Lucas

4 Alistalh, akxni Jesús litatsamalh espíritu santo, tamakgatlinilh kgalhtuchokgo Jordán, chu espíritu santo pulalilh anta kxakaskakni tiyat 2 tipuxam kilhtamaku,* chu Akgskgawini matlawiputulh tuku nitlan. Xla nitu walh amakgolh kilhtamaku, wa xlakata akxni takgatsilh ama kilhtamaku, xla tsinksli. 3 Chu Akgskgawini wanilh: «Komo wix xkgawasa Dios, kawani uma chiwix kaxtalanchu kawa». 4 Pero Jesús kgalhtilh: «Tatsokgnit: “Ni kajwatiya kaxtalanchu nalilatama chixku”».

5 Wa xlakata Akgskgawini lilh niku katalhman chu kaj lakapala masiyanilh putum tamapakgsin xalak katiyatni. 6 Chu Akgskgawini wanilh: «Nakmaxkiyan putum uma limapakgsin chu xlilanka, xlakata akit kimakamaxkikanit, chu tlan nakmaxki tiku akit naklakaskin. 7 Wa xlakata, komo wix kaj makgtum nakinkakninaniya, putum uma mila nawan». 8 Jesús kgalhtilh: «Tatsokgnit: “Wa Jehová miDios tiku xlilat nakakninaniya chu kajwatiya xla nakgalhakgaxpatniya”».

9 Alistalh xla lilh kJerusalén, chu wililh niku tlakg xatalhman* xpatsaps templo chu wanilh: «Komo wix xkgawasa Dios, lhkgen kapit, 10 xlakata tatsokgnit: “Xla nakamapakgsi xʼángeles xlakata nakuentajtlawakgoyan”, 11 chu “Nalinkgoyan kxmakankan xlakata ni naliʼakgchakgxa akgtum chiwix”». 12 Jesús kgalhtilh: «XaSanto Tatsokgni wankgo: “Ni xlilat naliʼakxilha Jehová miDios”». 13 Wa xlakata akxni Akgskgawini xliʼakxilhnita, makgxtakgli chu kgalhkgalhilh atanu kilhtamaku akxni tlan xliʼakxilhpa.

14 Jesús taspitli kʼGalilea chu xla xkgalhi xʼespíritu Dios. Chu latamanin tiku xlamakgolh kxlikalanka kachikinin lu tlan xlichuwinankgo. 15 Na tsukulh masiya ksinagogaskan* chu putum xmaxkikgo kakni.

16 Alistalh xla alh kNazaret, anta niku xmakgastakkanit, chu chuna la xlismaninit xtlawa kSábado, tanulh ksinagoga. Akxni tayalh xlakata nakgalhtawakga, 17 maxkika xatasmilin xtatsokgni palakachuwina Isaías, chu xla malakgakgelh chu tekgsli anta niku xtatsokgnit: 18 «Akit kkgalhi xʼespíritu Jehová, xla kilaksakli xlakata nakkalitachuwinan xatlan tamakatsinin limaxkgenin.* Kimalakgachalh xlakata nakkawani tiku kachiwilikanit pi nakalakgmaxtukan chu nakkawani lakgaxokgo pi nalakawanamparakgo, xlakata nakkalakgmaxtu tiku patinamakgolh, 19 chu na kimalakgachalh nakkalitachuwinan kilhtamaku akxni Jehová nakasikulunatlawapara». 20 Akxni xlikgalhtawakganita uma, smilipa tatsokgni, maxkilh makgtayana, chu tawi; chu putum tiku xwilakgolh ksinagoga kaks akxilhkgolh. 21 Alistalh tsukulh kawani: «Uku kgantaxtulh uma tatsokgni nema aku kgaxpattit».

22 Chu xputumkan tsukukgolh lu tlan lichuwinankgo Jesús chu kaks xlakawankgo akxni xkgaxmatkgo lakglilakgatit tachuwin, chu xwankgo: «¿Ni xlikana pi uma xkgawasa José?». 23 Wa xlakata kawanilh: «Xlikana pi wixin nakiwaniyatit uma tachuwin: “Makuchina, miʼakstu kamapaksaka”, chu nawanatit: “Kkgaxmatwi tuku lalh kCapernaúm, wa xlakata, na katlawa umakgolh unu kminkachikin”». 24 Wa xlakata wa: «Xlikana kkawaniyan, ni anan chatum palakachuwina tiku xlakaskinka naʼakxilhkan kxkachikin. 25 Akgtum liʼakxilhtit, xlikana kkawaniyan pi xlamakgolh kʼIsrael chalhuwa lakpuskatin tiku xnikgonita xchixkukan kxkilhtamaku Elías, akxni ni senalh akgtutu kata chu akgchaxan papaʼ, chu lakgatum analh lhuwa tatsinkstat kʼuma katiyatni. 26 Pero Elías ni malakgachaka niku xwilakgolh amakgolh lakpuskatin, kajwatiya puskat tiku xninita xchixku xalak Sarepta kxtiyat Sidón. 27 Nachuna, xlamakgolh lhuwa tiku xkgalhikgo lepra kʼIsrael kxkilhtamaku palakachuwina Eliseo; pero nipara chatum mapaksaka, kajwatiya Naamán xalak Siria». 28 Wa xlakata, putum tiku xwilakgolh ksinagoga chu kgaxmatkgolh uma, lu sitsikgolh 29 chu tayakgolh chu lakapala tamakxtukgolh kkachikin, chu linkgolh kxkilhpan sipi niku xwi uma kachikin xlakata anta xmamokgosikgolh ktalhpan.* 30 Pero xla kalakgstipataxtulh chu alh.

31 Alistalh, chalh kCapernaúm, xkachikin Galilea. Chu xkamasiyanima akxni Sábado xwanit, 32 chu lu kaks xlilakawankgo chuna la xmasiya, xlakata xla chuwinalh xtachuna la tiku kgalhi limapakgsin.33 Anta ksinagoga xwi chatum chixku tiku xlaktanuma xalixkajni demonio, chu pixlanka* wanilh: 34 «¿Tuku xlakata tanita kilamakglhuwiyaw Jesús xalak Nazaret? ¿Tanita kilamalakgsputuyaw? Liwana kkatsi tiku wix, xaSanto tiku malakgachanit Dios». 35 Pero Jesús kilhnilh chu wanilh: «¡Kgalhtsekg chu kamakgxtakgti uma chixku!». Wa xlakata akxni xlikasnokgnita uma chixku kxlakgstipankan tiku anta xyakgolh, demonio laktaxtulh chu nitu tlawanilh. 36 Alistalh xputumkan kaks lakawankgolh chu tsukukgolh lawanikgo: «¡Kaʼakxilhtit, tukuya tachuwin xla maklakaskin! ¡Kgalhi litliwakga chu kamapakgsi xalaklixkajni demonios chu xlakan taxtukgo!». 37 Wa xlakata chuntiya xlichuwinamaka klakgatum kachikinin.

38 Alistalh akxni xtaxtunita ksinagoga, Jesús tanulh kxchik Simón. Chu xputiatse* Simón palha lhkuyat xmakgapatima, chu skinika Jesús pi xmakgtayalh. 39 Wa xlakata lakgtalakatsuwilh niku xma chu kilhnilh lhkuyat, chu lhkuyat makgxtakgli. Xla tunkun takilh chu tsukulh kakaxtlawani liwat.

40 Pero akxni xtsiswamaja, putum tiku xkgalhikgo xtatatlaninkan maski tanu tanu tajatat xkgalhikgo, liminikgolh. Chatunu chatunu xkaʼakwili xmakan chu xkamapaksa. 41 Lhuwa latamanin tiku xkalaktanuma demonios kalaktaxtukgolh, chu pixlanka xwankgo: «Wix xKgawasa Dios». Pero xla xkakilhni, ni xkamaxki talakaskin nachuwinankgo, xlakata xkatsikgo pi wa Cristo xwanit.

42 Pero akxni xkgakgalh xla taxtulh chu alh niku tlan xʼakstu xtawi. Pero latamanin tsukukgolh putsakgo chu ankgolh niku xwi, chu xmachokgoputunkgo xlakata anta xtamakgxtakgli. 43 Pero xla kawanilh: «Na kiliʼanat alakatanu kachikinin xlakata naklichuwinan xatlan tamakatsinin xla xTamapakgsin Dios, xlakata wa uma kilimalakgachakanit». 44 Wa xlakata xlichuwinantilha anta ksinagogas xalak Judea.