Sena ‘Mulayanda’ Kugwasya Bamwi?
1 Jesu wakali kubalanganya ncobeni bantu. Iciindi sicinsenda naakalomba lugwasyo kulinguwe, Jesu wakatambika janza lyakwe, wamuguma alimwi akumwaambila mwaalumi ooyu kuti: “Ndayanda, pona.” (Maako 1:40-42, Ci) Ino muunzila nzi motukonzya kwiiya bube mbwaakajisi Jesu kutegwa tugwasye bamwi?
2 Bantu Bajisi Luyandisisyo: Umwi aumwi mumbungano ulijisi lubazu ndwakonzya kugwasya bantu bajisi luyandisisyo kutegwa beelele kuba bakombi ba Jehova. Iciindi bapya nobaboola kumiswaangano, amubaanzye alimwi akubazyiba kabotu. Amujane nzila mbomukonzya kubakulwaizya. Amubalumbaizye kubwiinguzi mbobapa. Amubalumbaizye akaambo kakusoleka nkobali mukucita kutobela njiisyo zya Bbaibbele mubukkale bwabo. Amubagwasye kubona kuti balakonzya kujana balongwe beni-beni mumbungano.
3 Basyomima: Ikapati “aabo baciinga calusyomo,” tweelede kubagwasya munzila zinji. (Gal. 6:10) Ibanji bali mukupenga akaambo kakuciswa-ciswa. Kwiinda mukubakulwaizya eelyo nomwabaswaya, caluyanzano mulakonzya kubayumya-yumya alimwi akubagwasya munzila zimwi ziyandika. Ibambi balakonzya kabajisi mapenzi aamwi mubukkale bwabo. Amubatondezye kuti mulababikkila maano kwiinda mukubaswiilila nobabandika alimwi akubayumya-yumya. (1 Tes. 5:14) Abalo baalu bayandika lugwasyo lwesu mbobayaa buzumanana kuzuzikizya mikuli yabo. (Heb. 13:17) Kwiinda mukutondezya muuya wakulisungula mukugwasya, tulakonzya ‘kubaumbulizya’ basyomima.—Kol. 4:11.
4 Banamukwasyi: Alimwi tweelede kusolekesya kwiiya Jesu kwiinda mukubabikkila maano banamukwasyi. Ikubikkila maano kapati nkobajisi ibazyali kulabakulwaizya ‘kulela bana babo mulwiiyo lwa Mwami amumilazyo yakwe.’ (Ef. 6:4) Bana balakonzya kuzuzikizya lubazu lwabo kwiinda mukufwambaana kulibambila nocakkwana ciindi cakucita ciiyo camukwasyi, kuunka kumiswaangano yambungano naa kuya mumulimo wamumuunda. Bana bapati-pati balakonzya kubabikkila maano bazyali babo mbubwenya mbwaakacita Jesu kwiinda mukubagwasya munzila yaluyando kutegwa bazwidilile mukuliyumya mumapenzi aaboola akaambo kakucembaala. Kwiinda munzila eezi alimwi azimwi, swebo toonse tulakonzya ‘kucita eezyo Leza nzyayanda mumikwasyi yesu.’—1 Timo. 5:4, Ci.
5 Mbotuyaa buzumanana kwiiya Jesu kwiinda mukugwasya bamwi, tulakonzya kugwasya ikucesya mapenzi alimwi akukamantanya mikwasyi yesu alimwi ambungano antoomwe. Icipati kwiinda zyoonse ncakuti, tulaleta bulemu kuli Jehova, “Taateesu siluzyalo.”—2 Kor. 1:3.