Ikuyumya Lusyomo Lwesu Mubululami Bwa Leza

“Kuti usyome Jehova, ncencico ncindakuzibisya makani aya.”—TUSIMPI 22:19.

1, 2. (a) Ino nkaambo nzi Bakamboni ba Jehova ncobatondezyela lusyomo muli Jehova? (Tusimpi 22:19) (b) Ncinzi citondezya kuti bantu bamwi beelede kuyumya lusyomo lwabo muli Jehova?

IBANAKRISTO beni-beni balilongezyedwe aluzibo lwini-lwini lwa Jehova alimwi amakanze akwe. “Muzike musyomesi uucenjede” ulabapa ‘cilyo cakumuuya kuciindi ceelede.’ (Matayo 24:45) Iluzibo ndobajana lubapa ntalisyo njumu alo mpobayaamika lusyomo muli Leza. Aboobo Bakamboni ba Jehova mbwiili nkamu batondezya lusyomo lugambya muli Jehova alimwi amubululami bwakwe.

² Nokuba boobo, kulibonya kuti Bakamboni bamwi bayandika kuyumya lusyomo luli boobu. Ciindi aciindi ba Sosaiti balatambula magwalo aamba kutasalalilwa kumwi kujatikizya bupanduluzi ibupegwa mumabbuku aabo. Ikudooneka oku kulakonzya kuba akaambo kakululamika kuteelela kwacitwa naa kubandikwa makani aajatikizya sikubuzya ikapati munzila yakumizeezo.—Amweezyanisye Johane 6:60, 61.

3. Ncinzi cikonzya kucitika nokuba kubabelesi ba Jehova basyomeka, alimwi nkaambo nzi?

³ Nobaba babelesi ba Jehova beni-beni bakubona kululama kwabbuku lya Mukambausi 9:11 ilyaamba kuti: “Acintu cimwi ncimbweni ansi ano nceeci. Teensi basiluno bazunda mukusiyana, teensi basintaze bazunda munkondo, teensi basongo bajana zyakulya, teensi bacenjede bavuba imbono, teensi basimaanu bafwidwa lyazyalo, pe. Bantu boonse buyo balasikilwa ziindi zyalufu azyamapenzi.” Ino aya makani inga asinizya buti kuba amasimpe munzila yakumuuya? Tulakonzya kuti tulibazi Banakristo ibakasungweede kutobela lulayo lwa Bbaibbele, ibakali bayumu kwiiminina kasimpe, ibakali basongo ikutobela njiisyo zya Bbaibbele alimwi ibakali basungu mukuyandaula luzibo lwini-lwini. Pele akaambo kakusikilwa ‘ziindi zyamapenzi,’ bamwi lino balakonzya kabatacicikonzyi pe kucita boobo akaambo kantenda naa kukomena. Balalibuzya kuti naa bayookonzya kunjila munyika ya Leza mpya kabatanafwa.

4, 5. Nkaambo nzi Banakristo ncobanyina kaambo kakubulila lusyomo mubululami bwa Jehova?

⁴ Imunakristo nafwidwa mukaintu naa mulumi, ikusowekelwa oku kulacisa kapati. Kabacili bobile, balakonzya bakamubelekela Jehova kwamyaka iili mbwiibede naaba makumi aamyaka. Oyo uucaala ulizi kuti ilufwu lumana lukwato.a (1 Ba-Korinto 7:39) Lino ikutegwa lusyomo lwakwe lutadyaamininwi, weelede kweendelezya moyo wakwe.—Amweezyanisye Marko 16:8.

⁵ Ncamaanu kaka ikuti naa lufwu lwamuntu ngotukwetene limwi, imuzyali, imwana naa mulongwe wesu Munakristo twalulanga kuti ncoolwe cakutondezya lusyomo mubululami bwa Jehova! Akuciindi notufwidwa tulakonzya kusyoma kuti Jehova uliluleme. Tulakonzya kusyoma kuti boonse bayoobaa buumi butamani—akube kwiinda mukufwutuka naa kwiinda mukubusigwa—bayookondwa. Ikujatikizya Leza sintembauzyo ulaamba: “Ulafumbatula ijanza lyako, ulakutya kusukama kwabaumi boonse. Jehova uliluleme munzila zyakwe zyoonse, ulasalala mumilimo yakwe yoonse. Jehova uli kufwaafwi kuliboonse bamwiita, boonse bamwiita calusinizyo. Bamuyoowa, ulabacitila mbobayanda; ulaswiilila cililo cabo akubafutula.”—Intembauzyo 145:16-19.

Ikulimvwa Kuti Mwakapenga Cabuyo

6, 7. (a) Nkaambo nzi ncobaziteelela bumbi zintu sunu abo Bakamboni banga bakapenga musyule? (b) Nkaambo nzi ncotuteelede kubona kuti Jehova tanaakaluleme akaambo kakuzumizya kupenga kuli boobu?

⁶ Ikaindi Bakamboni bamwi bakapenga akaambo kakukaka kutola lubazu mumilimo imwi yalo iikonzya kuzumizigwa amanjezeezya abo lino. Mucikozyanyo, oku kulakonzya nkokwakali kusala kwabo mumyaka yainda kujatikizya milimo imwi iitali yalumamba. Imukwesu umwi ulakonzya kulimvwa kuti wakali kukonzya kucita mulimo uuli boobu kakunyina kutyola mulawo wa Bunakristo wakutabaa lubazu kujatikizya bweende bwazintu buliko lino.

⁷ Sena kwakali kutalulama kwa Jehova ikumuzumizya kuti apenge akaambo kakukaka kucita cintu ncakonzya kucita lino kakunyinaa cisubulo? Ibunji bwabaabo ibakapenga munzila ezyo tabayeeyi boobo pe. Pele balakondwa akaambo kakuti bakabaa coolwe cakutondezya caantangalala kuti bakali kanzide kwiima nji kukaambo kakali kujatikizya bulelo bwakujulu anyika. (Amweezyanisye Jobu 27:5.) Ino ncinzi cinga capa kuti muntu alisende akaambo kakutobela manjezeezya kuti aime nji kulubazu lwa Jehova? Ikwiinda mukutobela njiisyo zya Bunakristo cakusyomeka kweelanaa mbubakali kuziteelela naa ikutobela ncaamba manjezeezya, bakasinizya kuti baleelela kuba balongwe ba Jehova. Inzya, ncamaanu ikutantamuka nzila iikonzya kunyonganya manjezeezya naa iikonzya kutyompya bamwi. Kumakani aya tulakonzya kuyeeya cikozyanyo ncaakasiya mwaapostolo Paulo.—1 Ba-Korinto 8:12, 13; 10:31-33.

8. Ino nkaambo nzi abo Banakristo bama Juda ibakali kutobela Mulawo ncobakanyina kaambo kakudoonekela bululami bwa Jehova?

⁸ Bama Juda bakali kuyandika kutobela Milawo iili Kkumi ikutegwa bakkomanisye Jehova alimwi aimwi milawo iiyungizidwe yaandeene-andeene iitandila ku 600. Mpoonya mububambe bwa Bunakristo, ikutobela milawo kuli boobu kwiina nokwakacili kuyandika pe kuti babelekele Jehova mbubwenya buyo akuli bama Juda bakumubili. Imilawo yakaleka kubeleka yakali kubikkilizya yeeyo iijatikizya kupalulwa, kutobela Sabata, kutuula zipaizyo zyabanyama alimwi akulesyegwa kwazyakulya zimwi. (1 Ba-Korinto 7:19; 10:25; Ba-Kolose 2:16, 17; Ba-Hebrayo 10:1, 11-14) Bama Juda—ikubikkilizya bamaapostolo—balo bakaba Banakristo teebakacili kuyandika kutobela milawo yalo njobakali kuyandika kutobela nobakacili mucizuminano ca Mulawo. Sena bakatongauka kuti bubambe bwa Leza teebwakaluleme akaambo kakuti musyule wakali kuyanda kuti bacite zintu ezyo izyatakacili kuyandika lino? Peepe, bakakukkomanina kuteelelesya oku kujatikizya makanze aa Jehova.—Incito 16:4, 5.

9. Ncinzi cakacitika kuli Bakamboni bamwi, pele nkaambo nzi ncobateelede kulisenda?

⁹ Kuciindi cesu cino, kwali Bakamboni bamwi ibali bayumuyumu kapati kumakani aazintu nzyobeelede kucita azyeezyo nzyobateelede. Akaambo kaboobo bakapenga kwiinda bamwi. Mpoonya iluzibo luyungizidwe lwakabagwasya kuteelelesya zintu. Pele kunyina nobalisenda akaambo kakucita zintu izyeendelanaa manjezeezya abo musyule nokuba kuti ambweni ikucita boobu kwakayungizya mapenzi. Ncibotu kapati kuti bakatondezya kuti baliyandide kupenga akaambo kakusyomeka kuli Jehova ikuti ‘bacite zintu zyoonse nkaambo ka Makani Mabotu.’ Jehova ulakulongezya kulyaaba kwabunaleza kuli boobo. (1 Ba-Korinto 9:23; Ba-Hebrayo 6:10) Imwaapostolo Petro wakalemba cabusongo ategwa: “Kuti naa wayumina mapenzi wacita ciluleme, nkokuti noocita cibotu kuli Leza.”—1 Pita 2:20, BT.

Ikwiiya Kuzwa Kuli Jona

10, 11. Ino Jona wakatondezya buti kubula lusyomo muli Jehova (a) ciindi naakapegwa mulimo wakuya ku Nineve? (b) ciindi Leza naatakabanyonyoona bana Nineve?

¹⁰ Jona naakaambilwa kuti aye ku Nineve, wakatondezya muuya wakutalumba kujatikizya kumusyoma nkwaakamusyoma Jehova. Nocakamucitikila cintu cimwi ciyoosya calo cakaletelezyegwaa bulenga bwakwe bwakuti atobele, Jona wakaliyeeya, wakaabona mpaakalubizya, wakauzumina mulimo wakucisi cimbi elyo wakacenjezya bana Nineve kujatikizya lunyonyooko lwakali kuboola. Mpoonya kwakacitika cintu catakali kulangilwa: Akaambo kakweempwa kwabana Nineve, Jehova wakakanza kutabanyonyoona.—Jona 1:1–3:10.

¹¹ Ino Jona wakalimvwa buti? Katyompedwe kapati wakatongaukila Leza mumupailo. Ncaakalilizyalizya cini ncakuti: ‘Ndakalizi kuti zintu zilaba boobu. Nkakaambo kaako kukusaanguna ncondatakali kuyandila kuti ndiboole ku Nineve. Lino ikulanga zintu zyoonse zyandicitikila, kubikkilizyaa kuyoowa alimwi amasampu aakumenwaa nswi mpati, alimwi kakuli ndacita kale mulimo mupati wakucenjezya bana Nineve kujatikizya lunyonyooko, izintu zyaba boobu! Ikubeleka kwangu alimwi akupenga zyakali zyabuyo! Inga cabota kuti ndafwa buyo!’—Jona 4:1-3.

12. Ncinzi ncotukonzya kwiiya kuzwa kucintu cakatikila Jona?

¹² Sena cakaleelede kuti atongauke Jona? Sena Jehova tanaakalulama naakabafwida lubomba basimucita zibi bakeempwa? Atwaambe, Jona naakakondwa buya; nkaambo imakumi aazyuulu zyabantu bakalekelelwa kuti batanyonyoonwi! (Jona 4:11) Pele ciimo cakwe cakubula bulemu alimwi cakutongauka cakatondezya kuti kunyina naakali kutondezya lusyomo lwini-lwini mubululami bwa Jehova. Wakali kuliyeeya buyo lwakwe mwini pele bamwi taakali kubabikkila maanu. Atwiiye kuzwa kuli Jona kwiinda mukulibikka mubusena bwabili antoomwe akuyeeya kwesu. Atusyome kuti ikutobela Jehova, ikutobela malailile akwe aapegwa kwiinda mumbunga yakwe alimwi akutobela mizeezo yakwe ncecintu ciluzi kucita. Tulasyoma kuti “bayoowa Leza bayooba kabotu.”—Mukambausi 8:12.

Lino Nceciindi Cakuyumya Lusyomo Lwesu!

13. Ino muunzila nzi toonse motukonzya kuyumya lusyomo lwesu muli Jehova?

¹³ Ikuyumya lusyomo lwesu muli Jehova nenzila yamaanu. (Tusimpi 3:5-8) Aino nzinji nzyotweelede kucita kunze lyakupaila buyo kuti Jehova atugwasye kubaa lusyomo lunji. Ilusyomo lulayuma ikuti kaluyeeme aluzibo lwini-lwini aboobo iciiyo ca Bbaibbele cakulibalila tobeni, ikubala Bbaibbele alimwi amabbuku aapandulula zya Bbaibbele zyeelede kuba akati kazintu nzyotucita buzubaa buzuba. Ikujanika lyoonse kumiswaangano ya Bunakristo cilayandika kapati mbubwenya mbuli kulibambila kabotu alimwi akutola lubazu mbuli mbotukonzya. Ikucicita kuti cibe cilengwa ikwaabila kasimpe ka Bbaibbele kuli bamwi akwiingula kukazya kwabo cabusongo azyalo ziyumya lusyomo lwesu muli Jehova a Jwi lyakwe. Aboobo tulaindila kuyanzana anguwe buzubaa buzuba.

14. Nkaambo nzi bantu ba Leza ncobayooyandika kutondezya lusyomo lwabo muli Jehova kwiinda mbobainingacitide musyule?

¹⁴ Lino-lino, iciindi camapenzi mapati kapati aatanacitikide kubantu ciyootalika kuciindi citayeeyelwi. (Matayo 24:21) Caakutalika, ibabelesi ba Leza bayooyandika kutondezya lusyomo mubululami bwa Jehova alimwi amumalailile aapegwa kwiinda mumbunga yakwe kwiinda mbobainingacitide musyule. Mpoonya munzila yacikozyanyo, bayootobela malailile aa Leza calusyomo aakuti: “Amuboole nubantu bangu, munjile mumaanda aanu aamukati, mulijalile milyango yako, muyube kaindi kaniini, mane bukali bukamane.” (Isaya 26:20) Lino balinjide kale mubusena bukwabilidwe ibujisi mbungano ziinda ku 85,000 mumasi aali 232. Kufwumbwa naa ncinzi acimbi ciyungizidwe mumalailile aakuti “munjile mumaanda aanu aamukati” tulakonzya kusyoma kuti Jehova uyootugwasya kucicita.

15. Ino makani aakusyomeka akankaizigwa buti mumwaka uno wa 1998, alimwi nkaambo nzi ncoceelede?

¹⁵ Ncintu ciyandika kapati lino kuti tuyumye lusyomo lwesu. Ikuti naa katutajisi lusyomo mubakwesu Banakristo, mumbunga ya Jehova alimwi amuli Jehova lwakwe mwini, tatukakonzyi pe kufwutuka. Aboobo cileelela kapati kuti mumwaka uno wa 1998, Bakamboni ba Jehova nyika yoonse mbwiizulwa balayeezyegwa lyoonse-lyoonse amajwi aali mulugwalo lwamwaka lwakuti, “umwi aumwi uulilila izina lya-Mwami [Jehova] ulafutuka”! (Ba-Roma 10:13) Akaambo kaboobo tweelede kuzumanana kusyoma. Ikuti naa twabona kabeela nokaceya kakudooneka mulusyomo olu, tweelede kusolekesya kukalulamika, inzya, sunu.

Ilubeta lwa Jehova Lunooluleme

16. Ncinzi cikonzya kucitika kulusyomo ikuti naa lwatakomezyegwa, alimwi mbuti mbotunga twacikasya kuti citacitiki cili boobu?

¹⁶ Kubbuku lya Ba-Hebrayo 3:14, Ibanakristo bananike balacenjezyegwa kuti: “Twaba beenzinyina Kristo, kuti kusyoma kwesu nkotwakali kujisi kumatalikilo katujatisya mane do kumagolelo.” Aya majwi alabelekaa ku Banakristo ibalaa bulangizi bwaanyika. Ilusyomo lwakusaanguna lulakonzya kumana ikuti naa lwatakomezyegwa. Cilayandika kaka kuti tuzumanane kutobela luzibo lwini-lwini ikutegwa tuyumye ntalisyo aawo aayeeme lusyomo lwesu!

17. Nkaambo nzi ncotunga twaba masimpe kuti kumakani aalufwutuko Jesu uyoobeteka cakululama?

¹⁷ Lino-lino, imasi woonse ayoolangwa-langwa a Kristo kutegwa ‘akaandaanye bantu mbuli mweembeli mbwaandaanya mbelele ampongo.’ (Matayo 25:31-33) Tulakonzya kusyoma kuti Kristo uyoolulama mukubeteka ibeelede kufwutulwa. Jehova wamupa busongo, ibupampu alimwi aziimo zimwi ziyandika kutegwa “[a]kabeteke nyika mubululami.” (Incito 17:30, 31) Ikusyoma kwesu akube mbuli kwa Abrahamu walo wakati: “Ncobeni cilatondwa kulinduwe [Jehova] kucita obo, kujaya uululeme antoomwe asizibi, uululeme acitilwe mbubonya mbuli sizibi. Ncobeni cilatondwa kulinduwe. Sa oyo uubeteka nyika yoonse takooyoocita cakululama?”—Matalikilo 18:25.

18. Nkaambo nzi ncotuteelede kuciindizya kulibilika kujatikizya zintu nzyotutazi lino?

¹⁸ Akaambo kalusyomo lwini-lwini mubululami bwa Jehova, tatweelede kulibilika kujatikizya nkotunga twajana bwiinguzi kumibuzyo mbuli yakuti: ‘Ino bavwanda alimwi abana basyoonto bayoobetekwa buti? Sena imweelwe wabantu ibatanasikilwa amakani mabotu unoocili mupati yaakutalika Amagedoni? Ino mbuti kumakani aabasikasondo? Ino mbuti kumakani aa . . . ?’ Masimpe, tulakonzya katutazi lino mbuli mbwayootubamba twaambo otu Jehova. Nokuba boobo uyootubamba munzila iiluleme alimwi yaluzyalo. Tatweelede kudooneka pe. Atwaambe, tuyoogambwa alimwi akukondwa kubona kuti watubamba munzila imwi njotwatakali kuyeeyela pe.—Amweezyanisye Jobu 42:3; Intembauzyo 78:11-16; 136:4-9; Matayo 15:31; Luka 2:47.

19, 20. (a) Nkaambo nzi ncocitalubide ikubuzya mibuzyo yamaanu? (b) Ino ndilili Jehova nayoopa bwiinguzi buyandika?

¹⁹ Imbunga ya Jehova kunyina noityompeezya mibuzyo mibotu iibuzigwa aciindi ceelede mbuli mbobataminina basikukazya bamwi. (1 Petro 1:10-12) Nokuba boobo, Ibbaibbele litulailila kuti twiitantamuke mibuzyo yabufwuba-fwuba yakuzumbauzya. (Tito 3:9) Ikubuzya mibuzyo yamaanu akuvwuntauzya Jwi lya Leza amabbuku aa Bunakristo ikutegwa tujane bwiinguzi bwamu Magwalo kulakonzya kuyungizya luzibo lwesu lwini-lwini aboobo inga cayumya lusyomo lwesu muli Jehova. Imbunga itobela cikozyanyo ca Jesu. Wakali kulilesya kwiingula mibuzyo kacitanasika ciindi ceelede cakuti yiingulwe. Wakapandulula kuti: “Ndicili amakani manji aakumwaambila, pele tamwaakonzya sunu.” (Johane 16:12) Alimwi wakazumina akuti izintu zimwi kunyina naakazizi kuciindi eco lwakwe mwini.—Matayo 24:36.

²⁰ Pele Jehova ucijisi zinji zyakwaamba. Ncamaanu kaka kuti tulindile, katusyomede kuti ikutondezyegwa kwamakanze akwe kuyoocitwa aciindi ceelede. Tulakonzya kusyoma kuti iciindi ca Jehova iceelede caakusika tuyoobaa busongo buyungizidwe munzila zyakwe. Inzya, tuyoolumbulwa kufwumbwa buyo kuti twabaa lusyomo lwini-lwini muli Jehova alimwi amumbunga njabelesya. Ibbuku lya Tusimpi 14:26 lilatusyomezya kuti: “Mukuyoowa Jehova muntu ulajana inguzu zisyomeka, abana bakwe balijisi ciyubilo.”

Bupanduluzi buyungizidwe

Muyeeya Buti?

◻ Nkaambo nzi ncocitali camaanu ikulekela mizeezo kudyaaminina lusyomo lwesu muli Jehova?

◻ Ncinzi ncotukonzya kwiiya kuzwa kucintu cakacitikila Jona?

◻ Nkaambo nzi ciiyo ca Bbaibbele alimwi akujanika kumiswaangano ncoziyandikila?

[Cifwanikiso icili apeeji 15]

Nociba ciindi notusowekelwa tulakonzya kusyoma kuti Jehova uliluleme

[Zifwanikiso izili apeeji 16]

Sena muli masimpe kuti lusyomo lwenu luli muli Jehova?