Bbaibbele lyaamba kuti mazuba aabuumi bwabantu ‘masyoonto alimwi azwide mapenzi manji kapati.’ (Jobu 14:1) Sena oobu mbwaakali kuyanda Leza kuti katupona? Kuti naa tabusyi, makanze nzi ngajisi kulindiswe? Sena kuli naayoozuzikizyigwa? Amubone bwiinguzi bwamu Bbaibbele buumbulizya.

1. Ino Jehova uyanda kuti katupona buumi buli buti?

Jehova uyanda kuti katupona buumi bubotu kapati. Ciindi Leza naakalenga bantu bakusaanguna ba Adamu a Eva, wakababikka mumuunda mubotu wa Edeni, nkokuti paradaiso. Mpoonya “Leza wakabalongezya akubaambila kuti: ‘Amuzyalane muvwule, muzuzye nyika akuyeendelezya.’” (Matalikilo 1:28) Jehova wakali kuyanda kuti bazyale bana, kupanga nyika yoonse kuba paradaiso alimwi akweendelezya banyama. Makanze aakwe akali aakuti bantu boonse kabapona buumi bubotu mane kukabe kutamani.

Nokuba kuti zintu zyakanyongana,a makanze aa Leza taacincide pe. (Isaya 46:10, 11) Makanze aakwe ngakuti, bantu bamumvwida bakapone kukabe kutamani mubukkale bulondokede.​—Amubale Ciyubunuzyo 21:3, 4.

2. Mbuti mbotukonzya kupona buumi bukkomanisya lino?

Jehova wakatulenga abube bwakuti ‘katuyandika kusololelwa anguwe,’ nkokuti kuyanda kumuzyiba alimwi akumukomba. (Amubale Matayo 5:3-6.) Uyanda kuti tube acilongwe ciyumu anguwe, “kweenda munzila zyakwe zyoonse akumuyanda,” alimwi akumubelekela ‘amoyo wesu woonse.’ (Deuteronomo 10:12; Intembauzyo 25:14) Ikuti twacita oobo, tunoojisi lukkomano lwini-lwini nokuba kuti tujisi mapenzi. Kukomba Jehova kutupa kuba abuumi buli kabotu nkaambo tupona kweelana amakanze aakwe.

3. Jehova ujisi makanze mabotu kujatikizya bantu

Atweebelele VIDIYO, akubandika mubuzyo uutobela.

VIDIYO: Ino Leza Wakailengela Nzi Nyika?​—Kabeela Buyo (1:41)

• Nkaambo nzi Leza ncaakalengela nyika eeyi mbotu?

Amubale Mukambausi 3:11, akubandika mubuzyo ooyu:

• Ino eeci cimuyiisya nzi kujatikizya Jehova?

4. Makanze aa Jehova taacincide

Amubale Intembauzyo 37:11, 29 alimwi a Isaya 55:11, akubandika mubuzyo ooyu:

• Ino tuzyi buti kuti makanze aa Jehova kujatikizya ndiswe taacincide?

5. Kukomba Jehova kupa kuti buumi bwesu kabukkomanisya

VIDIYO: Ndakazyiba Mpindu Yabuumi (5:03)

• Mbuti ba Terumi mbobakagwasyigwa kwiinda mukwiiya mpindu njobujisi buumi?

Amubale Mukambausi 12:13, akubandika mubuzyo ooyu:

• Mbwaanga Jehova wakatucitila zintu zinji kapati, mbuti mbotukonzya kutondezya kulumba?

MUBUFWAAFWI

Jehova uyanda kuti tukapone kukabe kutamani mubukkale bulondokede aano anyika. Kuti katumukomba amoyo wesu woonse, tulakonzya kuba abuumi bukkomanisya noliba lino.

Ncinzi Ncomwaiya?

• Ino Jehova wakajisi makanze nzi kujatikizya ba Adamu a Eva?

• Ino tuzyi buti kuti makanze aa Leza kujatikizya bantu taacincide?

• Mbuti mbomukonzya kujana lukkomano lwini-lwini mubuumi?

AMUZYIBE ZINJI

Amubone bumboni butondezya kuti muunda wa Edeni wakaliko ncobeni.

“Muunda wa Edeni​—Sena Wakaliko Ncobeni naa Ncaano Buyo?” (Ngazi Yamulindizi, January 1, 2011)

Amubone kaambo ncotukonzya kusyoma kuti nyika inooliko mane kukabe kutamani.

“Sena Nyika Iyoonyonyoonwa?” (Cibalo caaintaneti)

Amulange-lange ncolyaamba Bbaibbele kujatikizya mbomukonzya kukkomana mubuumi.

“Ino Buumi Bujisi Mpindu Nzi?” (Cibalo caaintaneti)

Amubone mwaalumi iwakali kuyeeya kuti wakalijisi zyoonse mbwaakacijana ncaakali kuyandika mubuumi.

Lino Ndijisi Buumi Bulaampindu (3:55)

2. Mbaani ibayoolela a Jesu?

Jesu takaleli alikke pe. Bantu bazwa “kumisyobo yoonse amilaka yoonse amikowa yoonse azisi zyoonse . . . bayooba bami ibayoolela nyika.” (Ciyubunuzyo 5:9, 10) Ino bali bongaye ibayoolela a Kristo? Kuzwa ciindi Jesu naakaboola anyika, Banakristo banji baba basikumutobela. Pele balikke ibali 144,000 mbabaunka kujulu kuyoolela a Jesu. (Amubale Ciyubunuzyo 14:1-4.) Banakristo bambi boonse banooli balelwa ba Bwami anyika.—Intembauzyo 37:29.

Bwami bwa Leza bwakatalika kale kulela. Lino-lino buyoocinca zintu kutegwa buumi munyika bukabote kapati. Atulange-lange zintu zimwi zibotu nzyotukonzya kulangila mubweendelezi bwa Bwami oobu.

1. Mbuti Bwami bwa Leza mbobuyooleta luumuno alimwi abululami anyika?

Jesu, Mwami wa Bwami bwa Leza, uyoobanyonyoona bantu babyaabi alimwi amfwulumende lyankondo ya Amagedoni. (Ciyubunuzyo 16:14, 16) Aciindi eeco, cisyomezyo camu Bbaibbele eeci citobela ciyoozuzikizyigwa cakumaninina: “Kusyeede kaindi kaniini buyo, ibantu babi tabakabi limbi pe.” (Intembauzyo 37:10) Kwiinda mu Bwami, Jesu uyoobona masimpe kuti kuli luumuno alimwi abululami munyika yoonse mbwiizulwa.—Amubale Isaya 11:4.

2. Ino buumi bunooli buti ciindi kuyanda kwa Leza kwaakucitwa anyika?

Mubweendelezi bwa Bwami bwa Leza, “balulami bayookona nyika, alimwi bayookkala alinjiyo lyoonse mane kukabe kutamani.” (Intembauzyo 37:29) Amweezeezye buyo kupona munyika mwalo bantu boonse mobanooluleme, ibamuyanda Jehova alimwi akuyandana! Kunyina uuyoociswa alimwi bantu boonse bayoopona kukabe kutamani.

3. Ncinzi Bwami bwa Leza ncobuyoozuzikizya ciindi bantu babi baakunyonyoonwa?

Bantu babi baakunyonyoonwa, Jesu uyoolela kali Mwami kwamyaka iili 1,000. Kuciindi eeco, walo alimwi aba 144,000 mbayoolela limwi bayoogwasya bantu ibanooli anyika kuti balondoke. Kumamanino aamyaka eeyo, nyika inooli paradaiso yeebeka, iizwide bantu bakkomene ibatobela buyo milawo ya Jehova. Mpoonya Jesu uyoopilusya bweendelezi kuli Bausyi, nkokuti Jehova. Kwiinda lyoonse, ‘zina lya Jehova liyoosalazyigwa.’ (Matayo 6:9, 10) Aciindi eeco, boonse bayoosinizya kuti Jehova Mweendelezi mubotu uubabikkila maano balelwa bakwe. Mpoonya Jehova uyoomunyonyoona Saatani, madaimona alimwi abaabo boonse ibayoosala kuzangila bweendelezi bwakwe. (Ciyubunuzyo 20:7-10) Bukkale bulondokede ibuyooletwa a Bwami bwa Leza buyoozumanana mane kukabe kutamani.

AMWIIYE ZINJI

4. Bwami bwa Leza buyoomanizya bweendelezi bwabantu

‘Muntu weendelezya muntunyina munzila iimuletela mapenzi.’ (Mukambausi 8:9) Kwiinda mu Bwami bwakwe, Jehova uyookumanizya kutalulama ooku.

Amubale Daniele 2:44 alimwi a 2 Batesalonika 1:6-8, akubandika mibuzyo eeyi:

• Ncinzi Jehova a Mwanaakwe Jesu ncobayoocita kumfwulumende zyabantu akuli baabo bazigwasyilizya?

• Mbuti nzyomwaiya kujatikizya Jehova a Jesu mbozimupa kusyoma kuti bayoocita zintu munzila yabululami alimwi akutasalulula?

5. Jesu Mwami mubotu kapati

Mbwaanga Mwami wa Bwami bwa Leza, Jesu uyoobacitila zintu zinji zibotu balelwa bakwe anyika. Atweebelele VIDIYO kutegwa tubone Jesu mbwaakatondezya kale kuti ulayandisya alimwi wakapegwa nguzu a Leza zyakugwasya bantu.

VIDIYO: Jesu Wakatondezya Zintu Nzyobuyoozuzikizya Bwami (1:13)

Naakali anyika, Jesu wakatondezya kale nzyobuyoozuzikizya Bwami. Nzilongezyo nzi akati kazyeezyi zyaambidwe waawa nzyomuyandisya kuyoobona? Amubale magwalo aabikkidwe aamba zilongezyo eezyo.

6. Bwami bwa Leza buyooleta buumi bubotu kumbele

VIDIYO: Citondezyo Cabuumi Bwakumbele Bubotu (4:38)

Amubale Intembauzyo 145:16, akubandika mubuzyo ooyu:

• Mbuti mbomulimvwa kuzyiba kuti Jehova ‘uyookkutya cilenge coonse cipona kwiinda mukucipa ncociyanda’?

MUBUFWAAFWI

Bwami bwa Leza buyakwaazuzikizya makanze aambubo. Buyoosandula nyika kuba paradaiso iizwide bantu babotu ibanookomba buyo Jehova mane kukabe kutamani.

Ncinzi Ncomwaiya?

• Mbuti Bwami bwa Leza mbobuyoolisalazya zina lya Jehova?

• Nkaambo nzi ncotukonzya kusyoma kuti Bwami bwa Leza buyoozizuzikizya zisyomezyo zyamu Bbaibbele?

• Nzintu nzi nzyobuyoozuzikizya Bwami nzyomulangila kapati?

AMUZYIBE ZINJI

Amubone ncoyaamba Amagedoni.

“Ino Nkondo ya Amagedoni Ninzi?” (Cibalo caaintaneti)

Amulange-lange zintu ziyoocitika lyabulelo bwa Jesu bwamyaka iili 1,000 alimwi akumamanino aambubo.

“Ino Ncinzi Ciyakucitika Mubuzuba Bwalubeta?” (Ngazi Yamulindizi, October 1, 2012)

Amubone mikwasyi mboikonzya kweezyeezya kuba antoomwe mu Paradaiso.

Amweezyeezye Kuti Muli mu Paradaiso (1:50)

Mucibalo cakuti “Ndakajisi Mibuzyo Minji Kapati Yalo Iyakali Kundikatazya,” amubone sikuzangila mfwulumende mbwaakajana bwiinguzi kumibuzyo iyakali kumukatazya.

“Ibbaibbele Lilakonzya Kubacinca Bantu” (Ngazi Yamulindizi, January 1, 2012)