Xlimaktiy Samuel
8 Titaxtulh kilhtamaku, David kamakgatlajalh chu kaʼakgchipalh filisteos, chu kamakglhtilh Meteg-Amá.
2 Titaxtulh kilhtamaku kamakgatlajalh moabitas. Tlawalh pi akxtum xlapaxtutamakgolh kkatutsu xlakata xkalilhkalh kgantum tasiw: tiku xtanukgolh chuna la xlilhman kgantiy tasiw xkamakgnikan, chu tiku xtanukgolh chuna la xlilhman kgantum tasiw ni xkamakgnikan. Moabitas kskujnin David litaxtukgolh chu xlakgaxokgonanikgo.
3 David makgatlajalh Hadadézer xkgawasa Rehob, mapakgsina xalak Zobá, akxni xʼama akgchipapara tuku xtapakgsini kkgalhtuchokgo Éufrates. 4 David kaʼakgchipalh akgtum mil akgtujun ciento ksoldados tiku xkgetawilakgo kawayu chu akgpuxam mil ksoldados tiku katantun xʼankgo. Alistalh lakluntu kamakgxtakgli* kawayu nema kxwatalinkgo xputlawkan, kajwatiya akgtum ciento nitu katlawanilh.
5 Akxni sirios xalak Damasco minkgolh makgtayakgo mapakgsina Hadadézer xalak Zobá, David kamakgnilh puxamatiy mil ksoldadoskan. 6 Chu David kawililh ksoldados* kSiria nema xwi kDamasco, chu sirios xlakskujnin litaxtukgolh chu xlakgaxokgonanikgo. Jehová xtlawa pi David xtlajanalh kaniwa niku xʼan talatlawanan. 7 David na kamakglhtilh xlakskujnin Hadadézer xalakgkgalhstilili xʼescudoskan nema xlitatlawanit oro chu kalilh kJerusalén. 8 Chu mapakgsina David lilh lhuwa cobre xalak Bétah chu xalak Berotái, xkachikinin Hadadézer.
9 Ama kilhtamaku, mapakgsina Toi xalak Hamat kgaxmatli pi David xkamakgatlajanit putum ksoldados Hadadézer. 10 Wa xlakata Toi malakgachanilh mapakgsina David xkgawasa Joram xlakata xkgalhskilh la xwi chu xwanilh laktlan tachuwin xlakata xtalatlawanit chu xmakgatlajanit Hadadézer (xlakata Hadadézer makglhuwa xtalatlawanit Toi). Joram linilh David tuku xlitatlawanit oro, plata chu cobre. 11 Mapakgsina David kamaskulunkilh xpalakata Jehová, chuna la xmaskulunkinit plata chu oro xalak kachikinin nema xkaʼakgchipanit: 12 xalak Siria, xalak Moab, xalak Amón, xalak Filistea chu xalak Amaleq, chu nachuna tuku lhuwa xtapalh xla Hadadézer xkgawasa Rehob, mapakgsina xalak Zobá. 13 David na lu lakgapaska akxni kitaspitli la kakimakgnilh akgkutsayan mil edomitas kxakaxtum niku wi Matsat. 14 Chu kawililh soldados kʼEdom. Kxlilakgatum Edom kawililh soldados, chu putum edomitas kskujnin David litaxtukgolh. Jehová xtlawa pi David xtlajanalh kaniwa niku xʼan talatlawanan.
15 David chuntiya mapakgsinalh kxlilakgatum Israel, xmakgtayanan xlakata xtlawaka tuku xaʼakgstitum chu tuku xatankswa kxlilakgatum xkachikin. 16 Joab xkgawasa Zeruyá wa tiku xkapulalima soldados chu Jehosafat xkgawasa Ahilud wa tiku xtsokgwili tuku xtlawakan. 17 Sadoc xkgawasa Ahitub chu Ahimélec xkgawasa Abiatar sacerdotes xwankgonit, chu Seraya makgatsokgna xwanit. 18 Benaya xkgawasa Jehoiadá wa tiku xkapulalima keretitas chu peletitas, chu xlakgkgawasan David tlakg xlakaskinka napuxkun* litaxtukgolh.