1 Corintios
10 Ja wego kermano jumasaʼ, wa xkʼana oja naʼex ke ja matik ekʼpaxtakujtiki tini ajyiye bʼa yibʼ ason, yibʼanale skʼutsuwe ja mari, 2 spetsanile yiʼaje jaʼ jastal snochumane Moisés yajni teye bʼa yibʼel ja asoni sok wane skʼutsjel ja mari, 3 spetsanile yabʼye ja junxta waʼelal yaʼa ja Dyosi 4 sok spetsanile yuʼaje ja jaʼ yaʼa ja Dyosi. Yujni ja yeʼnleʼi yuʼaje ja jaʼ wa x-el bʼa toni bʼa lajansok nochubʼaleyuj, sok jaxa ton jaw yeʼnani yaʼa ja Dyosi, sok jani senyaʼan* ja Kristo. 5 Pe tʼusan mi yibʼanaluke mini lek kʼot iljuke yuja Dyosi, pes tini chamyekan bʼa desierto.
6 Pe ja jastik it wani xmakunikujtik jastal sjejel bʼa mi oj kʼankʼunukujtik jastik bʼa mi lekuk, jastalni skʼulane ja yeʼnle. 7 Cha mokni jtoytik kʼulubʼal dyosik, jastalni skʼulane jujuntik ja yeʼnleʼi, jastalni tsʼijbʼunubʼal: «Ja chonabʼi och kulan bʼa oj waʼuke sok bʼa oj yuʼe, sok tixa stulu sbʼaje bʼa yajel ekʼ gusto jutsʼin». 8 Cha mokni kokotik mulal sok ixuk winik,* jastalni jujuntik bʼa yeʼnle koʼye mulal sok ixuk winik,* ja yuj chamye 23,000 bʼa jun ita kʼakʼu. 9 Cha mokni katik och probar ja Jyoba,* jastalni jujuntik bʼa yeʼnle yawe och probar sok chamye yuja kʼuxjiye yuja bʼitsʼbʼichaniki. 10 Cha mokni ochkotik parte, jastalni jujuntik bʼa yeʼnle ochye parte sok tsaʼan miljiye yuja maʼ wa xchʼakwani. 11 Iday, ekʼ sbʼaje ja jastik it bʼa oj makunuk jastal sjejel, sok tsʼijbʼaxi bʼa oj jtalna jbʼajtik ja keʼntiki, ja matik ti ayotik sakʼan ja bʼa xchʼakulabʼil ja jastal wa xtax ja tyempoʼik* it.
12 Ja yujil, ja maʼ wa spensaraʼan tekʼan ayi, a-stalna sbʼaj bʼa mok mokʼuk. 13 Ja weʼnlexi mini bʼa ekʼelabʼajex jun prueba bʼa mi snaʼunejuk sbʼaj ja kristyano. Pe ja Dyosi jel toj sok mi oj yakan oj ekʼxuk mas jun prueba ta mi oj kuchukawujilexi, pes yajni xjak ja prueba, cha ojni skoltayex bʼa jachuk oj bʼobʼ kuchukawujilex.
14 Ja yujil, kala kermano jumasaʼ, pakawik ajnel* sbʼaja stoyjel kʼulubʼal dyosiki.* 15 Wa xkʼumanex jastal kristyanoʼik bʼa waxa wabʼyex stojol. Kʼulanik jusgar weʼnlex mismo ja jas wa xkala. 16 ¿Mi maʼ wa xkatik el slekilal ja xchikʼel ja Kristo soka kopa bʼa yajel tsʼakatal ja it wa xkatikyi tsʼakatal soka Dyosi? ¿Mi maʼ wa xkatik el slekilal ja skuerpo ja Kristo soka pan wa xetʼatiki? 17 Kechani ay jun pan, ja yuj, ama jel jitsanotik ja keʼntiki, kechanta jun kuerpo kʼotelotik, yujni kibʼanaltik wa xkabʼtik ja único pan jawi.
18 Ajuluka kʼujolex ja mero Israeli. Yajni yabʼye ja jas wa xkʼapxi ja bʼa altari, ¿mi maʼ lajansok jani waʼye soka Dyosi? 19 Anto, ¿jasa wa xkʼan kali? ¿Kʼotel maʼ chaʼanyabʼalil ja jas wa xkʼapxiyi jun kʼulubʼal dyos? Ma ¿kʼotel maʼ chaʼanyabʼalil ja kʼulubʼal dyos? 20 Miniʼa. Ja jas wa xkʼan kali eske ja jas wa skʼapa ja chonabʼiki, jani wa skʼapaweyi ja pukujiki sok mi jaʼuk ja Dyosi; sok mini xkʼana oja chʼikabʼajex soka pukujiki. 21 Mini xbʼobʼa wuʼex ja bʼa scopa ja Jyoba* sok ja bʼa scopa ja pukujiki. Cha mini xbʼobʼ waʼanik «ja bʼa smesa ja Jyoba»* sok ja bʼa smesa ja pukujiki. 22 Ma ¿yuj ‹wantik yajel kʼeʼuk xchʼinajil ja Jyoba›?* ¿Anke mi mas ayuk kiptik ja keʼntik yuja yeʼn?
23 Ayni permiso bʼa skʼulajel chikan jasunuk, pe mi yibʼanaluk wa x-ilxi slekilal. Ayni permiso bʼa skʼulajel chikan jasunuk, pe mi yibʼanaluk wa stsatsankʼujolani. 24 Jani la jletik ja slekilal ja tuki sok mi jaʼuk ja jbʼajtiki.
25 Abʼanik yibʼanal ja jas wa xchonxi ja bʼa wa xchonowe bʼakʼeti sok mok jasa jobʼex yuja wa concienciaʼexi, 26 yujni «yeʼn sbʼaj ja Jyoba* ja luʼumi sok yibʼanal ja jas yiʼoji». 27 Ta slokowex june maʼ mi kʼuʼumanuk* sok waxa kʼana oj wajanik, abʼanik chikan jas wa x-ajiwilex sok mok jasa jobʼex yuja wa concienciaʼexi. 28 Pe ta ay maʼ yala wabʼyex «Ja it kʼapji jastal majtanal», moka wabʼyex bʼa mi oj slok yok ja maʼ yala, sok jachuk mi maʼ oj yajbʼesjukyi ja sconciencia. 29 Sok mini jaʼ wanukon stajel tiʼal jawa conciencia, jani sbʼaja sconciencia ja juni. Pes ama libre ayon, mi xkʼana oj kʼulajuk jusgar ja libreʼil kiʼoj yuja sconciencia ja juni. 30 Sok ta ja keʼn wa xkabʼi sok wa xkayi tsʼakatal ja Dyos yuja jaw, ¿sbʼej maʼ oj jkʼuluk ja it ta wa sloʼiltayone ja tuki?
31 Ja yujil, sea wanex waʼel, wanex yujel ma wanex skʼulajel chikan jasunuk, kʼulanik yibʼanal bʼa stoyjel ja Dyosi. 32 Moka wawex slok yok ja judíoʼik, ja griegoʼik sok ja skongregasyon ja Dyosi, 33 jastalni wa xleʼa modo bʼa yajel gustoʼaxuk spetsanil ja kristyano bʼa yibʼanal ja jastiki ja yajni jaʼ wa xleʼa ja slekilal jitsan kristyano sok mi jaʼuk ja jbʼaji, bʼa jachuk oj staʼ skoltajele.