Maofesi Aabasanduluzi Aagwasya Mamiliyoni Aabantu

Basanduluzi baciindi coonse bainda ku 60 pesenti bacitila mulimo wabo kumaofesi aabasanduluzi naa RTO, kutali kumitabi. Nkaambo nzi bubambe oobu ncobugwasya? Ino nzibelesyo nzi nzyobayandika basanduluzi kutegwa babeleke kabotu ku RTO? Alimwi ino busena nkoibede RTO bugwasya buti kutegwa mulimo wabasanduluzi weende kabotu?

Bubambe bwama RTO bupa kuti basanduluzi kabakkala kubusena bantu banji nkobaambaula mwaambo ngobasandulula. Ba Karin, ibasandulula ci Low German, bakaamba boobu: “Kuzwa notwakalongela ku RTO ku Cuauhtémoc, Chihuahua, Mexico, twaambaula buyo ci Low German abasanduluzima, mubukambausi, alimwi anotwaunka kuula zintu. Tuzingulukidwe abantu baambaula mwaambo wesu. Tumvwa twaambyo ntotwakamvwide kaindi, alimwi akumvwa mabala mapya ngobabelesya bantu kutali ngobakali kubelesya kaindi.”

Ba James, ibabelekela ku RTO iili ku Frafra, ku Ghana, bakaamba kuti zimwi ziindi balauyeeya mukwasyi wa Beteli uuli kumutabi. Nokuba boobo, bakaamba kuti: “Ndilakukkomanina kubelekela ku RTO. Kukambauka kubelesya mwaambo wesu akubona bantu mbobaatambula makani mabotu, kulandikkomanisya kapati.”

Ncinzi ncobalanga-langa bakwesu nobasala busena bwa RTO? Ba Joseph, ibabelekela mudipatimenti iilanganya mayake nyika yoonse iili ku Warwick, New York, U.S.A., bakaamba kuti: “Buyumuyumu bumwi mbotujana mbwakuti mumasena aamwi malaiti, maanzi alimwi aintaneti zilasyupa kapati, calo cikonzya kupa kuti cibakatazye basanduluzi kutambula milimo njobeelede kusandulula. Aboobo ciindi notusala busena bwa RTO, tulanga-langa masena manji nkowaambaulwa mwaambo ooyo.”

Pele kwaamba mubufwaafwi, tusaanguna kusala busena ikuli kale Busena Bwakucitila Miswaangano Mipati, Ŋanda ya Bwami, naa ŋanda yabamisyinali, nkaambo inga tabuduli, alimwi basanduluzi inga kabeenda kuyoobelekela nkuko. Ikuti kunyina busena ikuli zintu eezyi, bakwesu balakonzya kuzumizyigwa kuula maanda naa maofesi aayakidwe kale nkobakonzya kubelekela basanduluzi akukkala. Ikuti kwaba kucinca kuli koonse, masena aaya inga asambalwa kakunyina penzi mpoonya akubelesya mali kuzintu zimwi ziyandika kapati.

Balapegwa Zibelesyo Kutegwa Mulimo Weende Kabotu

Mumwaka wamulimo wa 2020, twakabelesya mali aasika ku $13 miliyoni (U.S.) kutegwa mulimo weende kabotu kuma RTO. Babelesi bali kuma RTO bayandika makkompyuta, mapulogilamu aakkompyuta aalubazu, zibelesyo zyakubelesya kulekkooda, Intaneti, azintu zimwi buyo. Mucikozyanyo, kutegwa musanduluzi omwe apegwe kkompyuta azyoonse ziyandika mumo, ulakonzya kubelesya mali aasika ku $750 (U.S.). Makkompyuta ajisi mapulogilamu aakunyika alimwi apulogilamu yiitwa kuti Watchtower Translation System, yalo iigwasya basanduluzi amulimo wabo alimwi akupa kuti kacibaubila kujana zibelesyo zyakuvwuntauzizya.

Kuyungizya waawo, basanduluzi balatambula zibelesyo zyakubelesya mukulekkooda. Zibelesyo eezyi zyakabeleka kapati kwaambisya ciindi bulwazi bwa COVID-19 nobwakabbuka. Basanduluzi banji bakali kukonzya kuzinyamuna kufwumbwa nkobakkala akuzumanana amulimo wabo wakusandulula akulekkooda mavidiyo.

Basikulisungula bakkala munsi-munsi a RTO balagwasyilizya kwiinda mukulanga-langa zyakasandululwa, kubamba akusalazya busena. Ba Cirstin, ibabelekela ku RTO yaci Afrikaans ku Cape Town, South Africa, bakaamba kuti: “Basikumwaya banji abapainiya baciindi coonse balaacoolwe cakugwasyilizya okuno.”

Basikulisungula aaba balacikkomanina coolwe eeci. Mucizyi umwi uugwasyilizya ku RTO imwi wakaamba kuti kubelekela ku RTO kulakatalusya kapati. Icimwi, bakwesu abacizyi balaakubelesyegwa mukupanga zyakumwaya zyakalekkoodwa. Ba Juana, basanduluzi baci Totonac, mudolopo lya Veracruz, ku Mexico bakaamba kuti: “Lino mbwaanga tuli munsi amadolopo nkobaambaula mwaambo wesu, ncuuba-uba kubelesya bakwesu baindene-indene mukulekkooda zyakuswiilila alimwi amavidiyo.”

Pele sena ma RTO agwasya mukusumpula busanduluzi? Ibabali banji baamba kuti inzya. Ba Cédric, ibasandulula ci Kongo ku Democratic Republic of Congo bakaluula boobu: “Bakwesu abacizyi bakali kwiita zyakumwaya zyesu kuti zyakalembedwe muci ‘Kongo caba Watch Tower,’ akaambo kakuti tiizyakalembedwe mumwaambo ngobavwula kubelesya bantu. Pele lino baamba kuti zyakumwaya zyesu zisanduludwe muci Kongo camazuba aano, mbubwenya buyo mbobaambaula bantu.”

Ba Andile, ibasandulula ci Xhosa ku South Africa, abalo bakalimvwida bantu kabalumbaizya. Bakati: “Ibanji balatwaambila kuti kuli kucinca nkobabona muzyakumwaya zyesu. Nobaba bana baniini ibakali kubala Ngazi Yamulindizi mucikuwa, lino balabala amuci Xhosa. Balalikkomanina kapati Bbaibbele lya Busanduluzi Bwanyika Mpya lyakalembululwa.

Mali aabelesyegwa kutegwa bapange RTO, kwiilanganya, alimwi akubona kuti babelesi balijisi ziyandika azwa muzyakusanga zyanyika yoonse nzyobapa bakwesu cakulisungula, kubikkilizya azyakusanga zicitwa kwiinda mukubelesya donate.jw.org.