Ojni bʼobʼ jobʼ jbʼajtik: «¿Wan maʼ xyilawe ja tuk ke wala ochyon rason sok wa xkaʼa jbʼaj, ma estrictoʼon sok kaprechudoʼon? ¿Wan maʼ xkiʼaj gusto smaklajel ja jas wa spensarane ja tuk sok yajel jbʼaj ja yajni oj bʼobʼuk?». Yajni mas wala ochtik rason, masni wa xnochotik ja Jyoba sok ja Jesús. Yajni ay jas wa xtukbʼi bʼa keʼntik tʼilani oj ochkotik rason sok oj ka jbʼajtik. Bʼobʼta junta chʼaykʼujol oj tʼasputik jun niwan wokol ja bʼa jsakʼaniltik ma oj kitik wokol ja meyuk ja takʼin ma yuja politika. Ja jastik it ojni bʼobʼ stukbʼes ja jsakʼaniltik sok oj yijankitik wokolik mi xmajlaytik oj ekʼ jbʼajtik (Ecl. 9:11). Asta yajni wa xtukbʼi jun jcholtik ja bʼa xchonabʼ ja Jyoba, ojni bʼobʼ ochkotik probar. Pe ojni bʼobʼ kʼajyukotik ja bʼa jas yajkʼachil wa xtukbʼi ta jnochotik ja chane rasonik it: 1) skʼulajel aseptar ke tukbʼita ja jastal wala taxi, 2) pensaran jas oja kʼuluk sok mi jaʼuk ja jas ekʼta, 3) la waj jkʼujoltik ja jastik lek kiʼojtik sok 4) skʼulajelyi jastik lek ja tuki. w23.07 21, 22 par. 7, 8

Yajni ja Daniel junto kerem, ijini och preso bʼa Babilonia sok najat lek yakan ja snaji. Pe ama jachuk, jelni chaʼanyabʼal kʼot iljuk. Ja babilonioʼik jelni payjiye yuja ‹jas yilawe›: jun kerem «bʼa lek ay lek sok tsamal skʼeljel» bʼa ti jakel bʼa jun pamilya jel chaʼanyabʼal (1 Sam. 16:7). Ja yuj stsaʼawe oj xchape bʼa ti oj ajyuk ja bʼa matik ay chaʼan xchole ja bʼa Babilonia (Dan. 1:​3, 4, 6). Ja Jyoba syajtay ja Daniel yuja jastal stsaʼa oj kʼotuk. Wani xnaʼatik jachuk ja it, pes yajni ja Daniel ayto yiʼoj junuk 20 jabʼil ma mas koʼelto, ja Jyoba staʼa tiʼal sok tuk winike bʼa ajyiye toj jastal ja Noé sok ja Job, bʼa yaʼteltaye jitsan tyempo ja Jyoba (Gén. 5:32; 6:​9, 10; Job 42:​16, 17; Ezeq. 14:14). Ja Jyoba mini yakan syajtajel ja Daniel, bʼa albʼi lek ajyi sakʼan sok jel chaʼanyabʼalil waji (Dan. 10:​11, 19). w23.08 2 par. 1, 2

Yajni waxa kʼana oja man jun naʼits, wani xa kʼana oja naʼ spetsanil ja jastik yiʼoj ja naʼitsi. Jachni junxta oj bʼobʼ jkʼuluktik ja yajni wa xkʼumantik sok wa xkʼulantik estudiar ja Biblia. Ta lijeroxta wa xkʼumantik, jaʼitani oj kabʼtik stojol ja jas mas tʼilani, ‹ja bʼajtanik jasunuk wa xnebʼatik ja bʼa Yabʼal ja Dyosi› (Heb. 5:12). Pe mastoni lek ja oj kʼuluktiksok jastal ja naʼitsi: spaklajel ja bʼa «yojoli» bʼa yiljel spetsanil ja jastik yiʼoji. Bʼa oj kʼultik lek estudiar ja Biblia, jani oj kiltik jastal wa syaka sbʼaj ja bʼa tuktukil rasonik yiʼoji. Mini malanta snajel ja jasa wa xkʼuʼantik, cha tʼilani oj natik jas yuj wa xkʼuʼantik. Bʼa oj kabʼtik lek stojol ja Yabʼal ja Dyosi, tʼilani oj kʼuluktik estudiar ja smeranilik bʼa mas nakʼan yiʼoji. Ja jekabʼanum Pablo stsatsankʼujolan spetsanil ja snochumanik Kristo bʼa kongana a-skʼuluke estudiar ja Yabʼal ja Dyos bʼa jachuk oj bʼobʼ ‹yabʼye lek stojolil ja skʼatanili, ja snajtili, ja xchaʼanil bʼa kʼeʼeli, sok ja xchaʼanil bʼa koʼel› ja bʼa smeranili. Sok ja slekilal oj yil-e jani ‹tsʼunan lek oj ajyuke sok yij lek› ja bʼa skʼuʼajel yiʼoje (Efes. 3:​14-19). Cha jachni junxta oj bʼobʼ jkʼuluktik ja keʼntiki. w23.10 18 par. 1-3