Xlimaktiy Samuel
1 Akxni xninita Saúl chu David xkitaspitnita chuna la xkamakgatlajanit amalequitas, tamakgxtakgli kZiclag akgtiy kilhtamaku. 2 Xliʼakgtutu kilhtamaku, mincha chatum chixku anta niku xtamakgxtakgmacha Saúl, xataxtitni xlin klhakgat chu xʼakwaka tiyat. Akxni lakgtalakatsuwilh David, tatsokgostalh chu lakgtakilhputalh.
3 David kgalhskilh: «¿Niku tanitampi?». Xla kgalhtilh: «Ktsalataxtucha niku xtamakgxtakgkgonit soldados xalak Israel». 4 Chu David wanilh: «Katlawa litlan, kakiwani, ¿tuku lalh?». Xla kgalhtilh: «Lhuwa latamanin tsalakgonit ktatalachipat chu lhuwa nikgonit. Asta Saúl chu xkgawasa Jonatán na nikgonit». 5 David kgalhskilh kgawasa tiku xlin tamakatsin: «Chu ¿la katsi pi Saúl chu xkgawasa Jonatán nikgonit?». 6 Uma kgawasa wanilh: «Kaj xalan xaktitaxtuma ksipi Guilboa chu kakxilhli pi Saúl xlimakgachipaxnama xlanza, chu putlaw nema kalitlawakan guerra chu tiku xkgewilakgo kawayu xlakgtalakatsuwimakgo. 7 Akxni xla talakgaspitli chu kiʼakxilhli, kintasanilh chu akit kwanilh: “¡Unu kwi!”. 8 Xla kinkgalhskilh: “¿Tiku wix?”. Akit kkgalhtilh: “Akit chatum amalequita”. 9 Chu kiwanilh: “Katlawa litlan, katat unu chu kakimakgni, xlakata lu kpatinama, pero nina kniy”. 10 Wa xlakata klakgalh chu kmakgnilh, xlakata xakkatsi pi lu xmasipanikanit* chu xʼama niy. Alistalh kmakglhtilh corona nema xʼakwi chu tamakgapixnu xlakata xakkaliminin, kimalana».
11 Akxni kgaxmatli uma, David xtitli klhakgat nema klhakganit chu putum ksoldados nema akxtum xtawilakgolh na xtitkgolh klhakgatkan. 12 Pixlanka tsukukgolh tasakgo chu kgalhxtakgnankgolh* asta akxni kgotanulh xpalakata Saúl, xpalakata Jonatán, xkgawasa, xpalakata xkachikin Jehová chu xpalakata xchik Israel, xlakata xkalimakgnikanit espada.
13 Chu David kgalhskilh kgawasa tiku xliminit tamakatsin: «¿Niku xala wix?». Chu xla kgalhtilh: «Akit chatum xkgawasa tiku xalak atanu kachikin, chatum amalequita». 14 David wanilh: «¿Tuku xlakata lakpuwanti natlawaniya tuku nitlan chu namakgniya xtalaksakni Jehová?». 15 Akxni kgaxmatli uma, David tasanilh chatum ksoldado chu wanilh: «Katat chu kamakgni». Wa xlakata xla makgnilh. 16 David wanilh kgawasa: «Wix lipina kuenta xlakata naniya, mintachuwin tlawalh pi xʼakgspulan tuku nitlan akxni wanti “Akit kmakgnilh xtalaksakni Jehová”».
17 Alistalh David likilhtlilh akgtum takilhtlin xla talipuwan xpalakata Saúl chu xpalakata Jonatán, xkgawasa, 18 chu wa pi xkamasiyanika putum latamanin xalak Judá. Uma takilhtlin xla talipuwan, nema wanikan «Arco»,* talhkatawilanit kxlibro Jasar chu wan:
19 «¡Israel! Tuku stlan xtasiya ninit anta klaktsu sipi.
¡Nikgonit tiku lakgtliwakgan!
20 Ni kalichuwinantit kʼGat;
ni kamakatsininantit kxkatijinin Asquelón,
xlakata xlaktsuman filisteos ni nalipaxuwakgo,
xlakata xlaktsumankan tiku ni skujnanikgo Dios
ni nalipaskuajnankgo.
21 Wixin, kasipijni xalak Guilboa,
ni kaʼanalh monkganat nipara sen kmilakgstipankan,
nipara kapukuxtun nema namakgalakgo xasanto tamakamastan;
xlakata anta xʼescudoskan tiku lakgtliwakgan kamaxkajwika,
xʼescudo Saúl nialh lilaksakkanit aceite.
22 Xkgalhnikan tiku xnikgonit chu xmantekajkan
tiku lakgtliwakgan,
ni xtlawa pi xʼarco Jonatán xtapanulh,
chu komo xʼespada Saúl ni xtlajananit, ni xtaspita.
23 Saúl chu Jonatán, tiku lu xkapaxkikan chu xkalakgkatsankan
akxni xlamakgolhku, nipara akxni nikgolh kamapitsika.
Lu lakapala xkgosnankgo chuna la águilas,
tlakg lakgtliwakga xwankgonit nixawa leones.
24 Wixin, xlaktsuman Israel, kalakgtasatit Saúl,
tiku kalimalhakgen xalakspinini
chu xalaktapalaxla lhakgat,
chu kmilhakgatkan kawilinin litakaxtay xaʼoro.
25 ¡Ktatalachipat nikgonit tiku lakgtliwakgan!
¡Jonatán ninit kʼaktsu sipi!
26 Kintala, Jonatán,
lu klakgaputsama mimpalakata; lu xakpaxkiyan.
Kimpalakata, mintapaxkit tlakg tlan xwanit
nixawa xtapaxkitkan lakpuskatin.
27 ¡Nikgonit tiku lakgtliwakgan
chu lakgsputkgonit tuku litlawakan guerra!».