Jelni lek ja oj mojxukotik soka hermanoʼik

1, 2. ¿Jasa jel tʼilan sbʼaja Jyoba, sok jasa wa skʼana oj jkʼuluktik?

JA JASTAL wa xkilatik ja tuk jelni tʼilan sbʼaja Jyoba. Ja Jesús sjeʼa ke tʼilani oj yajtaytik ja tuk jastal wa xyajtay jbʼajtik ja keʼntik (Mat. 22:​37-39). Ja it tini chʼikan sjejel lekil jmodotik soka matik mi xyaʼteltaye ja Jyoba. Jachuk wa xnochotik ja kala Tatik bʼa satkʼinal, ja maʼ «wa xya eluk ja kʼaʼuji sbʼaja matik leki sok sbʼaja matik malo, sok wa xya koʼyi jaʼ ja matik toji sok mi tojuki» (Mat. 5:45).

² Ama ja Jyoba wa syajtay spetsanil ja kristyano, pe mastoni wa syajtay ja matik wa xkʼuʼajiyuji (Juan 14:21). Sok wani skʼana ke oj jnochtik, ja yuj wa stsatsankʼujolanotik bʼa oj ‹yajtaytik meran lek› ja kermanotik sok ‹yajxta oj kiltike› (1 Ped. 4:8; Rom. 12:10). Ja tikʼe yajtanel jaw oj slaj ja jastal wa xjeʼatikyi jun jpamilyatik ma jun lekil kamigotik.

3. ¿Jasa tʼilan oj ka juljkʼujoltik sbʼaja yajalkʼujoli?

³ La ka juljkʼujoltik ke ja yajalkʼujoli jach jastal jun yal nichim, bʼa oj kʼiʼuk tʼilani oj talnaxuk sok yajel och yalel. Ja yuj, ja jekabʼanum Pablo yala yabʼ ja snochumanik Kristo: «Moka waʼexkan syajtajela bʼajex jastal wa syajta sbʼaj jun pamilya» (Heb. 13:1). Ja Jyoba wa skʼana mok katikan yajel tsatsbʼuk ja yajtanel kiʼojtik sbʼaja tuki. Ja bʼa artikulo it, oj kiltik jas yuj tʼilan oj mojxukotik mas soka hermanoʼik sok jastal mi oj katikan skʼulajel.

¿JAS YUJ TʼILAN OJ MOJXUKOTIK MAS SOKA HERMANOʼIK?

4. ¿Jasa oj skoltayotik bʼa mi oj katikan yiljele chaʼanyabʼal ja kermanotik? (Cha kʼela ja potoʼik).

⁴ (Kʼuman ja Salmo 133:1). «Jelni lek sok wa xyaʼa gusto» yamigoʼajel ja matik wa syajtaye ja Jyoba, jastalni yala ja tsʼijbʼanum bʼa Salmo 133. Pe xiwelani sbʼaj bʼa mixa chaʼanyabʼal oj kiltik ja jastal tsamal tsoman aytik soka kermanotik. Ojni bʼobʼ ekʼ jbʼajtik jastal jun kristyano bʼa kada kʼakʼu wa xyila jun niwan teʼ, pe yajni wa x-ekʼ ja tyempo mixa xyayi stʼilanil. Yuja tikʼanxta wa xkilatik ja kermanotik, ¿jasa oj skoltayotik bʼa mi oj katikan yiljele chaʼanyabʼal? Jani spiljel tyempo bʼa spensarajel jas yuj jel chaʼanyabʼale bʼa keʼntik sok sbʼaja kongregasyoni.

5. Yuja yajtanel wa xjeʼa jbʼajtik, ¿jasa wa xnikjiye jujuntik?

⁵ Yajni ja kristyano wa xwajye bʼajtan ekʼele ja bʼa jreuniontik, chamtoni wa xyilawe ja yajtanel wa xjeʼa jbʼajtik, sok wani skʼuʼane ke jani it ja smeranil. Ja yuj ja Jesús yala: «Ta waxa yajta abʼajex, jach oj snaʼe yibʼanal kristyano ja weʼnlexi kʼotelex jnebʼumanik» (Juan 13:35). La kiltik ja yexperiencia jun akʼix sbʼiʼil Chaithra bʼa kʼe skʼul estudiar soka Testigoʼik. Ja yeʼn waj bʼa june ja bʼa asambleaʼik bʼa oxe kʼakʼu sok yajni chʼak ja programa bʼa bʼajtan kʼakʼu yala yabʼ ja maʼ wa x-ajiyiyuj estudio: «Ja jnantati nunka bʼa stelunejoneʼa. Pe ja kʼakʼu it jelni maʼ stelawon. Kabʼ ke ja Jyoba ya makunuk ja xchonabʼ bʼa oj sjeki ja yajtanel yiʼoj jmok. Ja yuj, wani xkʼana oj ajyukon ja bʼa spamilya». Ja Chaithra mini yaʼakan skʼulajel estudiar ja Biblia sok yiʼaj jaʼ bʼa 2024. Yajni ja tuk wa xyilawe ja jastik lek wa xkʼulantik, bʼa tini chʼikan ja yajtanel wa xjeʼa jbʼajtiki, jitsan ekʼele wa xnikjiye bʼa oj yaʼteltaye ja Jyoba (Mat. 5:16).

6. ¿Jas yuj jun lekil koltanel ja hermanoʼik?

⁶ Mojxel mas soka hermanoʼik cha wani stalnayotik. Ja Pablo yala yabʼ ja snochumanik Kristo: «Moka waʼexkan stsatsankʼujolajel abʼajex kada kʼakʼu [ ...] bʼa jachuk ja yip jel xloʼlani ja mulali mi oj ya chʼuʼuybʼananik mini june bʼa weʼnlex» (Heb. 3:13). Ja yuj, ta yopiji ja jkʼuʼajeltik sok xkabʼtik wantik spiljel jbʼajtik ja bʼa tojil bʼej, ja Jyoba wani xbʼobʼ ya makunuk june ja bʼa kermanotik bʼa oj skoltayotik (Sal. 73:​2, 17, 23). ¡Jelni lek yuja ay kiʼojtik ja koltanel it!

7. ¿Jasa wa snikawotik ja yajalkʼujol sok jasa slekilal wa x-ilxi? (Colosenses 3:​13, 14).

⁷ Wani xkilatik jitsan slekilal yuja teytik bʼa jun tsome kristyano bʼa jel skʼujolane syajtajel sbʼaje (1 Juan 4:11). Jun sjejel, ja yajalkʼujol wa snikawotik bʼa oj tekʼ jbʼajtik sok ja yuj meran tsoman aytik (Efes. 4:​2-6; kʼuman ja Colosenses 3:​13, 14). Kechantani ja bʼa reunionik wa xbʼobʼ kiltik ja gustoʼil sok ja lamanil it bʼa mini xtax bʼa pilan lado.

LA JKIS JBʼAJTIK

8. ¿Jastal wa skoltayotik ja Jyoba bʼa ajyel tsoman?

⁸ Stsʼakatal yuja Jyoba wani xbʼobʼ ajyukotik tsoman soka kermanotik bʼa sutanal ja luʼumi ama yuja jpaltatik (1 Cor. 12:25). Ja Biblia wa xyala: «Yeʼn mismo ja Dyos wan sjejelawilex oja yajta abʼajex» (1 Tes. 4:9). Wani skʼulan ja it yajni wa xya makunuk ja Yabʼali bʼa wa xyalakabʼtik ja jas oj jkʼuluktik bʼa mojxel mas soka kermanotik. Jaxa keʼntik, wa xkaʼatikan oj sjekitik ja Jyoba yajni wa xpaklaytik lek ja jas wa xyalakabʼtik sok wa xkatik makunuk (Heb. 4:12; Sant. 1:25). Jani it ja jas wa xkʼujolantik skʼulajel jastal Testigoʼik.

9. Jastalni wa xyala ja Romanos 12:​9-13, ¿jas wa stojolan ja yaljelik: «Weʼnto bʼajtan jeʼawik waxa kisa bʼajex»?

⁹ ¿Jastal oj bʼobʼ skoltayotik ja Yabʼal ja Dyos bʼa mojxel mas soka kermanotik? La kiltik ja jas yala ja Pablo ja bʼa Romanos 12:​9-13 (kʼuman). Sok la waj jkʼujoltik ja yaljelik: «Weʼnto bʼajtan jeʼawik waxa kisa bʼajex». ¿Jas wa stojolan? Jani tʼilan oj jletik modoʼik bʼa sjejel yajxta wa xkila jbʼajtik, jastal yajel jbʼajtik perdon sok ajyel jaman jkʼujoltik (Efes. 4:32). Mokni jmajlaytik bʼa yeʼn oj mojxukejan ja tuki, la jkʼujoluktik bʼa keʼn bʼajtan oj jkʼuluktik. Jachuk oj kiltik jastal wa xkʼot smeranil ja yaljelik it bʼa Jesús: «Masni wa xyaʼa gustoʼil ja yajeli ke yuja oj ajukawiʼi» (Hech. 20:35).

10. ¿Jas oj jkʼuluktik yajni ay maʼ wa xmakuniyuj koltanel? (Cha kʼela ja poto).

¹⁰ Yajni ja Pablo yala ke keʼnto bʼajtan oj jetik wa xyajtay jbʼajtik, tixa cha yala ja it: «Aʼtijananik, mok paxanik jaraganil». June maʼ wa x-aʼtiji konganani wa skʼulan sok yajni wa x-ajiyi jun aʼtel wegoni wa skʼulan. Ja Proverbios 3:​27, 28 wa xyakitik ja rason it: «Moka wakan skʼulajelyi ja bʼa lek ja matik wa sbʼajin, ta wa xbʼobʼa koltayi». Ja yuj, ta kilatik ay maʼ wa xmakuniyuj koltanel, la jkʼuluktik ja janekʼ wa xbʼobʼkujtik bʼa oj koltaytik. Wegoxta ay jas la jkʼuluktik sok mok jpensaraʼuktik ke pilan maʼ oj skoltay (1 Juan 3:​17, 18).

11. ¿Jas pilan modo wa xjeʼatik ke wa xkisatik ja tuk?

¹¹ Pilan modo bʼa sjejel wa xkisatik ja tuk jani wegoxta yajele perdon yajni wa syajbʼesotike. Ja Efesios 4:26 wa xyala: «Moka majlayex aʼochuk ja kʼakʼu ta tajkelexto». ¿Jas yuj? Jachuk mi oj katikyi lugar ja Dyablo. Ja Jyoba tikʼanxta wa xyalakabʼtik ja bʼa Biblia ke la katik perdon ja tuki. Ja yuj ja Colosenses 3:13 wa xyakitik ja rason it: «Moka waʼexkan [ ...] yajela bʼajex perdon sok spetsanila kʼujolex». Yajel perdon ja jas mi lek wa skʼulanekitik ja hermanoʼik juni modo bʼa oj mojxukotik mas soka yeʼnleʼi. Jachuk wala koltanitik bʼa mi oj chʼaytik ja jastal tsoman wa xya ajyukotik ja ‹yip ja Dyosi stsʼakatal yuja lamanil wa xya ajyukotik tsomani› (Efes. 4:3). Bʼa tʼusanta yaljel, ta mi xkaʼatik perdon mini oj ajyukotik laman sok tsoman.

12. ¿Jasa oj skoltayotik bʼa yajel perdon ja tuk?

¹² Bʼobʼta wokol oj katik perdon june maʼ skʼulankitik bʼa mi lekuk. Pe soka skoltanel ja yip ja Dyosi ojni lajxukujtik. Tsaʼan yajni stsatsankʼujolanotikta bʼa yajxta oj kil jbʼajtik sok oj aʼtijukotik, ja Biblia wa snocho yaljel: «Kongana ajyanik yuja yip ja Dyosi». Bʼa tʼusanta yaljel, soka skoltanel ja yip ja Dyosi, jun snochuman Kristo konganani wa xbʼobʼ skʼuluk ja bʼa toj, bʼa ti chʼikan yajxta oj ilwanuk sok oj ya perdon sok spetsanil skʼujol. Ja yuj, wa xpatatikyi skʼujol ja Jyoba bʼa oj skoltayotik (Luc. 11:13).

MOK JAS SPILOTIK

13. ¿Jastik junuk oj bʼobʼ spilotik?

¹³ Ja bʼa kongregasyonik ayni «tuktukil tikʼe kristyano» (1 Tim. 2:​3, 4). Yuja tuktukil ja jastal kʼiʼelotik, tuktukilni ja jas wa stsaʼatik sbʼaja jastal wa xkʼutes jbʼajtik, wa xchapa jbʼajtik, ja tikʼe anik wa xkiʼajtik sok jastal wa xkatik ekʼ gusto. Ta mi xtalnay jbʼajtik, ja jastik it ojni bʼobʼ spilotik (Rom. 14:4; 1 Cor. 1:10). Pe ja Dyos sjeʼunejkitik ke tʼilan oj yajtay jbʼajtik, ja yuj mini xkʼuʼantik ke ja jas wa stsaʼatik masni lek ke yuja bʼa tuk (Filip. 2:3).

14. a) ¿Jasa mi oj katikan skʼujolajel? b) ¿Jastal oj bʼobʼ ya makunukotik ja Jesús?

¹⁴ Pilan jasunuk oj bʼobʼ jkʼuluktik bʼa mi jas oj spilotik ja bʼa kongregasyon, jani skʼujolajel bʼa mok katikan stsatsankʼujolajel ja tuk sok skoltajele (1 Tes. 5:11). Ja bʼa jtyempotik, jitsan kristyano bʼa chebʼel aye sok elelekan ja bʼa kongregasyon cha kumxiyeta. Jaxa keʼntik gustoxta wa xkʼulanetik resibir (2 Cor. 2:8). Jun sjejel, jun hermana bʼa cha waj sbʼajtanil ekʼele bʼa jun reunión yajni ekʼta 10 jabʼil wa xcholo: «Yibʼanale gustoxta jak skʼulukone saludar» (Hech. 3:19). ¿Jasa lajxi yuja jach kʼulaji resibir? Ja yeʼn wa xyala: «Kabʼ ke ja Jyoba wan skoltajelon bʼa cha gusto oj ajyukon». Yajni wa xkʼujolantik bʼa stsatsankʼujolajel ja tuk, ja Jesús ojni bʼobʼ ya makunukotik bʼa yajel kulan skʼujol ja matik ‹jel al ja skargaʼe› (Mat. 11:​28, 29).

15. ¿Jas pilan modo oj bʼobʼ koltanukotik bʼa oj ajyukotik tsoman? (Cha kʼela ja poto).

¹⁵ Cha wani xbʼobʼ koltanukotik bʼa ajyel tsoman soka jas wa xkalatiki. Ja Job 12:11 wa xyala: «¿Yuj maʼ mi wa xyabʼ yajbʼal ja jchikintik ja yaljeliki, jastalni ja kakʼtik wa xyabʼ yajbʼal ja waʼelali?». Jun sjejel, june maʼ jel snaʼa stojbʼesel waʼelal wani skʼulan probar ta wa x-ajbʼani bʼajtanto oj ya ekʼuk. Junxta jastal jaw, bʼajtanto ay jas oj kaltik tʼilani oj jpensaraʼuktik lek ta oj koltanuk, oj tulwanuk sok ta oj yawe el slekilal ja tuk (Sal. 141:3; Efes. 4:29).

16. ¿Matik masto oj skʼujoluke bʼa oj yale yaljelik bʼa oj tsatsankʼujolanuk?

¹⁶ Ja matik masto oj skʼujoluke bʼa oj yale yaljelik bʼa oj tsatsankʼujolanuk jani ja winike bʼa nupanelexa, ja tatalik sok ja nanalik (Col. 3:​19, 21; Tito 2:4). Ja ansyanoʼik cha tʼilani oj stsatsankʼujoluke sok oj yaʼe kulan skʼujol ja xchejik ja Jyoba (Is. 32:​1, 2; Gál. 6:1). Jastalni wa xyala ja Biblia: «¡Jelni lek ja yaljel wa x-alxi ja bʼa mero styempoʼil!» (Prov. 15:23).

LA JETIK KE MERAN WA XYAJTAY JBʼAJTIK

17. ¿Jas oj bʼobʼ jkʼuluktik bʼa oj jetik meran wa xyajtaytik ja hermanoʼik?

¹⁷ Ja jekabʼanum Juan yala: «Mok kechanta ajeʼex syajala kʼujolex soka jas waxa walawexi, pes tʼilani oj chijkajuk soka jas waxa kʼulanexi sok tʼilani oja jeʼex sok spetsanila kʼujolex» (1 Juan 3:18). ¿Jas oj bʼobʼ jkʼuluktik bʼa oj jetik meran wa xyajtaytik ja hermanoʼik? Jani spiljel tyempo bʼa ajyelsoke. Pes yajni jach wa xkʼulantik masni wala mojxitiksoke sok wa stsatsbʼi ja yajtanel kiʼojtiki. La jmojtaytike ja bʼa reunionik sok ja bʼa xcholjeli sok la kulataytike. Ta jach wa xkʼulantik, ojni aljuk ja it bʼa keʼntik: «Yeʼn mismo ja Dyos wan sjejelawilex oja yajta abʼajex» (1 Tes. 4:9). Sok ojni kiltik jaman lek ke «jelni lek sok wa xyaʼa gusto ke ja hermanoʼik tsoman aye» (Sal. 133:1).