Romanos
11 Ja yuj tak, ja ke’n wa xjobʼo: ¿yuj maʼ ja Dyos mixa skisa ja xchonabʼi? ¡Mini jachukuk! Pes cha israʼelenyoʼon ja keʼn, b’a yintil Abrahán, bʼa kʼole bʼa Benjamín. 2 Ja Dyosi mi yuj mixa skisa ja xchonabʼi, ja ma’ waj skʼujol* bʼajtani. ¿Mi maʼ xa naʼawex ja jas wa xyala jun parte ja bʼa Yabʼal ja Dyos sbʼaja Elías yajni och parte soka Dyos sbʼaja Israel? 3 «Jyoba,* smilaweta jawa walumaniki sok sjemaweta-el jawa waltariki; kechanxta keʼna sok jaxa wego wane slejel modo oj smilone». 4 Pe ¿jasa aljiyabʼ yuja Dyosi? «Aytoni kiʼoj 7,000 winike bʼa mito xkoye sbʼaj mekʼan ja Baal». 5 Pes cha jachni ja bʼa tyempo it, ayni jun kʼole tsaʼubʼal yuj lekil kʼujolal mi xbʼajixi. 6 Pe ta tsaʼubʼale yuj lekil kʼujolal mi xbʼajixi, mixani jaʼuk yuja jas wa xkʼulaxi. Pes lekbʼi jachuki, ja lekil kʼujolal mi xbʼajixi mixani kʼoteluk lekil kʼujolal mi xbʼajixi.
7 Anto ¿jastalxa? Ja Israel mini staʼa ja jas tarega wan slejeli, jaxa matik tsaʼubʼali staʼaweniʼa. Ja tuki chʼuʼuybʼi ja skʼujoleʼi, 8 jastalni tsʼijbʼunubʼal: «Masan ja bʼa kʼakʼu it, ja Dyosi yaʼunej* och lek swayele, jaxa soka sateʼi mi xyilawe kʼinal jaxa soka xchikineʼi mini xyabʼye kʼinal». 9 Ja David cha wa xyala: «Ja smesaʼeʼi akʼot jun laso, jun trampa, jun lok okil sok jun kastigo bʼa yeʼnle. 10 Jaxa sateʼi atupuk bʼa mi oj yil-e kʼinal. Sok aʼakan bʼa kotan oj ajyuk tolabida ja spatikeʼi».
11 Ja yujil, ja keʼn wa xjobʼo: ¿Yuj maʼ ja yeʼnle sloko yoke sok mokʼye pe mixa xbʼobʼ stul sbʼaje? ¡Mini jachukuk! Pe yuja skʼokowe ja leyi, ja matik mi judíoʼuki wani xbʼobʼ staʼ skoltajele, jaxa it jani bʼa oj kʼeʼuk ja xchʼinajileʼi. 12 Pe ta yuja skʼokowe ja leyi wa xyayi slekilal ja luʼumkʼinali sok jaxa stsʼujelal ja yeʼnleʼi wa xyayi slekilal ja matik mi judíoʼuki, ¡janekʼtoma slekilal oj ajyuk ja yajni stsʼikwiye ja yeʼnleʼi!
13 Ja wego wa xkalawabʼyex ja weʼnlex matik mi judíoʼukexi. Yuja kʼotelon jekabʼanumil ja bʼa tuk chonabʼiki, wa xka niwanbʼuk ja kaʼtel bʼa xcholjeli 14 bʼa yiljel ta oj bʼobʼ ka kʼe’uk xchʼinajil ja jchonabʼi sok skoltajel jujuntik ja bʼa yeʼnleʼi. 15 Pes yujni ta mixa xkisjiye ja yeʼnleʼi wa stojolan oj yaʼ kulan ja Dyos soka luʼumkʼinali, anto yajni xkʼulajiye resibir ja yeʼnleʼi ojni stojoluk sakʼanil sbʼaja jastal chameleʼi. 16 Chomajkil, ta kʼotel sak ja bʼajtan parte bʼa wotsʼubʼal arina ja it wa xkʼapxi bʼa majtanali, cha kʼotelni sak yibʼanal ja wotsʼubʼal arina. Sok ta kʼotel sak ja yechi, cha jachni ja skʼabʼ jumasaʼ.
17 Pe ta kʼutsji-el jujuntik skʼabʼ sok ja weʼn bʼa kʼotela jun chʼayachʼ olivo k’ulajiya injertar* soka tuki sok waxa makʼlabʼaj lek ja bʼa yech ja olivo, 18 moka wil menos ja tuk skʼabʼiki. Sok ta waxa wila menos ja yeʼnleʼi, ajuluka kʼujol mi weʼn yamanukawuj ja yechi, pes yeʼnani syamuneja ja yechi. 19 Anto oja wal: «Kʼutsji-el jujuntik skʼabʼ bʼa jachuk ja keʼn oj kʼulajukon injertar».* 20 ¡Meraniʼa! Ja yeʼnleʼi kʼutsjiye-el yuja mi ajyiyujile skʼuʼajeli, pe ja weʼn tekʼan aya yuja skʼuʼajeli. Sok masni lek xiwan ke yuj oja waʼabʼaj niwani. 21 Pes ta ja Dyos mi yaʼa perdon ja mero skʼabʼiki, cha mini oj yaʼa perdon ja weʼni. 22 Ja yuj pensaraʼan sbʼaja lekil skʼujol ja Dyosi sok sbʼaja skalaxili. Ja yeʼn kalaxni soka matik koʼye luʼumi, pe lekni skʼujola mok ja weʼni, pe kechan ta ti wala ajyi bʼa lekil skʼujoli. Ta mikʼa, ja weʼni ojni cha kʼutsjan ele. 23 Jaxa yeʼnleʼi ojni cha kʼulajuke injertar* ta kʼe ajyukyujile skʼuʼajel, pes wani xbʼobʼ kʼulajuke injertar yajkʼachil ekʼele yuja Dyosi. 24 Yujni ja weʼn kʼutsjiya bʼa jun mero chʼayachʼ olivo sok kʼulajiya injertar* bʼa jun olivo tsʼunubʼal bʼa mi jach kʼajyel wa xkʼulaxi. Sok ta jach kʼulaji awi, ¡jaʼuktoma mi oj kʼulajuk injertar ja mero skʼabʼik olivo ja bʼa steʼili!
25 Kermano jumasa’, wa xkʼana oja naʼex ja jas jel chaʼanyabʼal wa xjak bʼa Dyosi* bʼa jachuk mi oja kʼulukabʼajex jel xa naʼawex: jun parte ja bʼa Israel chʼuʼuy kanel ja skʼujoleʼi masan stsʼikwiye ja matik mi judíoʼuki, 26 sok jachuk oj staʼ skoltajel yibʼanal ja Israel. Jastalni tsʼijbʼunubʼal: «Ja koltanumi tini oj eljan bʼa Sion sok ojni spil ja yintil ja Jacob ja bʼa jastik jel malo wa xkʼulaxi. 27 Sok jani it ja jtrato soka yeʼnle yajni xchʼaya snajel ja smuleʼi». 28 Meraniʼa, ja jastik ti chʼikan soka lekil rasoni, ja yeʼnleʼi kʼotele kontraʼanumik bʼa wa lekilal weʼnlex; pe ja jastik ti chʼikan soka jastik stsaʼunej ja Dyosi, ja yeʼnleʼi yajtanubʼale yuj spabore ja matik ekʼpaxtayujileʼi. 29 Ja Dyosi mini oj snaʼ malaya yuja jastik wa xyaʼa sok mini yuja matik wa spaya. 30 Ja weʼnlexi mini kʼuʼabʼal ajyiyex jun tyempo soka Dyosi, pe ja wego jejitawilex yajulal kʼujol yuja mi kʼuʼabʼal ajyiye ja yeʼnleʼi. 31 Cha jachuk ja yeʼnle ja wego mini kʼuʼabʼal ayuke, sok yuja it jeʼubʼalawilex yajulal kʼujol, bʼa jachuk ja yeʼnleʼi oj cha bʼobʼ jejukyile yajulal kʼujol ja wego. 32 Yujni ja Dyos yaʼunejkan yibʼanal ja kristyano akʼotuke mosoʼil sbʼaja mi ajyel kʼuʼabʼali bʼa jachuk oj bʼobʼ jejukyile yajulal kʼujol yibʼanale.
33 ¡Jelni jitsan juntiro ja srikesaʼil ja Dyosi, ja sbiboʼili sok ja snajel yiʼoji! ¡Mini xbʼobʼ cholxuk tsʼikan lek ja jastal wa skʼulan jusgari sok mini xbʼobʼ jnatik yibʼanal ja sbʼeji! 34 Pes «¿machunkiluk kʼotel snaʼ sbʼaj ja spensar ja Jyoba?* Ma ¿machunkiluk wa xyayi rason?». 35 Ma «¿machunkiluk ayxa maʼ jas yaʼunejyi bʼajtan ja Dyosi bʼa jachuk ja yeʼn tʼilan oj ya kumxukyi slokʼol?». 36 Yujni yibʼanal ja jastiki ti wa xjak bʼa yeʼna sok ay yuj yeʼna sok teye yuja jach wa skʼana ja yeʼni. Ja yeʼn ayiʼ stoyjelal bʼa tolabida. Amén.