Xlimaktiy Samuel
11 Akxni xtsukuma kata* chu mapakgsinanin xtaxtukgo xlakata natalatlawanankgo, David malakgachalh Joab, xlakskujnin chu putum soldados xalak Israel xlakata nakamasputukgo ammonitas. Xlakan makgstiliwilikgolh Rabá, chu David tamakgxtakgli kJerusalén.
2 Akgtum kilhtamaku akxni xtsiswamaja,* David takilh chu tsukulh tlawan kxʼakgstin lanka xchik. Lata anta akxilhli chatum puskat tiku xpaxma, chu lu stlan xtasiya. 3 David wi tiku malakgachalh xlakata nakatsi tiku xwanit ama puskat, chu wanika: «Xla Bat-Seba xtsumat Eliam xpuskat Urías tiku hitita». 4 Alistalh David malakgachalh makatsininanin xlakata xliminkgolh. Wa xlakata puskat tanulh niku xla xwi, chu xla tatalakgxtumilh. (Uma chuna lalh akxni xla xtaskulunkima xlakata kxkajwananit).* Alistalh, Bat-Seba taspitli kxchik.
5 Chu uma puskat xʼama kgalhi kskgata chu makatsinilh David: «Nakkgalhi skgata». 6 Akxni katsilh, David malakgachanilh uma tamakatsinin Joab: «Katlawa pi kakilakgmilh Urías tiku hitita». Wa xlakata Joab malakgachanilh Urías. 7 Akxni Urías lakgchalh, David kgalhskilh la xwilakgolh soldados chu Joab, chu la xkitaxtuma tatalachipat. 8 Alistalh David wanilh Urías: «Kapit kminchik chu kajaxti».* Akxni Urías taxtucha kxchik mapakgsina, stalanika xlakata xmaxkika xtamaskiwin* mapakgsina.* 9 Pero, Urías lhtatalh anta niku xlaktanukan kxchik mapakgsina chuna la amakgapitsin xlakskujnin xmalana, chu ni alh kxchik. 10 Chu makatsinika David: «Urías ni alh kxchik». Wa xlakata David kgalhskilh Urías: «¿Ni aku kitaspitti niku xpinita? ¿Tuku xlakata ni pit kminchik?». 11 Urías kgalhtilh David: «Arca, israelitas chu Judá kaj klaktsu chiki tamakgxtakgmakgolh chu kimalana Joab chu xlakskujnin kimalana kalakgwan tamakgxtakgmakgolh. ¿La nakkan akit kkinchik xlakata nakwayan, nakkgotnan chu naktatama kimpuskat? ¡Kmalaknu kmilakatin pi nikxni chuna kaktitlawalh!».
12 Alistalh David wanilh Urías: «Unu katamakgxtakgti, chu chali tlan napina». Wa xlakata Urías tamakgxtakgli kJerusalén ama kilhtamaku chu xlichali. 13 Alistalh David matasaninalh xlakata xmilh tawayan chu akxtum xtakgotli, chu David makgakgachilh. Pero akxni tsiswalh, Urías ni alh kxchik, wata lhtatalh anta niku klhtatakgo kskujnin xmalana. 14 Lichali tsisa, David tsokgnanilh maktum carta Joab chu tlawalh pi Urías xlinilh. 15 Kxcarta tsokgnanilh uma: «Klakatin kayawaka Urías niku latalachipamaka, niku lu kalipekua latalachipamaka. Alistalh katapanutit chu xʼakstu kamakgxtakgtit xlakata namakgnikan».
16 Joab liwana xʼakxilhnit kachikin, chu yawalh Urías niku xkatsi pi xwilakgolh tlakg xalakgtliwakga soldados tiku xtalamakgasitsin xwankgonit. 17 Akxni lakchixkuwin taxtukgolh chu talatlawakgolh Joab makgapitsi xlakskujnin David nikgolh, chu nachuna Urías tiku hitita xwanit. 18 Alistalh Joab makatsinilh David putum tuku xlanit ktatalachipat. 19 Wanilh uma tiku xʼama lin tamakatsinin: «Akxni nawanikgoya mapakgsina putum tuku lanit ktatalachipat, 20 max mapakgsina nasitsi chu nawaniyan: “¿Tuku xlakata kitalachipanantit lakatsu kkachikin? ¿Ni xkatsiyatit pi xʼamakgon katalakgoyan lata kpatsaps? 21 ¿Tiku makgnilh Abimélec xkgawasa Jerubéset? ¿Ni wa chatum puskat tiku makgosunilh akgtum chiwix xla molino* lata xlitalhman patsaps chu chuna makgnilh kTebez? ¿Tuku xlakata lu talakatsuwitit kpatsaps?”. Komo chuna nawaniyan kawani: “Miskujni Urías tiku hitita xwanit na nilh”».
22 Wa xlakata makatsinina alh chu wanilh David putum tuku Joab xwaninit. 23 Alistalh makatsinina wanilh David: «Ksoldadoskan xkinkamakgatlajamakgon chu taxtukgolh kkilhtin xlakata nakinkatalatlawakgoyan pero akinin ktlawaw pi xtatampuxtukgolh asta niku xlaktanukan kkachikin. 24 Chu xlakata tiku xmaskujukgo arcos lata xlitalhman patsaps xkatalamakgo milakskujnin, makgapitsi xlakskujnin mapakgsina nikgolh. Miskujni Urías tiku hitita xwanit na nilh». 25 Akxni David kgaxmatli uma, wanilh makatsinina: «Kawani Joab: “Ni kamasta talakaskin pi uma nitlan namamakgkatsiniyan, xlakata espada katiwa tiku tlawani tuku nitlan. Tlakg katalatlawa kachikin chu kaʼakgchipa”. Chu na kamakgpuwantini Joab».
26 Akxni xpuskat Urías katsilh pi xchixku xninit, tsukulh talipuwani. 27 Akxni xtitaxtukgonita xtalipuwan, David tlawalh pi xliminka kxchik. Chu xla xpuskat litaxtulh chu takgalhilh chatum skgata. Pero Jehová nipara tsinu lakgatilh tuku tlawalh David.