Amuzumanane “Mukucita Kabotu”
1 Mwakacita kabotu nomwakaba mubelesi wa Jehova Leza. Nokuba boobo, ibuyumuyumu mbotulangene abwalo muziindi zikatazya lino tweelede kuzumanana “mukucita kabotu.” (Gal. 6:9) Nokuba kuti eci ciyandika kuzyandamana buya, pele mulakonzya kuzwidilila. Munzila nzi?
2 Amube Amiyeeyo ya Jesu: Mbubwenya mbuli Jesu, mulakonzya kuliyumya ikuti mwazumananaa bulangizi bwa Bwami. (Heb. 12:2, 3) Amusyome kuti Jehova ulamuyanda alimwi uyanda kuti muzwidilile. (2 Pet. 3:9) Amube alusyomo cakumaninina mulinguwe, kamusyomede kuti uyoomugwasya. (1 Kor. 10:13) Amujatisye kulomba Jehova kwiinda mukumukomba kuti amugwasye kukakatila. (Rom. 12:12) Amukondwe abulangizi bwakuti lukakatilo lwanu luyooleta bukkale butambulika kuli Leza. (Rom. 5:3-5) Ikusyomeka kwanu mukubaa “ciyanza ca Kilisito Jesu” kuyoomuletela lukkomano alimwi akukondelezya moyo wa Jehova.—Balo. 15:5, Ci; Tus. 27:11.
3 Amuzumanane Kucita Milimo Mibotu: Amuzibelesye kabotu zintu Jehova nzyaabambila bantu bakwe kutegwa abagwasye kuzumanana kucita milimo mibotu. Amube aacilengwa cibotu cakubala Jwi lya Leza alimwi akwiiya mabbuku apandulula Bbaibbele aaciinga camuzike musyomesi uucenjede. Cakusyomeka amulibambile akujanika kumiswaangano yambungano alimwi akutola lubazu. Kaitanatalika alimwi anoyamana miswaangano ya Bunakristo, amuyanzane kabotu-kabotu abakwesu alimwi abacizi bakumuuya. Amulibikkile mbaakani zikonzyeka zyamumulimo wanu kutegwa mube alubazu lugwasya mumulimo wamumuunda alimwi akusumpula nzila zyanu nzyomubelesya ciindi nomukambauka makani mabotu kubantu.
4 Oobu mbomukonzya kuzumanana kucita milimo mibotu alimwi akukkomana kapati. Kujatikizya makani aaya, imukwesu kucisi ca Italy wakaamba kuti: “Ciindi nolyabbila alimwi nondipiluka kuŋanda ndamana kubeleka buzuba boonse mumulimo wa Jehova, ndilimvwa kukatala alimwi aayo masimpe. Pele ndilikkomene alimwi ndilamulumba Jehova akaambo kakundipa kukondwa nkwatakonzyi kundinyanga muntu uuli woonse.” Mbubonya buyo, amuzumanane kucita milimo mibotu andinywe muyoojana lukkomano lunji.