‘Izina Libotu Ndibotu Kapati Kwiinda Lubono Lunji’

IZINA libotu, naa mpuwo mbotu ilayandika kapati cakuti mumasena amwi ilakwabililwa kwiinda mumulawo. Eeci cilakonzya kubikkilizya akukwabililwa kukujailwa zina (kwiinda mumajwi aalembedwe naa aamwaigwa muli sikapepele naa acipekupeku) alimwi akubejelezyegwa (majwi aambwa kujaya zina). Eeci cituyeezya kasimpi kansiku kakuti: “Izina libotu lyeelede kusalwa kwiinda lubono lunji; kulemekwa nkubotu kapati kwiinda nsiliva angolida.” (Tusimpi 22:1) Ino mbuti mbotukonzya kuba azina libotu akulemekwa abamwi? Nzila zigwasya kapati zilakonzya kujanwa mu Bbaibbele.

Mucikozyanyo, amulange-lange ncolyaamba Bbaibbele mulugwalo lwa Intembauzyo 15. Mukwiingula mubuzyo wakuti: “Ino nguni uukonzya kuba mweenzu mutente lya [Leza]?” sintembauzyo wakalemba kuti: “Nguyooyo . . . uucita zintu ziluleme alimwi iwaamba masimpe mumoyo wakwe. Kunyina nabejelezya muntu . . . , kunyina nacitila mweenzinyina cintu cibi, alimwi kunyina nasampaula beenzinyina. Ulamukaka muntu uuli woonse uusesemya . . . Tacinci mizeezo ikuti wasyomezya, nokuba kuti zintu tiizyamweendela kabotu. . . . Alimwi kunyina natambula cisinkamulomo.” (Intembauzyo 15:1-5) Sena inga tiimwamulemeka muntu uupona kweelana anjiisyo eezyi zibotu kapati?

Bube abumbi ibukonzya kupa kuti muntu kalemekwa nkulicesya. Lugwalo lwa Tusimpi 15:33 lwaamba kuti: “Kulicesya kuletela bulemu.” Amubone kaambo aaka: Bantu balicesya balabona mpobeelede kubelekela mpawo alimwi akubeleka canguzu kucita boobo. Alimwi balilibambilide kulilekelela ikuti naa balubizyila muntu uumwi. (Jakobo 3:2) Bantu balisumpula tabali boobo pe, muciindi caboobo balafwambaana kunyema. Lugwalo lwa Tusimpi 16:18 lwaamba kuti: “Kulisumpula kusololela kulunyonyooko, alimwi muuya wakulitukumuna nguupa kuwa.”

Pele ino mbuti kuti umwi wamubejelezya? Sena mweelede kufwambaana kubweza ntaamu, ambweni ciindi nomunyemede kapati? Amulibuzye kuti, ‘Ikuti naa ndasola kulikwabilila izina lyangu, sena inga capa kuti nditole lubazu mukumwaya makani aakubeja?’ Nokuba kuti zimwi ziindi kutola makani kunkuta cileelela, Bbaibbele litupa lulayo oolu lwabusongo: “Utabindi kutola makani kunkuta.” Muciindi caboobo, “kobandika kaambo kako amweenzinyoko.” (Tusimpi 25:8, 9)a Kucita boobu kulakonzya kumugwasya kutanyonyoona mali aakubbadelela ziyandika kunkuta.

Bbaibbele talili buyo bbuku lyamakani aajatikizya bukombi. Ndibbuku ligwasya kapati mubuumi alimwi lilasyomeka. Boonse aabo ibabelesya busongo bwandilyo balaba abube bupa kuti kabalemekwa alimwi akuba azina libotu.