Romanos

4 Ja yujil, ¿jasa oj kaltik lajxiyuj ja Abrahán, ja maʼ ekʼpaxtakujtiki? 2 La katik jun sjejel: lekbʼi aljukxta kʼotel toj ja Abrahán yuja jastik skʼulani, ojni ajyukyuj rason bʼa oj stoy sbʼaj ajyi, pe miyuk soka Dyosi. 3 Pes ¿jasa wa xyala ja Yabʼal ja Dyosi? «Ja Abrahán skʼuʼan bʼa Jyoba* sok ja yuj ilji kʼotel jun winik toj». 4 Pes ja maʼ wa x-aʼtijiʼi mi wa xtupji yuj wa sbʼajin ja lekil kʼujolali, pes jani wa xtupji yuja yaʼteli. 5 Jaxa winik mi jas skʼulani wani xkʼot iljuk kʼotel toj yuja skʼuʼajel yiʼoji, pes wani skʼuʼan sbʼaja Maʼ wa xyala kʼotel toj ja winik mi xiwyuj ja Dyosi. 6 Ja David cha yala sbʼaja sgustoʼil ja winik bʼa wa x-ilji kʼotel toj yuja Dyosi pe mi jaʼuk yuja jas wa skʼulani: 7 «Jel gusto wa x-ajyiye ja matik ajita perdon ja jastik malo skʼulaneʼi sok ja matik ajita perdon* ja smuleʼi; 8 jel gusto wa x-ajyi ja winik bʼa mixani tʼun oj ajuk kuenta ja smul yuja Jyoba».*

9 Anto, ¿kechan maʼ ja matik akʼubʼalyi senya ja swinkile ayiʼoje ja gustoʼil it, ma cha ayiʼoje ja matik mi akʼubʼalyi senya ja swinkileʼi? Yujni wa xkalatik: «Ja Abrahán ilji kʼotel jun winik toj yuja skʼuʼajel yiʼoji». 10 Pe ¿jas ora kʼot iljuk kʼotel toj? ¿Ja maʼ yajni ajitayi senya ja swinkili, ma jaʼa yajni mito x-ajiyi senya ja swinkili? Pes jani yajni mito akʼubʼalukyi senya ja swinkili. 11 Sok ajiyi jun senyal ja Abrahán, jani yajelyi senya ja swinkili, jastal seyoʼil ja bʼa stojolil yuja ajyiyuj skʼuʼajel ja yajni mito akʼubʼalukyi senya ja swinkili. Ja it ekʼi bʼa oj kʼot tatal sbʼa yibʼanal ja matik ayiʼoj skʼuʼajeli ama mi akʼubʼalukyi senya ja swinkileʼi, bʼa jachuk oj kʼot iljuk kʼotele toj, 12 sok bʼa oj kʼotuk tatal sbʼa jun intilal akʼubʼalyi senya ja swinkileʼi, pe mi kechanuk sbʼaja matik wa xyaweyi senya ja swinkileʼi, cha jachukni sbʼaja matik wa snochowe kʼubʼan lek ja skʼuʼajel ajyiyuj ja jtatik Abrahán ja yajni mito akʼubʼalukyi senya ja swinkili.

13 Yujni ja Abrahán ma ja yintili kʼapjiyile bʼa oj ajukyi jastal sdote jun luʼumkʼinal, pe mi jaʼuk yuja leyi, jani yuja ajyiyuj skʼuʼajeli sok jaxa Dyosi yala kʼotel toj. 14 Pe ta ja matik wa skisawe ja ley jaʼa matik oj yikan ja dote, ja skʼuʼajeli mini xmakuni jaxa skʼapjelali wa xchʼayi. 15 Ja smeranili, ja Leyi wa xyiʼajan tajkelal, pe jaxa bʼa mey leyi cha mini jas xkʼokxi.

16 Ja yuj ja Abrahán skʼulan resibir ja skʼapjelali yuja skʼuʼajel ajyiyuji, sok ja iti xchiktes ja lekil kʼujolal mi xbʼajixi bʼa Dyosi, bʼa jachuk ja skʼapjelali ojni kʼot axukyi meran yibʼanal ja yintili, sok mi kechanuk sbʼaja matik wa skisawe ja Leyi, cha jachukni sbʼaja matik wa skisawe ja skʼuʼajel ajyiyuj ja Abrahán, ja tatal bʼa kibʼanaltik ja keʼntiki. 17 (Jachni jastal tsʼijbʼunubʼal: «Kaʼunej ochan tatalil bʼa jitsan chonabʼik»). Ja it kʼapxi bʼa stiʼ sat Dyosi, sbʼaja maʼ wa skʼuʼan ja Abrahán, bʼa stiʼ sat ja maʼ wa xyayi sakʼanil ja chamwiniki sok ja maʼ wa staʼa tiʼal ja jastik mito kʼoteluki bʼa lajansok kʼotelxa smeranil. 18 Ja yeʼn skʼuʼan lek bʼa ojni kʼot tatalil bʼa jitsan chonabʼik, anima ja it lajansok nunka oj kʼot smeranil. Ja yeʼn skʼuʼani ja yajni aljiyabʼi: «Jachni sjitsanil oj kʼotuk jawa wintili». 19 Sok ama mini yopiji ja skʼuʼajel yiʼoji, pe wani xyaʼa sbʼaj kuenta ja yeʼn mixa xbʼobʼ untikanuk (pes ayxa yiʼoj junuk 100 jabʼil) sok jaxa Sara mixa xbʼobʼ yil yuntikil. 20 Pe yuja yeʼn skʼapunej ja Dyosi, ja yeʼn mini tʼun skʼulan dudar yuj ayto skʼanayuj skʼuʼajel. Pes aji tsatsbʼuk yuja skʼuʼajeli, ja yuj yayi stoyjel ja Dyosi 21 sok skʼuʼani lek wani xbʼobʼ ya kʼotuk ja jas kʼapubʼalyi yuja Dyosi. 22 Ja yujil, «ilji kʼotel jun winik toj».

23 Pe ja yaljelik «ilji kʼotel» mi kechan tsʼijbʼaji bʼa yeʼna, 24 cha jachni bʼa keʼntik, bʼa oj iljuk kʼotelotik toj yuja wani xkʼuʼantik sbʼaja Maʼ ya kʼeʼuk ja bʼa chamwinik ja Kajwaltik Jesús. 25 Ja yeʼn kʼulaji entregar yuja jmultiki sok aji sakʼwuk* bʼa oj aljuk kʼotelotik toj.