Jesu Uyaabukomena Kumilimo, Johane Uyaabuceya

Nobamana kusekelela Pobwe Lyakwiindilila mucilimo camu 30 C.E., Jesu abasikwiiya bakwe bazwa mu Jerusalemu. Nokuba boobo tiibapilukila kumaanda aabo ku Galilaya. Baunka muminzi yaku Judaya, nkobaakubbapatizya bantu banji. Johane Mubbapatizi wali kucita mulimo ooyu ngomunya kwamwaka omwe lino, alimwi ucilaantoomwe abasikwiiya bakwe bamwi ambweni mukkuti lya Mulonga wa Jordano.

Jesu lwakwe kunyina ngwabbapatizya, pele basikwiiya bakwe mbababbapatizya kwiinda mukulaililwa anguwe. Aciindi eeci mumulimo wa Jesu, boonse bobilo Jesu alimwi a Johane bayiisya ba Juda ibeempwa kuzibi nzyobakacita kwiinda mukutabamba cizuminano ca Mulawo wa Leza.​—Milimo 19:4.

Pele basikwiiya ba Johane baba amunyono, eelyo batalika kutongooka kujatikizya Jesu ategwa: “Muntu uulya [Jesu] ngookali anguwe . . . awalo ulabbapatizya alimwi boonse baunka kulinguwe.” (Johane 3:26) Nokuba boobo, walo Johane tanaafwa munyono pe. Wakkomana akaambo kakuzwidilila kwa Jesu alimwi uyanda kuti basikwiiya bakwe abalo bakkomane. Johane wabayeezya kuti: “Nywebo nobeni muli bakamboni bangu kuti ndakaamba kuti, ‘Mebo tandili Kristo pe, pele ndakatumwa kumbele lyakwe.’” Wapa cikozyanyo ikupandulula ncaamba kutegwa boonse bamvwisye, ulaamba: “Kufwumbwa ooyo uujisi nabwiinga ngusibwiinga. Pele imulongwe wasibwiinga naimikila munsi lyasibwiinga akumumvwa kaambaula, ulakondwa kapati akaambo kajwi lyakwe. Aboobo kukondwa kwangu ooku kwazulila.”​—Johane 3:28, 29.

Johane, mbubonya bucita mulongwe wasibwiinga, wakakondwa mumyezi yamusyule ciindi naakabatondezya Jesu basikwiiya bakwe. Bamwi akati kabo bakamutobela Jesu, alimwi mukuya kwaciindi bakali kuyoonanikwa amuuya uusalala. Alimwi Johane uyanda kuti basikwiiya bakwe mbajisi lino abalo bamutobele Jesu. Mubwini, makanze ngajisi Johane ngakubamba nzila yakuti Kristo azwidilile mumulimo wakwe. Johane wapandulula kuti: “Walo weelede kuyaabukomena kumilimo, pele mebo ndeelede kuyaabuceya.”​—Johane 3:30.

Johane uumbi, ooyo iwakatalika kutobela Jesu kumatalikilo, kumbele wakalemba kujatikizya nkwaakazwa Jesu alimwi amulimo wakwe mupati mulufwutuko lwabantu, ulaamba: “Ooyo uuzwa kujulu ulaatala lyabamwi boonse. . . . Bausyi balamuyanda Mwana, alimwi zintu zyoonse bazibikka mumaanza aakwe. Ooyo uumusyoma Mwana ulaabuumi butamani; ooyo uutamuswiilili Mwana takabuboni buumi pe, pele bukali bwa Leza bulakkalilila aalinguwe.” (Johane 3:31, 35, 36) Eelo kaka bantu beelede kwaazyiba makani aaya nkaambo mapati!

Kakutanainda ciindi cilamfwu kuzwa ciindi Johane Mubbapatizi naali kubandika kucesyegwa kwamukuli amulimo wakwe, Mwami Heroda wamwaanga. Heroda wabweza akukwata Herodiya, imukaintu wamunyina uutegwa Filipo. Johane naamusinsa caantangalala akaambo kabumambe mbwaacita, Heroda wamubikka muntolongo. Jesu naamvwa makani aakuti Johane waangwa, wazwa mu Judaya abasikwiiya bakwe ‘akuunka ku Galilaya.’​—Matayo 4:12; Marko 1:14.