Amulicesye
1 Mulombe mweembezi wasyoma muli Jehova akumuzunda sikalumamba singuzu. (1 Sam. 17:45-47) Imuntu muvwubi cakukkazika moyo waliyumya mumapenzi. (Job. 1:20-22; 2:9, 10) Mwana a Leza wapa bulemu boonse kuli Wisi mukuyiisya kwakwe. (Joh. 7:15-18; 8:28) Muzitondezyo zyoonse eezi, ikulicesya nkekaambo kapati. Mbubwenya buyo asunu, ikulicesya kulayandika kapati kutegwa tuliyumye mubukkale busiyene-siyene butusikila.—Kol. 3:12.
2 Notukambauka: Mbotuli babelesi Banakristo, cakulicesya tulabaambila makani mabotu bantu basiyene-siyene, ikutali kubabeteka buya akaambo kamusyobo wabo, zilengwa naa bukkale bwankobazwa. (1 Kor. 9:22, 23) Ikuti naa bamwi kabasampaula naa cankazi kabakaka mulumbe wa Bwami, tatupilusyi cibi kucibi, pele cakukkazika moyo tulazumanana kuyandaula baabo ibayanda kuswiilila. (Mt. 10:11, 14) Muciindi cakutondezya bamwi luzibo naa lwiiyo lwesu, tweelede kubagamika ku Jwi lya Leza, katuzi kuti lilijisi nguzu kapati kwiinda majwi oonse ngotukonzya kwaamba. (1 Kor. 2:1-5; Heb. 4:12) Ikwiinda mukwiiya Jesu, tupa bulemu boonse kuli Jehova.—Mk. 10:17, 18.
3 Mumbungano: Alimwi Banakristo beelede ‘kusama myoyo mitete akugwasyanya.’ (1 Pet. 5:5) Ikuti bamwi katubabona kuti mbabotu kwiinda ndiswe, tuyoolangaula nzila zyakubelekela bakwesu muciindi cakulangila kuti batubelekele. (Joh. 13:12-17; Flp. 2:3, 4) Kunyina notuya kulimvwa kuti tulayandika kapati cakunga tatukonzyi kutola lubazu mumilimo mbuli yakusalazya Ŋanda ya Bwami.
4 Kulicesya kulatugwasya ‘kukazikilana moyo akuyandana,’ aboobo kusumpula luumuno alukamantano mumbungano. (Ef. 4:1-3) Kulatugwasya kulibombya kuli baabo babikkidwe kutusololela. (Heb. 13:17) Kutukulwaizya kutambula kufwumbwa lulayo ndotukonzya kupegwa. (Int. 141:5) Alimwi kulicesya kutukulwaizya kusyoma Jehova notulanganya kufwumbwa mukuli ngotukonzya kupegwa mumbungano. (1 Pet. 4:11) Mbubwenya mbuli Davida, tulizi kuti kuzwidilila kuyeeme aalugwasyo lwa Leza ikutali munguzu zyabantu.—1 Sam. 17:37.
5 Kuli Leza: Iciyandika kapati ncakuti, tweelede ‘kulibombya kujanza lya Leza lyanguzu.’ (1 Pet. 5:6) Ikuti naa kwayandika kuliyumya mubukkale bukatazya, tulakonzya kulombozya kulemununwa ikuyooletwa a Bwami. Pele cakulicesya tulakkazika moyo, akulindila Jehova kuti azuzikizye zisyomezyo zyakwe aciindi ncabikkide. (Jak. 5:7-11) Mbubwenya mbocakabede kumuntu uusyomeka Jobu, ncotweelede kubikkila maano kapati ncakuti ‘lyoonse kalilumbwa izina lya Jehova.’—Job. 1:21.
6 Imusinsimi Daniele ‘wakalibombya kubusyu bwa Leza wakwe,’ aboobo Jehova wakamufwida luzyalo alimwi wakamupa mikuli minji yamulimo. (Dan. 10:11, 12) Aswebo mbubonya atulicesye, katuzi kuti “kulibombya akuyoowa Jehova kulaleta buvubi abulemu abuumi.”—Tus. 22:4.