Mbuti Mbotunga Twabagwasya Balumi Abamakaintu Batali Bakamboni?
1 Ibabelesi ba Jehova banji balitwelwe naa kutwala bantu ibabakkomanina bakwesu azicitwa ambungano pele ibatayandi kuba babelesi ba Leza. Imulumi umwi wakazuminizya kuti: “Ikuunka kuŋanda aŋanda cakali cisinkilizyo cipati kulindime.” Ibamwi balakonzya kabajisi ziyanza ziteendelani amagwalo nzyobeelede kuleka naa balakonzya kabalimvwa kuti inga tabacikonzyi kutobela zintu zyeendelezyegwa a Leza zicitwa amweenzinyina wamulukwatano. Ino mbuti mbotunga twabagwasya?
2 Amubabikkile Maanu Cacigaminina: Ikubabikkila maanu bamwi cacigaminina alimwi akuzyiba zintu zibapa kulibilika kulakonzya kujalula nzila yakuti batobele kasimpe kamu Bbaibbele. (Flp. 2:4) Aabo ibatakali kusyoma zisyoma mweenzinyina wamulukwatano bunji bwaziindi baamba kuti icakabagwasya nduyandisisyo lwaluyando ndobakatondezyegwa abamwi. Imulumi wazubululwa musyule wakapandulula kuti: “José, imwaalu mumbungano, wakandibikkila maanu kapati munzila yacigaminina. Ndiyeeya kuti nkukulwaizya kwakwe ikwakandipa kutalika kubikkila maanu kukwiiya.” Aumbi mulumi ulayeeya kuti bakwesu ibakali kumuswaya bakasoleka kubandika kujatikizya nzyaakali kukkomanina. Wakati: “Ndakatalika kubona bukombi [bwamukaintu wangu] munzila yiimpene kapati. Ibeenzinyina bakali bantu basongo kapati ibakali kukonzya kubandika aamakani manji-manji.”—1 Kor. 9:20-23.
3 Amugwasye Anzila Zibeleka: Alimwi banabukwetene batali Bakamboni balakonzya kunjilwa alugwasyo luli loonse ndobacitilwa. (Tus. 3:27; Gal. 6:10) Eelyo mootokala wamulumi umwi watakali Kamboni nowakafwa, Kamboni umwi mwana-mwana wakamugwasya. Ulayeeya ategwa: “Ncaakacita cakandinjila kapati.” Imukwesu aumbi wakabeleka buzuba boonse amulumi wamucizyi watakali Kamboni kamugwasya kuyaka lukwakwa abusena bwakwe. Nobakali kubeleka antoomwe akubandika, bakaba balongwe. Nokwakainda nsondo zyobile, imwaalumi ooyo wakasikila mukwesu akumwaambila kuti: “Lino nceciindi nendeelede kucinca mubuumi. Sena inga wandiyiisya Bbaibbele?” Wakayaambele cakufwambaana alimwi lino ngu Kamboni uubbapatizyidwe.
4 Mbotuzumanana kuyandaula bantu beelede mucilawo cesu, katuujisi kubagwasya aabo ibakwetene abasyomima.—1 Tim. 2:1-4.