¿Jastal tʼilan oj jkʼuluktik ja korasyontik bʼa oj smaklayotik ja Dyosi?

LA KATIKYI ORASYON JA JYOBA BʼA SBʼIʼIL JA JESÚS

«Ta waxa kʼanawexyi chikan jasa ja Tatal bʼa jbʼiʼil, ja yeʼn ojni yawilex» (Juan 16:23, TNM).

Ja jas yala ja Jesús wa sjeʼakitik ja Jyoba wani skʼana oj katikyi orasyon bʼa yeʼna, mini oj katik makunuk imajenik, santoʼik, anjelik ma pamilyaʼik bʼa chamelxa, sok wa skʼana oj katik ekʼ bʼa sbʼiʼil ja Jesukristo. Yajni ja korasyontik wa xkatik ekʼ bʼa sbʼiʼil ja Jesús, wa xjeʼatikyi ja Dyos wa xnaʼatik wani smaklayotik stsʼakatal yuja jas skʼulunej ja Jesús yuj bʼa keʼntik. Ja Jesús yala: «Mini maʼ xbʼobʼ kʼotuk soka Tatal ta mi jaʼuk yuja keʼni» (Juan 14:6, TNM).

LA KATIK EL MAN JKʼUJOLTIK

«Bʼa stiʼ sat ja yeʼn jamawik yi yibʼanal jawa kʼujolexi» (Salmo 62:8).

Yajni wa xkatikyi orasyon ja Jyoba, tʼilani oj jkʼuluktik jastalni wa xkʼumantik jun tatal bʼa jel syajtayotik. Jaʼukto maʼ ti oj jkʼumuktik bʼa jun libro ja orasyonik ma skʼulajel ja bʼa jnebʼunejtikxa, tʼilani oj jetik wa xkisatik ja Dyos ja yajni wala loʼilanitik soki sok yajel el man jkʼujoltik.

LA JKʼANTIKYI JA DYOS JASTIK JUNUK BʼA LEK XYILA JA YEʼN

«Chican jasuncʼa huax cʼanatic yii. Ta jach cʼa huas cʼana ja yen, oj ni yaa quitica» (1 Juan 5:14).

Ja bʼa Biblia wa xyala kabʼtik ja jas oj skʼuluk ja Dyos bʼa keʼntik sok ja jas wa smajlay oj jkʼuluktik ja keʼntik bʼa yeʼna. Bʼa oj skis kitik ja korasyontiki, tʼilan oj jkʼuluktik bʼa akwerdoni ay soka jas «huas cʼana ja yen». Bʼa oj bʼobʼkujtik, tʼilani oj jpaklaytik ja Biblia, sok jachuk oj kʼot jnatik sbʼaj mas. Jach jastal jaw, ja yeʼn gusto lek oj smaklayotik.

¿JASTIK JUNUK OJ BʼOBʼ JKʼANTIK JA BʼA ORASYON?

La jkʼantikyi bʼa orasyon ja jnesesidatik. Oj bʼobʼ jkʼantikyi ja Dyos a-skoltayotik bʼa oj jtatik ja jnesesidatik mas tʼilani, jastal ja jwaʼeltik, ja jkʼutik ma xen lugar bʼa oj ajyukotik. Cha oj bʼobʼ jkʼantikyi a-skoltayotik stsajel bʼa jastik lek oj jkʼuluktik sok aya kiptik bʼa oj kuchkujtik ja prebaʼik. Chomajkil, oj bʼobʼ jpatikyi skʼujol ayaʼotik perdon, ayakitik mas skʼuʼajel sok a-stalnayotik (Lucas 11:3, 4, 13; Santiago 1:5, 17).

La katik orasyon yuj bʼa tuk. Ja lekil tatalik jel sgustoʼe ja wa syajtay sbʼaje ja yuntikile. Ja Jyoba yeʼn ja jTatiki, ja yuj wani skʼana oj jtalnay jbʼajtik lajan soka tuki. Jelni lek ja oj katikyi orasyon yuja jcheʼumtik ma ja jtatamtik, yuja kuntikiltik, yuja jpamilyatik sok yuja kamigotik. Ja nebʼuman Santiago yala: «Kʼulanik orasyon yuj bʼa tuk» (Santiago 5:16, TNM).

La katik tsʼakatal. Ja Biblia wa xyala ja jKʼulumantiki skʼulan jastik junuk lek yuja bʼa tuk: «Huax ya co jan quitic ja jai. Mi scʼulan quitic palta ja juaeltiqui. Jel ja jas huax yaa quitic ba gusto oj ajyucotic» (Hechos 14:17). Yajni wa x-och jpensaraʼuktik spetsanil ja jastik skʼulunej ja Dyos yuj bʼa keʼntik, ojni kʼankʼunuk kujtik yajelyi tsʼakatal. Pe cha tʼilani oj jetik wa xkatikyi tsʼakatal skʼuʼajelyi ja jastik yaʼunejkan kulani (Colosenses 3:15).

LA AJYUKUJTIK PASENSYA SOK MOK KATIKAN YAJELYI ORASYON

Bʼobʼta ayni ekʼeleʼik oj el jganatik ta mi wegoxta wa xjakʼjikitik ja korasyontik elel man jkʼujoltiki. ¿Wan maʼ stojolan ja jaw mi xcham skʼujol bʼa keʼntik ja Dyos? ¡Mini jachukuk! La kiltik jujuntik sbʼaja jas ekʼel sbʼaje ja tuk bʼa wa sjeʼakitik, ayni ekʼeleʼik, kechantani mi oj katikan yajelyi orasyon.

Ja bʼa bʼajtan artikulo jtaʼatik tiʼal sbʼaja Steve. Ja yeʼn cha wa xcholo ja jas ekʼ sbʼaji: «Mokxta jaʼuk yuja orasyoni, ayxani jabʼilik elel jgana». ¿Jasa koltaji yuj? Ja yeʼn kʼe spaklay ja Biblia sok snebʼa tʼilani oj yayi orasyon jitsan ekʼele. Ja Steve wa xyala: «Wa xkayi tsʼakatal ja Dyos yuj spetsanil ja koltanel sok ja yajtanel wa xyaweki ja kamigoʼiki. Ja wego masxani jel gustoʼayon».

¿Sok jasa ekʼ sbʼaj ja Jenny, bʼa wani xyabʼ mixani sbʼajin ja ojto maklajuk yuja Dyosi? Ja yeʼn wa xyala: «Yajni jel wokol wan ekʼelkuj, jpatayi skʼujol ja Dyos a-skoltayon yabʼjel stojol jas yuj ja jel malo ayon wa xkabʼ». ¿Jastal koltaji yuj ja orasyon? «Loʼilanel soka Dyos skoltayon bʼa oj kil jbʼaj jastalni wa xyilawon ja yeʼn. Jnaʼa kʼinal, yajni ja jkʼujoli wa stʼenawon, ja Dyosi mini wa skʼulan. Cha skoltayon bʼa mi oj el jgana». ¿Jasa ekʼi? «Ja orasyoni skoltunejon bʼa oj kʼot kil ja Jyoba jastal jun amigo bʼa mi x-akʼwanikan, jun Tatal jel xyajtani sok jun Dyos sakʼan. Ja yeʼn tolabida ti oj ajyuk jmok sok oj skoltayon ta wa xkʼujolan skʼulajel ja jas wa skʼana ja yeʼn».

Ja wego la kiltik ja jas ekʼ sbʼaj ja Isabel. Yajni tukbʼel satkʼinal ay, aljiyabʼ yuja loktoriki oj pojkuk ja yalatsi jach mi tsʼikanuk ay. Yabʼ lajansok mixani ay stojol ja sakʼanili. Ayni jujuntik alji yabʼ mas lek a-sjipe. Ja yeʼn wa xyala: «Ja bʼa ekʼele jaw jkʼuʼan ojni chamkon yuja syajali». ¿Jasa skʼulan? «Tikʼanxta kayi orasyon ja Dyos bʼa a-skoltayon». Yajni ekʼ ja tyempo pojki ja yalatsi, bʼa yawe sbʼiʼiluk Gerard, bʼa mini tsʼikanuk ja skwerpo. ¿Yabʼ maʼ ja Isabel jakʼyi ja yorasyonik yuja Dyosi? ¡Jakʼjiniʼa! ¿Sok Jastal skʼulan? «Tsaʼan yajni ekʼta 14 jabʼil, ja jkerem Gerard yeʼnani kʼotel ja jniwan majtanal. Yiljel ja jkerem wan yabʼjel stsamalil ja sakʼanili, anima mi tsʼikanuk ay ja skwerpo, jani kʼotel ja lekil sjakʼjelik ja bʼa korasyoniki».

Ja yaljelik it bʼa jel xnikwani wa xya juljkʼujoltik ja jas yala ja tsʼebʼanumi: «Pe ja weʼn ojniʼa maklay ja yorasyon ja mansoʼiki, ah Jyoba. Tsatsni oja wa ajyuk ja skʼujoli sok altantoxtani oj ajyan bʼa yeʼnle» (Salmo 10:17). ¿Anke jel meran ay kiʼojtik lekil rasonik bʼa mi oj katikan skʼuljel orasyon?

Ja bʼa Biblia wa xbʼobʼ jkʼumuktik ja jitsan orasyonik skʼulan ja Jesús. Ja mas jel naʼubʼal sbʼaji, jani ja it sjeʼakanyi ja snebʼumaniki. ¿Jasa wa xnebʼatik ja bʼa orasyon jaw?