Lucas

21 Anto, yajni sjacha ja sati, ti yila ja rikoʼik wane yajel ochuk ja sdonasyone ja bʼa yetalik wa x-axi ja takʼini. 2 Sok tixa yila jun biuda pobre wan yajel ochuk chabʼ yal sat takʼin* bʼa jel koʼel stsʼakol. 3 Ti yalaʼa: «Wa xkalawabʼyex meran lek: ja biuda it jel pobre masto ya ochuk yuj yibʼanal ja yeʼnleʼi. 4 Yujni yibʼanale ja yeʼnleʼi jaʼ wa xyaʼawe sdonasyone ja bʼa wa xkanyujile sobra; pe ja yeʼn, ama jel pobre, ya och yibʼanal ja jas yiʼoj bʼa ajyel sakʼan».

5 Tsaʼan, yajni jujuntik wane yaljel jastal chapubʼal sok tsamal tonik ja templo sok bʼa jastik akʼubʼalyi ja Dyosi, 6 ja yeʼn yala: «Oj kʼotuk ja skʼakʼujil bʼa mini jun ton oj kan latsan ja bʼa jas waxa wilawex ja wego. Ojni chʼak jemuk». 7 Anto tixa sjobʼoweyiʼa: «Maestro, ¿jas ora oj ekʼuk ja jastik jaw, sok jas senyaʼil oj ajyuk ja yajni ojxta ekʼuk ja jastik jaw?». 8 Ti sjakʼayileʼa: «Talnabʼajik. Moka waʼabʼajex loʼlajel, yujni jitsan oj jakuke yajel makunuk ja jbʼiʼili sok oj yal-e: ‹Keʼnon ja Kristo›, ma ‹Ja tyempo tsaʼubʼali mojanxa ay›. Moka noch-ex. 9 Chomajkil, yajni xa wabʼyex yabʼalil guerra sok mi laman ayuke ja kristyano, mok ochuka xiwelex. Yujni oj ekʼuk bʼajtan ja jastik junuk it, pe mini wegoxta oj jakuk ja chʼakelali».

10 Anto ti yala yabʼye: «Yeʼnta oj tiroʼanuke ja chonabʼiki sok yeʼnta oj tiroʼanuke ja gobyerno jumasaʼ. 11 Oj ajyuk tsatsal terremotoʼik, sok bʼa tuktukil lugar oj ajyuk waʼin sok chamelik wa spuku sbʼaj. Yibʼanal ja jastik it jani ja skʼeʼulabʼil ja niwak wokoliki. Sok oj ilxuk jastik jel xiwela sbʼaj sok niwak senyaʼik ja bʼa satkʼinali.

12 Pe bʼajtanto yuj oj ekʼuk yibʼanal ja jastik junuk it, ja weʼnlexi oj yamjanik sok oj ijuka patikex. Oj ijanik ja bʼa naʼitsik wa stsomo sbʼaje sok oj lutjanik preso. Sok yuja jbʼiʼili, oj ijanik bʼa stiʼ sat ja reyiki sok ja mandaranumiki. 13 Ja it oj makunuk bʼa oj kʼota cholexyabʼ ja tuki. 14 Ja yuj, mok wajuka kʼujolex xchapjela bʼajex bʼajtan bʼa jastal oja kolta bʼajex, 15 yujni keʼn oj kawilex biboʼil sok oj koltayex bʼa oja naʼex jas oja walex, jaxa wa kontraʼexi mi oj snaʼe jas oj sjakʼawilex. 16 Chomajkil, asta oj skʼulukex entregar* jawa nantatex, jawa wermanoʼex, jawa pamilyaʼex sok jawa wamigoʼex. Jujuntik ja weʼnlexi oj miljanik. 17 Sok spetsanil ja kristyano oj yilkʼujolukex yuja jbʼiʼili. 18 Ama jachuk, mi oj chʼayuk mini jun stsoʼotsila wolomex. 19 Yuja oj kuchukawujilex* ojni akoltayexkan jawa sakʼanilexi.

20 Ja yujil, yajni xa wilawex ja Jerusalén joybʼubʼal yuj soldadoʼik, anto naʼawik mojxita ja xchʼakelali. 21 Anto ja matik tey bʼa Judea a-spake ajnel bʼa witsaltik; ja matik tey bʼa yoj snalan ja Jerusalén, aʼeluke ja tiwi, jaxa maʼ tey bʼa alaji, mok ochuke ja bʼa Jerusalén. 22 Yujni ja kʼakʼujik it, jani bʼa skʼulajel ja bʼa toji,* bʼa oj kʼotuk smeranil yibʼanal ja jastik kanel tsʼijbʼunubʼali. 23 ¡Ajula sbʼaje ja ixuke matik embarazada ayeʼi sok ja matik wanto xyawe chunuk ja yalatse ja bʼa kʼakʼujik jawi! Yujni oj ajyuk niwan wokol ja bʼa luʼum iti sok oj ajukyi kastigo ja chonabʼ iti. 24 Oj chamuke sok espada sok oj ijuke preso bʼa yibʼanal ja chonabʼiki; jaxa Jerusalén oj bʼatalajuk yuja chonabʼiki* masan xchʼak tsʼikwuk ja tyempo tsaʼubʼalxa bʼa chonabʼiki.*

25 Cha ojni ajyuk senyaʼik ja bʼa kʼaʼuji, ja bʼa luna sok ja bʼa kʼanaliki. Jaxa bʼa luʼumi, oj ajyuk chamkʼujol ja bʼa chonabʼiki sok mini oj snaʼ jas oj skʼuluke yuja skululel sok ja spukʼtsinel ja mari. 26 Ja kristyano oj tup yikʼe yuja xiweli sok yuja mi oj snaʼe jas oj ekʼuk ja bʼa spetsanil ja swinkil ja luʼumi. Yujni oj nijkuk ja jastik ay ja bʼa satkʼinali. 27 Anto oj yil-e ja Yunin ja Winik* jakum bʼa sat ason sok ipal sok jitsan toyjelal. 28 Pe yajni xkʼe ekʼuk ja jastik junuk it, kʼeʼanik tekʼan sok jacha jawa wolomexi, yujni mojanxa oj elanik libre».

29 Anto, tixa yala yabʼye jun slajelal: «Kʼelawik lek ja steʼil higo sok yibʼanal ja tuk teʼiki. 30 Yajni wa x-ajyi ja syawal spowili, weʼnlex mismo waxa wilawex sok waxa naʼawex mojanxa ja styempoʼil jaʼi. 31 Junxta ja weʼnlexi, yajni xa wilawex wan ekʼel ja jastik it, naʼawik mojanxa ay ja sGobyerno ja Dyosi. 32 Wa xkalawabʼyex meran lek: ja lame kristyano it mini tʼun oj chʼayuk masan xchʼak ekʼuk yibʼanal ja jastik junuki. 33 Ja satkʼinal sok ja luʼumi oj chʼayuke, pe ja jas wa xkala mini nunka oj chʼayuk.

34 Pe talnabʼajik bʼa mini nunka tʼenan oj ajyuk jawa kʼujolex yuj jelxel waʼel, yuj jelxel yujel sok yuja chamkʼujolik ja bʼa sakʼanili, sok jachuk mi junta chʼaykʼujol oj syamex ja kʼakʼu jaw 35 jastal jun trampa. Yujni oj jakuk sbʼa yibʼanal ja matik teye bʼa luʼumi. 36 Ja yujil, mok ochuka wayelex sok tolabida kʼanawika koltajelex. Bʼa jachuk oj elanik libre sbʼa yibʼanal ja jastik junuk it oj ekʼuki sok bʼa oj bʼobʼ ajyanik tekʼan ja bʼa stiʼ sat ja Yunin ja Winiki».

37 Ja yuj ja bʼa sat kʼakʼuʼi ti wa sjeʼa bʼa templo, jaxa bʼa akwali wa x-eli sok ti wa xwaj jijluk bʼa jun lugar sbʼiʼil wits Olivo. 38 Sok yibʼanal ja chonabʼi sajto lek wa xwaj smaklaye ja bʼa templo.