Xlimaktiy Samuel

14 Pero Joab xkgawasa Zeruyá, katsilh pi xnaku mapakgsina lu xʼakxilhputun Absalón. 2 Chu Joab maputsinalh kTecoa chatum skgalala puskat chu wanilh: «Klakaskin kalikatsi la chatum tiku talipuwanima. Kawili lhakgat xla talipuwan* chu ni kalitlawaka aceite. Kalikatsi la chatum puskat tiku lhuwa kilhtamaku lakgtasanit tiku ninit. 3 Alistalh kapit akxilha mapakgsina chu kalitachuwinanti tuku nakwaniyan». Chu Joab wanilh tuku xliwanat xwanit.*

4 Chu puskat xalak Tecoa lakgalh mapakgsina, tatsokgostalh kxlakatin, takilhputalh chu tasaskinilh: «¡Kakimakgtaya mapakgsina!». 5 Mapakgsina kgalhtilh: «¿Tuku akgspulaman?». Xla wa: «¡Kgoxuta akit! Kinchixku ninita. 6 Chu akit, miskujni, xakkgalhi chatiy lakgkgawasan. Akxni xwilakgo kkapukuxtun, tsukukgolh latalatlawakgo chu xlakata niti xʼanan anta xlakata xkamapapitsilh, chatum masipanilh* achatum chu makgnilh. 7 Chu putum familia talalakatawakamakgolh miskujni chu wankgo: “¡Kamasta tiku makgnilh xtala, xlakata nakmakgniyaw chu chuna nalakgaxokgo xlatamat xtala tiku makgnilh! Maski uma kilhchanima pi namasputukan tiku xʼama makglhtinan tuku xtapakgsini xtlat”. Nakimamixinikan xaʼawatiya jalanat nema ananku,* chu namalakgsputukan xtukuwani kinchixku chu nialh katikgalhilh xkamanan kʼuma tiyat».

8 Chu mapakgsina wanilh puskat: «Kapit kminchik. Akit naklimapakgsinan pi katalakkaxtlawalh uma taʼakglhuwit». 9 Puskat xalak Tecoa wanilh mapakgsina: «Kimalana tiku kgalhiya lhuwa kakni, akit kakilimalakgaxokgeka chu putum tiku xalak xchik kintlat. Pero mapakgsina chu xputawilh nitu kakaliyawaka». 10 Alistalh mapakgsina wanilh: «Komo wi tiku amakgtum wi tuku nawaniparayan, kakilitani chu nikxni katimakglhuwiparan». 11 Pero xla wampa: «Mapakgsina, katlawa litlan, kalakapastakti Jehová miDios xlakata xmalakgaxokgena kgalhni ni tlakg natlawa tuku tlakg nitlan chu namakgni kinkgawasa». Chu xla kgalhtilh: «Kmalaknuniyan kxtukuwani Jehová, xastakna Dios, pi minkgawasa ni katixamanika nipara kgantum xchixit».* 12 Alistalh puskat wanilh: «Katlawa litlan, kimalana tiku kgalhiya lhuwa kakni, kamaxki talakaskin miskujni wi tuku nawaniyan». Mapakgsina kgalhtilh: «Kachuwinanti».

13 Puskat wanipa: «¿Tuku xlakata lakkaxwilinita natlawaniya uma tuku nitlan xkachikin Dios? Xlakata tuku aku wa mapakgsina, litayama pi wa lin kuenta, xlakata mapakgsina ni maspitpara xkgawasa tiku taxtunit kkachikin. 14 Xlikana pi naniyaw chu nalitaxtuyaw la chuchut nema tamakganit chu nialhla tiyaparakan. Pero Dios niti katimakglhtilh xlatamat, xla liwana akxilhnit tuku xlakata tiku tlakgaxtukanit ni putum kilhtamaku xlitamakgatlinit. 15 Akit kminit kwani uma kimalana tiku kgalhi lhuwa kakni xlakata latamanin kimakgapekuankgolh. Wa xlakata miskujni wa: “Katlawa litlan, kakimaxkitit talakaskin naktachuwinan mapakgsina. Max mapakgsina natlawa tuku naskini kskujni. 16 Max mapakgsina nakgaxmatni kskujni chu nalakgmaxtu kxmakan chixku tiku kinkamakgniputunan akit chu xachastum kinkgawasa chu kinkamakglhtiputunan tuku Dios kinkamaxkinitan”. 17 Alistalh miskujni wampa: “Katlawa litlan, kimalana tiku kgalhiya lhuwa kakni, mintachuwin kakimakgoxamixilh”. Xlakata kimalana tiku kgalhi lhuwa kakni akxilha tuku tlan chu tuku nitlan chuna la xʼángel xaxlikana Dios. Chu Jehová miDios kamakgtayan».

18 Chu mapakgsina kgalhtilh puskat: «Wi tuku nakkgalhskinan chu kskiniyan pi nitu kakimatsekgni». Xla kgalhtilh: «Kachuwinanti kimalana tiku kgalhiya lhuwa kakni, katlawa litlan». 19 Chu mapakgsina kgalhskilh: «¿Wa Joab tiku tlawalh pi xtlawa uma?». Puskat kgalhtilh: «Malana tiku kgalhiya lhuwa kakni, kmalaknuniyan pi chuna la wix wanti, wa miskujni Joab tiku kiwanilh tuku kilitlawat xwanit chu putum tuku uma miskujni xliwanat xwanit. 20 Miskujni Joab tlawanit uma xlakata nalakgpali chuna la wix akxilha uma, pero kimalana lu skgalala chuna la chatum xʼángel xaxlikana Dios chu katsi putum tuku lama kkachikin».

21 Alistalh mapakgsina wanilh Joab: «Tlan, chuna naktlawa. Kapit chu kamaspitpara Absalón». 22 Joab tunkun lakgtakilhputalh chu tsukulh malanki mapakgsina. Chu Joab wanilh: «Kimalana tiku kgalhiya lhuwa kakni, la uku kkatsi pi kintatayaya xlakata mapakgsina tlawanit tuku skinin uma miskujni». 23 Alistalh Joab tayalh, alh kʼGuesur chu limilh Absalón anta kJerusalén. 24 Pero mapakgsina wa: «Kataspitli kxchik, pero nila namin kiʼakxilha». Wa xlakata Absalón taspitli kxchik chu ni alh akxilha mapakgsina.

25 Chu kxliputum Israel ni xʼanan chatum chixku tiku xmalankika xlakata lu stlan xtasiya chuna la Absalón. Lata kxlakapun xtantun asta xʼakgxakga, ni xʼanan tuku nitlan xtasiyani. 26 Akxni ksputtilha akgatunu kata xchukunikan xchixit xlakata lu tsinka xmakgkatsi. Akxni xchuku, xchixit xtsinkan max akgtiy kilo aitat,* chuna la xwi lipupulhkan kxchik mapakgsina. 27 Absalón kgalhilh kgalhtutu lakgkgawasan chu chatum tsumat tiku xwanikan Tamar, tiku lu stlan xtasiya.

28 Chu Absalón akgtiy kata latamalh kJerusalén, pero ni alh akxilha mapakgsina. 29 Alistalh Absalón matasaninalh Joab xlakata xmalakgachalh kxlakatin mapakgsina, pero Joab ni lakgamputulh Absalón. Matasaninalh xlimakgtiy, pero xla chuntiya ni lakgamputulh. 30 Xaʼawatiya kawanilh xlakskujnin: «Xpukuxtu Joab tatapakgta kila, chu anta kgalhi cebada. Kapitit chu kalhkuyuwilitit». Wa xlakata xlakskujnin Absalón lhkuyuwilikgolh pukuxtu. 31 Akxni lalh uma, Joab alh kxchik Absalón chu wanilh: «¿Tuku xlakata milakskujnin lhkuyuwilikgolh kimpukuxtu?». 32 Absalón kgalhtilh Joab: «Kakgaxpatti, akit kmalakgachanin uma tamakatsinin: “Katat unu chu nakmalakgachayan kxlakatin mapakgsina xlakata nakgalhskina kimpalakata: «¿Tuku xlakata kmincha kʼGuesur? Tlakg tlan xwa anta xaktitamakgxtakgcha. La uku mapakgsina kakimaxkilh talakaskin nakan kakxilha chu komo wi tuku klaklin, kakimakgnilh»”».

33 Wa xlakata Joab lakgalh mapakgsina chu wanilh tuku Absalón xwaninit. Alistalh mapakgsina matasaninalh Absalón, xla lakgmilh tatsokgostalh chu takilhputalh. Alistalh mapakgsina tsukli* Absalón.