Jehova Nguutupa “Kukondwa Kapati”

1-2. (a) Ino bantu banji bali mubukkale buli buti mazuba aano? (b) Ncinzi ncotutiibandike mucibalo eeci?

BANTU banji munyika baluujisi kuyandaula lukkomano. Pele nobasolekesya buti, kunyina nobakkomene. Bamwi baluuside akaambo kakuyeeya kuti zintu kunyina noziyoobeendela kabotu. Nobaba babelesi ba Jehova bamwi mbobalimvwa oobo. Akaambo kakuti tupona “kumazuba aamamanino,” tulakonzya kulijana mubukkale ‘bukatazya ncobeni.’—2Tim. 3:1.

² Mucibalo eeci, tulabandika zintu zikonzya kutumanina lukkomano alimwi acikonzya kutugwasya kuzumanana kukkomana. Pele kusaanguna atubone cikonzya kutugwasya kuba alukkomano lwini-lwini.

CIKONZYA KUTUGWASYA KUTEGWA TUBE ALUKKOMANO LWINI-LWINI

3. Ino zilenge zituyiisya nzi kujatikizya Jehova? (Amubone azifwanikiso.)

³ Lyoonse Jehova ngu Leza uukkomene alimwi uyanda kuti andiswe katukkomene. Nkakaambo kaako wakalenga zintu zinji zyalo zikonzya kutupa kukkomana. Mucikozyanyo, tulakkomana ciindi notubona nyika yesu mbotu yalo iijisi mibala yiindene-indene, notweebelela banyama basobana alimwi anotulya zyakulya nzyotukkomanina kapati. Masimpe Jehova ulatuyanda kapati alimwi uyanda kuti katukkomene mubuumi.

Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images

4. (a) Nkaambo nzi Jehova ncaazumanana kuba Leza uukkomene nokuba kuti ulaabwene mapenzi aali munyika? (b) Ncipengo nzi Jehova ncaakatupa? (Intembauzyo 16:11)

⁴ Nokuba kuti Jehova ngu “Leza uukkomene,” ulaabwene mapenzi aacitika munyika. (1Tim. 1:11) Pele tanaazumizya mapenzi aaya kuti amumanine lukkomano nkaambo ulizyi kuti ngakaindi buyo kasyoonto. Kunze lyaboobo, ulaliyumya cakukkazika moyo kusikila buzuba mbwayakwaamanizya mapenzi oonse. Pele calino ulaamvwisya mapenzi ngotujisi alimwi uliyandide kutugwasya. Mbuti mbwacita oobo? Nkwiinda mukutupa cipego cakuti katucikonzya kukkomana. (Amubale Intembauzyo 16:11.) Amubone kuzyiba Jehova mbokwakamuletela lukkomano Jesu.

5-6. Nkaambo nzi Jesu ncakkomene?

⁵ Akati kazilenge zya Jehova zyoonse, Jesu nguuyinda kukkomana. Nkaambo nzi? Amubone twaambo ootu tobilo. (1) ‘Ncinkozya ca Leza uutalibonyi’ alimwi ulabutondezya cakulondoka bube bwa Bausyi. (Kol. 1:15.) (2) Jesu wakkala kwaciindi cilamfwu a Bausyi balo bali Nkasensa kalukkomano.

⁶ Kunze lyaboobo, Jesu lyoonse ulikkomene akaambo kakuti ucita zintu nzyobamwaambila Bausyi. (Tus. 8:​30, 31; Joh. 8:29) Akaambo kaceeci, Jehova ulamukkomanina kapati Jesu.—Mt. 3:17.

7. Mbuti mbotukonzya kujana lukkomano lwini-lwini?

⁷ Tulakonzya kuba alukkomano lwini-lwini kwiinda mukuba acilongwe a Jehova walo uuli Nkasensa kalukkomano. Ciindi notwiiya kujatikizya Jehova alimwi akutobela cikozyanyo cakwe, tuyookkomana kapati. Kunze lyaboobo, tulakonzya kuba alukkomano kwiinda mukucita kuyanda kwa Jehova alimwi akuzyiba kuti ulatukkomanina.a (Int. 33:12) Masimpe kuti zimwi ziindi tulakonzya kuusa, ambweni kwamazuba masyoonto naa kwaciindi cilamfwu. Ikuti eeci cacitika, sena inga kacili citondezyo cakuti Leza tatukkomanini? Peepe. Kayi Jehova ulamvwisya kuti munyika motupona, zimwi ziindi tulakonzya kuusa alimwi akupenga. (Int. 103:14) Lino amuleke tulange-lange zintu zikonzya kutumanina lukkomano alimwi ancotweelede kucita kutegwa tuzumanane kukkomana.

AMUZICENJELELE ZINTU ZIKONZYA KUMUMANINA LUKKOMANO

8. Ino mapenzi aamubuumi inga atujatikizya buti?

⁸ Cakusaanguna: Mapenzi aamubuumi. Sena mulapenzyegwa naa kupenga akaambo kantenda zilicitikila, bucete, kuciswa naa kucembaala? Mapenzi aaya alakonzya kutumanina lukkomano ikwaambisya ikuti katutacikonzyi kwaayendelezya. Bbaibbele lyaamba kuti tulakonzya kuusa akulimvwa kuti tatukonzyi kukkomana alimwi. (Tus. 15:13) Mwaalu wazina lya Babis walo iwakafwidwa mwanookwabo alimwi abazyali bakwe bobilo mumyaka buyo iili 4 wakaamba kuti: “Ndakalimvwa kulendelelwa alimwi akubula lugwasyo. Zimwi ziindi ndakali kuba azyakucita zinji cakuti tiindakali kujana ciindi cakuba abazyali bangu alimwi amwanookwesu kabatanafwa, calo cindipa kuusa kapati.” Masimpe, mapenzi aamubuumi alakonzya kutumanina lukkomano.

9. Ncinzi cikonzya kutugwasya kuzumanana kukkomana? (Jeremiya 29:​4-7, 10)

⁹ Cikonzya kutugwasya kuzumanana kukkomana. Tulakonzya kuzumanana kukkomana ikuti twacileka kulibilika kujatikizya zintu nzyotutakonzyi kucinca akukkomana azintu nzyotujisi. Bbaibbele liyiisya kuti tulakonzya kuzumanana kukkomana nokuba kuti bukkale bwesu bwacinca. Mucikozyanyo, Jehova wakaambila ba Juda ibakatoledwe mubuzike ku Babuloni ikucita kufwumbwa nzyobakali kukonzya kutegwa bazumanane kukkomana mubuumi tacikwe makani abukkale mobakabede. (Amubale Jeremiya 29:​4-7, 10.) Ino twiiya nzi? Twiiya kuti tweelede kubona zintu zibotu mubuumi bwesu akukkomana akaambo kanzizyo. Kamuyeeya kuti Jehova takamulekelezyi pe. Pele lyoonse unoomugwasya. (Int. 63:7; 146:5) Mucikozyanyo, mucizyi Effie iwakalicisa cakuti takonzyi kweenda, ulamulumba Jehova akaambo kakumugwasya. Wakaamba kuti: “Jehova, bamukwasyi wangu alimwi abakwesu abacizyi mumbungano, bakandigwasya kapati akuzumanana kundikulwaizya. Ndiyanda kubatondezya kuti ndilalumba kapati akaambo kazintu nzyobazumanana kundicitila. Alimwi ndilasolekesya kucita kufwumbwa ncondikonzya kutegwa kandikkomene.”

10. Mbuti mbotukonzya kuzumanana kuba bantu bakkomene nokuba kuti tujisi mapenzi?

¹⁰ Nokuba kuti tujisi mapenzi, zintu zibi zyatucitikila naa kucitikila banamukwasyi, tulakonzya kuzumanana kuba bantu bakkomene.b (Int. 126:5) Nkaambo nzi? Nkaambo lukkomano taluyeeme abukkale bwesu. Mupainiya wazina lya Maria wakaamba kuti: “Ciindi notujisi mapenzi, tulazumanana kukkomana akaambo kakuti tulayeeya Jehova ncatusyomezya. Eeci tacaambi kuti tatukonzyi kulila naa kutondezya mbotulimvwa. Pele Taateesu ulakonzya kutugwasya kuzumanana kuba bantu bakkomene tacikwe makani amapenzi ngotukonzya kujana.” Aboobo kamuyeeya kuti nokuba kuti bukkale bwanu mbuyumu lino, tabukazumanani kuba mbubonya oobo lyoonse nkaambo ino-ino Jehova uyoozigusya zintu zyoonse zitupa kupenga akuusa.

11. Ino cikozyanyo camwaapostolo Paulo cimukulwaizya buti?

¹¹ Zimwi ziindi tulakonzya kulimvwa kuti ambweni mapenzi eesu atondezya kuti Jehova tacitukkomanini. Ikuti katulimvwa boobo, tulakonzya kuyeeya babelesi ba Jehova bambi balo ibakalijana mubukkale buli boobo. Amubone cikozyanyo camwaapostolo Paulo. Jesu wakamusala kutegwa akambauke makani mabotu “kuli bamasi akubami alimwi akubana ba Israyeli.” (Mil. 9:15) Eelo kaka eeci cakali coolwe cilibedelede! Nokuba boobo, Paulo wakajisi mapenzi manji. (2Kor. 11:​23-27) Sena mapenzi ngaakajisi Paulo atondezya kuti Jehova tanaakacili kumukkomanina? Peepe. Muciindi caboobo, kuliyumya kwakwe kwakatondezya kuti Jehova wakali kumugwasya. (Rom. 5:​3-5) Lino amuyeeye kujatikizya bukkale bwanu. Andinywe mwazumanana kumubelekela Jehova cakusyomeka nokuba kuti mujisi mapenzi. Aboobo mulakonzya kuba masimpe kuti Jehova ulamukkomanina.

12. Mbuti kwaalilwa kucita zinji mumulimo wa Jehova mbokukonzya kutumanina lukkomano?

¹² Cabili: Kwaalilwa kucita zinji mumulimo wa Jehova. (Tus. 13:12) Luyando ndotujisi kuli Jehova alimwi akulumba, zilatukulwaizya kulibikkila mbaakani mumulimo wakwe. Nokuba boobo, ikuti twaalilwa kuzizuzikizya mbaakani nzyotwakalibikkila akaambo kabukkale, tulakonzya kutyompwa kapati. (Tus. 17:22) Mupainiya wazina lya Holly wakaamba kuti: “Ndakajisi mbaakani yakunjila Cikolo Cabakambausi ba Bwami, kuyoobelekela kucisi cimbi naa kuunka kuyoobelekela kumayake aaku Ramapo. Nokuba boobo, bukkale bwangu bwakacinca. Aboobo, tiindakacikonzya kuzizuzikizya mbaakani zyangu. Eeci nocakacitika, ndakatyompwa kapati. Kwaamba masimpe, cilatyompya kapati ikuti kojisi mbaakani mpoonya waalilwa kuzizuzikizya.” Babelesi ba Jehova banji mbobalimvwa oobo ciindi nobaalilwa kuzuzikizya mbaakani nzyobakalibikkila mumulimo wakwe.

13. Nzintu nzi nzyotukonzya kucita nokuba kuti bukkale bwesu bwacinca?

¹³ Cikonzya kutugwasya kuzumanana kukkomana. Kamuyeeya kuti Jehova talangili kuti tucite zintu kwiinda aali zeezyo nzyotukonzya kucita alimwi tatuboni kuti tulayandika kulinguwe akaambo buyo kazintu nzyotukonzya kucita mumulimo wakwe. Jehova uyanda kuti katulicesya alimwi akusyomeka. (Mik. 6:8; 1Kor. 4:2) Kunze lyaboobo, ubikkila kapati maano kubube bwesu ikutali kuzintu nzyotukonzya kucita. Aboobo tatweelede kulangila kucita zinji kwiinda aali zeezyo Jehova nzyalangila kuti tucite.c Nokuba kuti bukkale bwanu tabumuzumizyi kucita zinji mumulimo wa Jehova kwiinda aali zeezyo nzyomukonzya kuyanda kucita, amuyeeye zintu zimwi nzyomukonzya kucita. Mucikozyanyo, mulakonzya kukulwaizya mukubusi, kugwasya mukwesu naa mucizyi uucembeede. Naa ambweni mulakonzya kuswaya mukombinyoko, kumutumina fooni naa kumulembela kagwalo kutegwa mumukulwaizye. Ikuti mwacita oobo, Jehova uyoomukkomanina alimwi akumulongezya kwiinda mukumupa kuti kamukkomene. Alimwi kamuyeeya kuti munyika mpya, tuyoocikonzya kumubelekela Jehova munzila zinji kwiinda mbotucita lino. Eeci ncecakamukulwaizya mucizyi Holly iwaambwa kale. Wakaamba kuti: “Ciindi nondatalika kulimvwa kutyompwa, inga ndilakkala ansi akuyeeya kuti ndiyoopona mane kukabe kutamani. Kunze lyaboobo, inga ndilayeeya kuti munyika mpya ndiyoocikonzya kucita zyoonse nzyondiyanda kumucitila Jehova kwiinda mukugwasyigwa anguwe.”

14. Ncinzi acimbi cikonzya kutumanina lukkomano?

¹⁴ Catatu: Kulikkomanisya. Bantu bamwi basola kubelesya Intaneti kutegwa basumpule muzeezo wakuti lukkomano lwini-lwini lulakonzya kuboola kwiinda mukulikkomanisya. Andiswe ikuti twatacenjela tulakonzya kutalika kusyoma kuti, ikuti katucita buyo zintu nzyotuyanda mbuli kuula nzyotuyanda akuunka kumasena ayiindene-indene, tulakonzya kukkomana ncobeni. Masimpe kucita boobo tacilubide pe. Nkaambo Jehova wakatulenga munzila yakuti katuzikkomanina zintu zibotu nzyaakalenga. Nokuba boobo, zintu bantu banji nzyobakali kuyeeya kuti inga zyabapa kukkomana, mubwini zyabamanina lukkomano. Mupainiya wazina lya Eva wakaamba kuti: “Ikuti kamuyeeya buyo kulikkomanisya, lyoonse munooyanda zinji.” Masimpe kuti, ikuti katuyanda kunoolikkomanisya ciindi coonse, tuyakuusa alimwi akutyompwa.

15. Ncinzi ncotukonzya kwiiya ku Mwami Solomoni?

¹⁵ Mwami Solomoni wakasola kucita zintu ziindene-indene kutegwa abone naa zyakali kukonzya kumupa kukkomana. Mucikozyanyo, wakasola kulya zyakulya zibotu ziindene-indene, kuswiilila nyimbo zibotu alimwi akuula kufwumbwa ncaakali kuyanda. Pele zintu eezyo tiizyakamupa kukkomana pe. Wakaamba kuti: “Liso talikkuti kubona pe, akwalo kutwi takukkuti kumvwa.” (Muk. 1:8; 2:​1-11) Zintu zibi zyamunyika zyalo zikonzya kulibonya kuti zilakonzya kuleta lukkomano lwini-lwini zili mbuli mali aakubeja. Alakonzya kulibonya kuba aamasimpe pele mubwini kunyina naakonzya kugwasya.

16. Ncinzi ncotukonzya kucita kutegwa tuzumanane kuba bantu bakkomene? (Amubone azifwanikiso.)

¹⁶ Cikonzya kutugwasya kutegwa tuzumanane kukkomana. Jesu wakatuyiisya kuti: “Kupa kulakkomanisya kapati kwiinda kupegwa.” (Mil. 20:35) Mwaalu wazina lya Alekos wakaamba kuti: “Ndilasolekesya kucitila bamwi tuntu tusyoonto-syoonto. Ciindi nondibagwasya ndilakkomana nkaambo eeci cindipa kutabikkila maano kuzintu nzyondiyanda.” Ncinzi ncomukonzya kucita kutegwa mucikonzye kugwasya bamwi? Mucikozyanyo, ikuti mwabona muntu umwi uuside, amwaambaule anguwe. Nokuba kuti tamukonzyi kwaamanizya mapenzi aakwe, mulakonzya kumuumbulizya kwiinda mukumuswiilila caluzyalo alimwi akumuyeezya kuti weelede kuwaala mukuli wakwe uuminya mumaanza aa Jehova. (Int. 55:22; 68:19) Kunze lyaboobo, mulakonzya kumuyeezya kuti Jehova kunyina nakonzya kumulekelezya pe. (Int. 37:28; Is. 59:1) Kumane mulakonzya kumugwasya munzila yacigaminina mbuli kumubambila cakulya akweendeenda anguwe. Amumutambe kuti amusangane mumulimo wamumuunda calo cikonzya kupa kuti alimvwe kabotu. Amulekele Jehova kuti amubelesye kugwasya bamwi. Kubikkila maano kugwasya bamwi muciindi cakuligwasya kuyoopa kuti tukkomane ncobeni.—Tus. 11:25.

17. Ikuti katuyanda kukkomana ncobeni mubuumi, ncinzi ncotweelede kucita? (Intembauzyo 43:4)

¹⁷ Ikuti katuyanda kukkomana ncobeni mubuumi, tweelede kuzumanana kuba acilongwe ciyumu a Taateesu wakujulu. Bbaibbele litwaambila kuti Jehova nguukonzya kutupa “kukondwa kapati.” (Amubale Intembauzyo 43:4.) Aboobo tacikwe makani azintu zitucitikila mubuumi, tulakonzya kuliiba. Akaambo kakuti Jehova ngomulongwe wiinda kubota, uyootugwasya kuba bantu bakkomene lino mane kukabe kutamani.—Int. 144:15.