Kucita Zintu Zigwasya Bakwesu Alimwi Anyika

Swebo Tobakamboni ba Jehova, tulizyi kuti ino-ino Jehova Leza uyoobweza ntaamu yakubambulula nyika yesu yalo bantu njobanyonyoona. (Ciyubunuzyo 11:18) Nokuba kuti tulizyi oobo, tulasolekesya kwiibamba kabotu nyika. Mucikozyanyo, twakayaka masena eesu aakukombela Jehova munzila yakuti kaatanyonyooni nyika.

Milimo iicitwa kugwasya bakwesu, ilacitwa munzila yakuti kaitanyonyooni nyika. Ino milimo nzi eeyo? Alimwi ino catugwasya buti kwaabelesya kabotu mali aasangwa?

Bubambe Bwakubikka Zintu Zipa Kuti Kamutontola Mubusena Bucitilwa Miswaangano Mipati

Ŋanda Yakucitila Miswaangano Mipati ya Matola ku Mozambique yakajisi ciluli camasenke, kumane mumabali kwakanyina cakaliko. Lino akaambo kamasenke mbwaakapangidwe, akali kupa kuti kamupya kapati mukati. Umwi mukwesu wakubusena oobu wakaamba kuti: “Kupya ooku kwakali kupa kuti katuzwa nkasaalo! Mboyamanina buyo pulogilamu bakwesu bakali kufwambaana kuzwa anze kutegwa baumwe kawo.” Ino ncinzi ncotwakeelede kucita kutegwa bakwesu abacizyi kabalikwaya akubikkila maano lyamiswaangano?

Twakasala kulimana penzi eeli munzila yatakali kukonzya kunyonganya busena. Aboobo twakabikka mafaani alo aabelesya muwo alimwi akubikka zintu zimwi mujulu zitegwa insulation. Zintu eezyi zipa kuti kakutapyi maningi mukati, mpoonya mafaani alo apa kuti kakuunga kawo katontola. Mafaani aaya taabelesyi magesi, pele abeleka amuwo uunga calo cipa kuti muya uupya kautanjili mukati. Aulwa mali aasika ku $50 imwi aimwi.a

Bubambe oobu bwapa kuti bakwesu abacizyi kabaswaangana kabotu akulikwaya. Mbwaanga lino kulanjila muya mubotu mukati, cipa kuti kakutabi mudumu. Kumane carbon dioxide inga ilaceya mpoonya oxygen ilavwula. Akaambo kaceeci basimuswaangano balaswiilila cakubikkila maano alimwi balalikwaya. Mukwesu waambidwe kumatalikilo wakaamba kuti: “Lino tatucifwambaani kuzwa anze mboyamanina buyo pulogilamu. Muciindi caboobo, inga tulakkala mukati aciindi cakulyookezya akwiizya abalongwe. Kukkala mubusena bwakuswaanganina mutontola kabotu cili mbuli kukkala munsi aacisamu cibotu!”

Kupanga Magesi Kuzwa Kuzuba

Mumasena eesu aakukombela munyika yoonse, twakabikka masola kutegwa kaapanga magesi. Akaambo kaceeci, tatucisyomi maningi magesi aapangwa azintu mbuli malasya, mungwimba alimwi a gas zyalo zipa kuti muya unyongane. Masola taapi muya kunyongana alimwi alatugwasya kwaabelesya kabotu mali aasangwa.

Mu 2022, twakabikka masola kuofesi yamutabi waku Slovenia, alo aapa 30 pesenti yamagesi aabelesyegwa. Ikuti aciindi cimwi masola aaya apanga magesi manji kwiinda aali yaayo aayandika amutabi, inga baabelesya bantu bali mucilawo cili munsi-munsi. Masola aaya aulwa mali aasika ku $360,000. Lino mbwaanga mutabi taucibbadeli mali manji aamagesi, mali ngotulaayobole mumyaka iili 4 buyo, anooli manji kapati kwiinda yaayo aakabelesyegwa kuula masola aaya.

Mu 2024, twakabikka masola abbatili mpati kuofesi yamutabi waku Sri Lanka. Zibelesyo eezyi zyuulwa mali aabalilwa ku $3 miliyoni alimwi masola aaya alapa 70 pesenti yamagesi aabelesyegwa amutabi. Mali aatiyobolwe mumyaka yotatwe anooli manji kwiinda yaayo aakabelesyegwa kuula zibelesyo eezyi. Mumwaka ngweena ooyu twakabikka masola akwalo kuofesi yamutabi waku Netherlands. Masola aaya aulwa mali aasika ku $1.1 miliyoni alimwi alapa 35 pesenti yamagesi aabelesyegwa amutabi. Mali aatiyobolwe mumyaka iili 9 anooli manji kwiinda yaayo aakabelesyegwa kuula masola aaya.

Kumaofesi aabasanduluzi (RTO) ku Mexico akwalo kwakabikkwa masola. Mucikozyanyo, ku RTO yaci Tarahumara (Central) iili ku Chihuahua, lyamupeyo inga kulatontola kapati, mpoonya lyacilimo inga kulapya kapati! Akaambo kakuti magesi aladula kapati kubusena oobu, bakwesu tiibakali kuzibelesya zibelesyo zikasaazya azitontozya. Mukwesu Jonathan uubelekela ku RTO eeyi, wakaamba kuti: “Lyamupeyo twakali kulivwumba ngubo akusama nsweta mpoonya lyacilimo twakali kujalula mawindo.”

Mu 2024, kwakabikkwa masola ku RTO eeyi. Aulwa mali aasika ku $21,480, pele mali aatiyobolwe mumyaka iili 5 anooli manji kwiinda yaayo aakabelesyegwa kuula masola aaya, nkaambo mali aakubbadelela magesi anooli masyoonto. Bakwesu lino balazibelesya kapati zibelesyo zikasaazya azitontozya. Mukwesu Jonathan wakati: “Lino tuubeleka kabotu mulimo wesu alimwi tulaukkomanina. Kuyungizya waawo, tulakkomana nkaambo tulizyi kuti mali aambunga abelesyegwa kabotu alimwi bubambe oobu kunyina nobunyonganya nyika.”

Kubelesya Meenda Aamvwula

Mu Africa, mu Maanda aa Bwami aamwi meenda alakatazya kapati. Kutegwa bakwesu bateke meenda inga beenda misinzo milamfwu. Kumane mu Maanda aa Bwami aamwi, bakwesu inga baula buya meenda alo aaletwa atilaki, nzila eeyi iladula kapati alimwi inyonganya nyika.

Kutegwa bakwesu babe ameenda, kuciluli kwakabikkwa ziteekezya meenda alimwi amatanki mapati mu Maanda aa Bwami mumasena aaindene-indene aamu Africa. Kazitanabikkwa zibelesyo eezyi, bakwesu basaanguna kwiiya kujatikizya kucinca kwambobuca ambowuunga muwo kutegwa ziteekezyo eezyi zibikkwe abusena bweelede akuti kazibweza kabotu meenda. Kutegwa zibelesyo eezyi zibikkwe mu Maanda aa Bwami, kubelesyegwa mali aabalilwa ku $600 kusikila ku $3,000. Nokuba boobo, zibelesyo eezyi zipa kuti kakubelesyegwa mali masyoonto buyo kubbadelela ziyandika mu Maanda aa Bwami, mbwaanga bakwesu tabacibbadeleli meenda.

Bubambe oobu bwabagwasya kapati bakwesu. Mucizyi Noemia waku Mozambique, wakaamba kuti: “Musyule, twakali kweenda misinzo milamfwu kuyooteka meenda. Twakali kusika ku Ŋanda ya Bwami katukatede kapati. Penzi lyakubula meenda lyakali kupa kuti kacikatazya kuba balondo. Lino mbwaanga meenda nkwaali, boonse balakonzya kusamba kumaanza. Kuyungizya waawo, tulaunka ku Ŋanda ya Bwami katutakatede akuukkomanina muswaangano. Tulalumba kapati kububambe oobu!”

Ino mbunga yesu icikonzya buti kubbadelela zintu eezyi? Kwiinda muzyakusanga zyamulimo wanyika yoonse zyalo zicitwa munzila ziindene-indene izili a donate.jw.org. Tulamulumba kapati akaambo kazyakusanga zyanu!