Cibalo 38
Sena Johane Tanaakajisi Lusyomo?
JOHANE Mubbapatizi, iwakkala muntolongo kwamazuba aatandila kumwaka lino watambula makani aakubusigwa kwamwanaa mukamufwu ku Naini. Pele Johane uyanda kumvwa mulomompande kuli Jesu ncocaamba eci aboobo watuma basikwiiya bakwe bobile kuti bakabuzye ategwa: “Sena nduwe oyo uuza, na tucilangila umbi?”
Oyo ulakonzya kulimvwisya kuti mubuzyo uukankamanisya nkaambo Johane wakaubona muuya uusalala wa Leza kauseluka ali Jesu alimwi wakalimvwa jwi lya Leza lyakuzumizya ciindi naakali kubbapatizya Jesu myaka iitandila kwiibili yainda. Imubuzyo wa Johane ulakonzya kupa kuti bamwi bayeeye kuti lusyomo lwakwe lwaceya. Pele tabusi obo pe. Jesu naataamba zintu zibotu boobu kujatikizya Johane mbuli nzyaamba aciindi awa ikuti Johane naalitalikide kudooneka. Ino ono nkaambo nzi Johane ncabuzya mubuzyo oyu?
Johane ulakonzya kayanda buyo kusalazyilwa kuzwa kuli Jesu kuti Ngo Mesiya. Eci cilakonzya kumuyumya kapati Johane mbwabundaya muntolongo. Pele mubuzyo wa Johane ulajatikizya azimbi. Uyanda kuziba kuti naa kuli umbi uuboola, simulya zina uyoozuzikizya zintu zyoonse zyakasinsimwa kuti ziyoomanzigwa a Mesiya.
Kweelana abusinsimi bwa Bbaibbele mbwazi Johane, Imunanike wa Leza uyakuba mwami alimwi imufwutuli. Pele Johane ucili mwaange nokuba kuti kwainda myezi minji kuzwa ciindi naakabbapatizigwa Jesu. Aboobo kulibonya kuti Johane ubuzya Jesu kuti: ‘Sena nduwe ncobeni uyooleta Bwami bwa Leza munguzu naa kuli umbi, simulyazina walo ngotukonzya kulangila kuti uyoozuzikizya boonse businsimi bubotu bujatikizya bulemu bwa Mesiya?’
Muciindi cakwaambila basikwiiya ba Johane kuti, ‘Aino ndime yooyo uuza!’ Jesu mpoonya aciindi awo wakaponya bantu banji kumalwazi akuzicisa zyoonse. Mpoonya waambila basikwiiya ategwa: “Kamuya mukamwaambila Johane zintu ezi nzomwabona anzomwamvwa, kuti boofu babona, abatyokede beenda, basicinsenda basalazigwa, basinke-matwi bamvwa, abafwide babusigwa, abacete bakambaukilwa Makani Mabotu.”
Munzila imwi, mubuzyo wa Johane ulakonzya kutondezya kuti kuli bulangizi bumwi bwakuti Jesu uyoocita zintu ziinda waawa alimwi akuti ambweni uyoomwaangulula Johane. Nokuba boobo, Jesu waambila Johane kuti atalangili zimbi ziinda amaleele Jesu ngacita.
Nobazwa basikwiiya ba Johane, Jesu walanga kumakamu aabantu akubaambila kuti Johane “mutumwa” wa Jehova wakasinsimwa kubbuku lya Malaki 3:1 alimwi nguwenya ngomusinsimi Eliya wakasinsimwa kubbuku lya Malaki 4:5, 6. Aboobo wamulemeka Johane kuti uleelene a musinsimi uli oonse wakapona kale katana walo kapandulula kuti: “Ncobeni ndamwaambila kuti akati kabo bazyedwe kubanakazi tana kuzyalwa mupati kwiinda Johane Mubapatizi, nekubaboobo oyo muniini wamu-Bwami bwakujulu mupati kwiinda nguwe. Kuzwa kuciindi ca-Johane Mubapatizi kusikila sunu Bwami bwakujulu bwajatwa canguzu.”
Awa Jesu utondezya kuti Johane takabi mu Bwami bwakujulu pe nkaambo imuniini mulimbubo mmupati kwiinda Johane. Johane wamubambila mugwagwa Jesu pele wafwa Kristo katanaanga cizuminano abasikwiiya bakwe kutegwa babe basikulelanyina mu Bwami bwakwe. Nkakaambo kaako Jesu waamba kuti Johane takabi mu Bwami bwakujulu. Pele Johane uyooba mulelwa wa Bwami bwa Leza anyika yaansi. Luka 7:18-30; Matayo 11:2-15.
▪ Nkaambo nzi Johane ncabuzila kuti naa Jesu ngonguwe uuza naa kuli umbi uuelede kulangilwa?
▪ Mbusinsimi nzi Jesu mbwaamba kuti Johane wakabuzuzikizya?
▪ Nkaambo nzi Johane Mubbapatizi ncatakabedi kujulu antoomwe a Jesu?