Hebreos
5 Pes chikan maʼ winikil bʼa wa x-aji och mero olomal sacerdote wani xtʼoji bʼa skoltajel ja kristyano ja bʼa jastik ti chʼikan soka Dyosi, bʼa skʼapjel majtanalik chante sok tuk majtanalik yuja mulali. 2 Ja yeʼn wani xbʼobʼ snaʼ syajulal ja matik wa sleʼa smule yuja mi snaʼawe stojoli, pes ja yeʼn cha mulanumniʼa, 3 sok ja yuj tʼilani oj skʼap majtanalik chante yuja smuli, jastalni wa skʼapa yuja chonabʼi.
4 Mini jun winik yeʼnta wa stʼojo sbʼaj jastal mero olomal sacerdote, kechani yeʼn wa xtʼojwani ja Dyosi, jastalni stʼojo ja Aarón. 5 Junxtani soka it, ja Kristo mi yeʼnta stʼojo sbʼaj jastal mero olomal sacerdote, jaʼi, mini yeʼnta stoyo sbʼaj, pes jani toyji yuja Dyos yajni yala: «Weʼnani ja jkeremi; jaxa wego ja keʼn kʼotelon wa tat». 6 Pes jachni jastal wa xyala bʼa pilan parte bʼa Yabʼal ja Dyosi: «Ja weʼn kʼotela sacerdote bʼa tolabida jastalni ja Melquisedec».
7 Ja janekʼ tyempo ajyi sakʼan ja bʼa luʼumi, ja Kristo jel tsats okʼi sok spekʼa yalel sat yajni ay jas skʼanayi sok spatayi skʼujol ja Maʼ wa xbʼobʼ koltajukyuj ja bʼa chamelali, sok maklaji yuja wa xiwyuj ja Dyosi. 8 Ama ja yeʼn kʼotel uninal, snebʼa ajyel kʼuʼabʼal yuja wokolik yiʼaji. 9 Sok yajni lajxitayuj ja skʼelsati, yeʼn kʼot ajyuk bʼa skʼabʼ ja koltanel bʼa tolabida bʼa yibʼanal ja matik wa xkʼuʼajiyuji, 10 yujni ja Dyosi yaʼunej och mero olomal sacerdote jastalni ja Melquisedec.
11 Jeltoni jas oj kaltik bʼa yeʼna, pe jelni wokol xcholjel, pes yujni mixa kʼujolanex bʼa oja wabʼyex stojol.* 12 Pes ama ja mero sbʼejxanike maestroʼexa, pe wantoni xa kʼanawex bʼa ay maʼ oj cha sjeʼawilex yajkʼachil ekʼele ja bʼajtanik jasunuka nebʼawex ja bʼa yabʼal ja Dyosi. Wani xa kʼanawex oj cha kʼe awuʼex lech sok mi meran waʼeluk. 13 Sok ja maʼ wanto yujel lechi mini snaʼa sbʼaj ja yabʼal ja Dyos bʼa wa sjeʼakitik ja jas toji, yujni chʼinto. 14 Pe ja mero waʼelali jani sbʼaja matik tsatsxa ja skʼuʼajeleʼi,* sbʼaja matik snebʼunejexa spensarajel sok jachuk wa xbʼobʼ yil-e ja stukil ja bʼa jas lek soka bʼa mi lekuki.