Mulongo Wamunsondo Iitalika mu March 25

NSONDO IITALIKA MU MARCH 25

Lwiimbo 76 Amupailo

□ Ciiyo ca Bbaibbele Cambungano:

gt cibalo 29-30 (30 min.)

□ Cikolo Camulimo Weendelezyegwa a Leza:

Kubala Bbaibbele: Luka 4-6 (10 min.)

Na. 1: Luka 4:22-39 (4 min. naa kutasika aawo)

Na. 2: Ino Yakazwa Kuli Misyobo Yabantu Yaandene-Andeene?—w08 1/1 p. 14 minc. 3, 4 (5 min.)

Na. 3: Ino Mbumboni Nzi Buliko Butondezya Kuti Jesu Wakabusyigwa?—1 Ko. 15:3-7 (5 min.)

□ Muswaangano Wamulimo:

Lwiimbo 111

5 min: Amutalisye Ciiyo ca Bbaibbele Mubuzuba bwa Mujibelo Bwakusaanguna. Kwiinda mukubelesya nzila iili apeeji 8, amucite citondezyo cambomukonzya kutalisya ciiyo ca Bbaibbele mubuzuba bwa Mujibelo bwakusaanguna mu April. Amubakulwaizye boonse kutola lubazu.

25 min: “Mbomukonzya Kubelesya Broshuwa Yakuti Makani Mabotu Aazwa Kuli Leza!” Kubuzya akwiingula. Mwanoolanga-langa muncali 6, amucite zitondezyo zyobilo.

Lwiimbo 97 Amupailo

Malipooti Aakulwaizya Aajatikizya Mulimo Wamumuunda

Mbomukonzya Kubelesya Broshuwa Yakuti Makani Mabotu Aazwa Kuli Leza!

Broshuwa Mpya Yakabambilwa Kutugwasya Kupanga Nyendo Zyakupilukila Akutalisya Ziiyo zya Bbaibbele

1. Ino nibroshuwa nzi mpya yakamwaigwa Kumuswaangano Wacooko wakajisi mutwe wakuti “Bamba Moyo Wako!” iyakabambilwa kutugwasya kupanga nyendo zyakupilukila akutalisya ziiyo zya Bbaibbele?

¹ Kumuswaangano Wacooko wakajisi mutwe wakuti “Bamba Moyo Wako!,” twakakkomana kutambula broshuwa mpya yakutugwasya kupanga nyendo zyakupilukila akutalisya ziiyo zya Bbaibbele. Broshuwa ya Makani Mabotu Aazwa Kuli Leza! ilikozyenye abroshuwa ya Ncayanda Leza, mukuti ziiyo nzifwaafwi alimwi tazikatazyi kumvwa. Broshuwa eeyi yanjila mubusena bwabroshuwa ya Ncayanda Leza. Eeci ciyootugwasya kusololela ziiyo zya Bbaibbele katwiimvwi aanze. Broshuwa ya Ncayanda Leza yakali kubandika zyeelelo zya Bunakristo, zyalo zikonzya kubayumina basikwiiya bapya kutobela, pele eeyi broshuwa mpya yaamba makani mabotu aajanika mu Bbaibbele.—Mil. 15:35.

2. Nkaambo nzi broshuwa ya Makani Mabotu ncoyakabambilwa?

² Nkaambo nzi ncoyakabambilwa? Bakwesu nyika yoonse mbwiizulwa balikulomba cintu cimwi cuuba-uba cikonzya kukwela bantu kukasimpe alimwi cikonzya kubelesyegwa kubasololela mukwiiya bbuku lya Bbaibbele Ncoliyiisya, bbuku ndyotubelesya mukusololela ziiyo zya Bbaibbele. Bantu ibayoowa kwiiya bbuku akaambo kakuti lilibonya kuti ndipati kanji-kanji balayanda kwiiya Bbaibbele kwiinda mukubelesya broshuwa. Kuyungizya waawo, ncuuba-uba kusandulula broshuwa mumyaambo minji.

3. Ino broshuwa eeyi iindene buti amabbuku aamwi aakwiiya?

³ Mboibambidwe: Mabbuku eesu manji ngotwiiya alembedwe munzila yakuti muntu ulakonzya kubala akumvwisya kasimpe kakunyina uumugwasya. Pele broshuwa eeyi iliimpene. Yakalembelwa kugwasya muntu kwiiya Bbaibbele pele kagwasyigwa asikumuyiisya. Aboobo, nomuyaabila kumuntu, cilainda kubota kubandika muncali omwe naa yobilo. Ijisi mincali mifwaafwi, aboobo mulakonzya kwiilanga-langa amuntu kamwiimvwi aanze naa kubusena bwamakwebo. Nokuba kuti cilikabotu kutalikila muciiyo 1, tulakonzya kutalikila muciiyo cili coonse cabroshuwa.

4. Ino broshuwa itugwasya buti kuyiisya kwiinda mukubelesya Bbaibbele kuligama?

⁴ Mumabbuku eesu manji, bwiinguzi kumibuzyo iisimbidwe bulakonzya kujanwa mumincali. Pele mubroshuwa eeyi, kanji-kanji bwiinguzi bujanika mu Bbaibbele. Bantu banji bayanda kwiiya kwiinda mukubelesya Bbaibbele kuligama kutali kubelesya mabbuku eesu. Pele magwalo manji aabikkidwe taazubuludwe pe. Aboobo, ayelede kubalwa mu Bbaibbele kuligama. Eeci cigwasya basikwiiya kuzyiba kuti nzyobaiya zizwa kuli Leza.—Is. 54:13.

5. Nkaambo nzi sikuyiisya ncaelede kulibambila kabotu ciiyo cimwi acimwi?

⁵ Broshuwa eeyi tayaapandululi magwalo oonse pe. Nkaambo nzi? Yakabambwa munzila iikulwaizya sikwiiya kubuzya mibuzyo akuzumizya mwiiyi kuti abelesye luzyibo lwakwe lwakuyiisya. Aboobo, cilayandika kulibambila kabotu ciiyo cili coonse. Kucenjezya: Mutanooambi zinji. Kupandulula Magwalo tulakuyanda. Pele sikwiiya ulakonzya kugwasyigwa kapati kuti twamulomba kupandulula ncayeeya kujatikizya ncolwaamba lugwalo. Kwiinda mukwiibelesya kabotu mibuzyo, tulakonzya kumugwasya kuyeeya cini ncolwaamba lugwalo lumwi alumwi.—Mil. 17:2.