Romanos

7 ¿Yuj maʼ mixa naʼawex, kermano jumasaʼ, ja Leyi ibʼ kʼabʼal ayuj ja winik ja yajni sakʼan ayi? (Jani wanon yaljel yabʼ ja matik wa snaʼawe sbʼaj ja leyi). 2 Jun sjejel, ja ley wa xyala jun ixuk bʼa nupanelxa mochani ay soka statam ja yajni sakʼanto ayi; pe ta ti cham ja statami, ti wa xkan libre sbʼaja sley ja statami. 3 Ja yujil, ta ti yiʼaj pilan winik yajni sakʼanto ay ja statami, ja yeʼn ojni xchʼaykʼujoluk ja snupaneli. Pe ta cham ja statami, wani xkan libre ja bʼa sley ja statami, ja yuj mixani oj xchʼaykʼujoluk ja snupanel ta ti yiʼaj pilan winiki.

4 Ja yujil, kermano jumasaʼ, ja weʼnlexi lajansok nupanelex ajyi soka Leyi, pe yuja yaʼa ja sakʼanil ja Kristo ti kʼot tikʼana. Ja it ekʼi bʼa oj ajyanik ibʼ kʼabʼal soka Kristo, ja it maʼ aji kʼeʼuk ja bʼa chamwiniki, bʼa jachuk oj jkʼuluktik ja jastik lek wa xyila ja Dyosi. 5 Pes yajni jato kiʼojtik ja jsakʼaniltik ja jastal wa skʼana ja bʼakʼtelali, ja Ley xchiktes ke ja kʼankʼunelik mi lekuki snika ja jkuerpotik bʼa koʼel mulal, jaxa mulal jaw wa xyiʼajotik bʼa chamelal. 6 Pe ja wego ajita elkotik libre ja bʼa Leyi, yujni chamtikta ja jastal smochunejotik ajyi ja Leyi, bʼa oj kʼotkotik mosoʼil bʼa jun yajkʼachil modoʼal stsʼakatal yuja yip ja Dyosi,* sok mixani jaʼuk yuja Leyi.

7 Anto, ¿jasa oj kaltiki? ¿Kʼotel maʼ mulal ja Leyi? ¡Miniʼa! Ja smeranili, mini oj jnaʼ ajyi jasunkiluk ja mulali mokxta jaʼuk yuja Leyi. Jun sjejel, mini oj jnaʼ ajyi jasunkiluk ja okʼel kʼujolal lekbʼi mi xyala ja Leyi «Mokni okʼuka kʼujol ja jas yiʼoj jawa moji». 8 Pes yuja leyi, ja mulali staʼa jun modo bʼa oj ya ajyuk bʼa keʼn tuktukil tikʼe okʼel kʼujolal, pes yajni mito ayuk ja leyi ja mulali mey yip ajyi. 9 Iday, ja keʼn ajyiyon sakʼan bʼa jun tyempo mey ley ajyi. Pe yajni stuluyi ja mandari, sakʼwi ja mulali jaxa keʼni chamyon. 10 Sok kʼot jnaʼ ja mandar oj yiʼon bʼa sakʼanil ajyi, ja smeranili yiʼajoni bʼa chamelal. 11 Pes yuja leyi, ja mulali staʼa modo bʼa oj smon-on sok oj smil-on. 12 Ja yuj ja Leyi kʼotelni sak, jaxa mandari sakniʼa, toj sok lek.

13 Anto, ¿yuj maʼ smilawon jun jasunuk bʼa lek?* ¡Miniʼa! Yeʼnani ja mulal wa skʼulanki ja jaw. Pes yuja jas leki smilunejon ja mulali. Ja it jani bʼa sjejel ja jas kʼotel ja mulali. Ja Leyi sjeʼa jaman lek jelni malo juntiro ja mulali. 14 Yujni wa xnaʼatik ja Leyi ti jakel bʼa Dyos, pe ja keʼni mulanumon, chonjiyon bʼa oj kʼotkon mosoʼil sbʼaja mulali. 15 Yujni mi xkabʼ stojol ja jmodo: mini xkʼulan ja jas wa xkʼana, jani wa xkʼulan ja jas wa xkilkʼujolani. 16 Pe ta wa xkʼulan ja jas mi xkʼana, akuerdoni ayon ke lekni ja Leyi. 17 Pe ja wego mixa keʼnukon ja maʼ wa skʼulan ja jastik jawi, jani ja mulal tey jbʼaji. 18 Pes wa xnaʼa mini jas lek kiʼoj, wa xkʼan kal, ja bʼa jbʼakʼteli, pes ama wa xkʼana oj jkʼuluk ja jas leki, mini xbʼobʼ jkʼuluk. 19 Yujni mi xkʼulan ja jastik lek wa xkʼana oj jkʼuluki, pes jani wa xkʼulan ja jastik mi lekuk wa xkʼana. 20 Anto, ta wa xkʼulan ja jas mi xkʼana, mixani keʼnuk ja maʼ wa skʼulani, jaxani ja mulal tey jbʼaji.

21 Ja yujil, wa xkaʼa jbʼaj kuenta tey ja ley it ja bʼa jastal wala taxyoni: yajni wa xkʼana oj jkʼuluk ja bʼa jas toji, tini ay jmok ja bʼa jas mi lekuki. 22 Ja jkʼujoli meran lek jelni tsamal xyabʼ ja sley ja Dyosi, 23 pe ja bʼa jkuerpo wa xkila pilan ley bʼa wa skʼulan luchar soka ley bʼa jpensari sok lajansok lutan ayon yuja ley bʼa mulal tey bʼa jkuerpo. 24 ¡Jelni ajula jbʼaj! ¿Maʼ oj ya elkon libre ja bʼa kuerpoʼal bʼa wa xyiʼajon ja bʼa chamelal it? 25 ¡Wani xkayi tsʼakatal ja Dyos yuja Kajwaltik Jesukristo! Ja yuj tak, soka jpensari moso ayon soka ley bʼa Dyosi, pe soka jbʼakʼteli moso ayon soka ley bʼa mulali.