Romanos

8 Ja yujil, ja matik lajan aye soka Kristo Jesús mini ay smule. 2 Yujni ja ley bʼa yip ja Dyos* bʼa wa xyayi sakʼanil ja matik lajan ay soka Kristo Jesús ya elan libre ja bʼa ley bʼa mulali sok ja bʼa chamelali. 3 Ja Dyosi skʼulan ja jas mi lajxiyuj skʼulajel ja Leyi, yujni ja it mey yip ajyi yuja bʼakʼtelali. Sjeka ja mero Yunini jastal splanta ja kristyano mulanumiki bʼa jachuk oj xchʼaysnajel ja mulali.* Sok jachuk yala ja jas oj ekʼ sbʼaj ja mulal ja bʼa bʼakʼtelali, 4 bʼa jachuk oj kʼotuk bʼa keʼntik ja jas toj wa xkʼanxi bʼa Leyi, ja matik wa stojowotik ja yip ja Dyosi* sok mi jaʼuk ja bʼakʼtelali. 5 Yujni ja matik tojubʼale yuja bʼakʼtelali jani wa xwaj skʼujole ja jastik bʼa bʼakʼtelali, pe ja matik tojubʼale yuja yip ja Dyosi* jani wa xwaj skʼujole ja jastik bʼa yip ja Dyosi. 6 Ja matik wa xwaj skʼujole ja bʼa bʼakʼtelali wani x-ijiye och bʼa chamelal, jaxa matik wa xwaj skʼujole ja bʼa yip ja Dyosi* wani x-ijiye och bʼa sakʼanil sok bʼa lamanil; 7 ja matik wa xwaj skʼujole ja bʼa bʼakʼtelali wani x-ijiye och bʼa skontraʼajel ja Dyosi, pes ja bʼakʼtelali mini ibʼ kʼabʼal ayuk soka sley ja Dyosi sok mini xbʼobʼ ajyuk ibʼ kʼabʼal. 8 Ja yuj ja matik tojubʼale yuja bʼakʼtelali mini xbʼobʼ yawe gustoʼaxuk ja Dyosi.

9 Pe ta teya mokex meran lek ja yip ja Dyosi,* ja weʼnlexi mini jaʼ wa stojowex ja bʼakʼtelali, jani ja yip ja Dyosi. Pe ta ay june mi jaʼuk yiʼoj ja spensar ja Kristo, mini sbʼajuk yeʼna. 10 Pe yujkʼa ja Kristo lajan aya mokex, ja kuerpoʼali chamelni ay yuja mulali, jaxa yip ja Dyosi* wa xyaʼa sakʼanil yuja bʼa toji. 11 Pes ja yip ja Dyosi* ya kʼeʼuk ja Jesús ja bʼa chamwiniki. Sok ta teya mokex ja ipal jawi, ja it ya kʼeʼuk ja Kristo Jesús ja bʼa chamwiniki, oj ajuk makunuk ja ipal jaw bʼa yajelyi sakʼanil jawa kuerpoʼex wa xchami.

12 Ja yuj tak, kermano jumasaʼ, obligadoni aytik, pe mi jaʼuk skʼuʼajelyi ja bʼakʼtelali sok ja jastik wa xkʼankʼuniyuji. 13 Ta ja weʼnlexi jaʼ tojubʼalex yuja bʼakʼtelali, ojni chamanik. Pe ta soka yip ja Dyosi* waxa milawex ja jastik mi lekuk wa skʼulan ja kuerpoʼali, ojni ajyanik sakʼan. 14 Yujni yibʼanal ja matik tojubʼale yuja yip ja Dyosi* kʼoteleni yuntikil Dyos. 15 Ja weʼnlexi mi ajiwilex ja yip ja Dyos* bʼa oj ajyanik mosoʼil sok oj ya xiwanik. Ja weʼnlexi ajiniwilex ja yip ja Dyos bʼa oj kʼotanik jastal yuntikil, ja ipal it bʼa wa snikawotik yaljel: «¡Abba,* Tat!». 16 Ja yip ja Dyosi* yeʼn mismo wa xya jnatik kʼinal kʼotelotik yuntikil Dyos. 17 Anto, ta kʼotelotik yuntikil, sbʼejni oj ajukitik ja doteʼi, wa xkʼan kaltik, ja dote oj ya ja Dyosi. Sok junxtani dote oj ajukitik soka Kristo, pe jani ta kiʼajtik wokol soka yeʼn bʼa jachuk oj cha ajukitik ja chaʼan cholal soka yeʼni.

18 Ja yuj wa xpensaraʼan ja wokolik ja bʼa tyempo it mini tʼun oj slaj ja niwan jtsʼakoltik oj sjeʼ ja Dyos ja bʼa tyempo jakumi. 19 Yujni ja kʼulbʼeniki kʼelan jakanxta wane smajlajel ja tyempo oj chijkajuk ja yuntikil ja Dyosi. 20 Pes ja kʼulbʼeniki chʼikji bʼa jun sakʼanil mi xmakuni, mi yuj yeʼn jach skʼana, jani yuja maʼ chʼikjiyuji, jaxa yeʼn ya makunuk ja smajlajel 21 bʼa ojni cha ajuk el libre ja kʼulbʼenik sbʼaja mosoʼil ja bʼa jastal wala jomtiki sok oj ajyuke libre jastal ja yuntikil ja Dyosi. 22 Wani xnaʼatik yibʼanal ja kʼulbʼeniki junta lajan wane mebʼa okʼel sok wane yabʼjel syajal man wego. 23 Mi kechanuk ja jawi, cha jachukni ja keʼntik bʼa akʼubʼalkitik ja bʼajtan parte ja jtsʼakoltiki, bʼa jani ja yip ja Dyosi,* cha wantikni mebʼa okʼel ja bʼa jkʼujoltiki malan wantikxta smajlajel bʼa oj kʼotkotik jastal yuntikil ja Dyosi. Ja yeʼn wani xbʼobʼ skʼuluk ja it yujni ja Kristo stupu* bʼa oj elkotik libre ja bʼa jkuerpotiki. 24 Yujni aji elkotik libre soka smajlajel jawi. Pe ja smajlajel bʼa wa x-ilxi mini smajlajeluk, pes ¿jastal modo ay maʼ oj bʼobʼ smajla jun jasunuk ta wanxa xyila? 25 Pe ta wa xmajlatik ja jas mi xkilatiki, wani xkuchkujtik* smajlajel sok spetsanil jkʼujoltik.

26 Junxtani soka it, ja yip ja Dyosi* wa xjak skoltayotik ja yajni mey kiptiki. Pes yujni ay ekʼele mi xnaʼatik ja jasa tʼilan oj jkʼantik ja bʼa korasyontiki, pe ja yip ja Dyosi yeʼn mismo wa spata kʼujolal yuj keʼntik ja bʼa jastik wa syatsʼa jkʼujoltiki.* 27 Pe ja Dyosi, ja maʼ wa spaklay ja jkʼujoltiki, wani snaʼa ja jas wan skʼanjel ja yip* yuja matik tsaʼubʼalexa sbʼaja Dyosi yujni akuerdo ay soka jas wa skʼana.

28 Wani xnaʼatik yibʼanal ja jas wa skʼulan ja Dyosi wani xyaʼakan aʼatijuke lajan bʼa slekilal ja matik wa xyajtajiyuji, ja matik spayunej ja yeʼn jastalni wa skʼana. 29 Yujni ja matik snaʼaxa sbʼaj* bʼajtani cha bʼajtanxa stsaʼa bʼa oj kʼotuke jastal ja Yunini, bʼa jachuk yeʼn oj kʼotuk ja bʼajtan uninal ja bʼa jitsan hermanoʼiki. 30 Chomajkil, ja matik bʼajtanxa stsaʼa, cha spayaniʼa; jaxa matik spaya, cha yala kʼotele toj. Sok jaxa matik yala kʼotele toji, cha yayile toyjelal.

31 Anto, ¿jasa oj kaltik sbʼaja jastik it? Ta tey bʼa jpartetik ja Dyosi, ¿machun oj bʼobʼ ajyuk kontra jmoktik? 32 Ja yeʼn asta mini yaʼa perdon ja sakʼanil ja Yunini, pes yaʼani bʼa kibʼanaltik. Ja yuj tak, jastalni yakitik ja Yunini, ¿mi maʼ cha ojni yakitik sok spetsanil skʼujol yibʼanal ja tuk jasunuki? 33 ¿Machunkiluk oj sleyi smul ja matik stsaʼunej ja Dyosi? Pes yeʼnani ja Dyos ja Maʼ wa xyala kʼotele toji. 34 ¿Machunkiluk oj yal jas oj ekʼ sbʼaje? Yujni cham ja Kristo Jesusi sok aji sakʼwuk* ja bʼa chamwiniki, ja yeʼn tey bʼa stojol skʼabʼ ja Dyosi sok yeʼnani wa spatayi skʼujol yuj keʼntik.

35 ¿Machunkiluk oj spilotik ja bʼa syajal skʼujol ja Kristo? ¿Ja maʼ ja wokoli? ¿Ja maʼ ja chamkʼujoli? ¿Ja maʼ ja ijel jpatiktiki? ¿Ja maʼ ja waʼini? ¿Ja maʼ ja mey jkʼutiki? ¿Ja maʼ ja jas xiwela sbʼaji? ¿Ja maʼ ja espada? 36 Jachni tsʼijbʼunubʼal: «Sok spetsanil tyempo wantikon miljel yuj weʼna. Wala iljitikon jastal chejik bʼa oj miljuke». 37 Pe stsʼakatal ja maʼ syajtayotiki, jkʼulunejtik ganar yibʼanal ja jastik junuk iti. 38 Yujni jkʼuʼunej lek mini chamelal sok mini sakʼanil, mini anjelik sok mini gobyernoʼik, mini ja jastik bʼa wego sok mini ja jastik jakumi, mini ipal, 39 mini jun jasunuk tey bʼa kʼeʼel sok mini jun jasunuk tey bʼa koʼel, mini jun jasunuk kʼulubʼal oj bʼobʼ spilotik ja bʼa syajal skʼujol ja Dyos ja it tey bʼa Kajwaltik Kristo Jesusi.