CIIYO 47
Sena Mulilibambilide Kubbapatizyigwa?
Mwaiya zintu zinji kujatikizya Jehova kwiinda muciiyo canu ca Bbaibbele. Kweelede kuti mwakacinca bukkale bwanu kutegwa mubelesye zintu nzyomwiiya. Pele, ambweni kuli cintu cimwi icimupa kuwayawaya kulyaaba kuli Jehova akubbapatizyigwa. Mucibalo eeci tulabandika zintu zimwi zikonzya kuba zisinkilizyo alimwi mulaiya mbomukonzya kuzizunda.
1. Ino mweelede kuzyiba makani manji buti kamutanabbapatizyigwa?
Kutegwa mubbapatizyigwe, mweelede ‘kuba aluzyibo lwini-lwini lwakasimpe.’ (1 Timoteyo 2:4) Eeci tacaambi kuti mweelede kuti kamucizyi kwiingula mibuzyo iili yoonse yamu Bbaibbele kutegwa mweelele kubbapatizyigwa. Nobaba Banakristo bakabbapatizyigwa kaindi bacizumanana kwiiya. (Bakolose 1:9, 10) Pele mweelede kuti kamujisi luzyibo lwanjiisyo zyantalisyo zyamu Bbaibbele. Baalu bambungano bayoomugwasya kuzyiba naa mulilujisi luzyibo oolu.
2. Nintaamu nzi nzyomweelede kubweza kamutanabbapatizyigwa?
Kamutanabbapatizyigwa, mweelede ‘kweempwa akusanduka.’ (Amubale Milimo 3:19.) Eeci caamba kuti mulausa akaambo kazibi nzyomwakacita musyule alimwi mulomba Jehova kuti amulekelele. Mulikanzide kukaka kucita cintu cili coonse Leza ncaamba kuti ncibi alimwi mulayanda kupona munzila iimukkomanisya walo. Kuyungizya waawo, mweelede kutalika kujanika kumiswaangano alimwi akukambauka ambungano kamuli sikumwaya uutanabbapatizyigwa.
3. Nkaambo nzi ncomuteelede kulekela kuyoowa kuti kumulesye kubweza ntaamu?
Bamwi balayoowa kuti tabakacikonzyi kucita ceeco ncobakamusyomezya Jehova. Masimpe, zimwi ziindi munoolubizya, nkaambo nobaba bamaalumi abamakaintu baambidwe mu Bbaibbele bakali kulubizya. Alimwi Jehova talangili kuti babelesi bakwe kabacita zintu munzila iilondokede. (Amubale Intembauzyo 103:13, 14.) Pele ulakkomana nomusolekesya kumukkomanisya! Uyoomugwasya. Mubwini, Jehova utusyomezya kuti kunyina ‘ciyootwaandaanya kuluyando lwakwe.’—Amubale Baroma 8:38, 39.
AMWIIYE ZINJI
Amubone mbomukonzya kuzunda zintu zili zyoonse zikonzya kumulesya kubbapatizyigwa kwiinda mukumuzyiba kabotu Jehova akutambula lugwasyo lwakwe.
4. Amumuzyibe kabotu Jehova
Ino mweelede kumuzyiba kusikila aali Jehova kamutanabbapatizyigwa? Mweelede kumuzyiba kabotu kutegwa mucikonzye kumuyanda akumukkomanisya. Atweebelele VIDIYO kutegwa tubone basikwiiya Bbaibbele munyika yoonse mbobakacita oobo. Mpoonya tubandike mubuzyo ooyu.
Muvidiyo, ncinzi cakagwasya bantu bamwi kulibambila lubbapatizyo?
Amubale Baroma 12:2, akubandika mibuzyo eeyi:
Sena muladooneka kujatikizya ceeco ncoliyiisya Bbaibbele naa kuti Bakamboni ba Jehova bayiisya kasimpe?
Kuti kakuli boobo, ncinzi ncomukonzya kucita kujatikizya kudooneka ooko?
5. Amuzizunde zintu zikonzya kumusinkila kuti mubbapatizyigwe
Ciindi notusala kulyaaba kuli Jehova akubbapatizyigwa, toonse tulajana buyumuyumu. Kutegwa mubone cikozyanyo, atweebelele VIDIYO, akubandika mibuzyo iitobela.
Muvidiyo, nzintu zili buti ba Narangerel nzyobakeelede kuzunda kutegwa babelekele Jehova?
Mbuti kuyanda Jehova mbokwabagwasya kuzunda zintu eezyo?
Amubale Tusimpi 29:25 alimwi a 2 Timoteyo 1:7, akubandika mubuzyo ooyu:
Ncinzi citupa busicamba bwakuzunda zintu zikonzya kutulesya kubweza ntaamu?
6. Amusyome lugwasyo lwa Jehova
Jehova uyoomugwasya kuti mumukkomanisye. Atweebelele VIDIYO, akubandika mibuzyo iitobela.
Muvidiyo, ncinzi cakali kupa sikwiiya Bbaibbele kuwayawaya kubbapatizyigwa?
Ncinzi ncaakaiya calo icakamugwasya kuyumya lusyomo lwakwe muli Jehova?
Amubale Isaya 41:10, 13, akubandika mubuzyo ooyu:
Nkaambo nzi ncomusyoma kuti muyoocikonzya kucizuzikizya cikonke ncomwakapanga nomwakali kulyaaba?
7. Amuzumanane kulumba luyando ndwajisi Jehova
Nomuzumanana kuyeeya Jehova mbwamuyanda, muyooba aluyandisisyo lwakumubelekela mane kukabe kutamani. Amubale Intembauzyo 40:5, akubandika mubuzyo ooyu:
Nzilongezyo nzi kuzwa kuli Jehova nzyomulumba kapati?
Musinsimi Jeremiya wakali kumuyanda Jehova alimwi ajwi lyakwe, wakali kulumba kapati kucoolwe cakwiitwa azina lya Jehova. Wakaamba kuti: “Ijwi lyako lyakandipa kusekelela akukondwa mumoyo wangu, nkaambo ndiitwa azina lyako, O Jehova Leza wamakamu.” (Jeremiya 15:16) Amwiingule mibuzyo eeyi:
Nkaambo nzi ncocili coolwe caalubazu kuba umwi wa Bakamboni ba Jehova?
Sena mulayanda kubbapatizyigwa kamuli umwi wa Bakamboni ba Jehova?
Sena kuli cintu cili coonse cimulesya kuti mubbapatizyigwe?
Ncinzi ncomweelede kucita kutegwa musike antaamu eeyi?
BAMWI BAAMBA KUTI: “Tandisyomi naa inga ndacikonzya kuzizuzikizya zyoonse nzyondiyoosyomezya ndaakubbapatizyigwa.”
Sena andinywe mbomulimvwa oobo?
MUBUFWAAFWI
Kwiinda mukugwasyigwa a Jehova, muyoocikonzya kuzunda zintu zimusinkila kuti mubbapatizyigwe.
Ncinzi Ncomwaiya?
Ino mweelede kuba aluzyibo lunji buti lwamu Bbaibbele kutegwa mweelele kubbapatizyigwa?
Ino nkucinca kuli buti nkomweelede kucita kamutanabbapatizyigwa?
Nkaambo nzi ncomuteelede kulekela buyoofwu kumulesya kubbapatizyigwa?
AMUZYIBE ZINJI
Amulange-lange ceelede kumupa kusala kubbapatizyigwa.
“Sena Mulilibambilide Kubbapatizyigwa?” (Ngazi Yamulindizi, March 2020)
Amwiiye mbomukonzya kuzunda zintu zikonzya kumulesya kubbapatizyigwa.
“Ino Ncinzi Cindilesya Kubbapatizyigwa?” (Ngazi Yamulindizi, March 2019)
Amubone mwaalumi umwi mbwaakacikonzya kuzunda zintu zyakali kumulesya kubbapatizyigwa.
Kumatalikilo, ba Ataa bakali kuwayawaya kubbapatizyigwa. Amubone cakapa kuti basinizye akubweza ntaamu eeyi iiyandika kapati.