Santiago
4 ¿Bʼa wa xjak jawa guerraʼexi sok jawa tiroʼanelexi? ¿Mi maʼ ti wa x-eljan ja bʼa jastik wa xkʼankʼuniyuj ja bʼakʼtelal bʼa wane skʼulajel luchar ja bʼa wa wojolexi? 2 Ja weʼnlexi ayni jas waxa kʼanawex, pe meya wiʼojex. Mini xa waʼawexkan milwanel sok okʼela kʼujolex, pe mi xbʼobʼa taʼex ja jas waxa kʼanawexi. Mixa waʼawexkan tiroʼanel sok guerraʼanel. Meyka wiʼojex yujni mixa kʼanawex. 3 Yajni waxa kʼanawex, mini x-ajiwilex, yujni waxa kʼanawex sok jun pensar bʼa mi sbʼejuk, bʼa oja chʼak-ex ja bʼa jas wa xkʼankʼuniyuj jawa bʼakʼtelexi.
4 Ja weʼnlex matik mi toj ayukex soka Dyosi, ¿mi maʼ xa naʼawex ke ja yamigoʼajel ja luʼumkʼinali jani skontraʼajel ja Dyosi? Ja yujil, chikan maʼ wa skʼana yamigoʼajel ja luʼumkʼinali jani wan skontraʼajel ja Dyosi. 5 Ma ¿waxa pensaranex lom wa xyala ja Yabʼal ja Dyosi: «Ja jkʼujoltik* bʼa wa xyiʼajotik bʼa oj jkʼulwanukotik imbidiar wani snikawotik bʼa jel oj kʼankʼunukujtik tuktukil jastik junuk»? 6 Pe mastoni ekʼxel ja lekil skʼujol mi xbʼajintik wa sjeʼa ja yeʼni. Ja yuj ja Yabʼal ja Dyosi wa xyala: «Ja Dyosi kontrani aysok ja matik jel niwan wa xyaʼa sbʼajeʼi, pe wa sjeʼayi lekil skʼujol mi xbʼajixi ja matik chʼin wa xyaʼa sbʼajeʼi».
7 Ja yujil, ajyanik bʼa yibʼ skʼabʼ ja Dyosi, pe kontraʼanik ja Dyablo sok jaxa yeʼni oj spak ajnel bʼa weʼnlex. 8 Mojxanik soka Dyosi sok jaxa yeʼni ojni mojxuka mokex. Mulanumik, sakʼawik jawa kʼabʼexi, jaxa weʼnlex matik jela wokolaniyex stsajel, awik sakbʼuk jawa kʼujolexi. 9 Ajyanik triste, mebʼa okʼanik sok okʼanik. Jawa tseʼejexi apax mebʼa okʼel sok jaxa wa gustoʼilexi apax jom olomil. 10 Aʼabʼajik chʼin ja bʼa stiʼ sat ja Jyoba* sok jaxa yeʼni oj ya niwanbʼananik.
11 Hermano jumasaʼ, aʼawikxakan sloʼiltajela bʼajex. Chikan maʼ wa sloʼiltay jun hermano ma wa skʼulan jusgar ja yermano, wani sloʼiltajel ja leyi sok wan skʼulajel jusgar ja leyi. Pe ja weʼn ta waxa kʼulan jusgar ja leyi, mini wanuka skʼuʼajel ja leyi, kʼotelani jun jues. 12 Kechan ay june ja Maʼ wa xya kujlajuk ja leyi sok kechan ay jun Jues, ja it maʼ wa xbʼobʼ koltanuki sok wa xbʼobʼ chʼakwanuki. Pe ja weʼn, ¿machunkiluka bʼa skʼulajel jusgar jawa moji?
13 Pe ja wego maklayik ja weʼnlex matik waxa walawex «Ja yani ma ja jecheli oj wajkotikon ja bʼa chonabʼ it sok ti oj kankotikon tiw jun jabʼil, oj jkʼultikon jnegosyotikon sok oj katikon el jganartikon», 14 yajni ja weʼnlexi mixa naʼawex jas oj ekabʼajex ja jecheli. Yujni jach kʼotelex jastal ja ason bʼa mi albʼeluk wa xkoʼ lamani sok tixta wa xchʼaya. 15 Ja mero jachnike oja walex «Ta jachkʼa wa skʼana ja Jyoba,* oj ajyukotik sakʼan sok oj jkʼuluktik ja it ma ja jawi». 16 Pe ja wego ja weʼnlexi jel niwan waxa waʼabʼajex ja bʼa jastik jel xa toyobʼajexsoki. Yibʼanal ja stoyjela bʼajex jawi mini lekuk. 17 Ja yujil, ta ay maʼ wa snaʼa skʼulajel ja bʼa jas toji pe mi skʼulan, wanxani slejel smul.