Mbomukonzya Kugwasyigwa Kapati Ciindi Nomubala Bbaibbele

Sena kuli nomwakali kuyanda kutalika mulimo umwi mupati, pele mwakalimvwa kuti mulimo ooyo muyumu kapati? Ambweni kutegwa umuubile-ubile, mwakaucita muzibeela zisyoonto-syoonto. Oobo mbocibede caboola kukubala Bbaibbele. Mulakonzya kulibuzya kuti, ‘Ino inga ndatalikila aali?’ Muciiyo eeci, tulalanga-langa zintu nzyomukonzya kucita kutegwa kamukukkomanina kubala akwiiya Bbaibbele.

1. Nkaambo nzi ncotweelede kubala Bbaibbele abuzuba?

Muntu uubala Bbaibbele abuzuba, naa ‘mulawo wa Jehova,’ unookkomene akuzwidilila. (Amubale Intembauzyo 1:1-3.) Nomutalika, amusole kubala kwamaminiti masyoonto abuzuba. Mwanooyabulimvwisya Jwi lya Leza, munookkomana kulibala.

2. Ncinzi ciyoopa kuti mugwasyigwe kapati nomubala Bbaibbele?

Kutegwa mugwasyigwe kapati ciindi nomubala Bbaibbele, mweelede kwiima asyoonto akuyeeya nzyomubala. Aboobo mweelede kulibala Bbaibbele ‘akuzinzibala kuyeeya zili mumo.’ (Joshua 1:8, bupanduluzi buyungizyidwe) Nomubala, amulibuzye kuti: ‘Ino eeci cindiyiisya nzi kujatikizya Jehova? Mbuti mbondikonzya kucibelesya mubuumi bwangu? Mbuti mbondikonzya kubelesya tupango ootu ikugwasya bamwi?’

3. Ndilili nomukonzya kujana ciindi cakubala Bbaibbele?

Sena cilamukatazya kujana ciindi cakubala Bbaibbele? Tobanabunji cilatukatazya. Amusole ‘kucibelesya kabotu ciindi coonse.’ (Baefeso 5:16) Mulakonzya kucita oobo, kwiinda mukuzandula ciindi cigaminide kutegwa kamubala Bbaibbele abuzuba. Bamwi balajana ciindi cakubala Bbaibbele kuseeni. Bamwi basala kubala aciindi cimwi mubuzuba, ambweni ciindi nobalyookezya masyikati. Mpoonya bamwi babala masiku kabatanoona. Ino nywebo inga mwayanda kubala ciindi nzi?

AMWIIYE ZINJI

4. Amwiiye mbomukonzya kukukkomanina kubala Bbaibbele

Inga kacitali cuuba-uba kutalika kubala Bbaibbele. Pele mulakonzya kwiiya kukukkomanina kubala Bbaibbele, mbubwenya mbomukonzya kwiiya kukkomanina cakulya ncomutanalide. Amubale 1 Petro 2:2, akubandika mubuzyo ooyu:

• Ikuti kamulibala Bbaibbele abuzuba, sena muyeeya kuti muyoolikkomanina alimwi akuzumanana kulibala?

Atweebelele VIDIYO kutegwa tubone bamwi mbobakatalika kukukkomanina kubala Bbaibbele. Mpoonya tulabandika mibuzyo iitobela.

VIDIYO: Bakubusi Mbobakonzya Kuyanda Jwi lya Leza (5:33)

• Muvidiyo, mbuyumuyumu nzi bakubusi mbobakazunda?

• Ncinzi cakabagwasya kubala Bbaibbele abuzuba?

• Ncinzi ncobakacita kutegwa kabakukkomanina kapati kubala Bbaibbele?

Zintu zikonzya kumugwasya kutalika kubala Bbaibbele:

• Amusale busanduluzi bwa Bbaibbele ibusyomeka, bwamwaambo wamazuba aano. Amusole Bbaibbele lya Busanduluzi Bwanyika Mpya kuti kaliliko mumwaambo wanu.

• Amusaangune kubala zibeela izimukkomanisya kapati. Kutegwa mubone nzila zigwasya, amubone ccaati yakuti “Amutalike Kubala Bbaibbele.”

• Amuzyibe mpomweendela nomubala. Amubelesye ccaati yakuti “Amubone Mpomweendela Nomubala Bbaibbele” iili mubbuku eeli.

• Amubelesye JW Library^® app. Yalo mulakonzya kwiibelesya kubala naa kuswiilila Bbaibbele lyakalekkoodwa, ikubelesya simati fooni naa cibelesyo cimbi cili boobu kufwumbwa nkomubede.

• Amubelesye cibeela cakuti Makani Aayungizyidwe icili mu Bbaibbele lya Busanduluzi Bwanyika Mpya. Cibeela eeci cilijisi mamaapu, maccaati, alimwi abupanduluzi bwamabala aamu Bbaibbele, izikonzya kumugwasya kukukkomanina kubala Bbaibbele.

5. Amulibambile ciiyo canu ca Bbaibbele

Amubale Intembauzyo 119:34, akubandika mubuzyo ooyu:

• Nkaambo nzi ncociyandika kupaila kamutanatalika kubala Bbaibbele naa kulibambila ciiyo canu ca Bbaibbele?

Mbuti mbomukonzya kugwasyigwa kapati ciindi nomucita ciiyo canu ca Bbaibbele? Ciindi nomulibambila ciiyo cimwi acimwi mubbuku eeli, amusole nzila eezyi zitobela:

1. Amubale mincali iili kumatalikilo aaciiyo.

2. Amubale magwalo akubona mbwaayendelana azili mucibalo.

3. Amweenge twaambo tupati-pati naa bwiinguzi bwamubuzyo umwi aumwi; eeci ciyoomugwasya mwanoobandika ciiyo amwiiyi wanu.

Sena mulizyi?

Bakamboni ba Jehova balabelesya busanduluzi bwama Bbaibbele aaindene-indene. Nokuba boobo, tulalikkomanina kapati Bbaibbele lya Busanduluzi bwa Nyika Mpya bwa Magwalo Aasalala nkaambo lililuzi, talikatazyi kumvwa alimwi libelesya zina lya Leza.—Amubone Cibalo caaintaneti cakuti “Sena Bakamboni ba Jehova Bajisi Bbaibbele Lyabo?”

MUBUFWAAFWI

Kutegwa mugwasyigwe kapati ciindi nomubala Bbaibbele, kamuzandula ciindi cakulibala, kamupaila kutegwa muzimvwisye nzyomubala, alimwi kamulibambila ciiyo canu ca Bbaibbele.

Ncinzi Ncomwaiya?

• Ncinzi ciyoopa kuti mugwasyigwe kapati nomubala Bbaibbele?

• Ndilili nomukonzya kujana ciindi cakubala alimwi akwiiya Bbaibbele?

• Nkaambo nzi ncociyandika kulibambila ciiyo ca Bbaibbele cimwi acimwi?

AMUZYIBE ZINJI

Amulange-lange twaambo tukonzya kupa kuti mugwasyigwe kapati ciindi nomubala Bbaibbele.

“Mbomukonzya Kugwasyigwa Kapati Kwiinda Mukubala Bbaibbele” (Ngazi Yamulindizi No. 1 2017)

Amwiiye nzila zyotatwe zyakubala Bbaibbele.

“Ino Bbaibbele Inga Lyandigwasya Buti?​—Cibeela 1: Kulimvwisya Kabotu Bbaibbele” (Cibalo caaintaneti)

Amubone mbomukonzya kukukkomanina kubala Bbaibbele.

“Ino Bbaibbele Inga Lyandigwasya Buti?​—Cibeela 2: Mbondikonzya Kukukkomanina Kubala Bbaibbele” (Cibalo caaintaneti)

Amwiiye nzila zyakubala Bbaibbele kuzwa kubantu ibalibala kwamyaka minji.

Kucita Ciiyo Canu Nobeni (2:06)