Ino Jerusalemu Mupya Ninzi?
Bwiinguzi bwamu Bbaibbele
Mabala aakuti “Jerusalemu mupya,” alo aajanika ziindi zyobilo mu Bbaibbele, aamba munzi wacikozyanyo iwiiminina nkamu yabasikutobela Jesu ibaunka kujulu kutegwa bakalele anguwe mu Bwami bwa Leza. (Ciyubunuzyo 3:12; 21:2) Bbaibbele litondezya kuti nkamu eeyi alimwi yiitwa kuti nabwiinga wa Kristo.
Twaambo tugwasya kuzyiba Jerusalemu Mupya
Jerusalemu Mupya uli kujulu. Lyoonse Bbaibbele nolyaamba Jerusalemu Mupya, lyaamba kuti ulaseluka kuzwa kujulu, kwalo bangelo nkobalindilila milyango yamunzi. (Ciyubunuzyo 3:12; 21:2, 10, 12) Alimwi kukomena kwamunzi ooyu kutondezya kuti taukonzyi kuba waanyika. Bupati bwamunzi mubulamfwu, mubwamba akuya mujulu makkilomita aatandila ku 2,200. (Ciyubunuzyo 21:16) Aboobo mubwamba wakali kulampa makkilomita aatandila ku 560 kuya mujulu.
Jerusalemu Mupya upangidwe aankamu yabasikutobela Jesu, nabwiinga wa Kristo. Jerusalemu Mupya wiitwa kuti “nabwiinga, imukaintu wa Mwanaambelele.” (Ciyubunuzyo 21:9, 10) Mubupanduluzi oobu bwacikozyanyo, Mwanaambelele wiiminina Jesu Kristo. (Johane 1:29; Ciyubunuzyo 5:12) “Imukaintu wa Mwanaambelele,” nabwiinga wa Kristo, wiiminina Banakristo bayooba antoomwe a Jesu kujulu. Bbaibbele likozyanisya cilongwe icili akati ka Jesu a Banakristo aaba kucilongwe icili akati kamwaalumi amukaintu wakwe. (2 Bakorinto 11:2; Baefeso 5:23-25) Kunze lyaboobo, mabwe aantalisyo aa Jerusalemu Mupya ajisi “mazina aali 12 aabaapostolo bali 12 ba Mwanaambelele.” (Ciyubunuzyo 21:14) Makani aaya atugwasya kusinizya ncowiiminina Jerusalemu Mupya, mbwaanga Banakristo ibaitilwa kubuumi bwakujulu ‘bakayakwa antalisyo yabaapostolo abasinsimi.’—Baefeso 2:20.
Jerusalemu Mupya ncibeela camfwulumende. Jerusalemu wansiku ngowakali munzi mupati wa Israyeli, kwalo Mwami Davida, mwanaakwe Solomoni, alimwi abaluzubo lwabo nkobakali kulela “acuuno cabwami ca Jehova.” (1 Makani 29:23) Aboobo, Jerusalemu iwakali kwiitwa kuti “imunzi uusalala,” wakali kwiiminina bulelo bwa Leza mumulongo waluzubo lwa Davida. (Nehemiya 11:1) Jerusalemu Mupya, awalo wiitwa kuti “munzi uusalala,” ulapangwa abaabo ibasangana Jesu kujulu “eelyo bayooba bami ibayoolela nyika.”—Ciyubunuzyo 5:9, 10; 21:2.
Jerusalemu Mupya uyooleta zilongezyo kubantu anyika. Jerusalemu Mupya waambwa kuti “uboola ansi kuzwa kujulu kuli Leza,” kutondezya kuti Leza uyoobelesya nguwe kugwasya bantu anyika. (Ciyubunuzyo 21:2) Kaambo aaka kaswaanganya Jerusalemu Mupya a Bwami bwa Leza, bwalo Leza mbwabelesya kuzuzikizya makanze aakwe “ansi aano mbubonya mbuli kujulu.” (Matayo 6:10) Makanze aa Leza kujatikizya bantu anyika alabikkilizya azilongezyo eezyi:
Kugusyigwa kwacibi. “Mulonga wamaanzi aabuumi” ulakunka kuzwa mu Jerusalemu Mupya akutola maanzi ‘kuzisamu zyabuumi’ izibambilidwe “kuponya masi.” (Ciyubunuzyo 22:1, 2) Kuponesyegwa ooku kwakumubili alimwi akumuuya kuyoogusya cibi eelyo bantu bayooba abuumi bulondokede, mbubwenya mbwaakali kuyanda Leza kumatalikilo.—Baroma 8:21.
Cilongwe cibotu akati ka Leza alimwi abantu. Cibi cabaandaanya bantu a Leza. (Isaya 59:2) Kugusyigwa kwacibi kuyoopa kuti buzuzikizyigwe cakumaninina businsimi bwakuti: “Tente lya Leza lili aabantu, alimwi uyookkala ambabo, eelyo bayooba bantu bakwe. Alimwi Leza lwakwe uyooba ambabo.”—Ciyubunuzyo 21:3.
Kumanizyigwa kwamapenzi alimwi alufwu. Kwiinda mu Bwami bwakwe, Leza “uyoosindula misozi yoonse kumeso aabo, alimwi lufwu talukabi limbi, akwalo koomoka, kulila nokuba kucisa takukabi limbi pe.”—Ciyubunuzyo 21:4.