Marcos

7 Anto ja fariseoʼik sok jujuntik jeʼumanik b’a ley b’a ti jakele bʼa Jerusalén ti stsomo sbʼaje bʼa sjoyanal ja Jesús. 2 Sok yilawe jujuntik ja snebʼumaniki mini asyado ayuk ja skʼabʼe ja wane waʼeli, wa xkʼan alxuk, mi sakʼunejuke.* 3 (Yujni ja fariseoʼik sok ja tuk judíoʼik mini xwaʼye ta mi sakʼunejuke ja skʼabʼe man xujkubʼe yujni jaʼ wa snochowe ja skostumbre ja winike bʼa tyempo najate. 4 Sok yajni wa xkumxiye ja bʼa merkado, mini xwaʼye ta mi asyado ayuke. Cha wani snochowe ja tuk jitsan kostumbreʼik bʼa najate, jastal smuljel jaʼ ja copaʼiki, ja jarroʼiki sok ja yetalik bʼa kobre). 5 Ja yuj ja fariseoʼik it sok ja jeʼumanik bʼa ley sjobʼoweyi: «¿Jas yuj jawa nebʼumanik mi snochowe ja skostumbreʼe ja winike b’a tyempo najate? Pes mini asyado ayuk ja skʼabʼe yajni wa xwaʼyeʼi». 6 Ja yeʼn tixa yala yabʼye: «Ja weʼnlex bʼa chabʼ kara ayex, jak’ayuj ja Isaías yalakan bʼa weʼnlex ja jastalni tsʼijbʼunubʼali: ‹Ja chonabʼ it wa stoyowon soka stiʼeʼi, pe ja skʼujoleʼi najat lek aye jmok. 7 Lomni wa stoyowone, yujni ja jas wa sjeʼaweʼi kechan smandar winike›. 8 Ja weʼnlexi waxa waʼawexkan jun lado ja smandarik ja Dyosi sok jaʼ waxa nochowex ja skostumbreʼe ja winikeʼi».

9 Cha yalato yabʼye: «¡Jelni xa naʼawex bʼa yajelkan jun lado ja smandarik ja Dyos bʼa jachuk mi oja waʼexkan snochjel jawa kostumbreʼexi! 10 Jun sjejel, ja Moisés yala: ‹Kisa jawa tat sok jawa nani›, sok ‹Ja maʼ wa staʼa tiʼal malo* ja stati ma ja snani ojni miljuk›. 11 Pe ja weʼnlexi waxa walawex: ‹Bʼobʼta ayni maʼ oj yalyabʼ ja stat ma ja snani: «Yibʼanal ja jas kiʼoj bʼa oj bʼobʼ jkoltaya junxa corbán»› (wa xkʼan alxuk, jun majtanal akʼubʼalxayi ja Dyosi). 12 Soka it waxa timawex bʼa mixani tʼun oj skoltay ja snantati. 13 Jachuk, waxa waʼawexkan jun lado ja yabʼal ja Dyos yuja wa kostumbreʼex waxa wawex ekʼyi ja tuki. Sok waxa kʼulanex jitsan jastik jastal jaw». 14 Anto tixa skʼanayi cha amojxuke ja kristyano jumasaʼ sok yala yabʼye: «Maklayonik awibʼanalex, sok abʼanik stojol ja jas wa xkalawabʼyexi. 15 Jun winik mi x-aji kuxbʼuk yuja jas wa x-och ja bʼa stiʼi. Ja jas wa x-aji kuxbʼukyuji jani ja jastik wa x-el bʼa yeʼni». 16 *

17 Yajni ja Jesús yaʼakan ja nole kristyano, tixa och bʼa jun naʼits sok jaxa nebʼumaniki och sjobʼeyi sbʼaja slajelal yaʼa. 18 Jaxa yeʼn sjakʼayile: «¿Yuj maʼ cha mito xkʼota wabʼyex stojol ja weʼnlex jastal yeʼnle? ¿Mi maʼ xa waʼabʼajex kuenta yibʼanal ja jas wa x-och ja bʼa stiʼ jun kristyano mini x-aji kuxbʼukyuj? 19 Pes mini ti wa xkʼot bʼa skʼujol, tini bʼa slukum, sok tsaʼan tixa wa xkʼot bʼa letrina». Soka jaw yala naka asyado yibʼanal ja waʼelali. 20 Cha yala: «Ja jas wa x-aji kuxbʼukyuj jun kristyano jani ja jas wa x-el bʼa yeʼni. 21 Yujni ja bʼa yojoli, ja bʼa skʼujol ja kristyano, wa x-el pensarik bʼa mi lekuk: koʼel mulalik sok ixuk winik,* elkʼanel, milwanel, 22 xchʼaykʼujolajel ja nupanel,* okʼel kʼujolal, skʼulajel bʼa mi lekuk, loʼlanel, kistal modoʼal jel kʼixwela sbʼaj,* imbidia, kʼumanel kistal,* niwan yajel sbʼaj sok mi x-och abʼal. 23 Yibʼanal ja jastik it mi lekuki tini wa x-el bʼa skʼujol jun kristyano sok wa x-aji kuxbʼukyuj».

24 Tsaʼan tixa el ja tiwi sok waj bʼa slujmalil Tiro sok Sidón. Ti och bʼa jun naʼits yujni mi skʼana ay maʼ oj yabʼ tey tiw, pe ama jachuk abʼjini yabʼalil. 25 Mixani ekʼ tyempo, jun ixuk bʼa ochel sbʼaj jun pukuj* ja yal yakʼixi yabʼ yabʼalil bʼa yeʼna. Tixa jak ja ixuki sok koʼ mekʼan bʼa stiʼ sat. 26 Ja ixuki griega, ti pojki* bʼa sirofenicia; sok tikʼanxta spatayi skʼujol ja Jesús bʼa aya eluk ja pukuj ochel sbʼaj ja yakʼixi. 27 Pe ja yeʼn yala yabʼi: «Aʼakan awaʼuke bʼajtan ja yal untiki, yujni mi lekuk sjapjelyi ja pan ja yal untiki sok sjipjelyi ja yal tsʼiʼiki». 28 Anto ja ixuki sjakʼa: «Meraniʼa kajwal, pe asta ja yal tsʼiʼik teye bʼa yibʼ mesa wani sloʼowe ja stsʼubʼil wa xmokʼyujile ja yal untiki». 29 Jaxa yeʼn yala yabʼi: «Kaʼax bʼa wa naj. Yuja jach awala, ja pukuji elta ja bʼa wa wakʼixi». 30 Jaxa yeʼn waj bʼa snaj sok ti staʼa bʼaʼan ekʼ bʼa chʼat ja yal akʼixi sok mixa teyuk ja pukuji.

31 Anto ja Jesús tixa el ja bʼa slujmalil ja Tiro bʼa oj wajuk bʼa mar bʼa Galilea. Ja yeʼn ti ekʼ bʼa slujmalil Sidón sok bʼa slujmalil Decápolis.* 32 Jaxa tiw ti ijijanyi jun winik mi xyabʼ kʼinal sok mi x-el lek skʼumal sok spataweyi skʼujol ayayi kajan ja skʼabʼi. 33 Ja yeʼn yiʼaj-el pilan, najat ja bʼay ja nole kristyano. Ti yaʼa ja yal skʼabʼ bʼa sjotol xchikin ja winiki, sok yajni tsujbʼani, ti syamayi ja yakʼi. 34 Sok yajni wan skʼeljel ja satkʼinali, ti sikʼa skʼujola sok yala yabʼi «Éfata», wa xkʼan alxuk, «jamabʼaj». 35 Wegoxta sjama sbʼaj ja xchikini sok wanxani x-el lek ja skʼumali. 36 Anto ja Jesús ti skomo lek ja kristyano bʼa mok maʼ yal-e yabʼi. Pe yajni mas wa skomo ja kristyano, masto wa xyalawe ekʼe. 37 Jelni och spensare juntiro sok wa xyalawe: «Jelni lek juntiro ja jas wa xchʼak skʼuluki. ¡Asta wa sjamayi ja xchikin ja maʼ mi xyabʼ kʼinali sok wa xya kʼumanuk ja maʼ mi xkʼumani!».