Amuyandaule Luumuno Lwini-Lwini Akulutobela!
“Uuyandisya kubona buumi, akulijanina mazuba mabotu, . . . aleye kububi, acite kabotu. Ayandaule luumuno akulutobela.”—1 PETRO 3:10, 11.
1. Majwi nzi ngaakaamba Isaya aatakawidi ansi?
“BAYOOFULA mapanga aabo abe maamba aakulimya, amasumo aabo abe zizibyo zyamisamu. Cisi tacikooyoobweza ipanga lyakulwisya cisinyina. Tabakooyooiya inkondo limbi pe.” (Isaya 2:4) Nokuba kuti aya majwi aazizilwe abikkidwe aantangalala kumbalaa maopesi mapati nyika yoonse aa United Nations mu New York City, eyo mbunga yanyika taakwe noyasolela limwi kwaatobela. Pele mbwaanga aaya mmajwi aa Jehova Leza aatawidi aansi, taali abuyo pe.—Isaya 55:10, 11.
2. Ncinzi ciyakucitika “kumamanino aaciindi” kweelana abwaamba Isaya 2:2, 3?
2 Aya majwi aajanika ku Isaya 2:4 ncibeela cabusinsimi bugambya, ibusinsimi bwaluumuno lwini-lwini—alimwi alimukuzuzikizigwa mumazuba ngoona ngotukkede. Obo businsimi nobutana kwaambilizya bulangizi bukondelezya, bwaamba kuti: “Kumamanino aaciindi cilundu caŋanda ya-Jehova ciyooimikwa atala lyazilundu akusumpulwa kwiinda tulundulundu toonse, nkabela masi oonse anooya bukunka kulincico. Misyobo minji inooya bwaamba kuti, Atwiinke, tukaye kucilundu ca-Jehova, kuŋanda ya-Leza wa-Jakobo, elyo uyootwiisya inzila zyakwe, nkabela tuyooenda muziyanza zyakwe. Nkaambo mu-Ziyoni muyoozwa mulao, alyalo ijwi lya-Jehova liyoozwa mu-Jerusalemu.”—Isaya 2:2, 3.
Ibantu Balakonzya Kuba Basiluumuno
3. Ino muntu wali mulwani inga wacinca buti kuba siluumuno?
3 Amuzibe kuti bantu nobatana kutobela nzila yaluumuno, beelede bayiisigwe nzila zya Jehova. Muntu wayiisigwaa Jehova akutobela ncaayiya, ulakonzya kucinca nzila njayeeya akulilemeka, elyo naa wali mulwani, ulasanduka waba siluumuno. Ino oku kucinca kucitika buti? Ilugwalo lwa Ba-Roma 12:2 lwaamba kuti: “Mutakozyanizigwi aziyanza zyaciindi ecino, pele amusanduke kukucitululwa kwamyoyo yanu, kuti mukasimpikile makani ngaayanda Leza, makani mabotu aatambulika aalondokede.” Tucitulula myoyo yesu, naa kwiikulwaizya kunyona kuti itozye nzila imbi kwiinda mukwiizuzya njiisyo alimwi amilawo yamu Jwi lya Leza. Ikwiiya Bbaibbele lyoonse kutugwasya kucinca munzila eyi alimwi kutucita kuti tusimpikile makani ngayanda Jehova, kutegwa tubone kabotu inzila njotweelede kutozya.—Intembauzyo 119:105.
4. Mbuti muntu mbwanga wasama buntu bupya bwaluumuno?
4 Kunze lyakucinca nzila njotuyeeya, kasimpe kamu Bbaibbele kapa kuti tucince mukulilemeka kwesu alimwi aciimo cesu. Katugwasya kutobela ncaakalailila Paulo kuti: “Muleelede kuleka ziyanza zyanu zyaciindi abuntu bwanu bukulukulu bubisizidwe azisusi zibi zyalweeno, muleelede kubukuluka mumuuya wakuyeeya kwanu, akulisamika buntu bupya bulengulwidwe mucinkozya ca-Leza cabululami acabusalali bwinibwini.” (Ba-Efeso 4:22-24) Imuuya wakuyeeya ngwamukati. Oyu muuya ulasanduka akubaa nguzu lwanooyabukomena luyando lwesu lwa Jehova amilawo yakwe, alimwi utupa kuti tube bantu bayanda zintu zyakumuuya alimwi aluumuno.
5. Mbuti “mulao mupya” Jesu ngwaakapa basiciiya bakwe mboubagwasya kubaa luumuno akati kabo?
5 Tulakonzya kubona kuti kucinca oku kulayandika kwiinda mumalailile Jesu ngaakapa kuli basiciiya bakwe naakali ambabo kaciyanda kusika kumamanino ciindi cakwe, wakati: “Ndamupa mulao mupya wakuti, amuyandane umwi amweenzinyina, mbuli mbwendali kumuyanda, anywebo muyandane mbubonya. Kuliceeci bantu boonse bayoomuziba, kuti muli basikwiiya bangu, mwanooyandana umwi amweenzinyina.” (Johane 13:34, 35) Olu luyando ilukozya lwa Kristo, ilwakutaliyanda lukamantanya basiciiya antoomwe mulukamantano lulondokede. (Ba-Kolose 3:14) Balikke bakonzya kubaa luumuno olu ndwasyomezya Leza mbaabo batobela “mulao mupya” oyu. Sena nkobali bantu bacita boobo sunu?
6. Nkaambo nzi Bakamboni ba Jehova ncobali aluumuno kwiindana abantu banyika?
6 Bakamboni ba Jehova balasola kutondezya luyando mukati kabunyina bwamunyika yoonse mbwiizulwa. Nokuba kuti bayobololwa kuzwa kumisyobo yoonse munyika, tabatoli lubazu mumazwanga aanyika nobapenzegwa kapati buti abulelo alimwi abukombi. Boonse mbobakamantene antoomwe balayiisigwa a Jehova alimwi bali muluumuno. (Isaya 54:13) Tabanjili mumazwanga aamapolitikisi alimwi tabatoli lubazu munkondo. Bamwi ibakali balwani kaindi bacileka ciyanza eco. Baba Banakristo bayanda luumuno, ibatobela cikozyanyo ca Kristo Jesu. Alimwi balatobela amoyo omwe lulayo lwa Petro lwakuti: “Uuyandisya kubona buumi, akulijanina mazuba mabotu, alesye lulimi lwakwe kububi, amulomo wakwe utaambi calweeno. Aleye kububi, acite kabotu. Ayandaule luumuno akulutobela.”—1 Petro 3:10, 11; Ba-Efeso 4:3.
Aabo Bayandaula Luumuno
7, 8. Amwaambe zikozyanyo zyabantu bakaleka nkondo kutegwa babe basikuyandaula luumuno lwini-lwini. (Amwaambe bambi mbomuzi.)
7 Mucikozyanyo kuli Rami Oved iwakali umwi wabaabo bankamu yakali kulwana zigwebenga. Wakayiya mbobajaigwa basinkondonyina. Wakalijisi lusyomo kapati mumusyobo wakwe wabuna Israyeli kusikila buzuba naakabona kuti bama rabbi teebakali kumuyanzya kukwata mukaintu ngwaakali kuyanda akaambo buyo kakuti oyo musimbi wakali muna Asia naa wakunze. Wakatalika kuyandaula kasimpe mu Bbaibbele. Mpoona wakaswaangana Bakamboni ba Jehova. Kwiinda mukwiiya Bbaibbele a Bakamboni, wakabona kuti tanaakeelede kulanga musyobo pe. Luyando lwa Bunakristo lwakamupa kuti aleke nkondo alimwi atule zilwanyo akutalika kuyanda bantu bamisyobo yoonse. Wakagambwa kapati naakatambula lugwalo lutontozya ilwakajisi majwi aantalisyo aakuti, “Mukwesu Rami”! Ino nkaambo nzi ncocakali ceenzu eco? Sikulemba wakali Kamboni Muna Palestine. “Ndakali kuyeeya kuti ayo mmalweza,” mbwaakaamba Rami, “nkaambo bana Palestine bakali basinkondoma, eno ngooyu umwi wabo undiita kuti ‘Mukwesu.’” Lino Rami amukaintu wakwe bayandaula luumuno lwini-lwini munzila njayanda Leza.
8 Acimbi cikozyanyo ncica Georg Reuter wakali umwi wabasilumamba bacisi ca Jelemani bakasaala Russia Munkondo ya Nyika ya II. Wakazikutyompwa amapuwo aa Hitler aakuyanda kulela nyika. Naakapiluka kuzwa kunkondo, wakatalika kwiiya Bbaibbele a Bakamboni ba Jehova. Wakalemba kuti: “Lino izintu ndakatalika kuziteelela. Ndakabona kuti Leza tanaakeelede kupegwa mulandu kubulowa boonse bwakatilwa . . . Ndakayiya kuti makanze aakwe ngakuleta paradaiso munyika yoonse mbwiizulwa azileleko zitamani kubantu bamvwa. . . . Hitler wakali kulidunda kuti ‘Bulelo Bwakwe Buyakukkala Cuulu Camyaka,’ pele bwakalela buyo [kwamyaka] ili 12—alimwi takuli nkokunyonyoona! Ngu Kristo, kutali Hitler . . . uukonzya kulela alimwi nguuyakuleta bulelo bwacuulu camyaka anyika.” Lino Georg wakkwanya myaka iili 50 kabeleka mulimo wabwiiminizi bwaluumuno lwini-lwini mubukambausi bwaciindi coonse.
9. Ino zyakacitikila Bakamboni ba Jehova kuciindi ca Nazi ku Jelemani zisinizya buti kuti kunze lyakuba basicamba mbaasiluumuno?
9 Ikusyomeka alimwi akutatola lubazu kwa Bakamboni ba Jehova mu Jelemani kuciindi caba Nazi kwasiya mpuwo yakuti mbantu bayanda Leza iicizumanana kupa bukamboni asunu nokuba kuti kwainda myaka iili 50. Ikabbuku kakazwaa kumwaigwa ino-ino aba Holocaust Memorial Museum baku Washington D.C. mu United States, kaamba kuti: “Bakamboni ba Jehova bakapenzegwa kapati mubulelo bwaba Nazi. . . . Ibusicamba mbobakatondezya bunji bwabo kwiinda mukutazumina [kuleka cikombelo cabo] nobapenzegwa, nobapenga muzilabba zyabuzike, cimwi ciindi akujaigwa, bwakapa kuti balemekwe abantu baciindi eco.” Aka kabbuku kalayungizya kuti: “Ciindi boonse bakali muzilabba nobakaangululwa, Bakamboni ba Jehova bakazumanana amulimo wabo, kabaya bweenda akati kabasikufwutuka, kabaya bubasandula.”
Ikucinca Kwiinda Kapati Aawa
10. (a) Nkucinca kuli buti kupati ikuyandika kutegwa luumuno lwini-lwini luboole? (b) Ino eci cakatondezegwa buti mubbuku lya Daniele?
10 Sena eci caamba kuti Bakamboni ba Jehova basyoma kuti balakonzya kuleta luumuno munyika yoonse kwiinda mukusandula nkamu zyabantu kuti babe bantu basyoma mukutatola lubazu kwa Bunakristo? Peepe! Ikutegwa kube luumuno munyika, kuyandika kucinca kupati kwiinda waawo. Ino oko nkucinca kujatikizya nzi? Ibulelo bwabantu ibuleta lwaandaano, ibudyaaminina alimwi ibwabulwani bweelede kuzwa kuboole bulelo bwa Bwami bwa Leza, Jesu mbwaakayiisya basiciiya bakwe kupailila. (Matayo 6:9, 10) Pele, ino eco ciyoocitika buti? Muciloto icakazwa kuli Leza, musinsimi Daniele wakazibisigwa kuti mumazubaa mamanino, Bwami bwa Leza, mbuli bbwe ‘lyatakakomonwa aamaanza aabantu,’ bwakali kuzoopwayaula cikozyanyo cipati iciiminina bulelo bwabantu ibweendelezya nyika. Mpawo wakaambilizya kuti: “Lino mumazuba aabaami abo, Leza wakujulu uyoobusya bwami butakooyoonyonyoonwa abuniini mane kukabe kutamani, anguzu zyabo tazikooyoosiilwa bantu bambi. Obo bwami buyoopwayaula akumanisya mami aya oonse, alimwi bwalo buyooima nji kukabe kutamani.”—Daniele 2:31-44.
11. Ino Jehova uyakubelesya nzila nzi kutegwa alete kucinca kuyandika kwaluumuno?
11 Nkaambo nzi ncokuyakuba kucinca kuli boobu munyika? Nkaambo Jehova usyomezya kuti uyakugwisya munyika boonse baisofwaazya akwiinyonyoona. (Ciyubunuzyo 11:18) Oku kusanduka kwazintu kuyakucitika munkondo yabululami, Jehova njayakulwana Saatani anyika yakwe mbyaabi. Ku Ciyubunuzyo 16:14, 16 tubala kuti: “Njemyuuya [iisofweede] yabadaimona, ilabeleka malele, alimwi ileendeenda kuya kubami [baleli bazisi] boonse banyika, kuti ibabungike kunkondo yabuzuba bupati bwa-Leza Singuzuzyoonse. Lino bakababungika antoomwe mubusena butegwa muci-Hebrayo Harmagedoni.”
12. Ino Harmagedoni iyooba buti?
12 Ino yalo Harmagedoni iyakuba buti? Taikabi kwiinda mulunyonyooko lwanyukkiliya noluba lumbi buyo lunyonyooko lukonzya kuletwaa muntu. Pele, ninkondo ya Leza iiyakumana nkondo zyabantu zyoonse alimwi akunyonyoona boonse baleta nkondo ezi. Inooli nkondo ya Leza iiyakuleta luumuno lwini-lwini kuli baabo bayanda luumuno. Ee, Harmagedoni ilaboola kweelana amakanze aa Jehova. Taikoomuka pe. Kwiinda mumuuya uusalala, musinsimi wakwe Habakuku wakalemba kuti: “Nkaambo cilengano cilijisi ciindi caco cibikidwe. Cileza bukunkulika, nkabela kumamanino tacikooyoobeja pe. Na camuka, kocilindila, nkaambo ncobeni cilaza, tacikooyoocedelelwa pe.” (Habakuku 2:3) Inga yabaanga yatumukila akaambo kakuyeeya kwabuntu, pele Jehova ulazuzikizya ciindi cakwe. Harmagedoni iyakuboola aciindi Jehova ncabikkide.
13. Ino Leza uyakucita nzi kuli Saatani Diabolosi uuleta zintu zyoonse zibi?
13 Eeyi ntaamu iyakujula mulyango wakuti kube luumuno lwini-lwini! Pele kutegwa kube luumuno lwini-lwini, kuli cimbi cintu ceelede kucitwa—kweelede kugwisya yooyo uleta lwaandaano, lusulano, alimwi amanyongwe. Eeco ncencico Ibbaibbele ncolisinsima kuti ciyakuccilila kucitika—Saatani uuleta nkondo alimwi wisi wababeja, uyakwaangwa. Mwaapostolo Johane wakacibona eci mucilengaano cabusinsimi icilembedwe ku Ciyubunuzyo 20:1-3, wakati: “Lino ndakabona angelo uuza buseluka kujulu, ulijisi cijuzyo camulindi uutagoli. Mujanza lyakwe mwakali inketani impati, nkabela wakajata Simwaaba, eyo inzoka yaciindi iitegwa Diabolosi a-Saatani, akumwaanga myaaka iili cuulu. Wakamusowela mumulindi uutagoli, wakamujalila akusinka kujulu, kuti ateeni limbi masi mane do yamana eyo myaaka iili cuulu.”
14. Ino ntaamu ya Jehova yakuzunda Saatani inga yapandululwa buti?
14 Eeci tacili ciloto buyo pe; ncisyomezyo ca Leza—alimwi Ibbaibbele lyaamba kuti: “Takonzya kubeja Leza.” (Ba-Hebrayo 6:18) Aboobo kwiinda mumusinsimi wakwe Jeremiya, Jehova wakali kukonzya kwaamba kuti: “Ndime Jehova sibuuya uubeteka kabotu akucita cakululama moonse munyika, nkaambo nzenzizyo zintu zindibotela, mbwaamba Jehova.” (Jeremiya 9:24) Jehova ulacita zintu ziluzi alimwi ziluleme alimwi ulakkomana aluumuno ndwayakuleta anyika.
Ibulelo Bwa Mwami Waluumuno
15, 16. (a) Nguni uusalidwe a Jehova kulela mu Bwami? (b) Ino bulelo obo bupandulwidwe buti, alimwi mbaani bayakutola lubazu muli mbubo?
15 Ikutegwa kukabe luumuno kuli boonse balelwaa Bwami bwakwe, Jehova wapa bulelo ku Mwami wini-wini wa Luumuno lwini-lwini, Jesu Kristo mbuli bwakasinsimwa ku Isaya 9:6, 7 kuti: “Iswe twazyalilwa mwana, twapegwa mwana mulombe. Bweendelezi buyookala azifunzi zyakwe. Nkabela izina lyakwe liyooambwa kuti, Sinkuta uugambya, Leza Singuzu, Taateesu Uuteeli, Mwami waluumuno. Bwami bwakwe buyookomenesya, alwalo luumuno talukooyoomana . . . Busungu bwa-Jehova wamakamu mbobuti cite aya makani oonse.” Awalo sintembauzyo wakalemba businsimi bujatikizya bulelo bwa Mesiya bwaluumuno, wakati: “Mumazuba aakwe bululami bukomene, aluumuno luvule ciindi coonse mwezi nuuciliwo.”—Intembauzyo 72:7.
16 Kunze lyanguwe, kuli abambi ibali 144,000 ibanyina ba Kristo bananikidwe amuuya mbayakulela limwi kujulu. Aaba mbebalelinyinaa Kristo mbaakali kwaamba Paulo, naakati: “Leza siluumuno ulamulyataulila Saatani kunsi lyamaulu aanu. Luzyalo lwa-Mwami wesu Jesu Kristo lube anywe. Ameni” (Ba-Roma 16:20) Ee, aaba bayakutola lubazu a Kristo kuzwa kujulu mukuzunda Saatani Diabolosi uuleta nkondo!
17. Ncinzi ncotweelede kucita kutegwa tukakone luumuno lwini-lwini?
17 Imubuzyo uliko lino ngwakuti, Ncinzi ncomweelede kucita kutegwa mukone luumuno lwini-lwini? Luumuno lwini-lwini lulakonzya kuboola kwiinda munzila ya Leza ilikke, elyo kutegwa mulujane mweelede kubweza ntaamu zini-zini. Mweelede musyome mu Mwami wa Luumuno akulanga kuli nguwe. Eeci caamba kuti mweelede kusyoma muli Kristo kuti Ngomufwutuli alimwi Ngomunununi wabantu basizibi. Jesu lwakwe wakaamba majwi aaya aazizilwe, wakati: “Obuya Leza mbwaakayandisya nyika, wakapa Mwanaakwe simuzyalwa alike, kuti umwi umwi uumusyoma atafwidilili, pele abe abuumi ubutamani.” (Johane 3:16) Sena mulilisungwide kusyoma muli Kristo Jesu Mwiiminizi wa Leza wakuleta luumuno lwini-lwini alimwi alufwutuko? Kunyina zina limbi kujulu kunze lyaleeli ilikonzya kuleta luumuno akulusyomezya. (Ba-Filipi 2:8-11) Nkaambo nzi? Nkaambo Jesu Ngo Musale wa Leza. Ngomupati kubatumwa boonse baluumuno ibakaponede munyika. Sena Muyoomuswiilila Jesu akutobela cikozyanyo cakwe?
18. Ncinzi ncotweelede kucita kutobela majwi aa Jesu aalembedwe ku Johane 17:3?
18 Jesu wakaamba kuti “mboobu buumi ubutamani, kuti bazibe nduwe, Leza mwini-mwini, ooli olike, ayooyo ngookatuma, nguwenya Jesu Kristo.” (Johane 17:3) Ecino nceciindi ncomweelede kwiiya luzibo lwini-lwini kwiinda mukujanika lyoonse kumiswaangano ya Bakamboni ba Jehova ku Ŋanda ya Bwami. Eeyi miswaangano iyiisya iyakumugwasya kuzibya beenzinyoko luzibo lwenu alimwi abulangizi bwenu. Anywebo mulaba baiminizi baluumuno lwa Leza. Mulakonzya kubaa luumuno lino kwiinda mukusyoma muli Jehova Leza, mbuli mbokwaambwa ku Isaya 26:3, kuti: “Oyo uupangika moyo wakwe kulinduwe, uyoomukazika muluumuno lwakasimpe, nkaambo kakuti ulakusyoma.” Nguni ngomweelede kusyoma? “Amusyome Jehova lyoonse, nkaambo mu-Mwami Jehova momujenwe indomba iitamani.”—Isaya 26:4.
19, 20. Ncinzi ncobayakujana aabo sunu ibayandaula luumuno akulutobela?
19 Lino amusale buumi butamani munyika ya Leza mpya yaluumuno. Ku Ciyubunuzyo 21:3, 4 Ijwi lya Leza litusyomezya kuti: “Elyo ndakamvwa ijwi ipati lizwa kucuuno cabwami, lyakati, Amubone, bukalo bwa-Leza mpobuli akati kabantu, uzookala akati kabo. Bazooba bantu bakwe, alakwe Leza mwini uzookala kulimbabo, azoobe Leza wabo. Nkabela uyoosindula misozi yoonse kumeso aabo, takukooyooba limbi lufu, nikuba kuomoka nikuba kulila nikuba kuciswa, nkaambo zintu zyakale zyamaninina.” Sena obu tabuli mbobuumi mbomweelede kulombozya kupona kumbele?
20 Elyo amuyeeye cisyomezyo ca Leza. “Babombemyoyo bayoovuba nyika, bayookondwa muluumuno lunji. Langisya uuololokede! Bona mululami! Nkaambo muntu siluumuno nguuyoojana coolwe kumamanino.” (Intembauzyo 37:11, 37) Ibuzuba obo bubotu bwaakuti bwasika, atukaambe akulumba kuti, “Luumuno lwini-lwini lwasika! Alumbwe Jehova Leza sikuleta luumuno lwini-lwini!”
Sena Inga Mwapandulula?
◻ Ncinzi cinga cagwasya muntu kucinca mumizeezo alimwi amunzila njalilemeka?
◻ Mbuti omwe-omwe wa Bakamboni ba Jehova alimwi boonse ikubabikka antoomwe mbobatondezya kuti balaluyanda luumuno lwini-lwini?
◻ Ino Jehova uyakucita nzi abaabo boonse ibaleta lusulano alimwi ankondo?
◻ Ino bulelo bwa Mwami wa Luumuno buyakubacitila nzi bantu?
[Zifwanikiso izili apeeji 9]
Majwi aa Isaya taakwe naazuzikizigwa a UN, pele azuzikizigwa abaabo ibatobela kuyiisya kwa Jehova
[Zifwanikiso izili apeeji 10]
Aaba baalumi bobile bakacinca kutegwa batobele nzila yaluumuno
Rami Oved
Georg Reuter
[Cifwanikiso icili apeeji 11]
Kuyakuba luumuno lwini-lwini mubulelo bwa Mwami wa Luumuno