Filipenses

3 Sok tsaʼanxta kermano jumasaʼ, tolabida gusto ajyanik yuja Kajwaltiki. Mini wokoluk xkabʼ ja junxta wa stsʼijbʼanawilexi, sok sbʼajni alekilalex.

2 Talnabʼajik soka matik jachuke jastal ja tsʼiʼi; talnabʼajik soka matik wa xyajbʼesniyeʼi; talnabʼajik soka matik wa skʼanawe oja wawexyi senya jawa winkilexi.* 3 Yujni keʼntik ja matik akʼubʼalyi ja meran senya bʼa swinkili, ja matik wane yaʼteltajel ja Dyos stsʼakatal yuja skoltanel ja yip ja Dyosi* sok wantik stoyjel ja Kristo Jesús sok mi wa xjipa jkʼujoltik bʼa bʼakʼtelal.

4 Ta ay maʼ wa skʼana oj stoy sbʼaj yuja wa sjipa skʼujol bʼa bʼakʼtelali, ja keʼni mastoni oj bʼobʼ jtoy jbʼaj yuja yeʼni: 5 ajiyi senya ja jwinkil ja bʼa swaxakil kʼakʼu, tini jbʼaj bʼa xchonabʼil Israel, bʼa kʼole bʼa Benjamín, hebreoʼon sok hebreoʼe ja jnantat ajyi, kʼotyon jun fariseo* bʼa wa xyiʼaj ja leyi; 6 sok konganani lek kiʼaj spatik ja kongregasyon, sok jaxa bʼa yijel ja jastalni stojolil wa xyala ja leyi, ja keʼn jeʼa mini jas jmul. 7 Pe ja jastik wa xkila chaʼanyabʼal ajyi, ja wego mixa chaʼanyabʼaluk wa xkila* yuja Kristo. 8 Chomajkil, wani xkila lomxa yibʼanal ja jastik junuki yuja janekʼto chaʼanyabʼalil ja snajelil bʼa Kajwal Kristo Jesús. Yuj yeʼna kaʼakan achʼayuk yibʼanal ja jastik junuk sok wa xkila jastal jun monton tsʼilel, bʼa jachuk oj jkʼul ganar ja Kristo 9 sok bʼa oj kʼot najuk ke lajani ayon soka yeʼn, pe ja keʼn mini xkala kʼotelon toj yuj skʼuʼajel ja jas wa xyala ja Leyi, jani yuja skʼuʼajel kiʼoj bʼa Kristo ja alubʼal kʼotelon toji, ja tojil it ti wa xjak bʼa Dyos sok ti wa x-el bʼa skʼuʼajel. 10 Ja jas wa xkʼana jani snajel sbʼaj ja yeʼn, snajel janekʼto yip yiʼoj ja sakʼwelali sok yijel ja wokolik yiʼaji, sok bʼa oj chamkon jastal cham ja yeʼn, 11 bʼa jachuk ti oj ajyukon ja bʼa matik oj sakʼwuke bʼajtani.

12 Mi yuj ajitaki ja premio sok mi yuj mixa ay jmul, pes jelni wanon skʼujolajel bʼa oj kil ta oj bʼobʼ lajxukuj sbʼaja jas stsaʼawon* ja Kristo Jesús. 13 Kermano jumasaʼ, ja keʼn wa xkʼuʼan mitoni xlajxikuj. Pe wanoni skʼulajel ja it: xchʼayjel jkʼujol ja jastik kanta sok wa xtima jbʼaj bʼa oj jtaʼ ja jastik jakumi, 14 jelni wanon skʼujolajel bʼa oj jtaʼ ja jkʼelsati bʼa oj ajuki ja premio, ja premio jawi jani ajyel sakʼan bʼa satkʼinal, bʼa ojni yayile ja Dyos ja matik spayunej stsʼakatal ja Kristo Jesús. 15 Ja yujil, ja matik tsatsxa ja skʼuʼajel kiʼojtiki* la ajyukujtik ja junxta pensar it, sok ta bʼa jun modo tuk ja jas waxa pensaranexi, ja Dyosi ojni skoltayex bʼa oja pensaraʼukex toj. 16 Chikan janekʼ takʼanbʼelotik, mok katikan ajyel toj lek ja bʼa junxta bʼej jaw.

17 Kermano jumasaʼ, awibʼanalex junxta lajan nochowik ja jmodo sok aʼasatex ja matik yiʼoj ja sakʼanile jastalni ja sjejel katikonawilexi. 18 Yujni ay jitsan yiʼoje ja sakʼanile jastal skontraʼik ja sposte bʼa yijel wokol* ja Kristo, ja ajyi tikʼan wa xtaʼawe tiʼal sok jaxa wego wa xtaʼawe tiʼal sok yalel jsat. 19 Pe ja jastal oj eluke kʼoti jani ja xchʼakelaleʼi sok jani sdyose ja jas wa xkʼankʼuniyuj ja skuerpoʼeʼi; jel stoyo sbʼaje yuja jastik tʼilan oj kʼixwukyujileʼi sok jani wajel skʼujole ja jastik bʼa luʼumi. 20 Pe ja keʼntiki tini jbʼajtik bʼa satkʼinal. Sok gustoxta wantik smajlajel jun koltanum, jani ja Kajwaltik Jesukristo, bʼa tini ay bʼa satkʼinal, 21 bʼa oj ya paxuk ja jkuerpotik it mi chaʼanyabʼaluki jastal ja skuerpo jel chaʼanyabʼal yuja niwan yipi, stsʼakatal ja jaw wa xkoltaji bʼa oj ajyuk bʼa yibʼ skʼabʼ yibʼanal ja jastik junuki.