Malifalensi Aamu Kabbuku Kamuswaangano Wabuumi Amulimo Wesu
FEBRUARY 4-10
MBONO IZILI MU JWI LYA LEZA | BAROMA 1-3
“Amuzumanane Kwaayiisya Manjezyeezya Aanu”
(Baroma 2:14, 15) Nkaambo lyoonse bantu bamasi ibatajisi mulawo nobacita zintu zyaambwa mumulawo, aaba bantu nokuba kuti tabajisi mulawo, baba ngomulawo beni. 15 Aaba mbambabo ibatondezya kuti injiisyo zyamumulawo zililembedwe mumyoyo yabo, eelyo manjezyeezya aabo naapa bumboni antoomwe ambabo, aboobo mumizeezo yabo beni balapegwa mulandu nokuba kutajaninwa mulandu.
Kuba Amanjezyeezya Mabotu Kuli Leza
Nobaba bantu ibatamuzyi Jehova kanji-kanji balizyi kuti kuli zintu ziluzi azitaluzi. Bbaibbele lyaamba boobu: “Mumizeezo yabo beni balapegwa mulandu nokuba kutajaninwa mulandu.” (Baroma 2:14, 15) Mucikozyanyo, bantu banji balizyi kuti kujaya naa kubba nkubi. Nokuba kuti inga kabatazyi, mubwini inga baswiilila manjezyeezya aabo, ibube mbwaakabapa Jehova bwakuzyiba cibotu acibi. Alimwi inga batobela njiisyo zya Leza, naa kasimpe nkaakatupa Jehova ikatugwasya kusala kabotu mubuumi.
(Baroma 2:15) Aaba mbambabo ibatondezya kuti injiisyo zyamumulawo zililembedwe mumyoyo yabo, eelyo manjezyeezya aabo naapa bumboni antoomwe ambabo, aboobo mumizeezo yabo beni balapegwa mulandu nokuba kutajaninwa mulandu.
Kuba Amanjezyeezya Mabotu Kuli Leza
Bantu bamwi bayeeya kuti kuswiilila manjezyeezya aabo caamba kutobela mbobalimvwa. Bayeeya kuti balakonzya kucita cili coonse ncobayanda kufwumbwa buyo kuti kabalimvwide kabotu kujatikizya ncico. Pele mizeezo yesu tailondokede, alimwi ilakonzya kutupa kucita cintu cilubide. Mbotulimvwa kulakonzya kuba anguzu kapati cakuti kulakonzya kwaajatikizya manjezyeezya eesu. Bbaibbele lyaamba kuti: “Moyo uleena kwiinda cintu cimbi cili coonse alimwi ulapenzya kapati. Ino nguni uukonzya kuuzyiba?” (Jeremiya 17:9) Aboobo, tulakonzya kutalika kuyeeya kuti cintu cimwi cililuzi kakuli taciluzi. Mucikozyanyo, Paulo katanaba Munakristo, wakapenzya bantu ba Leza calunya akusyoma kuti ncaakali kucita cakaliluzi. Kweelana ambwaakali kuzibona zintu, wakali kuyeeya kuti wakajisi manjezyeezya aasalala. Pele mukuya kwaciindi wakaamba kuti: “Ooyo undilingula ngu Jehova.” (1 Bakorinto 4:4; Milimo 23:1; 2 Timoteyo 1:3) Ciindi Paulo naakazyiba Jehova mbwalimvwa kujatikizya ncaakali kucita, wakabona kuti wakali kuyandika kucinca. Cilasalala kuti notutanacita cintu cimwi, tweelede kulibuzya kuti, ‘Ino ncinzi Jehova ncayanda kuti ndicite?’
Ikuti muntu umwi kamumuyanda, inga tamuyandi kumunyemya. Akaambo kakuti tulamuyanda Jehova, tatweelede kucita cintu cili coonse cikonzya kumunyemya. Kuyoowa kunyemya Jehova kweelede kuyuma kapati mulindiswe. Tulacibona eeci mucikozyanyo ca Nehemiya. Wakakaka kubelesya cuuno ncaakajisi cabweendelezi kumupa kuti avwube. Ino nkaambo nzi? Wakapandulula kuti “akaambo kakuyoowa Leza.” (Nehemiya 5:15) Nehemiya tanaakali kuyanda kucita cintu cili coonse icakali kukonzya kumunyemya Jehova. Mbubwenya mbuli Nehemiya, andiswe tulayoowa kumunyemya Jehova kwiinda mukucita cintu cilubide. Tulakonzya kwiiya zintu zimukkomanisya Jehova kwiinda mukubala Bbaibbele.—Amubone Bupanduluzi Buyungizyidwe 6.
Kuyandaula Mbono Zyakumuuya
(Baroma 3:4) Peepe! Pele Leza ngwamasimpe lyoonse, nokuba kuti bantu mbabeji, mbubonya mbokulembedwe kuti: “Kutegwa kuzyibwe kuti yebo uliluleme mumajwi ngokanana akuti ulazunda nobetekwa.”
Twaambo Tugwasya Mubbuku lya Ba-Roma
3:4. Ciindi zyaamba muntu nozikazyanya ancolyaamba Jwi lya Leza, tupa kuti “Leza abe musyomesi” kwiinda mukusyoma mulumbe wamu Bbaibbele alimwi akucita kweelana akuyanda kwa Leza. Kwiinda mukutola lubazu cabusungu mumulimo wakukambauka Bwami alimwi akugwasya bantu kuba basikwiiya, tulakonzya kugwasya bantu kubona kuti Leza ulasyomeka.
(Baroma 3:24, 25) pele Leza muluzyalo lwakwe wakabapa cipego citabbadelwi cakuti babe balulami kwiinda mukubaangununa acinunuzyo ca Kristo Jesu. 25 Leza wakamutuula kali cituuzyo cakumanya zibi akuyanzanisya baabo basyoma mubulowa bwakwe. Wakacita boobo ikutegwa atondezye kuti wakaliluleme, nkaambo Leza wakali kukkazika moyo akulekelela zibi zyakacitika kaindi.
Twaambo Tugwasya Mubbuku lya Ba-Roma
3:24, 25—Ino mbuti ‘cinunuzyo cakabbadelwa a Kristo Jesu’ mbocakali kukonzya kumanya “zibi ezyo izyakacitwa kalekale” cinunuzyo kacitana kubbadelwa? Businsimi bwakusaanguna bujatikizya Mesiya ibwakalembwa kuli Matalikilo 3:15, bwakazuzikizyigwa mu 33 C.E. ciindi Jesu naakajaigwa acisamu cakupenzyezya. (Gal. 3:13, 16) Nokuba boobo, ciindi Jehova naakaamba businsimi oobu, wakali kubona mbuli kuti muulo wacinunuzyo wabbadelwa kale, nkaambo kunyina cikonzya kumukasya kuzuzikizya makanze aakwe. Aboobo kujatikizya cinunuzyo ca Jesu Kristo cakumbele, Jehova wakali kukonzya kulekelela zibi zyabana ba Adamu aabo bakajisi lusyomo mucisyomezyo eeco. Alimwi cinunuzyo cipa kuti aabo bakafwa kabutanatalika Bunakristo bakabusyigwe.—Inc. 24:15.
AMUSUNGWAALE MUMULIMO WAMUMUUNDA
Amukkutile Kwiinda Mukubelesya Njiisyo Zyamu Bbaibbele
Amuzumanane Kuzilanga Munzila Yeelede Zintu
Kutegwa katukkomene mubuumi, tweelede kuzumanana kukulanga munzila yeelede kulezya kwesu alimwi akulezya kwabamwi. Mulugwalo ndwaakalembela bana Roma, mwaapostolo Paulo wakati: “Boonse balibisyide alimwi balalezya kubulemu bwa Leza.” (Baroma 3:23) Tatukonzyi kuzimvwisya cakumaninina zibeela zimwi zyabulemu bwa Jehova. Mucikozyanyo, kaambo kamwi kamasimpe ikalembedwe kulugwalo lwa Matalikilo 1:31 kaamba kuti: “Leza wakabona kuti zintu zyoonse nzyaakalenga, nzibotu kapati.” Kufwumbwa ciindi Jehova ayanda kulanga zintu nzyaakalenga, lyoonse ulakonzya kwaamba kuti “nzibotu kapati.” Kunyina muntu uulya maila uukonzya kwaamba boobu lyoonse. Ikuzyiba kuti tulalezya, nintaamu yakusaanguna iikonzya kutusololela kukukkutila. Nokuba boobo, nzinji zijatikizyidwe. Kutegwa tukkutile mubuumi, zintu tweelede kuzibona mbuli mbwazibona Jehova.
Ibbala lya Chigiriki ilyakasandululwa kuti “cibi” lizwa kubbala ilyaamba “kutasika ambaakani.” (Baroma 3:9) Mucikozyanyo, amweezyeezye muntu umwi uulombozya kuwina cintu cimwi kwiinda mukusika ambaakani. Ujisi masumo otatwe mumaanza. Wawaala sumo lyakusaanguna, mpoonya wainzya. Alimwi wasola kuwaala lyabili, mpoonya wainzya amasentimita aali 30. Lino lyamamanino kabikkilide maano kapati waliwaala sumo akwiinzya buyo asyoonto amasentimita obilo. Kwaceede buyo asyoonto, pele ikuti wainzya, nkokuti wainzya kunyina mbocicitwa.
Toonse tuli mbuli sikuwaala masumo ooyu uutyompedwe. Zimwi ziindi inga “tulainzya ambaakani” citaambiki. Ziindi zimwi inga tulasola pele mbubwenya buyo tulainzya ambaakani. Inga tulacimwa akaambo kakuti inga tulasolekesya canguzu, pele cilaala. Lino, atupiluke kuli sikuwaala masumo.
Kayaabupiluka asyoonto asyoonto, wacimwa akaambo kakuti waliyandide kupegwa bulumbu. Pele cakutayeeyela sikweendelezya cisobano wamwiita mpoonya akumupa bulumbu, kumane wamwaambila kuti: “Ndiyanda kukupa bulumbu oobu akaambo kakuti ndilakuyanda, alimwi ndakubona kuti wasolekesya canguzu.” Sikuwaala masumo wakondwa kapati!
Ncimwi buyo! Muntu uuli woonse uutambula “cipego” kuzwa kuli Leza cabuumi butamani ibulondokede uyoolimvwa munzila njiyona eeyi. (Baroma 6:23) Aboobo, kufwumbwa zintu nzyobanoocita zinooli kabotu, nkaambo kunyina nobayakwaalilwa alimwi kusika ambaakani yeelede. Bayookkutila cakumaninina. Aboobo, ikuti twazumanana kuzilanga munzila eeyi zintu, nkokuti tunookkomene alimwi abaabo ibatuzingulukide.
FEBRUARY 11-17
MBONO IZILI MU JWI LYA LEZA | BAROMA 4-6
“Leza Watutondezya Luyando Lwakwe Mwini”
(Baroma 5:8) Pele Leza watutondezya luyando lwakwe mwini mukuti notwakacili basizibi, Kristo wakatufwida.
(Baroma 5:12) Aboobo mbubonya cibi mbocakanjila munyika kwiinda mumuntu omwe alufwu kwiinda mucibi, eelyo lufwu lwakasikila bantu boonse nkaambo boonse bakabisya—.
Leza Watutondezya Luyando Lwakwe Mwini
Paulo naakaamba makani aya, wakatalika akaambo aaka: “Mbubonya cibi mbocakanjila munyika kwiinda mumuntu omwe alufwu kwiinda mucibi, eelyo lufwu lwakasikila bantu boonse nkaambo boonse bakabisya.” (Lom. 5:12) Tweelede kucizyiba eeci akaambo kakuti Leza wakalijisi zyintu zyakalembedwe zitondezya buumi bwamuntu mbobwakatalika. Jehova wakalenga bantu bobilo, Adamu a Eva. Mulengi wesu ulilondokede abalo bazyali besu bakusaanguna bakalilondokede. Leza wakabapa mulawo ngobakeelede kutobela akuti naa batautobela mulawo ooyo bakeelede kufwa. (Matl. 2:17) Nokuba boobo, tiibakautobela mulawo ngwaakabapa Leza, bakamubisizya alimwi bakamukaka kuti nguupa Milawo alimwi ngo Mupatikampatila.—Dt. 32:4, 5.
(Baroma 5:13, 14) Nkaambo cibi cakaliko munyika kautanasika Mulawo, pele kunyina muntu uupegwa mulandu wacibi ikuti kakutakwe mulawo. 14 Nokuba boobo, lufwu lwakali kweendelezya mbuli mwami kuzwa kuli Adamu kusikila kuli Musa alimwi akuli baabo batakabisya kwiinda mukusotoka mulawo mbuli Adamu, ooyo uukozyenye ayooyo wakali kulangilwa.
Leza Watutondezya Luyando Lwakwe Mwini
Adamu naakazyala bana wakali sizibi kale, aboobo bana bakwe boonse bakakona cibi. Nokuba boobo, tiibakasotoka mulawo wa Leza acaali mbuli mbwaakacita Adamu, alimwi kunyina mulawo ngobakapedwe kale. (Matl. 2:17) Pele masimpe ngakuti, bana ba Adamu bakakona cibi. Aboobo, cibi alufwu zyakazumanana kusikila Leza naakapa bana Israyeli mulawo, walo wakatondezya caantangalala kuti bakali basizibi. (Amubale Baloma 5:13, 14.) Nguzu zyacibi ncotwakakona zilakonzya kukozyanisyigwa kumalwazi aamwi ngotukonzya kukona kubazyali besu. Nokuba kuti bana bamwi mumukwasyi balakonzya kukona cilwazi kubazyali babo, pele bana bamwi mumukwasyi balakonzya kupona kabatabujisi bulwazi oobo. Pele oobo tabusyi mbocibede kujatikizya cibi. Toonse twakakona cibi kuli Adamu alimwi akaambo kaceeci, ncotufwida. Sena penzi eeli kuli noliyakumana?
(Baroma 5:18) Aboobo mbubonya bantu bamisyobo yoonse mbobakasinganizyigwa kwiinda mucibi comwe, mbubonya buyo kwiinda mukucita cintu ciluleme comwe bantu bamisyobo yoonse baambwa kuti baliluleme akweelela kuba abuumi.
(Baroma 5:21) Amakanze nzi? Ikutegwa mbubonya cibi mbocakeendelezya mbuli mwami antoomwe alufwu, mbubonya buyo alwalo luzyalo lwa Leza lweendelezye mbuli mwami kwiinda mubululami kutegwa kube buumi butamani kwiinda muli Jesu Kristo Mwami wesu.
Leza Watutondezya Luyando Lwakwe Mwini
Ino mabala aaci Giliki asanduludwe kuti “bantu baambwe kuti baliluleme” apandulula nzi? Musanduluzi wa Bbaibbele umwi wakalemba kuti: “Mabala aaya ajatikizya makani aalubeta aamaambilambali. Aamba kucinca cilongwe muntu ncajisi a Leza kutali kucinca mbwabede . . . Maambilambali aaya atondezya kuti Leza uli mbuli mubetesi wasala kulekelela muntu wabisya, iwaletwa munkuta ya Leza yacikozyanyo akaambo kakutalulama. Pele Leza wamulekelela muntu ooyo.”
Ino kulekelela muntu uutaluleme nkwacita ‘mubetesi uululeme wanyika yoonse’ kuyeeme anzi? (Matl. 18:25) Cakusaanguna ncaakacita Leza, nkutuma Mwanaakwe simuzyalwa alikke kuti aboole anyika. Jesu wakacita kuyanda kwa Bausyi cakulondoka nokuba kuti wakali kusunkwa, kusampaulwa akuumwa. Wakazumanana kusyomeka kusikila naakafwa acisamu cakupenzezya. (Heb. 2:10) Kwiinda mukwaaba buumi bwakwe bulondokede, Jesu wakapa cituuzyo cakali kukonzya kunununa bana ba Adamu kuzwa kucibi alufwu.—Mt. 20:28; Lom. 5:6-8.
Kuyandaula Mbono Zyakumuuya
(Baroma 6:3-5) Naa sena tamuzyi kuti swebo toonse notwakabbapatizyigwa muli Kristo Jesu twakabbapatizyigwa mulufwu lwakwe? 4 Aboobo twakazikkwa anguwe kwiinda mulubbapatizyo lwesu mulufwu lwakwe, kutegwa mbuli Kristo mbwaakabusyigwa kuzwa kubafwu kubulemu bwa Usyi, mbubonya oobo andiswe tweelede kupona buumi bupya. 5 Nkaambo ikuti naa twakamantana anguwe mulufwu luli mbuli lwakwe, nkokuti masimpe tuyookamantana alimwi anguwe mububuke buli mbuli bwakwe.
Twaaambo Tugwasya Mubbuku lya Ba-Roma
6:3-5—Ino ncinzi cipandululwa kwiinda mukubbapatizyigwa muli Jesu Kristo alimwi akubbapatizyigwa mulufwu lwakwe? Jehova nananika basikutobela Kristo amuuya uusalala, balakamantana a Jesu alimwi balaba cibeela cambungano ya Banakristo bananike, yalo iili mubili wa Kristo walo uuli ngo Silutwe wayo. (1Kor. 12:12, 13, 27; Kol. 1:18) Eeci ncocipandulula kubbapatizigwa muli Jesu Kristo. Alimwi Banakristo bananike ‘balabbapatizigwa mulufwu lwa Kristo’ munzila yakuti bapona buumi bwakulyaaba alimwi tabacijisi bulangizi bwakupona buumi butamani anyika. Aboobo, lufwu lwabo ndwakulyaaba mbubwenya mbolwakabede lufwu lwa Jesu, nokuba kuti lufwu lwabo talukonzyi kunununa. Lubbapatizyo oolu mulufwu lwa Kristo lulamanizyigwa ciindi nobafwa akubusyigwa kubuumi bwakujulu.
(Baroma 6:7) Nkaambo muntu ooyo iwafwa waangununwa kucibi cakwe.
Ino Mbulangizi Nzi Mbobajisi Basikale Bangu?
Ciindi bataluleme nobayoobusyigwa, sena lubeta lunooyeeme azintu nzyobakacita kabatanafwa? Peepe. Lugwalo lwa Baloma 6:7 lwaamba kuti: “Muntu wafwa waangununwa kucibi cakwe.” Bataluleme banooli baangununwa kuzibi zyabo kwiinda mukufwa. Aboobo lubeta lwabo lunooyeeme azintu nzyobayoocita baakubusyigwa, ikutali nzyobakacita mukutaziba kabatanafwa. Ino bayoojana mpindu nzi?
FEBRUARY 18-24
MBONO IZILI MU JWI LYA LEZA | BAROMA 7-8
“Sena ‘Mulalangila Cakuyandisisya’?”
(Baroma 8:19) Nkaambo zilenge zilalangila cakuyandisisya kuyubununwa kwabana ba Leza.
Amulekele Jehova Kuti Amusololele Kulwaanguluko Lwini-lwini
Ciindi naakali kubandika lwaanguluko Jehova ndwabambilide babelesi bakwe baanyika, Paulo wakalemba kuti: “Zilenge zilalangila cakuyandisisya kuyubununwa kwabana ba Leza.” Mpoonya wakayungizya kuti: “Zilenge azyalo ziyooangununwa kubuzike bwakubola akuba alwaanguluko lwabulemu bwabana ba Leza.” (Lom. 8:19-21) Ibbala lyakuti “zilenge” lyaamba bantu bajisi bulangizi bwakupona anyika, balo bayoojana mpindu akaambo “[ka]kuyubununwa” kwabana ba Leza bananikidwe amuuya. Kuyubununwa ooku kuyootalika ciindi “bana” aaba ibanooli babusyigwa mumibili yamuuya, nibayootola lubazu antoomwe a Kristo kusalazya nyika eeyi kububi alimwi akufwutula “nkamu mpati” kubanjizya mubweende bupya bwazyintu.—Ciy. 7:9, 14.
(Baroma 8:20) Nkaambo zilenge zyakaba abuumi bwabuyo, ikutali kuti zyakaliyandila buya pe, pele akaambo kayooyo iwakayanda kuti kube boobo akaambo kabulangizi
Atukkomane Akaambo Kabulangizi Bwesu
“Bulangizi” bwabantu bwakapegwa a Jehova ciindi naakasyomezya lufwutuko kuzwa “[ku]muzoka ooyo wakaindi” uutegwa Saatani Diabolosi kwiinda “[mu]lunyungu” lwakasyomezyegwa. (Ciy. 12:9; Matl. 3:15) Kusaanguna Jesu Kristo ngookali “lunyungu.” (Gal. 3:16) Kwiinda mulufwu alimwi akubusyigwa kwakwe, Jesu wakapa ntalisyo njumu yabulangizi bwabantu kutegwa bakaangununwe kubuzike bwacibi alufwu. Kuzuzikizyigwa kwa bulangizi oobu kuleendelana “[a]kuyubununwa kwabana ba Leza.” Bananike ncibeela cabili “[c]alunyungu.” ‘Bayooyubununwa’ ciindi baakutola lubazu antoomwe a Kristo kunyonyoona bweende bwazyintu bwa Saatani. (Ciy. 2:26, 27) Eeci ciyooleta lufwutuko kuli bambelele zimbi, balo banooli bainda mumapenzi mapati.—Ciy. 7:9, 10, 14.
(Baroma 8:21) bwakuti zilenge azyalo ziyakwaangununwa kubuzike bwakubola akuba alwaanguluko lwabulemu bwabana ba Leza.
Atukkomane Akaambo Kabulangizi Bwesu
Eelo kaka “zilenge” naa bantu bayoomvwa kabotu mu Bulelo bwa Kristo bwa Myaka Iili Cuulu! Aciindi eeco, “bana ba Leza” ‘bayooyubununwa’ alimwi nibayoobeleka kabali bapaizi a Kristo, kupa mpindu yacipaizyo cacinunuzyo ca Jesu kubantu. Kabali balelwa ba Bwami bwakujulu, “zilenge” naa bantu bayootalika kwaangununwa kuzyintu ziboola akaambo kacibi alufwu. Asyoonto-syoonto bantu basyomeka “[ba]yooangununwa kubuzike bwakubola.” Kuti bazumanana kusyomeka kuli Jehova kwamyaaka iili Cuulu alimwi amumusunko wamamanino uuyoba kumamanino aa bweendelezi bwa Myaka iili Cuulu, mazyina aabo ayoolembwa kwaciindi coonse “[mu]bbuku lyabuumi.” Bayoonjila “[mu]lwaanguluko lwabulemu bwabana ba Leza.” (Ciy. 20:7, 8, 11, 12) Eelo kaka oobu mbulangizi butaliboteli!”
Kuyandaula Mbono Zyakumuuya
(Baroma 8:6) Nkaambo kubikkila maano kuzintu zyamubili caamba lufwu, pele kubikkila maano kuzintu zyamuuya caamba buumi aluumuno;
Sena Muciyeeyende?
Ino nkwiindana nzi kuliko akati ‘kakubikkila maano kuzintu zyamubili’ alimwi ‘akubikkila maano kuzintu zyamuuya’? (Rom. 8:6)
Muntu uubikkila maano kuzintu zyamubili, ubikkila kapati maano kuzisusi zyanyama, alimwi kanji-kanji ulaamba akusumpula zintu zyakumubili. Mpoonya muntu uubikkila maano kuzintu zyamuuya, ubikkila maano kumakani aajatikizya Leza alimwi amizeezo yakwe; Munakristo uuli boobo ulagwasyilizyigwa amuuya uusalala. Kubikkila maano kuzintu zyamubili kusololela kulufwu, pele kubikkila maano kuzintu zyamuuya kusololela kubuumi aluumuno.—w16.12, pp. 15-17.
(Baroma 8:26, 27) Mbubonya buyo muuya awalo ulatugwasya mukulezya kwesu; nkaambo penzi ndyakuti nokuba kuti tuleelede kupaila tatuzyi pe mbotweelede kupaila, pele muuya wini ulatukombelezyela kujatikizya kutongela nkotukakilwa kwaamba cakupozya. 27 Pele ooyo uulingula myoyo ulizizyi ncozyaamba zikombelezyegwa amuuya nkaambo ukombelezyela basalali kweelana akuyanda kwa Leza.
Ino Mipailo Yanu Itondezya Nzi Kujatikizya Ndinywe?
Zimwi ziindi inga tatuzizyi kabotu nzyotweelede kwaamba notupaila tolikke. Paulo wakalemba kuti: “Nkaambo kukomba mbutweelede tatucizi pe, pele Muuya mwini ulatukombelezezya amitongelo iitaambiki. Nkabela oyo [Leza] uugulunganya myoyo yabantu ulizi miyeeyo ya-Muuya mbwiibede.” (Rom. 8:26, 27) Jehova nguwakapa kuti mipailo minji ilembwe mu Magwalo. Ulaitambula mipailo eeyi mbuli kuti ndiswe tulomba akutupa ncotuyanda. Leza ulituzyi alimwi ulizizyi zyoonse zilembedwe mu Bbaibbele nzyaakasololela amuuya wakwe. Jehova ulaingula mipailo yesu ciindi muuya ‘noutukombelezyela.’ Pele notuyaabulizyiba kabotu Ijwi lya Leza, tulakonzya kuba azyakwaamba notupaila.
FEBRUARY 25–MARCH 3
MBONO IZILI MU JWI LYA LEZA | BAROMA 9-11
“Cikozyanyo Cacisamu Camaolifa”
(Baroma 11:16) Alimwi ikuti cibeela cafulaulu uukandidwe icibonwa kuti micelo mitaanzi kacisalala, nkokuti mulwi woonse awalo ulasalala; alimwi ikuti muyanda kausalala, nkokuti ayalo mitabi ilasalala.
‘Eelo Kaka Twabweeli Busongo Bwa Leza!’
Mwaapostolo Paulo wakakozyanisya baabo bakali kuyooba cibeela calunyungu lwa Abrahamu kumitabi yacikozyanyo yacisamu camaolifa. (Lom. 11:21) Eeci cisamu camaolifa cakali kwiiminina kuzuzikizyigwa kwa makanze a Leza aajatikizya cizuminano ca Abrahamu. Muyanda wacisamu eeci ulisetekene alimwi wiiminina Jehova wakabapa buumi bana Israyeli bakumuuya. (Is. 10:20; Lom. 11:16) Cisamu ciiminina Jesu wakali wakutaanguna mulunyungu lwa Abrahamu. Imitabi yoonse “[ngo]mweelwe wabo uukkwene” aabo babikkilizyidwe mucibeela camamanino calunyungu lwa Abrahamu.
(Baroma 11:17) Nokuba boobo, ikuti naa mitabi imwi yakagonkwa eelyo nywebo, nokuba kuti muli mutabi wacisamu camaolifa camusyokwe, mwakalumikizyigwa akati kanjiyo akulya zintu zinono zizwa kumiyanda yacisiko camusamu wamaolifa,
(Baroma 11:20, 21) Aayo masimpe! Akaambo kakubula lusyomo kwabo bakagonkwa, pele nywebo muliimvwi akaambo kalusyomo. Lino mutalisumpuli, pele kamuyoowa. 21 Nkaambo ikuti naa Leza tanaakailekela kuzumanana mitabi iini-ini, nkokuti andinywe takamulekeli kuzumanana pe.
‘Eelo Kaka Tabweeli Busongo Bwa Leza!’
Aboobo, ino ncinzi Jehova ncaakacita kutegwa azuzikizye makanze aakwe? Paulo wakali kupandulula mitabi yacisamu camaolifa camusyokwe kuti cakalumikizyigwa acisamu camaolifa cakasyangwa kutegwa cinjilile busena mitabi yakagonkwa. (Amubale Baloma 11:17, 18.) Aboobo, Banakristo bananike bamasi mbuli bamwi mumbungano yaku Roma, bakalumikizyigwa kucisamu camaolifa cacikozyanyo. Munzila eeyi bakaba cibeela calunyungu lwa Abrahamu. Kumatalikilo bakali mbuli mitabi yacisamu camaolifa camusyokwe, tiibakajisi coolwe cakuba cibeela cacizuminano eeci cilibedelede. Pele Jehova wakabapa coolwe cakuba bama Juda bakumuuya.—Lom. 2:28, 29.
(Baroma 11:25, 26) Nkaambo tandiyandi kuti nywebo bakwesu kamutaazyi maseseke aa Leza aaya, kutegwa mutacenjeli mumeso aanu nobeni; kuti cibeela cimwi cabana Israyeli baba basicinguni kusikila mweelwe uukkwene wabantu bamasi uyobololwe, 26 aboobo munzila eeyi bana Israyeli boonse bayoofwutulwa. Mbubonya mbokulembedwe kuti: “Muvwuni uyooboola kuzwa mu Ziyoni akubalesya kucita micito mibi balunyungu lwa Jakobo.
‘Eelo Kaka Tabweeli Busongo Bwa Leza!’
Masimpe, makanze a Jehova aajatikizya “iba Isilayeli ba Leza” alazuzikizyigwa munzila iigambya. (Gal. 6:16) Mbuli Paulo mbwaakaamba kuti: “Bana Isilayeli boonse bayoofwutulwa.” (Lom. 11:26) Aciindi ncabikkide Jehova, “bana Isilayeli boonse”—nkokuti, mweelwe uukkwene wabana Israyeli bakumuuya, bayakuba bami abapaizi kujulu. Taaku cikonzya kulesya makanze a Jehova kuti azuzikizyigwe!
Kuyandaula Mbono Zyakumuuya
(Baroma 9:21-23) Sena tamuzyi kuti mubumbi ulijisi nguzu zyakubumba cibelesyo cilemekwa alimwi acibelesyo citalemekwi kuzwa kubulongo bomwe? 22 Ino mbuti kuti Leza wakali kuyanda kutondezya bukali bwakwe akupa kuti nguzu zyakwe zizyibwe, alimwi wakazyeengelela akuzikkazikila moyo kapati izibelesyo zyabulongo zyabukali izyeelela kunyonyoonwa? 23 Alimwi ino mbuti ikuti wakacita boobo ikutegwa azyibye mbobuli bupati kapati bulemu bwakwe kuzibelesyo zyabulongo zyaluse, eezyo nzyaakabambila limwi kutegwa zikalemekwe,
Amugwasyigwe Alulayo Lwa Jehova
Mbuti kuti bantu bakaka kubumbwa a Mubumbi Mupati? Mbuti Leza mbwakonzya kutondezya nguzu zyakwe? Amuyeeye cikonzya kucitika kubulongo ikuti kabutaceeleli kubelesyegwa mulimo umwi. Mubumbi ulakonzya kububelesya kubumba cintu cimbi naa kubusowa. Ikuti bulongo kabutaceeleli kubelesyegwa, kanji-kanji mubumbi nguujisi penzi. Pele oobo tabusyi mbocibede a Mubumbi wesu. (Dt. 32:4) Ikuti muntu katayandi kubumbwa a Jehova, nkokuti muntu ooyo nguujisi penzi. Jehova ulatondezya nguzu zyakwe kubantu zyalo zili mbuli zyamubumbi kwiinda mukucinca-cinca mbwabeendelezya bantu kweelana ambobakutambula kubumba kwakwe. Aabo bakutambula kabotu kubumba kwakwe balagwasyigwa kapati. Mucikozyanyo, Banakristo bananike ‘nzibelesyo zyabulongo zyaluse’ izyakabumbwa kuba “cintu cimwi cilemekwa.” Kulubazu lumwi, aabo bamukazya Leza baba ‘zibelesyo zyabulongo zyabukali izyeelela lunyonyooko.’—Lom. 9:19-23.
(Baroma 10:2) Inzya, ndilazumina kuti mbasungu kubelekela Leza, pele ikutali kweelana aluzyibo lwini-lwini.
it-1 1260 ¶2
Busungu
Busungu Butali Kabotu. Muntu ulakonzya kuba musungu kapati mucintu cimwi, pesi busungu oobo inga kabutali kabotu alimwi inga kabutamukkomanisyi Leza. Oobu mbocakabede kuba Juda banji bamumwaanda wamyaka wakusaanguna. Bakali kulangila kuti balakonzya kuba balulami kwiinda mumilimo yabo beni yakutobela Mulawo wa Musa. Pele Paulo wakatondezya kuti busungu bwabo tiibwakali kabotu akaambo kakuti, tiibakajisi luzyibo lwini-lwini. Aboobo kunyina nobakabutambula bululami bwini-bwini ibuzwa kuli Leza. Bakeelede kuzumina kuti bakali munzila iiteelede akuti bakeelede kupiluka kuli Leza kwiinda muli Kristo kutegwa batambule bululami akwaangululwa ku Mulawo walo aciindi eeco iwakalekede kubeleka. (Rom. 10:1-10) Oobu mbwaakabede Saulo waku Tarso, walo kumbele iwakazooba Paulo. Wakali musungu kapati cakuzwa munzila kubukombi bwaba Juda cakuti wakali “kupenzya mbungano ya Leza citaambiki akusola kwiinyonyoona.” Wakali kuutobela Mulawo cakumaninina mbuli “muntu wakanyina kampenda.” (Gal. 1:13, 14; Flp. 3:6) Nokuba boobo, busungu bwakwe kubukombi bwaba Juda tiibwakali kabotu. Wakalisinizyide mumoyo wakwe, nkakaambo kaako Jehova wakamufwida luzyalo kwiinda muli Kristo ciindi naakamusololela kubukombi bwakasimpe.—1Tim. 1:12, 13.