Sena Nyika Eeyi Iyoomana?

Ambweni mulizyi kuti Bbaibbele lilaamba kujatikizya kumana kwanyika. (1 Johane 2:17) Sena caamba kunyonyoonwa kwabantu bali anyika? Sena nyika inoonyina cintu cili coonse cipona naa iyoonyonyoonwa cakumaninina?

BWIINGUZI BWAMU BBAIBBELE KUMIBUZYO EEYI YOBILO MBWAKUTI PEEPE!

Ino Ncinzi Citakamani?

BANTU

Ncolyaamba Bbaibbele: Leza ‘tanaakailenga buyo [nyika] kakunyina kaambo, pele wakaibumba kutegwa kaikkalwa bantu.’—ISAYA 45:18.

NYIKA

Ncolyaamba Bbaibbele: “Izyalani lilainda, izyalani limbi lilaboola, pele nyika inooliko lyoonse mane kukabe kutamani.”—MUKAMBAUSI 1:4.

NCOCAAMBA: Kweelana ancolyaamba Bbaibbele, nyika kunyina noiyoonyonyoonwa alimwi inookkalwa abantu lyoonse. Aboobo, ino kumana kwanyika caamba nzi?

AMUYEEYE KAAMBO AAKA: Bbaibbele likozyanisya mamanino aanyika eeyi kuliceeco cakacitika mumazuba aa Nowa. Aciindi eeco, “nyika yakazwide bubi.” (Matalikilo 6:13) Nokuba boobo, Nowa wakali mululami. Aboobo Leza wakamufwutula Nowa amukwasyi wakwe, pele wakabanyonyoona bantu basizibi kwiinda mukubelesya zambangulwe. Kalyaamba kujatikizya cakacitika ciindi eeco, Bbaibbele lyaamba kuti: “Inyika yakuciindi eciya yakanyonyoonwa noyakapaizyigwa maanzi aazambangulwe.” (2 Petro 3:6) Aaya akali mamanino aanyika yakaliko ciindi eeco. Pele ino ncinzi cakanyonyoonwa? Taili nyika pe, pele mbantu basizibi ibakali aanyika. Aboobo ciindi Bbaibbele nolyaamba zyamamanino aanyika, talyaambi kunyonyoonwa kwanyika iini. Lyaamba mamanino aabantu basizibi bali munyika alimwi azintu zibyaabi zicitika munyika.

Ino Ncinzi Ciyoomana?

MAPENZI ALIMWI ABUBI

Ncolyaamba Bbaibbele: “Kusyeede kaindi kaniini buyo, ibantu babi tabakabi limbi pe; uyoolanga nkobakabede, pele tabakabiko pe. Pele babombe myoyo bayookona nyika, eelyo bayoobotelwa kapati muluumuno lunji.”—INTEMBAUZYO 37:10, 11.

Zifwanikiso: 1. Babbi ibasamide atwakulivwumbya kumeso, bazwa mucintoolo azintu nzyobabba. 2. Mwaalumi upa mweenzyinyina cibbeke cizwide mali.

NCOCAAMBA: Zambangulwe lyakuciindi ca Nowa kunyina noyakabumanina limwi bubi boonse. Nolyakainda Zambangulwe, bantu babi alimwi bakapa kuti bubayumine buumi bantu boonse. Pele ino-ino, Leza uyoobumanizya bubi boonse. Mbubwenya mbwaakaamba sintembauzyo: “Ibantu babi tabakabi limbi pe.” Leza uyoobumana bubi boonse kwiinda mukubelesya Bwami bwakwe, nkokuti mfwulumende yanyika yoonse iili kujulu iiyoolela bantu bamvwida Leza.

AMUYEEYE KAAMBO AAKA: Sena beendelezi bamunyika bayoozumina kumvwida Bwami bwa Leza? Bbaibbele litondezya kuti tabakazumini. Cabufwuba-fwuba, bayootalika kukazya Bwami bwa Leza. (Intembauzyo 2:2) Ino ncinzi ciyoocitika? Bwami bwa Leza buyoonjila mubusena bwamfwulumende zyabantu zyoonse, mpoonya “bwalo bulikke buyakwiima nji mane kukabe kutamani.” (Daniele 2:44) Pele nkaambo nzi bweendelezi bwabantu ncobweelede kumana?

KAAMBO NCOBWEELEDE KUMANA—Bweendelezi Bwabantu

Ncolyaamba Bbaibbele: “Muntu weenda tapedwe nguzu zyakusololela noziba ntaamu zyakwe.”—JEREMIYA 10:23.

Bantu baleenda munsi abwaanda buzwide zikwankwani zyamakkampeeni aabasimapolitikisi.

NCOCAAMBA: Bantu tiibakalengwa kuti kabalyeendelezya. Tabakonzyi kubeendelezya kabotu bantunyina alimwi akumana mapenzi aabo.

AMUYEEYE KAAMBO AAKA: Bbuku litegwa Britannica Academic lyakaamba kuti, kulibonya kuti mfwulumende zyaalilwa “kumana mapenzi mbuli bucete, nzala, malwazi, ntenda zilicitikila, nkondo alimwi amapenzi aamwi.” Lyakazumanana kwaamba kuti: “Bamwi . . . basyoma kuti ilikke mfwulumende yanyika yoonse njiikonzya kumana mapenzi aaya cakumaninina.” Pele nokuba kuti mfwulumende zyanyika zyoonse zyakamantana, nyika icinooyendelezyegwa abantu batalondokede balo batakonzyi kulesya mapenzi oonse aambwa atala aawa. Bwami bwa Leza bulikke, nemfwulumende iikonzya kugusya mapenzi oonse aali munyika cakumaninina.

Aboobo, kweelana ancolyaamba Bbaibbele, mamanino aanyika, nkokuti bweende bwazintu oobu bubyaabi, tacili cintu ncobeelede kuyoowa bantu bali kabotu. Muciindi caboobo, eeci ncintu ncotweelede kulangila nkaambo nyika eeyi iinyonyookede iyoonjililwa busena anyika ya Leza mpya yeebeka!