Lucas

2 Ama kilhtamaku, César Augusto limapakgsinalh pi xlikalanka katiyatni putum latamanin xtatsokgtawilakgolh. 2 (Uma xapulana chuna titlawaka akxni Quirinio gobernador xwanit kSiria). 3 Chu putum latamanin ankgolh tatsokgtawilakgo kkachikin niku xlakachinkgonit. 4 Chu xlakata José xtapakgsi kxfamilia David, na mincha kkachikin Nazaret xalak Galilea, taspitli kJudea, kxkachikin David nema wanikan Belén. 5 Xla na alh tatatsokgtawila María, xpuskat,* chu nialh makgas xtsankga xʼama lakachin kskgata. 6 Akxni antaku xwilakgocha, chalh kilhtamaku xlakata nalakachin kskgata. 7 Chu lakachilh kskgata, xapuxku xkgawasa, chu limakgchilh laktitsu lhakgat chu mamilh niku xkamawikan animales, xlakata nialh xʼanan niku tlan xtamakgxtakgkgolh.

8 Nachuna kʼama kachikin kalakgwan xlamakgolh xmapuchwayaninanin borregos nema tantaskaka xkuentajtlawamakgolh xborregoskan. 9 Kaj xalan, xʼángel Jehová tayalh kxlakatinkan, chu xlilanka Jehová makaxkgakgenalh niku xwilakgolh chu lu pekuankgolh. 10 Pero ángel kawanilh: «Ni kapekuantit, xlakata ¡kaʼakxilhtit!, kkamakatsiniman xatlan tamakatsinin nema nakalimini lhuwa tapaxuwan putum latamanin. 11 Xlakata uku lakachilh anta kxkachikin David chatum milakgmaxtunakan, wa Cristo, Malana. 12 Wa uma tuku nalikatsiyatit pi wa: natekgsatit aktsu skgata limakgchikanit laktitsu lhakgat chu mamikanit niku kamawikan animales». 13 Kaj xalan ángel lakgminkgolh tlakg lhuwa ángeles* chu xmalankimakgolh Dios chu xwankgo: 14 «Katamalankilh Dios kʼakgapun, chu kkatiyatni kakgalhikgolh takaksni latamanin tiku tlan kaʼakxilha Dios».

15 Wa xlakata akxni ángeles ankgolh kʼakgapun, xmapuchwayaninanin borregos tsukukgolh lawanikgo: «Kaʼaw uku kBelén chu naʼakxilhaw uma tuku Jehová kinkamakatsinin». 16 Chu lakapala ankgolh, tekgskgolh María chu José, chu aktsu skgata anta xmamikanit niku kamawikan animales. 17 Akxni chuna akxilhkgolh, wankgolh tuku xkawaninit ángel xlakata skgata. 18 Chu putum tiku kgaxmatkgolh, kaks lilakawankgolh tuku xmapuchwayaninanin borregos wankgolh, 19 pero María xmaki kxtalakapastakni umakgolh tachuwin chu xlilakpuwan tuku xkilhchanima putum uma. 20 Alistalh, xmapuchwayaninanin borregos taspitparakgolh, chu xpaxtikatsinitilhakgo chu xmalankitilhakgo Dios xlakata putum tuku xkgaxmatkgonit chu xʼakxilhkgonit, chuna la xkawanikanit.

21 Titaxtulh akgtsayan kilhtamaku lata xlakachinit, akstilichukunika kxuwa xlichixku* chu limapakuwika Jesús. Wa uma tukuwani nema ángel wa pi xwilinika akxni María xʼakstu xlamajku.

22 Nachuna, akxni chalh kilhtamaku xlakata xkamaskulunkika chuna la xwan xLimapakgsin Moisés, linka kJerusalén xlakata namakamaxkikan Jehová, 23 chuna la tatsokgnit kxLimapakgsin Jehová: «Putum xapuxku kgawasa, xlilat namakamaxkikan Jehová». 24 Chu xlakan makamastakgolh tamakamastan, chuna la wan xLimapakgsin Jehová: «Tantiy xalakstakni palomas* o tantiy xalakgskgata palomas».

25 Chu ¡kaʼakxilhti!, anta kJerusalén xlama chatum chixku tiku xwanikan Simeón, chu uma chixku xaʼakgstitum xwanit chu kskujnani Dios, xla xkgalhkgalhima kilhtamaku akxni Dios xmakgtayalh Israel, chu espíritu santo xpulalin. 26 Nachuna, Dios xlimakatsininit espíritu santo pi ni xʼama niy asta akxni akxilhnita xwa xCristo Jehová. 27 Espíritu santo pulalilh, chu xla tanulh ktemplo, chu akxni xnatlatni* aktsu Jesús liminkgolh chuna la xtalismaninit tuku xwan Limapakgsin, 28 xla chaxli aktsu kgawasa chu malankilh Dios, wa: 29 «La uku, Malana Tiku lakgchan namapakgsinan, makgxtakgpat pi miskujni tlantiya naniy, xlakata kgantaxtulh tuku xmalaknunita, 30 xlakata kilakgastapu akxilhnit tiku nalilakgmaxtunana, 31 nema wix mastanita xlakata latamanin tlan naʼakxilhkgo, 32 akgtum xkgakganat nema namapanu tuku tlawa pi nila naʼakxilhkgo latamanin, chu namalanki minkachikin Israel». 33 Chu xtlat chu xtse aktsu kgawasa kaks xlilakawankgo xlakata tuku xwankan xpalakata. 34 Nachuna, Simeón kasikulunatlawalh chu wanilh María, xtse aktsu kgawasa: «¡Kaʼakxilhti! Uma aktsu kgawasa, Dios malakgachanit kʼIsrael, chu makgapitsi naliʼakgchakgxkgo kaj xpalakata chu amakgapitsin natakiparakgo. Maski Dios nalimasiya pi maxki xlitliwakga, lhuwa nitlan katilichuwinankgolh 35 xlakata lhuwa naku natasiya tuku lakpuwankgo. Chu wix lhuwa napatinana xtachuna la akxni wi tiku lilhtukukan lhman espada».

36 Ama kilhtamaku xlama chatum puskat palakachuwina, Ana xtsumat Fanuel, xminacha klanka xfamilia Aser. Uma puskat xlina kata chu kaj akgtujun kata talatamalh xchixku tiku xtatamakgaxtokgnit lata tsumatku xwanit, 37 chu uma kilhtamaku xkgalhi tatipuxamatati kata chu xninita xchixku. Xla putum kilhtamaku xmin ktemplo, chu xkgalhxtakgnan* akxni xkakninani Dios tantaku chu tantaskaka chu palha xtasaskin kxʼoración. 38 Ama kilhtamaku talakatsuwilh chu tsukulh maxki paxtikatsinit Dios, chu tsukulh kalitachuwinan xpalakata aktsu kgawasa putum tiku xkgalhkgalhimakgolh pi xlakgmaxtuka Jerusalén.

39 Alistalh, akxni xmakgantaxtikgonita putum tuku kskin xLimapakgsin Jehová, taspitparakgolh kʼGalilea, kxkachikinkan, kNazaret. 40 Chu aktsu kgawasa chuntiya staktilhalh chu tatliwakglhtilhalh chu lu skgalala wa, chu putum kilhtamaku xkgalhi xtamakgtay Dios.

41 Chu xnatlatni xlismanikgonit kata kata xʼankgo kJerusalén kʼakgatunu Pascua. 42 Chu akxni xla xkgalhi akgkutiy kata, ankgolh kPascua chuna la xlismanikgonit. 43 Chu akxni kgalhsputkgolh kilhtamaku xla Pascua chu xlakan xtaspitmaparakgolh, aktsu kgawasa Jesús tamakgxtakgcha kJerusalén, chu xnatlatni ni katsikgolh. 44 Xlakpuwankgo pi anta xkatamin tiku na xkatataspitmakgolh, tantaku tlawankgolh chu alistalh tsukukgolh putsakgo kxlakgstipankan niku xminkgo tiku xalak xfamilia chu tiku xkalakgapaskgo. 45 Pero akxni ni tekgskgolh, taspitparakgolh kJerusalén chu lu liwana putsakgolh. 46 Chu akxni xtitaxtunita akgtutu kilhtamaku, anta tekgskgolh ktemplo, xwi kxlakgstipankan makgalhtawakgenanin xla takanajla, xkakgaxmatnima chu xkatlawanima takgalhskinin. 47 Pero putum tiku xkgaxmatnikgo kaks xlilakawankgo xlakata lu tlan xʼakgatekgsa chu chuna la xkgalhtinan. 48 Akxni xnatlatni akxilhkgolh, kaks lakawankgolh, chu xtse wanilh: «Kinkgawasa, ¿tuku xlakata chuna kilatlawaw? Mintlat chu akit lu kkaputsaman chu lu klilakgaputsamaw». 49 Pero xla kawanilh: «¿Tuku xlakata xkimputsapatit? ¿Ni xkatsiyatit pi kilitawilat kxchik kinTlat?». 50 Pero xlakan ni akgatekgskgolh tuku xkawanima.

51 Alistalh taspitparakgolh kNazaret chu chuntiya xkakgalhakgaxmata. Nachuna xtse xmakitilhama kxnaku putum umakgolh tachuwin. 52 Chu Jesús chuntiya kstakma, tlakg xkgalhitilhama liskgalala, chu Dios chu latamanin tlakg tlan xʼakxilhkgo.