Kulanga-langa Makani Aajatikizya Zilongwe

INDIA

Kweelana abuvwuntauzi bwakacitwa mu 2014, 61 pesenti yabakubusi bajisi myaka iili 18 kusika ku 25 basyoma kuti koonana kwabantu batakwetene “taacili makani mapati pe mu India.” Musilisi waku Mumbai wakaambila ba Hindustan Times kuti mukuyeeya kwakwe, “kutalika cisyabo tacaambi kuti bakubusi inga bajisi muzeezo wakukwatana. Kufwumbwa naa cisyabo eeco cikkala buyo busiku bomwe, ncakusobana buyo, naa kukkala antoomwe kakunyina kukwatana mumulawo, inga tabalibambilide kulyaaba.”

NCOMWEELEDE KUYEEYA: Sena malwazi aaboola kwiinda mukoonana alimwi akupenga mumizeezo zilaboola akaambo kakoonana bantu kabatanakwatana naa bamana kukwatana?—1 Bakorinto 6:18.

DENMARK

Ikuzwangana kapati abanamukwasyi ziindi zinji, kulakonzya kupa kuti muntu uujisi myaka iili 35 kusika ku 50 afwambaane kufwa. Basikuvwuntauzya baku University of Copenhagen nobakavwuntauzya, bakajana kuti mumyaka iili 11 mweelwe wabantu batandila ku 10,000 bajisi myaka iili 35 kusika ku 50 ibakali kuvwula kuzwangana abanamukwasyi ibakali kulangilwa kufwambaana kufwa kwiinda baabo ibatakali kuvwula kuzwangana. Mulembi wacibalo wakaamba kuti kulanganya kulibilika alimwi akumana mazwanga “inga yaba nzila mbotu yakucesya mweelwe wabantu bafwambaana kufwa.”

BBAIBBELE LYAAMBA KUTI: “Muntu uujisi luzyibo ulalijata kwaambaula, alimwi muntu uulaamaano ulazumanana kukkazika moyo.”—Tusimpi 17:27.

UNITED STATES

“Zisyabo zimana-mana”—kweelana abuvwuntauzi bwakacitwa caino-ino kubantu bakazwa akukwatana bali 564 mu Louisiana, kwakajanika kuti aabo balaazisyabo zimana-mana akutalika alimwi, balalangilwa kwaandaana mumyaka yosanwe yakusaanguna mucikwati cabo. Kuyungizya waawo, balavwula kuzwangana alimwi akutakkutila mucikwati cabo.

BBAIBBELE LYAAMBA KUTI: “Aabo Leza mbaaswaanganya kutabi muntu uubaandaanya.”—Matayo 19:6.