Jehova Amuyeeye Kumpuwo Yanu Mbotu

“Kondiyeeya, O Leza wangu, nkaambo kamakani aya. Kondiyeeya O Leza wangu. Kondicitila bubotu.”—NEHEMIYA 13:22, 31.

1. Ncinzi cigwasya balyaabide kuli Leza ikulijanina mpuwo mbotu kuli Jehova?

IBABELESI ba Jehova balilujisi loonse lugwasyo luyandika kuti balijanine mpuwo mbotu kulinguwe. Nkaambo nzi? Nkaambo baliyanzene kapati a Leza mbobali basimbunga yakwe yaansi. Wabatondezya kuyanda kwakwe, akubapa bupampu bwakumuuya kwiinda mumuuya wakwe uusalala. (Intembauzyo 51:11; 119:105; 1 Ba-Korinto 2:10-13) Akaambo kaciimo cilibedelede ncobabede, Jehova muluyando ulababeteka babelesi bakwe kumicito yabo alimwi azeezyo nzyobakonzya kucita munguzu zyakwe alimwi amulugwasyo lwamuuya uusalala.

2. (a) Muunzila nzi Nehemiya mwaakalijanina mpuwo mbotu kuli Leza? (b) Ninkombelezyo nzi Nehemiya njaakabelesya kumanizya bbuku lya Bbaibbele ililaa zina lyakwe?

² Umwi muntu iwakalijanina mpuwo mbotu kuli Leza ngu Nehemiya, sikukutaukila Mwami Aritasasta (Longimano) wa Persia. (Nehemiya 2:1) Nehemiya wakazooba mweendelezi waba Juda akuyakulula bwaanda bwa Jerusalemu nokuba basinkondonyina alimwi antenda. Busungu bwakwe mukukomba kwakasimpe bwakamupa kuti abone kuti Mulawo wa Leza watobelwa alimwi akubalanganya bantu badyaamininwa. (Nehemiya 5:14-19) Nehemiya wakakulwaizya ba Levi kuti kabalisalazya lyoonse, balindilile zitendele, akulemeka buzuba bwa Sabata. Aboobo wakali kukonzya kupaila kuti: “Kondiyeeya, O Leza wangu, nkaambo kamakani aya. Kondifwida luse muluzyalo lwako lupati.” Aboobo akali kweelela imajwi ngaakabelesya Nehemiya kumanizya bbuku eli kwiinda mulugwasyo lwamuuya uusalala aakuti: “Kondiyeeya O Leza wangu. Kondicitila [Kondiyeeyela, NW] bubotu.”—Nehemiya 13:22, 31.

3. (a) Mbuti mbomunga mwapandulula muntu uucita zibotu? (b) Ikuyeeya nzila zya Nehemiya inga kwatupa kulibuzya mibuzyo nzi?

³ Imuntu uucita bubotu mmubotu alimwi ulacita micito iiluleme yalo iigwasya bambi. Mbombuboobu mbwaakabede Nehemiya. Wakali kumuyoowa cakumukomba Leza alimwi wakali musungu kubukombi bwakwe bwini-bwini. Kunze lyaboobo wakali kulumba coolwe ncaakajisi cakucita mulimo wa Leza alimwi wakalijanina mpuwo mbotu kuli Jehova. Ikuyeeya nzila zyakwe kulakonzya loko kutupa kulibuzya kuti, ‘Ino milimo njenditumidwe a Leza ndiilanga buti? Sena ndilijanina mpuwo ili buti kuli Jehova Leza alimwi a Jesu Kristo?’

Luzibo Lutupa Kubetekwa

4. Mmukuli nzi Jesu ngwaakapa basikumutobela, alimwi ncinzi aabo ‘bakeelede buumi butamani’ ncobakacita?

⁴ Jesu wakalailila basikumutobela kuti: “Kamuya mukabaiisye bantu bamisyobo yoonse, akubabapatizya . . . , alimwi amubaiisye kuti bajatisye makani oonse ngendakamulailila.” (Matayo 28:19, 20) Bantu bakeelede kuba basiciiya kwiinda mukuyiisyigwa. Aabo bakayiisyigwa boobo alimwi ‘ibakaelela buumi butamani’ bakali kunoozoobbapatizigwa mbuli mbwaakacita Jesu. (Incito 13:48; Marko 1:9-11) Iluyando lwakucita zintu zyoonse nzyaakabalailila lwakali kunoozoozwa mumoyo. Bakali kunoozoosika aciimo cakulyaaba kwiinda mukwiiya akubelesya luzibo lwini-lwini lwa Jwi lya Leza.—Johane 17:3.

5, 6. Mbuti mbotweelede kuteelela Jakobo 4:17? Amubukozyanisye bupanduluzi oobu.

⁵ Kuti luzibo lwesu lwamu Magwalo kaluli lunji, ayalo intalisyo yalusyomo lwesu ilaya ambele. Aciindi nciconya eco, izintu nzyotweelede kubetekwa kuli Leza ziyakuyungizigwa. Kuli Jakobo 4:17 kulembedwe kuti: “Lino oyo uuzi kucita kabotu, nekubaboobo taciti, wabisya.” Aaka kaambo kaboneka kuti kakali kakumanizya makani siciiya Jakobo ngaakazwide akwaamba aakulidunda muciindi cakuyaama ali Leza cakumaninina. Kuti muntu kazi kuti kunyina cintu cini-cini ncanga wakonzya kakutakwe kugwasyigwa a Jehova pele tayaami nguwe, wabisya oyo. Pesi majwi aa Jakobo alakonzya kubelesyegwa akukwaamba cibi cakutacita ceelede. Mbuli mucikozyanyo Jesu ncaakaamba icambelele ampongo, zyalo mpongo zilasinswa akaambo kakutagwasya babunyina ba Kristo, kutali akaambo kamicito mibi.—Matayo 25:41-46.

⁶ Umwi mwaalumi ngobakali kuyiisya Bbaibbele Bakamboni ba Jehova wakali kweenkeenka kuyaambele munzila yakumuuya, ambweni nkaambo kakutaleka kufweba, nokuba kuti wakalizi kuti uleelede kuleka. Umwi mwaalu wakamulomba kuti abale Jakobo 4:17. Amane kupandulula caamba lugwalo olo, mwaalu oyo wakati: “Nokuba kuti tamubbapatizidwe, muyakubetekwa mukusala kwenu alimwi mulandu woonse uuzwa mumo nguwenu nobeni.” Mucoolwe, mwaalumi oyo wakazumina, wakaleka kufweba, mpoona wazooelela akubbapatizigwa ikutondezya kulyaaba kwakwe kuli Jehova Leza.

Tuyoobetekwa Kumulimo Wesu

7. Ninzila nzi imwi yakutondezya kulumba kwesu ku “luzibo lwa Leza”?

⁷ Ncotweelede kuyandisya loko mumoyo wesu nkukkomanisya Mulengi wesu. Imwi nzila yakutondezya kulumba “luzibo lwa-Leza” njakubweza mukuli wakuyiisya bantu kuba basiciiya ba Mwanaakwe, Jesu Kristo. Eeyi kumwi ninzila yakutondezya luyando lwesu kuli Leza alimwi akubeenzuma. (Tusimpi 2:1-5; Matayo 22:35-40) Masimpe, iluzibo ndotumuzi Leza lutupa kubetekwa kulinguwe, alimwi tweelede kulanga bantuma mbuli bantu bakonzya kuba basiciiya.

8. Nkaambo nzi ncotunga twaamba kuti Paulo wakalibwene kuti uyoobetekwa kuli Leza mumulimo wakwe?

⁸ Mwaapostolo Paulo wakalizi kuti kuzumina camoyo woonse akumvwa makani mabotu kuletela lufwutuko, kakuli kwalo kwaakaka kulakonzya kuletela lunyonyooko. (2 Ba-Tesalonika 1:6-8) Aboobo wakalimvwa kuti uyakubetekwa kuli Jehova mumulimo wakwe. Atwaambe kuti Paulo abeenzinyina bakaulemeka kapati mulimo wabo cakuti bakalikasya nokuba kulibonya kuti mulimo ubajanya buyo mali. Kunze lyaboobo, moyo wa Paulo wakamupa kwaamba kuti: “Nkaambo teensi kukambauka Makani Mabotu nkundikankaizizya pe. Nkaambo milimo eyo nsikonzyi kwiikaka. Maawe kulindime nintakambauka Makani Mabotu.”—1 Ba-Korinto 9:11-16.

9. Ncikwelete nzi cipati Banakristo boonse ncobeelede kupilusya?

⁹ Mbotuli babelesi ba Jehova balyaabide, ‘imilimo eyo tatukonzyi kwiikaka pe.’ Mmukuli wesu iwakukambauka mulumbe wa Bwami. Twakauzumina mukuli oyo ciindi notwakalyaaba kuli Leza. (Amweezyanye a Luka 9:23, 24.) Kunze lyaboobo, tujisi cikwelete cakubbadela. Paulo wakaamba kuti: “Ndijisi ceelelo cakucitila boonse, nibaba ba-Helene nibaba bamisyobo imbi, nibaba basongo nibaba bataiyide. Nkaambo kaako mebo ndayandisya kumukambaukila Makani Mabotu anywebo nomuli mu-Roma.” (Ba-Roma 1:14, 15) Paulo wakalaa cikwelete nkaambo wakalizi kuti mulimo wakwe ngwakukambauka kutegwa bantu bamvwe makani mabotu bafwutulwe. (1 Timoteo 1:12-16; 2:3, 4) Aboobo wakasoleka kuyumuna mukuli wakwe akupilusya cikwelete cakwe kubantunyina. Mbotuli Banakristo, aswebo tulaa cikwelete cakupilusya. Alimwi kukambauka Bwami ninzila imwi mpati yakutondezya luyando kuli Leza, ku Mwanaakwe, alimwi akubeenzuma.—Luka 10:25-28.

10. Nkwiinda mukucita nzi bamwi nkobayungizya mulimo wabo?

¹⁰ Imwi nzila yakulijanina mpuwo mbotu kuli Leza njakubelesya nguzu zyesu ikuyungizya mulimo wesu. Nceeci cikozyanyo: Myaka misyoonto eyi yainda, mucisi ca Britain kwanjila bantu bazwa mumasi manji. Kutegwa makani mabotu asisyigwe kuli mbabo, bapainiya bali 800 (bakambausi ba Bwami ibaciindi coonse) alimwi amyaanda ya Bakamboni bambi bali mukwiiya milaka yaandeene-andeene. Eeci caleta busungu bubotu mumulimo. Umwi painiya uuyiisya ci Chainizi wakati: “Taakwe nindakali kuyeeya kuti inga kuli nenjooyiisya Bakambonima mulaka wakwesu, kutegwa bayiisye bambi kasimpe munzila eyi. Cilakkomanisya kaka!” Sena anywebo inga mwauyungizya mulimo wenu munzila iili boobu?

11. Ncinzi cakacitika ciindi umwi Munakristo naakakambauka munzila yakwiizya?

¹¹ Umwi aumwi wesu ulalangilwa kuti inga ulacita kufwumbwa ncakonzya ikufwutula muntu uunyikila. Babelesi ba Jehova abalo balisungweede kubelesya zileleko zyabo mukukambauka kufwumbwa kwajanika ciindi. Umwi Kamboni ino-ino wakakkala kumbalaa mukaintu umwi mubbaasi akumubandisya makani aamu Magwalo. Mukulamwa makani ngaakamvwa, mukaintu oyo wakabuzya mibuzyo minji. Kamboni oyo naakaamba kuti ulaafwi kuseluka mubbaasi, ooyo mukaintu wakamukombelezya kuti akamuswaye, nkaambo wakajisi mibuzyo minji. Kamboni wakazumina. Ino awo ninzi cakatobela? Kwakatalikwa ciiyo ca Bbaibbele, mpoona kwiinde myezi iili cisambomwi, mukaintu oyo wakaba sikumwaya wa Bwami uutabbapatizidwe. Teelyakalampa awalo wakatalika kweendelezya ziiyo zya Bbaibbele zyakwe mwini izili cisambomwi. Ma! Bulalamya bulumbu oobo bwamulimo wa Bwami.

12. Mbuti nguzu zyesu zyamulimo mbozinga zyabelesyegwa kabotu mumulimo wamumuunda?

¹² Inguzu zyesu mubukambausi zilakonzya kubelesyegwa kabotu mumuunda kwiinda mukubelesya mabbuku aali mbuli lya Luzibo Lutola Kubuumi Butamani ilyamapeeji aali 192. Kusikila mumwezi wa April wa 1996, iba Kkomitii Yakulemba mu Kabunga Keendelezya ka Bakamboni ba Jehova bakali bazumizya kale kumwaigwa kwabbuku lya Luzibo mumilaka iili 140, alimwi kusikila kuciindi eco kwakasimbidwe kale makkopi aali 30,500,000 mumilaka iili 111. Eeli bbuku lyakalembelwa kugwasya basikwiiya Bbaibbele kuti bazulizye kwiiya Jwi lya Leza amakanze aakwe kusikila kukulyaaba kuli Jehova akubbapatizigwa. Mbokunga basikwaambilizya Bwami tabanooendelezyi ziiyo zya Bbaibbele kumuntu omwe kwamyaka minji, balakonzya kuyungizya bantu mbobeendelezezya ziiyo naa kuyungizya lubazu ndobatola mumulimo wakuŋanda aŋanda. (Incito 5:42; 20:20, 21) Mbobazi kuti balabetekwa kuli Leza, balatondezya kucenjezya ikuzwa kuli Leza. (Ezekiele 33:7-9) Pele ncobabikkilide kapati maanu nkulemeka Jehova akugwasya bantu banji mbuli mbobanga bakonzya kuti baiye makani mabotu muciindi cisyoonto icicisyeede mubweende obu bwazintu ibubyaabi.

Kulijanina Mpuwo Mbotu Tobanamikwasyi

13. Nkaambo nzi mikwasyi yabunaleza nciyeelede kubaa ciiyo ca Bbaibbele camukwasyi lyoonse?

¹³ Umwi aumwi wamumukwasyi uuzumina Bunakristo bwini-bwini ulabetekwa a Leza eelyo uleelede “[a]ye kumbele kumakani aabupati” alimwi abe “[mu]yumu mulusyomo.” (Ba-Hebrayo 6:1-3; 1 Petro 5:8, 9) Mucikozyanyo, aabo ibali kwiiya bbuku lya Luzibo akubbapatizigwa beelede kulondola luzibo lwabo lwamu Magwalo kwiinda mukujanika kumiswaangano lyoonse alimwi akubala Bbaibbele amabbuku ambi aa Bunakristo. Mikwasyi yabunaleza ayalo yeelede kubaa ciiyo camukwasyi lyoonse, nkaambo eeyo ninzila mpati yakuti “mulangile, mukakatile mulusyomo. Amube baalumi benibeni, muyume.” (1 Ba-Korinto 16:13) Kuti kamuli basilutwe bamukwasyi, ikapati nywebo mulabetekwa kuli Leza kumakani aakubona kuti mukwasyi wenu ulasaninwa kabotu munzila yakumuuya. Mbubonya cilyo cakumubili icilaa busani bunji mbocigwasya kupona kabotu, acalo cakulya cakumuuya cilayandika lyoonse kutegwa nywebo amukwasyi wenu “[mu]kale kabotu mulusyomo,”—Tito 1:13.

14. Ncinzi cakazwa mubumboni bwakacita musimbi muna Israyeli iwakayiisigwa kabotu?

¹⁴ Kuti kakuli bana muŋanda yenu, Leza uyoomuyeeya kumpuwo yanu mbotu kuti mwabapa lwiiyo lwakumuuya ilugwasya. Kuyiisya kuli boobu kuyoobagwasya, mbuli mbukwakacita musimbi muna Israyeli iwakatoledwe bwaange kubana Aramu mumazubaa musinsimi wa Leza Elisha. Wakaba mukutausi wamuka Naamani, silutwe wampi ya Aramu, walo wakalaa cinsenda. Naceya boobo musimbi ooyo, wakaambila namalelo wakwe kuti: “Nicakabota mwami wangu naakali kumunsinsimi uuli ku-Samariya, nkaambo naakamuponya cinsenda cakwe.” Akaambo kabumboni mbwaakacita, Naamani wakaunka ku Israyeli, waakuzumina kutobela malailile aa Elisha aakusamba ziindi zili ciloba mumulonga Jordano, wapona acinsenda cakwe. Kunze lyaboobo, Naamani wakaba mukombi wa Jehova. Ma! Uleelede kuti wakalamwa cini-cini musimbi musyoonto oyo.—2 Bami 5:1-3, 13-19.

15. Nkaambo nzi ncecili cintu cipati kubazyali ikupa bana babo lwiiyo lubotu lwakumuuya? Amukozyanisye.

¹⁵ Tacili cintu cuuba pe ikukomezya bana bayoowa Leza munyika eeyi iitakwe mulawo yalo iili munguzu zya Saatani. (1 Johane 5:19) Pesi kuzwa kubwana bwakwe Timoteo, bakaapanyina ba Loisi alimwi abanyina ba Eunike, bakazwidilila kumuyiisya Magwalo. (2 Timoteo 1:5; 3:14, 15) Ikuyiisya bana benu Bbaibbele, ikubatolelezya kumiswaangano ya Bunakristo lyoonse, alimwi bucebuce ikuyaabubatolelezya mumulimo, ezi zyoonse nzibeela zyanzila yakuyiisya yalo njomuyoobetekwa kuli Leza. Umwi Munakristo mucisi ca Wales, walo lino uulaa myaka yakuzyalwa iibalilwa kuma 80, ulaibaluka kuti kaindi kuma 1920, bawisi bakali kumutolelezya ciindi nobakali kweenda makkilomita aali 10 ikwiinda atala lyamilundu (imusinzo wamakkilomita aali 20 kubalilizya awakupiluka) kukumwaya matrakiti aabandika zya Bbaibbele kuli basiminzi yamucibanda cakabambene acakwabo. Cakulumba ulaamba ati: “Muukuyaabweenda nkweena oko bataata mubakandiyiisyizya kasimpe.”

Baalu Balabetekwa—Ibuti?

16, 17. (a) Mmilimo nzi njobakajisi bamaalumi basimide mu Israyeli yansiku? (b) Kweezyanya ambuzyakabede zintu ku Israyeli yansiku, nkaambo nzi baalu Banakristo sunu ncobayandika kucita milimo imbi kunze lyayeeyo?

¹⁶ Mwaalumi musongo Solomoni wakaamba kuti: “Mutwe uuli amvwi munsini wabulemu, ulajanwa munzila yabululami.” (Tusimpi 16:31) Pele takuli buyo kucembaala kwamubili ikupa kuti mwaalumi alibambile kuyumuna mikuli yamumbungano yabantu ba Leza. Ibaalumi basimide munzila yakumuuya mu Israyeli yansiku bakali babetesi abeendelezi mumbeta amukubamba luumuno, bulondo, abuponi bubotu munzila yakumuuya. (Deuteronomo 16:18-20) Nokuba kuti mbwiibede oobu mbungano ya Bunakristo yeni-yeni, ibaalu bayandika kucita milimo imbi kunze lyayeeyo mbotuyabuswena kumamanino aabwende obu bwazintu. Nkaambo nzi?

¹⁷ Bana Israyeli bakali ‘bantu basale’ balo Leza mbaakafwutwide kuzwa mu Egepita yansiku. Mbokunga bakatambula Mulawo kwiinda mumwiiminizi wabo, Musa, luzubo lwabo lwakazyalilwa muciinga cakalyaabide alimwi bakaliizi milawo ya Jehova. (Deuteronomo 7:6, 11) Pele sunu taakwe umwi wakazyalilwa mucisi cilyaabide boobo, alimwi kweezyanya mbasyoonto aabo bakomenena mumikwasyi yabunaleza kabakazi kabotu kasimpe kamu Magwalo. Ikapati banga bayandika malailile aambokuzuzikizigwa njiisyo zya Magwalo mbabaabo bazwaa kutalika “[kw]eenda mulusinizyo.” (3 Johane 4) Aboobo ulibakkede mukuli uutalikomeneni ibaalu basyomeka ‘mbobajatisya majwi menimeni’ akugwasya bantu ba Jehova!—2 Timoteo 1:13, 14.

18. Ndugwasyo lwamusyobo nzi baalu bambungano ndobeelede kuti kabalibambide kupa, alimwi nkaambo nzi?

¹⁸ Mwana mumvwanda ulakonzya kulileba akuwa ciindi naiya kweenda. Ulalibilika alimwi uyandika kugwasyigwa akukulwaizigwa abazyali. Muntu uulyaabide kuli Jehova awalo ulakonzya kulebwa akuwa munzila yakumuuya. Naba mwaapostolo Paulo wakajana kuti weelede kufwundumana buya kuti acite ciluzi naa cibotu kumeso a Leza. (Ba-Roma 7:21-25) Beembezi babutanga bwa Leza beelede kupa lugwasyo lwamuluyando ku Banakristo ibalubizya pele ibeempwa ncobeni. Ciindi baalu nobakaswaya umwi mukaintu Munakristo iwakalubizizye kapati, walo wakabaambila kaliwo amulumi wakwe uulyaabide ikuti: “Ndilizi mulandigwisya mumbungano!” Pele yakamweenda biya misozi ciindi naakaambilwa kuti ncobayanda baalu nkuziba lugwasyo luyandika kutegwa mukwasyi wakwe ululamikwe munzila yakumuuya. Mbobazi kuti bayoobetekwa, ibaalu abo bakakkomana ikugwasya musyominyina weempwa.—Ba-Hebrayo 13:17.

Amuzumanane Kulijanina Mpuwo Mbotu

19. Mbuti swebo mbotunga twazumanana kulijanina mpuwo mbotu kuli Leza?

¹⁹ Baalu bamumbungano alimwi ababelesi bambi boonse ba Leza beelede kuzumanana kulijanina mpuwo mbotu kuli Jehova. Eeci cilakonzeka kuti twakakatila ku Jwi lya Leza akukucita kuyanda kwakwe. (Tusimpi 3:5, 6; Ba-Roma 12:1, 2, 9) Ikapati tuyanda kubacitila zibotu aabo mbotuli limwi muciinga calusyomo. (Ba-Galatiya 6:10) Pele butebuzi mbupati, kakuli balo babelesi mbasyoonto. (Matayo 9:37, 38) Aboobo atubacitile zibotu bambi kwiinda mukusungwaala kwaambilizya mulumbe wa Bwami. Jehova uyootuyeeya kumpuwo yesu mbotu kuti twazuzikizya kulyaaba kwesu, akucita kuyanda kwakwe, alimwi akusyomeka kukwaambilizya makani mabotu.

20. Ncinzi ncotwiiya kunzila zya Nehemiya?

²⁰ Aboobo atuzumanane kufwundumana kumilimo ya Mwami. (1 Ba-Korinto 15:58) Alimwi inga cagwasya kuti twamuyeeya Nehemiya, walo wakayakulula bwaanda bwa Jerusalemu, akubona kuti Mulawo wa Leza watobelwa, alimwi akusungwaala kukusumpula bukombi bwini-bwini. Wakapaila kuti Jehova Leza amuyeeye akaambo kabubotu mbwaakacitide. Andinywe mulipe mbubwena obu kuli Jehova, alimwi walo amuyeeye kumpuwo yanu mbotu.

Mulaingula Buti?

◻ Ncikozyanyo nzi ncaakapa Nehemiya?

◻ Nkaambo nzi luzibo ncolutupa kubetekwa kuli Leza?

◻ Mbuti mbotunga twalijanina mpuwo mbotu kuli Jehova mumulimo wesu?

◻ Ninzi nciinga yacita mikwasyi kutegwa ilijanine mpuwo mbotu kuli Leza?

◻ Mbuti baalu Banakristo mbobalijanina mpuwo mbotu?

[Zifwanikiso izili apeeji 16]

Mbuli Paulo, aswebo tulakonzya kulijanina mpuwo mbotu kuli Leza iyakwaambilizya Bwami

[Cifwanikiso icili apeeji 17]

Sena bana banu mbayumu mulusyomo mbuli musimbi muna Israyeli wakali amunzi wa Naamani?