Ino Mbuti Mbondikonzya Kulilesya Kunyema?

Mibuzyo

• Sena mulanyema-nyema?

  • peepe

  • zimwi ziindi

  • inzya, abuzuba

• Ino munyema kusikila aali?

  • asyoonto

  • kapati

  • cakuciindizya

• Ino nguni uumunyemya kapati?

  • muzyali

  • mwanookwanu

  • mweenzinyoko

Ikuti naa muyandika kulilesya kunyema, eeci cibalo cilamugwasya! Cakusaanguna, amulange-lange ncociyandika kuumuna buyo nomwanyemezyegwa.

Ikaambo ncocili boobo

Buumi bwanu. Lugwalo lwa Tusimpi 14:30 lwaamba kuti: “Moyo uukkede upa buumi kumubili.” Mukwiimpana, bbuku litegwa Journal of Medicine and Life lyaamba kuti “kunyema kulakonzya kumupa kuciswa bulwazi bwamoyo.”

Beenzinyoko. Ibbaibbele lyaamba kuti: “Utanoomvwani amuntu mukali, alimwi utanikweendi amuntu uunyema-nyema buyo.” (Tusimpi 22:24) Aboobo, kuti naa mulanyema-nyema, mutanoogambwi kuti bantu balamutantamuka. Mukubusi wazina lya Jasmine wakaamba kuti, “Ikuti tamwiiyi kulilesya kunyema, nkokuti mulibuzya coolwe cakuba abalongwe.”

Mpuwo yanu. Ethan uujisi myaka iili 17 wakaamba kuti “Ikuti kamunyema-nyema, abantu bambi bayoomuzyiba mbomubede.” Amulibuzye kuti, ‘Ino ndiyanda kuti bantu kabandizyi kuti ndili muntu uuli buti, mutontozi siluumuno naa muntu uunyema-nyema buyo?’ Ibbaibbele lyaamba kuti: “Ooyo uutafwambaani kunyema musongo kapati, pele ooyo uutakkaziki moyo utondezya bufwubafwuba bwakwe.”​—Tusimpi 14:29.

Ncomukonzya kucita

Amulange-lange magwalo aatobela alimwi anzyobaamba bamwi, mpoonya amulibuzye mibuzyo iibikkilizyidwe.

• Tusimpi 29:22: “Muntu mukali ubusya mazwanga; Muntu uuli woonse uunyema-nyema buyo ucita zinyonyoono zinji.”

  “Nindakali mukubusi, cakali kundikatazya kulilesya kunyema. Eeli ndepenzi ndyobajisi babbululu babataata. Aboobo inga twati ncamubulowa buya. Tulakatazyigwa kulilesya kunyema!”​—Kerri.

  Sena ndilanyema-nyema? Ikuti kandizumina kulumbaizyigwa akaambo kabube bubotu, sena ncamaano kutongooka akwaamba kuti penzi lyakunyema mbondakazyalwa buya?

• Tusimpi 15:1: “Kuvwiila kabotu kulalesya bukali, pele majwi mabi alanyemya.”

  “Cikonzya kugwasya nkwiiya kulilesya kunyema. Ikuti mwaiya kuba abube bwakubomba moyo alimwi akubona bubotu ciindi coonse, nkokuti ciyoomuubaubila kutanyema-nyema.”​—Daryl.

  Ciindi nobandinyemya bamwi, nkaambo nzi ncondeelede kubikkila maano kuzintu nzyondicita?

• Tusimpi 26:20: “Kuti kakunyina nkuni mulilo ulazima.”

  “Kuti ndaingula cakukkazika moyo, cipa kuti awalo muntu ngondibandika limwi atontomane akupa kuti tubandike kakunyina kunyemezyanya.”​—Jasmine.

  Ino mbuti majwi ngondaamba alimwi azintu nzyondicita mbozikonzya kupa kuti mulilo uvwilime buya?

• Tusimpi 22:3: “Muntu uucenjede abona mapenzi ulayuba, pele aabo batakwe maano balaunka nkukonya ooko, aboobo balapenga.”

  “Zimwi ziindi cilagwasya kuzwa buyo kutegwa ndibe aciindi cakuyeeya cacitika, mpoonya kwainda ciindi ndilalimana penzi kanditontomene.”​—Gary.

  Ino ndilili nocili cibotu kuzwa kuti naa bukkale bwabija pele kakunyina kulitondezya kuti munzila imwi tamumubikkili maano?

• Jakobo 3:2: “Nkaambo toonse tulalubizya ziindi zinji.”

  “Tweelede kuusa kujatikizya kulubizya kwesu, pele alimwi tweelede kwiiya ciiyo kukulubizya kwesu. Tweelede kuba amakanze aakululamika zintu twaakulijana mubukkale bukozyenye aboobo.”​—Kerri.

Muzeezo: Amube ambaakani. Amukanze kuba muntu mubombe moyo kwaciindi cili mbocibede ambweni kwamwezi omwe. Mpoonya kamulilingula ciindi aciindi.