Romanos
6 Anto, ¿jasa oj kaltiki? ¿Tʼilan maʼ oj jnochtik slejel ja jmultik bʼa oj jitsanbʼuk ja lekil kʼujolal mi xbʼajintiki? 2 ¡Miniʼa! Pes yuja libre xa aytik sbʼaja mulali, ¿jastal modo sigue oj jleʼ jmultik? 3 ¿Yuj maʼ mixa naʼawex ke kibʼanaltik ja matik kiʼajtik jaʼ bʼa Kristo Jesús kiʼajtikni jaʼ bʼa xchamelal? 4 Ja yuj lajan mukjitik soka yeʼn yajni kiʼajtik jaʼ ja bʼa xchamelali, bʼa jachuk, jastalni aji kʼeʼuk ja Kristo ja bʼa chamwinik yuja yip ja Tatali, cha jachuk ja keʼntiki oj kitik jun yajkʼachil sakʼanil. 5 Yujni ta chamtikta jastal yeʼn, ja keʼntiki ojni cha ajuk sakʼwukotik jastal yeʼna, sok jachuk lajan aytik soka yeʼni. 6 Yujni wa xnaʼatik ja poko jmodotiki lajan aji kʼe lokan ja bʼa poste soka yeʼni, bʼa jachuk ja jkuerpotik bʼa ayiʼoj mulali oj chʼayuk ja yipi sok jachuk oj katikan ajyel mosoʼil yuja mulali. 7 Yujni ja maʼ wa xchami ti wa xkan libre soka smuli.*
8 Chomajkil, ta chamtikta soka Kristo, wani xkʼuʼantik cha ojni ajyukotik sakʼan soka yeʼni. 9 Yujni wa xnaʼatik ja Kristo, bʼa ajita kʼeʼuk ja bʼa chamwinik ja wego, mixa nunka oj chamuk; mixani xbʼobʼ ajuk ibʼ kʼabʼal yuja chamelali. 10 Pes yajni cham ja yeʼn, jun ita buelta cham bʼa yajel eluk ja mulali, pe ja sakʼanil yiʼoji, jani bʼa skʼulajel ja jas wa skʼana ja Dyosi. 11 Jachni ja weʼnlexi, ilawik lajansok chamelexa bʼa yijel jun sakʼanil bʼutʼel mulal, pe ajyanik sakʼan bʼa skʼulajel ja jas wa skʼana ja Dyos yuja Kristo Jesús.
12 Ja yujil, moka waʼexkan ja mulali a-skʼul mandar jawa kuerpoʼex wa xchami bʼa jachuk mi oja kʼuʼukexyi ja jas wa xkʼankʼuniyuji. 13 Cha awikxakan skʼapjel jawa kuerpoʼex ja bʼa mulali jastal armaʼik bʼa skʼulajel ja bʼa jastik mi tojuki. Mas lek, kʼapabʼajik soka Dyosi jastal ja matik chamyeta sok ekʼyeta bʼa sakʼanil sok kʼapawikyi jawa kuerpoʼex ja Dyos jastal armaʼik bʼa skʼulajel ja bʼa jastik toji. 14 Mini sbʼejuk oja wajwalukex ja mulali, yujni ja weʼnlexi mi ibʼ kʼabʼal ayukex yuja leyi, pes jani ibʼ kʼabʼal ayex yuja lekil kʼujolal mi xbʼajintiki.
15 Anto, ¿jastalxa? ¿Oj maʼ jleʼ jmultik yuja mi ibʼ kʼabʼal ayukotik yuja leyi sok jaʼ ibʼ kʼabʼal ayotik yuja lekil kʼujolal mi xbʼajintiki? ¡Miniʼa! 16 ¿Yuj maʼ mixa naʼawex ta ay maʼ waxa kʼapabʼajexsok jastal mosoʼal bʼa kʼuʼabʼal ay, wani la ochyex mosoʼil sbʼaja maʼ kʼuʼabʼal wala ajyiyexsoki? Sea ta jaʼ soka mulal bʼa wa x-ikʼwani bʼa chamelali, ma jaʼ soka ajyel kʼuʼabʼal bʼa wa x-ikʼwani och ja bʼa jas toji. 17 Pe stsʼakatal ja Dyosi, ama ja weʼnlex ajyiyex mosoʼil soka mulali, kʼuʼabʼalni wajyex sok spetsanila kʼujolex sbʼaja tikʼe sjejel ajikanawilexi. 18 Jachukniʼa, yuja aji elanik libre ja bʼa mulali, ochyex mosoʼil ja bʼa jas toji. 19 Wanon yajel makunuk yaljelik bʼa kʼajyel wa xyalawe ja kristyano yujni mi yijukex yuja mulali. Jastalni awaʼawex jawa kuerpoʼex jastal mosoʼil sbʼaja jastik jel kuxi sok sbʼaja jastik mi lekuk bʼa skʼulajel ja jastik malo, ja wego aʼawik jawa kuerpoʼex jastal mosoʼal ja bʼa jas toji bʼa skʼulajel ja bʼa jas mi kuxuki.* 20 Pes yajni moso ajyiyex yuja mulali, mini ibʼ kʼabʼal ajyiyex yuja bʼa jas toji.
21 Anto, ¿jastik maʼ satinel waxa wawex ajyuk ja bʼa tyempo jaw? Jani sbʼaja jastik wanxa la kʼixwiyexyuj ja wego. Yujni ja jas wa xyiʼajan ja jastik jawi jani ja chamelali. 22 Pe ja wego yuja ajita elanik libre ja bʼa mulali sok kʼotyexta smoso ja Dyosi, ja satinel waxa wawex ajyuki jani ja bʼa jas mi kuxuki* sok wa x-ikʼwani och bʼa sakʼanil bʼa tolabida. 23 Yujni ja stsʼakol wa stupu ja mulali jani ja chamelali, pe ja majtanal wa xyaʼa ja Dyosi jani ja sakʼanil bʼa tolabida yuja Kajwaltik Kristo Jesusi.