2 Timoteo

3 Pe jelni tʼilan oja naʼ ke ja bʼa tsaʼanikxta kʼakʼu oj jak tyempoʼik jel wokol sok mi pasiluk oj kuchkujtik. 2 Yujni ja kristyano kechanta yeʼn oj syajtay sbʼaje; ojni syajtaye ja takʼini, jel oj stoy sbʼaje, jel banoso oj yaʼ sbʼaje, oj kʼumanuke kistal, mi kʼuʼabʼal oj ajyuke soka snantateʼi, mi oj yaʼe tsʼakatal sok mi toj oj ajyuke, 3 mi yaj oj ilwanuke, mi puesto oj ajyuke bʼa ochel akuerdo, oj abʼaltanuke, mi oj skom sbʼaje, jelni kʼakʼ oj ajyuke, mi oj syajtaye ja bʼa jas leki, 4 oj chʼaykʼujolanuke sok mi oj ochuke abʼal,* jel niwan oj yaʼ sbʼaje juntiro, jaʼ oj syajtaye ja jas wa xkʼankʼuniyujile sok mi jaʼuk ja Dyosi 5 sok oj sjeʼe lajansok wa xiwyeyuj ja Dyosi, pe ja yeʼnleʼi mini sjeʼawe yuja jastal yiʼoje ja sakʼanileʼi. Moka mojtaye ja tikʼe kristyano jastal jaw. 6 Ja bʼa kʼole it wa x-elyejan winike sok spensare mi lekuk bʼa wa x-ochye ja bʼa naʼitsaltik sok wa smonowe ja ixuke bʼa jel mulanume sok wa xyaʼa sbʼaje bʼa tuktukil tikʼe kʼankʼunel. 7 Jaxa yeʼnleʼi tolabida wane snebʼjel pe nunka xlajxiyujile jun meran snajelil sbʼaja smeranili.

8 Jastalni ja Janes sok ja Jambres skontraʼane ja Moisés, ja yeʼnleʼi mini xyaʼawekan skontraʼajel ja smeranili. Kʼotele winike bʼa jelxa jomel ja spensareʼi sok jaxa yeʼnleʼi mini lek x-iljiye yuja Dyosi yujni ja yeʼnleʼi kontraʼaye soka skʼuʼajeli. 9 Pe mini oj jelxuke mas, pes yujni ja tuki oj ya sbʼaje kuenta ja sonsoʼil ja yeʼnleʼi, jastalni ekʼ soka chabʼ winike jaw. 10 Pe ja weʼni atsajlunej lek ja jas jeʼuneji, ja jastal kiʼonej ja jsakʼanili, ja jas wa xkʼana ja bʼa jsakʼanili, ja skʼuʼajel kiʼoji, ja jpasensya, ja syajal jkʼujoli sok ja jastal kuchelkuji,* 11 sok waxa naʼa ja jastal iji jpatiki sok ja wokolik ekʼ jbʼaji, jastalni ja jas jtʼaspun ja bʼa Antioquía, bʼa Iconio sok ja bʼa Listra. Kuchnikuj ja jastal jel iji jpatiki, sok ja Kajwaltiki ya elkon libre bʼa yibʼanal ja jastik jaw. 12 Chomajkil, yibʼanal ja matik wa xyiʼaje ja sakʼanile jastal snochuman ja Kristo Jesús sok wa xyaʼteltaye ja Dyosi* ojni ijuk spatike. 13 Pe ja matik malo sok ja loʼlanumiki masto oj ipaxuke ele, ojni loʼlanuke sok oj cha loʼlajuke.

14 Pe ja weʼn, moka wakan ja jasa nebʼa sok aji kʼokxan bʼa oja kʼuʼuk, pes wani xa naʼa matik anebʼayi 15 sok man awalatsil* waxa naʼa ja jas kanel tsʼijbʼunubʼal ja bʼa Yabʼal ja Dyosi, bʼa ojni bʼobʼ yawi ja biboʼil wa xmakuni bʼa oja taʼ akoltajel yuja skʼuʼajel bʼa Kristo Jesús. 16 Yibʼanal ja Yabʼal ja Dyosi jani stojunej soka yipi sok wani xmakuni bʼa sjejel, bʼa tojwanel, bʼa stojel ja jastiki sok wa xchapwani bʼa skʼulajel ja bʼa jas toji, 17 bʼa jachuk ja yaʼtijum Dyosi oj lajxukyuj lek sok chapan lek oj ajyuk bʼa skʼulajel tuktukil tikʼe lekil aʼtel.