1 Corintios
16 Chu xpalakata tumin nema pukiyatit xpalakatakan natalan,* katlawatit chuna la kkawanikgolh congregaciones xalak Galacia. 2 Xapulana kilhtamaku xla semana, chatunu chatunu wixin wi tuku kamaʼakgataxtilh chuna la tlajatilha, xlakata ni napukikan tumin akxni akit nakchanacha. 3 Pero akxni nakchanacha, nakkamalakgacha lakchixkuwin tiku wixin nawanatit kmintatsokgnikan pi kalipawanatit, xlakata nalinkgo kJerusalén tuku xatapaxuwan maskiwinantit.* 4 Pero komo natalakaskin pi na nakanacha, akxtum nakintaʼankgoyacha.
5 Pero nakkalakganachan akxni ktitaxtunita nawan kMacedonia, xlakata naktitaxtu kMacedonia; 6 chu max akxtum nakkatatamakgxtakgan tsinu kilhtamaku, komo chuna naktlawa, max anta naktamakgxtakga asta akxni titaxtunita nawan lonkgni, xlakata kaj ni makgat nakilataʼanaw niku nakan. 7 Xlakata ni kaj xalakapala kkatilakgapaxialhnamputunan, wata tlakg makgas kkatatawilaputunan, komo Jehová nakimaxki talakaskin. 8 Pero kama tamakgxtakga unu kʼÉfeso asta akxni natlawakan Fiesta xla Pentecostés, 9 xlakata malakkikanit akgtum lanka malakcha* xlakata naktlawa xtaskujut Malana,* pero anan lhuwa talatlawananin.
10 Chu komo nachanacha Timoteo, kamakgtayatit xlakata nitu nalilakgaputsa anta kmilakgstipankan, xlakata xla makgantaxtima xtaskujut Jehová chuna la akit. 11 Wa xlakata niti kalakgmakgalh. Katatlawantit kaj ni makgat ktiji xlakata nitu nalani chu tlan nakilakgchin, xlakata akit chu natalan kkgalhkgalhimaw.
12 Pero xpalakata kintalakan Apolos lu kskinilh litlan pi akxtum xkataʼancha makgapitsi natalan xlakata xkalakgapaxialhnan. Xla ninajla anacha uku, pero naʼanacha akxni nalimakgwani.
13 Skgalalh katawilatit, tliwakga kakgalhitit mintakanajlakan, ni kapekuantit, lakgtliwakga kawantit. 14 Putum tuku natlawayatit, kalimasiyatit tapaxkit.
15 Nachuna, wi tuku kkaskiniputunan natalan. Wixin katsiyatit pi putum tiku wilakgolh kxchik tala chixku Estéfanas xapulana kstalaninanin Cristo litaxtukgolh kʼAcaya, chu na katsiyatit pi xliputum xnakujkan kamakgtayakgonit natalan.* 16 Wixin na kakakgalhakgaxpattit latamanin tiku chuna likatsikgo chu putum tiku makgtayanankgo chu tliwakga skujkgo. 17 Pero lu kpaxuwa pi minkgolh Estéfanas, Fortunato chu Acaico, umakgolh natalan lakchixkuwin lu kimakgtayakgonit xlakata wixin ni unu wilatit. 18 Xlakata xlakan lu kimatliwakglhkgonit chu nachuna wixin kamatliwakglhkgonitan. Wa xlakata, lu xtapalh kakaʼakxilhtit lakchixkuwin tiku chuna likatsikgo.
19 Congregaciones xalak Asia kamalakgachanikgoyan tamakgachipat. Áquila chu Prisca chu congregación nema wi kxchikkan, xatapaxuwan kamalakgachanikgoyan tamakgachipat wixin tiku na kstalaninanin Malana. 20 Putum natalan kamalakgachanikgoyan tamakgachipat. Akxni nalamakgachipayatit chatunu chatunu kalamaxkitit xasanto tatsukni.*
21 Akit Pablo, kimakan kkalitsokgniman tamakgachipat nema kkamalakgachaniman.
22 Komo wi tiku ni paxki Malana, kamalakgsputuka. ¡Katlawa litlan, katat kiMalanakan! 23 Xtalakgalhaman Malana Jesús nema ni anan xtachuna* akxtum kakatatawilan. 24 Kintapaxkit akxtum kakatatawilan putum wixin tiku kstalaninanin Cristo Jesús.