasya kuliyumya mumapenzi. Mucikozyanyo, mucizyi Anne uukkala ansumbu ya Mayotte ku Indian Ocean wakaamba kuti: “Ndakausa kapati akaambo kakufwidwa bamaama. Nokuba boobo, lyoonse ndilaliyeezya kuti Jehova talinguwe uupa kuti katupenga. Alimwi buya uliyandide kuyookumana kupenga koonse akubusya bayandwa besu ibakafwa. Aboobo, kuzinzibala kuyeeya twaambo ootu kundipa kuba aluumuno lwamumizeezo alimwi akukkalwa moyo.”

11. Mbuti kuzyiba kaambo Jehova ncazumizya kupenga mbokutukulwaizya kuzumanana kukambauka?

¹¹ Kuzyiba kaambo Leza ncazumizya kupenga kulatukulwaizya kuzumanana kukambauka. Ciindi naakamana kwaamba kuti Jehova ulakkazika moyo akaambo kakuti uyanda kuti bantu beempwe akuyoofwutuka, Petro wakalemba kuti: “Amuyeeye buyo naa mweelede kuba bantu bali buti mubukkale busalala alimwi amilimo yakubelekela Leza cakulyaaba.” (2Pet. 3:11) Mulimo wakukambauka uli akati “kamilimo yakubelekela Leza cakulyaaba.” Mbubwenya mbuli Taateesu, tulabayanda bantu. Alimwi tuyanda kuti abalo bakapone munyika mpya njatusyomezyede Leza. Aboobo cakukkazika moyo Jehova wapa bantu bamucilawo canu coolwe cakuti bamukombe. Eelo kaka tulijisi coolwe citaliboteli cakuba basimilimonyina a Leza akugwasya bantu kumuzyiba kaatanasika mamanino!—1Kor. 3:9.

TUPONA “KUMAZUBA AAMAMANINO”

12. Ino kuzyiba kuti tupona “kumazuba aamamanino” kwatugwasya buti?

¹² Cakutainda mumbali Bbaibbele lyakaamba bantu mbobanoobede “kumazuba aamamanino.” (2Tim. 3:​1-5) Ciindi notubona bukkale bwabantu mazuba aano, tuba masimpe kuti ncolyakaamba Bbaibbele ncamasimpe. Alimwi ciindi notubona bukkale bwabantu kabuyaabwiindila kubija, citupa kusinizya kuti Jwi lya Leza lilasyomeka.—2Tim. 3:​13-15.

13. Kweelana acikozyanyo ca Jesu icijanika kulugwalo lwa Luka 12:​15-21, mibuzyo nzi ncotweelede kulibuzya?

¹³ Kuzyiba kuti tupona kumazuba aamamanino kulatugwasya kubikkila maano kuzintu ziyandika kapati. Amubone ncotukonzya kwiiya kucikozyanyo ca Jesu cijanika kulugwalo lwa Luka 12:​15-21. (Amubale.) Nkaambo nzi muntu umwi muvwubi ncaakaambwa kuti “tayeeyi kabotu”? Nkaambo kakuti wakabikkila kapati maano kuzintu ziteelede ikutali akaambo kakuti wakali muvwubi. “Wakaliyobweda lubono pele tanaakali muvwubi kuli Leza.” Nkaambo nzi ooku ncokwatakali kucita zintu cabusongo? Nkaambo Leza wakamwaambila kuti: “Masiku ngoonya aaya balabuyanda buumi bwako.” Mbotuyaabuswena kumamanino aabweende bwazintu oobu, tulakonzya kulibuzya kuti: ‘Sena mbaakani zyangu zitondezya kuti ndibikkila maano kuzintu ziyandika kapati? Ino bana bangu ndibakulwaizya kulibikkila mbaakani zili buti? Sena ndibelesya nguzu zyangu, ciindi alimwi azintu zyakumubili kuliyandawida lubono naa kuyobola lubono kujulu?’

14. Mbuti cakuluula camucizyi Miki mbocitugwasya kubona mbociyandika kapati kuyeeya kuti tupona kumazuba aamamanino?

¹⁴ Kuyeeya kuti tupona kumazuba aamamanino kulakonzya kutugwasya kububelesya kabotu buumi bwesu. Eeci ncaakacita mucizyi wazina lya Miki. Wakaamba kuti: “Nondakamanizya cikolo, ndakali kuyanda kucita kkoosi iijatikizya kwiiya banyama. Kunze lyaboobo, ndakajisi mbaakani yakutalika mulimo waciindi coonse akuyoobelekela kubusena kubulide. Pele bakwesu abacizyi basimide kumuuya, bakandikulwaizya kwaayeeyesya makani aaya akubona naa kucita kkoosi eeyi, kwakali kukonzya kupa kuti ndizizuzikizye mbaakani zyangu zyakumuuya. Kuyungizya waawo, bakandiyeezya kuti bweende bwazintu oobu bulamana ino-ino akuti munyika mpya ndinoojisi ciindi cinji cakwiiya banyama banji. Aboobo, ndakasala kucita kkoosi iimbi yalo yakali kukonzya kutola buyo ciindi cisyoonto alimwi akundigwasya kuzuzikizya mbaakani zyangu zyakumuuya. Eeci cakandigwasya kuzuzikizya mbaakani zyangu zyakumuuya akulongela kubusena kubulide ku Ecuador.” Lino mucizyi Miki amulumaakwe balabeleka mumulimo wamubbazu mucisi eeci.

15. Mbuti cikozyanyo ca Jakobo mbocitugwasya kubona kaambo ncotuteelede kutyompwa ciindi bantu nobataabikkili maano makani mabotu? (Amubone azifwanikiso.)

¹⁵ Tatweelede kutyompwa ciindi bantu nobataabikkili maano makani mabotu nkaambo balakonzya kucinca. Amubone cikozyanyo ca Jakobo imwanookwabo a Jesu. Wakamubona Jesu kakomena, kaba Mesiya alimwi akuba mwiiyi uucibwene. Nokuba boobo, kwakainda myaka iili mbwiibede Jakobo katanatalika kumutobela Jesu. Wakaba sikwiiya lilikke buyo naakabusyigwa Jesu, amana buya wakaba sikwiiya musungu.b (Joh. 7:5; Gal. 2:9) Alimwi tatweelede kutyompwa ciindi banamukwasyi nobataabikkili maano makani mabotu. Kunze lyaboobo, tweelede kuzumanana kubakambaukila aabo ibakakaka ciindi cakusaanguna. Kamuyeeya kuti tupona kumazuba aamamanino, aboobo mulimo wesu wakukambauka ulibindide kapati. Alimwi kamuyeeya kuti nzyotubaambila lino bantu zilakonzya kuyoobajatikizya kumbele noliba leelyo aakutalika mapenzi mapati.c

AMUZUMANANE KULUMBA AKAAMBO KAZIYEEKEZYO ZYA JEHOVA

16. Ino mwagwasyigwa buti aziyeekezyo zya Jehova? (Amubone akabbokesi kakuti “Amuzibelesye Kugwasya Bamwi.”)

¹⁶ Zyakulya zyakumuuya zimbi nzyotutambula inga zibambilidwe bantu batazyi zinji kujatikizya Bbaibbele. Mucikozyanyo, makani aabuleya aapegwa nsondo ansondo, zibalo amavidiyo aamwi aajanika aa jw.org alimwi amamagazini aakubuleya kanji-kanji inga zibambilidwe bantu batali Bakamboni. Nokuba boobo, toonse tulagwasyigwa aziyeekezyo zijanika mumo nkaambo zilatugwasya kuyumya luyando lwesu kuli Jehova, lusyomo lwesu mu Bbaibbele alimwi akuba bamayi bacibwene ciindi notuyiisya bamwi njiisyo zyamu Bbaibbele.—Int. 19:7.

17. Muubukkale nzi motukonzya kuyandika kuzinzibala kuyeeya njiisyo zyantalisyo zyamu Bbaibbele?

¹⁷ Mbuli Bakamboni ba Jehova, tulakkomana kapati ciindi nokwaba kucinca mukumvwisya njiisyo yakasimpe imwi yamu Bbaibbele. Pele alimwi tulalumba kapati akaambo kanjiisyo zyantalisyo zyamu Bbaibbele nzyotwakaiya ciindi cakusaanguna zyalo zyakapa kuti tukayande kasimpe. Ikuti naa twasunkwa kukakatila kumizeezo yesu kuti njiiluzi muciindi cakutobela busolozi bwambunga ya Jehova, cakulicesya tweelede kuyeeya kuti Mulengi wesu musongo alimwi singuzu nguusololela mbunga eeyi. Mpoonya ciindi bayandwa besu naa swebo notwalijana mubukkale bukatazya, tweelede kukkazika moyo akuyeeya kaambo Jehova ncazumizya kupenga. Kunze lyaboobo, ciindi notuyanda kusala mbotukonzya kubelesya ciindi cesu azintu zyesu, tweelede kuyeeya kuti tupona kumazuba aamamanino alimwi kusyeede buyo ciindi cisyoonto kuti mamanino asike. Aboobo ziyeekezyo zya Jehova azizumanane kutugwasya kusala cabusongo alimwi akuzumanana kumubelekela cakusyomeka.