Cisi ca Indonesia Mubufwaafwi

Nyika Cisi ca Indonesia ncecisi cipangidwe aansumbu zinji kapati munyika yoonse mboizulwa calo icijanika akati kacisi ca Australia alimwi aca Asia. Munsumbu zinji akati kansumbu zyacisi eeci iziinda ku 17,500 muli malundu aajisi mampangala alimwi azyoonde aasisinkene kapati. Alimwi akaambo kakuti cijisi zilundu zizwa mulilo iziinda ku 100, eeci ncecisi icijisi zilundu zinji izyamusyobo ooyu kwiinda cisi cimbi cili coonse munyika.

Bantu Cisi ca Indonesia ncecisi cane mumulongo wazisi izijisi bantu banji kapati munyika (kuzwa cisi ca China, India, alimwi aca United States) alimwi kujanika misyobo yabantu yiinda ku  300. Musyobo uutegwa Javanese alimwi awa Sundanese njemisyobo mipati iijisi bantu bainda kucisela cabantu boonse ibali mucisi eeci.

Bukombi Bantu banji bamucisi ca Indonesia ibasika ku 90 pesenti mba Mozilemu. Ibambi basyaala mba Hindu, mba Bbuda, alimwi abaabo ibalyaamba kuti Mbanakristo. Alimwi kuli bantu banji ibatobela zilengwa zyabukombi zyamucisi zyabasikale.

Mwaambo Munsumbu eezyi zyoonse izipanga cisi ca Indonesia kuli myaambo yiinda ku 700 iyaambaulwa. Mwaambo wacisi wiitwa kuti Indonesian, walo uuzwa kumwaambo uutegwa Malay. Kunze lyaboobo, bantu banji baambaula cisyobo cankobazwa mumaanda aabo.

Bukkale Bantu banji mbalimi basyoonto naa mbaasimakwebo. Cisi eeci cijisi mabwe mayandisi manji, zisamu zyamapulanga, mungwimba uutasetedwe, muya uubelesyegwa mbuli mbuubelesyegwa mungwimba (natural gas) alimwi ncecisi ikuzwa mukupa wazisamu munji uubelesyegwa kupanga zintu mbuli rubber alimwi amafwuta aapangwa kuzwa kutukunka.

Cakulya Mupunga ncecakulya cacisi civwula kuligwa. Zyakulya zidumide zibikkilizya nasi goréng (mupunga amayi aakangidwe antoomwe azisyumani), satay (nyama iiyokedwe kiityungilidwe kutubulo naa tusamu), alimwi a gado-gado (tusyumani tuligwa bukwangi itubikkidwe cintele).

Ziindi Zyamwaka Kulapya kapati alimwi kuli mudumu mumuya. Myuwo iizwa kumusanza akunyika ipa kuti kakuli ziindi zyamwaka zyobilo—mainza alimwi acilimo. Ziindi zinji inga kuwa mvwula mpati yaguwo, iilaba alimwi akuzuma kapati.