Jonás
3 Alistalh, Jehová xlimakgtiy tachuwinampa Jonás: 2 «Kapit klanka kachikin Nínive chu kakamakatsini tuku akit nakwaniyan».
3 Wa xlakata, Jonás kgalhakgaxmatli Jehová chu alh kNínive. Nínive akgtum lanka kachikin xwanit,* akgtutu kilhtamaku katantun xlilakgatsalakan. 4 Jonás tanulh kkachikin chu akxni xlakgatsalanita akgtum kilhtamaku, tsukulh wan: «Kaj tipuxam kilhtamaku Nínive namalakgsputukan».
5 Chu latamanin xalak Nínive kanajlanikgolh Dios. Chu kalimapakgsika lata tiku aktsujku asta tiku tlakg lankata pi xkgalhxtakgnankgolh chu xwilikgolh lhakgat xla talipuwan.* 6 Akxni mapakgsina xalak Nínive kgaxmatli tamakatsinin, tayalh kxpumapakgsin, lakgpalilh klhakgat nema wilikgo mapakgsinanin chu wililh lhakgat xla talipuwan chu laktawi lhkaka. 7 Na limapakgsinalh pi xmastaka uma limapakgsin kxlilakgatum Nínive:
«Mapakgsina chu xmakgtayananin limapakgsinankgo pi putum latamanin chu animales xlikgalhxtakgnatkan. Ni xliwayanatkan chu na ni xlikgotnatkan. 8 Putum latamanin xliwilitkan lhakgat xla talipuwan chu na nakalimakgtlapakgo animales lhakgat xla talipuwan. Xliputum xlitliwakgakan katasaskinikgolh Dios chu kamakgxtakgkgolh ni xatlan xtijikan chu nialh kakatlawanikgolh tuku nitlan amakgapitsin. 9 Ni katsiyaw, max xaxlikana Dios nalakgpali* tuku lakpuwanit natlawa chu namapanu xtasitsi chu chuna ni katiniw».
10 Akxni xaxlikana Dios akxilhli tuku tlawakgolh chu pi xmakgxtakgkgonit ni xatlan xtijikan, lakgpalilh* tuku xlakpuwanit natlawa chu nialh kamalakgsputulh chuna la xkawaninit.