Sena Bakamboni ba Jehova Balasyoma Muli Jesu?

CILAYANDIKA KUSYOMA MULI JESU

Miyanda: Kamwaamba baMoono. Cabota kuti twabonana alimwi.

Moono: Andime ndabotelwa.

Miyanda: Ndamuletela mamagazini mapya aa Sinsimuka! alimwi a Ngazi Yamulindizi. Ndisyoma kuti mulakkomana kapati azibalo zili mumamagazini aaya.

Moono: Ndalumba. Alimwi cabota kuti mwasika nkaambo kuli cintu cimwi ncondiyanda kumubuzya.

Miyanda: Taakwe bubi, amubuzye.

Moono: Bumwi buzuba, ndakali kubandika amubelesima. Ndakamwaambila kujatikizya mamagazini ngomwakandipa alimwi ambwaali mabotu. Pele wakandaambila kuti tandeelede kwaabala akaambo kakuti Bakamboni ba Jehova tabasyomi muli Jesu. Sena makani aaya ngamasimpe? Ndakamwaambila mubelesima kuti ndiyoobabuzya ciindi baakundiswaya alimwi.

Miyanda: Ndakkomana kuti mwandibuzya mubuzyo ooyu mbwaanga ndili kamboni wa Jehova, muciindi cakubuzya bamwi. Alimwi buya taakwe nzila imbi mbotu yakuzyiba zintu muntu nzyasyoma kunze lyakubuzya.

Moono: Andime mbondali kuyeeya oobo.

Miyanda: Masimpe ngakuti Bakamboni ba Jehova balasyoma muli Jesu. Alimwi tuzyi kuti kusyoma muli Jesu cilayandika kutegwa muntu afwutulwe.

Moono: Andime mbondali kuyeeya oobo, pele ciindi mubelesima nakaamba kuti tamusyomi muli Jesu, cakandipa kuyanda kuzyiba zinji. Ndisyoma kuti kunyina notwakaabandikide kale makani aaya.

Miyanda: Sena inga ndamutondezya tupango tumwi twamu Bbaibbele tutondezya mbociyandika kusyoma muli Jesu? Ootu ntupango ntobavwula kubelesya Bakamboni ba Jehova mumulimo wabo wakukambauka.

Moono: Cili kabotu.

Miyanda: Inga cabota kutalikila amajwi ngaakaamba Jesu aalembedwe mulugwalo lwa Johane 14:6. Aaya ali akati kamajwi Jesu ngaakaamba ciindi nakali kubandika aumwi wabasikwiiya bakwe. Tubala kuti: “Jesu wakati kulinguwe: ‘Ndime nzila, kasimpe alimwi abuumi. Kunyina uuboola kuli Taata ccita kuti wainda mulindime.’” Kweelana azili mukapango aaka, ino ninzila nzi ilikke motukonzya kusika kuli Taata?

Moono: Nkwiinda muli Jesu.

Miyanda: Masimpe aayo. Bakamboni ba Jehova balaasyoma kapati makani aaya. Pele ngooyu mubuzyo: Kweelana anzyomuzi kujatikizya zyeelelo zya Leza, ciindi muntu napaila, ino weelede kupaila muzina lyani?

Moono: Muzina lya Jesu.

Miyanda: Inzya. Nkakaambo kaako lyoonse nondipaila inga ndilapaila kwiinda muzina lya Jesu. Mbocibede oobu kujatikizya mipailo yoonse ya Bakamboni ba Jehova.

Moono: Cilakkomanisya kuzyiba makani aaya.

Miyanda: Lugwalo lumwi ndotukonzya kulanga-langa ndugwalo lwa Johane 3:16. Kapango aaka kalayandika kapati cakuti kaambwa kuti nkabeela kaniini kajisi Makani Mabotu oonse. Muzeezo aawa ngwakuti, zyoonse izyakalembwa kujatikizya buumi amulimo wa Jesu waanyika ikuti zyalembwa mukapango komwe, aaka nkakapango ikaamba zyoonse. Ambweni inga mwayanda kuti mukabale kapango aaka.

Moono: Taakwe bubi. Kaamba kuti: “Nkaambo Leza wakaiyanda kapati nyika cakuti wakapa Mwanaakwe simuzyalwaalikke, kutegwa muntu uuli woonse uumusyoma atakanyonyoonwi pele akabe abuumi butamani.”

Miyanda: Ndalumba. Sena mulikazyi kabotu kapango aaka?

Moono: Inzya, inga ndilamvwa bantu kabaambaamba, alimwi kanji-kanji kalalembwa azikwankwani.

Miyanda: Nkapango kazyibidwe kapati. Atukalange-lange cakulomya, amubone Jesu ncaakaamba: Wakaamba kuti luyando lwa Leza lupa kuti bantu bacikonzye kukkomana abuumi butamani–pele lilikke kuti twacita nzi?

Moono: Lilikke kuti twaba alusyomo.

Miyanda: Masimpe aayo. Cacigaminina, kuba alusyomo muli simuzyalwaalikke, Jesu Kristo. Alimwi kaambo aaka kakuti lusyomo muli Jesu lusololela kubuumi butamani kalaambwa apeeji 2 yamagazini eeyi njondamuletela. Kujatikizya mulimo wa Ngazi Yamulindizi, yaamba kuti “Ikulwaizya bantu kuba alusyomo muli Jesu Kristo, iwakafwa kutegwa tujane buumi butamani alimwi lino iweendelezya kali Mwami wa Bwami bwa Leza.”

Moono: Eena, anu mumagazini yanu mulajanika bumboni bwakuti Bakamboni ba Jehova balasyoma muli Jesu!

Miyanda: Mwaamba kabotu.

Moono: Pele nkaambo nzi bantu ncobaamba kuti tamusyomi muli Jesu?

Miyanda: Kweelede kuti kuli twaambo tuli mbotubede itupa bantu kwaamba boobo. Zimwi ziindi bantu balaamba oobu akaambo kakuti bakamvwa bantu bamwi kabaamba oobo. Ambweni bamwi bakayiisyigwa twaambo tutali twamasimpe abasololi babo bazikombelo.

Moono: Mebo ndali kuyeeya kuti ambweni ncobaambila boobo bantu nkaambo kakuti mulyaamba kuti muli Bakamboni ba Jehova ikutali Bakamboni ba Jesu.

Miyanda: Akalo aako kalakonzya kuba kaambo akamwi kabapa kwaamba boobo.

Moono: Nkaambo nzi ncomwaamba kapati kujatikizya Jehova?

“NDABAZYIBYA ZYINA LYAKO”

Miyanda: Kaambo kapati nkakuti, tusyoma kuti cilayandika kubelesya zina lya Leza limugeme lyakuti Jehova—mbubwenya mbwaakalibelesya mwanaakwe Jesu. Amubone ncaakaamba Jesu mumupailo ngwaakapaila kuli Usyi kweelana ambokulembedwe mulugwalo lwa Johane 17:26. Sena inga mwabala lugwalo oolu?

Moono: Taakwe bubi. “Ndabazyibya zyina lyako alimwi ndiyoolizyibya ikutegwa luyando ndookali kundiyanda andulo lube muli mbabo alimwi mebo ambabo tukamantane.”

Miyanda: Ndalumba. Amubone kuti Jesu wakaamba kuti wakalizyibya zina lya Leza. Muyeeya kuti nkaambo nzi ncaakacitila boobo?

Moono: Mm. Tandizyi kabotu.

Miyanda: Mbubo, ndiza inga twalanga-langa lugwalo alumwi lukasalazya kaambo aaka. Ndiyeeya kuti inga twabala lugwalo lwa Milimo 2:21. Tubala kuti: “Alimwi woonse wiita zyina lya Jehova uyoofwutulwa.” Ndisyoma kuti mulazuminizya kuti kwiita zina lya Jehova cilayandika kutegwa tukafwutuke, cakutazumbauzya Jesu wakalizyi mbociyandika eeci.

Moono: Inzya.

Miyanda: Aboobo lufwutuko lwabasikwiiya bakwe nkaambo kamwi Jesu ncaakali kuyandila kuti balizyibe akulibelesya zina lya Leza. Aaka nkamwi katwaambo tuyandika tutupa kwaamba kapati kujatikizya Jehova. Tulimvwa kuti cilayandika kulizyibya zina lya Leza limugeme alimwi akugwasya bamwi kuti kabaita zina eelyo.

Moono: Pele nokuba kuti bantu tabalizyi zina lya Leza naa kulibelesya cacigaminina, balimuzyi ngobaamba ciindi nobaamba kuti Leza.

Miyanda: Aayo alakonzya kuba masimpe. Nokuba boobo, kwiinda mukutwaambila zina lyakwe limugeme, Leza wapa kuti cituubile-ubile kuswena kulinguwe.

Moono: Ino ncinzi ncomusola kupandulula?

Miyanda: Amuciyeeyele munzila eeyi: Tiicakali kuyandika kuzyiba zina lya Musa limugeme. Notwalimuzyi buyo kuti mwaalumi wakaandaanya meenda aamu Lwizi Lusalala naa mwaalumi wakatambula Milawo Iili Kkumi. Mbocibede oobo kujatikizya Nowa—nkaambo nzi ncotuyandika kuzyiba zina lyakwe? Notwali kumwiita buyo kuti mwaalumi iwakayaka bwato akufwutula mukwasyi wakwe alimwi abanyama. Awalo Jesu notwalimuzyi buyo kuti nguyooyo wakazwa kujulu akuzootufwida akaambo kazibi zyesu, tee kayi?

Moono: Mbokweelede.

Miyanda: Pele Leza wakasinizya kuti twaazyibe mazina aabantu aaba aabageme. Kuzyiba mazina aabantu aaba kupa kuti zibalo zijatikizya mbabo katuzibona kuba zyamasimpe. Nokuba kuti tatunamubwene Musa, Noah naa Jesu, ikuzyiba buyo mazina aabantu aaba citupa kubabona kuti mbantu beni-beni kulindiswe.

Moono: Tandinaciyeeyede munzila eeyo, pele cilamvwika!

Miyanda: Alimwi aaka nkaambo kamwi Bakamboni ba Jehova ncobalibelesya kapati zina lya Leza limugeme. Tuyanda kuti bantu babe alusyomo muli Jehova Leza akumubona kuti Muntu mwini-mwini akuti balakonzya kuswena kuli nguwe. Aciindi nciconya, tulakankaizya kapati mukuli ngwajisi Jesu kujatikizya lufwutuko lwesu. Ambweni inga twabala lugwalo alumwi lukakankaizya kaambo aaka.

Moono: Inzya.

Miyanda: Twalibalide lugwalo lwa Johane 14:6. Amuyeeye kuti Jesu wakalyaamba kuti ‘Ninzila, kasimpe alimwi abuumi.’ Lino atupiluke buyo asyoonto akubona majwi aali mulugwalo lwa Johane 14:1. Sena inga mwabala ncaakaamba Jesu mumajwi aali kumamanino aakapango aaka?

Moono: Cili kabotu. Tubala kuti: “Amusyome Leza, alimwi amundisyome andime.”

Miyanda: Ndalumba. Sena inga mwaamba kuti makani aajatikizya lusyomo lwini-lwini ngakulisalila? Sena aawa caamba kuti tweelede kusala kusyoma muli Jesu naa kusala kusyoma muli Jehova?

Moono: Peepe. Jesu wakaamba kuti, boonse bobilo balayandika.

Miyanda: Mbombubo oobo. Alimwi ndili masimpe kuti mulakonzya kuzumina kuti tacizulili ikwaamba buyo kuti mulasyoma muli Leza alimwi amuli Jesu. Mubwini, tweelede kupona munzila iitondezya kuti tuli alusyomo mulimbabo.

Moono: Mbombubo oobo.