Xlimaktum Samuel
12 Xaʼawatiya, Samuel kawanilh putum israelitas: «Ktlawalh* putum tuku wixin kiskinitit chu klaksakli chatum mapakgsina xlakata nakamapakgsiyan. 2 ¡Unu wi mapakgsina tiku nakapulalinan!* Akit kgolota chu lu kʼaktsasanita, chu kinkamanan wilakgolh kmilakgstipankan. Lata akxni kgawasaku xakwanit asta la uku, kkapulalinitan. 3 Unu kwi, ¿minit kilhtamaku wi tiku kmakglhtinit xtoro o xburro? ¿Wi tiku kmakgkgalhananit o wi tiku nitlan klikatsininit? ¿Kinkgalhxokgokanit* xlakata nitu nakwan maski kakxilhma pi tlawamaka tuku nitlan? Komo chuna, kawantit kxlakatin Jehová chu tiku laksaknit, chu akit naklakgxokgonani». 4 Kgalhtikgolh: «Nikxni kilamakgkgalhanitaw kintuminkan chu ni lixkajni kinkalikatsininita. Chu nikxni mastanita talakaskin pi wi tiku nakgalhxokgoyan». 5 Wa xlakata xla kawanilh: «Jehová chu tiku xla laksaknit kgaxmatnit pi ni anan tuku wixin tlan nakilimawakayatit».* Chu xlakan kgalhtinankgolh: «Chuna, xla putum kgaxmatli».
6 Alistalh Samuel kawanilh israelitas: «Jehová tiku limaklakaskilh Moisés chu Aarón, chu katamakxtucha anta kʼEgipto xalakgmakgan minatlatnikan, kgaxmatli tuku wantit. 7 Chu la uku katantit* chu katayatit unu, nakkalakputsananiyan kxlakatin Jehová chu kama kuenta tlawa putum tuku tlan tlawanit* Jehová mimpalakatakan chu xpalakatakan xalakgmakgan minatlatnikan.
8 »Akxni Jacob tanulh kʼEgipto chu xalakgmakgan minatlatnikan tasaskinikgolh tamakgtay Jehová, Jehová kamalakgachalh Moisés chu Aarón xlakata xkatamakxtucha kʼEgipto chu xkalimilh xlakata unu xlatamakgolh. 9 Pero xalakgmakgan minatlatnikan nialh lakapastakkgolh Jehová xDioskan, wa xlakata xla kaʼakgxtakgmakgalh* kxmakan Sísara, xpuxkukan soldados xalak Hazor, chu nachuna kxmakankan filisteos chu mapakgsina xalak Moab, tiku katalatlawakgolh. 10 Alistalh tasaskinikgolh tamakgtay Jehová. Wanikgolh: “Jehová, klakgalhinanitaw, xlakata kkamakgxtakgnitan chu kkaskujnaninitaw Baales chu tatlawamakgxtu xla Astoret. Pero la uku, kakilalakgmaxtuw kxmakankan kintalatlawananinkan xlakata kaj wix nakkaskujnaniyan”. 11 Chu Jehová malakgachalh Jerubaal, Bedán, Jefté chu Samuel xlakata tlan xkalakgmaxtun kxmakankan mintalatlawananinkan nema xkamakgstiliwilinitan, xlakata wixin nitu xkaʼakgspulan. 12 Pero akxni akxilhtit pi Nahás, xmapakgsinakan ammonitas, xminit katalatlawayan, wixin makglhuwa kilawaniw “¡Klakaskinaw chatum mapakgsina!”, akxni wa Jehová miDioskan mimapakgsinakan litaxtu. 13 La uku, unu wi mapakgsina tiku wixin laksaktit, tiku skintit. ¡Kaʼakxilhtit! Jehová laksakli chatum mapakgsina mimpalakatakan. 14 Komo wixin napekuaniyatit Jehová, naskujnaniyatit chu nakgalhakgaxpatatit, chu ni natalalakatawakayatit tuku Jehová nalimapakgsinan, chu komo wixin chu mimapakgsinakan nastalaniyatit Jehová miDioskan, tlan nakakitaxtuniyan. 15 Pero komo ni nakgalhakgaxpatatit xtachuwin Jehová chu natalalakatawakayatit tuku Jehová limapakgsinan, xmakan Jehová nakamalakgaxokgeyan wixin chu minatlatnikan. 16 La uku, katantit chu katayatit unu chu kaʼakxilhtit tuku Jehová natlawa kmilakatinkan, tuku lu kaks malakawaninan. 17 La uku makgalamaka trigo, ¿ni xlikana? Nakskini Jehová pi kajililh chu kamilh sen. Nakatsiyatit chu naʼakgatekgsatit pi lu nitlan tuku tlawanitantit kxlakatin Jehová xlakata skintit chatum mapakgsina».
18 Alistalh, Samuel tasaskinilh Jehová, chu Jehová tlawalh pi xjililh chu ksenalh ama kilhtamaku, wa xlakata putum kachikin lu pekuanikgolh Jehová chu Samuel. 19 Chu putum kachikin wanilh Samuel: «Katlawani oración Jehová miDios kimpalakatakan, milakskujnin, xlakata ni kniputunaw, xlakata makglhuwa klakgalhinanitaw chu ktlawaparaw talakgalhin akxni kskiw chatum mapakgsina».
20 Wa xlakata Samuel wanilh kachikin: «Ni kapekuantit. Xlikana pi tlawanitantit putum umakgolh tuku nitlan. Pero la uku, chuntiya kastalanitit Jehová. Kaskujnanitit Jehová xliputum minakujkan. 21 Ni katamakgatlinitit xlakata nastalaniyatit nixaxlikana dioses, nema nitu litaxtukgo chu nila lakgmaxtunankgo, xlakata litaxtukgo tatlawamakgxtu nema ni kgalhikgo litliwakga. 22 Xpalakata xalanka xtukuwani, Jehová ni katiʼakgxtakgmakgalh xkachikin. Xlakata Jehová lakkaxwilinit pi wixin xkachikin nalitaxtuyatit. 23 Chu akit, chuntiya naktlawa oración mimpalakatakan. Komo nialh chuna xaktlawalh, klakgalhinama xwa kxlakatin Jehová. Chuntiya nakkamasiyaniyan la napinatit kxatlan chu kxaʼakgstitum tiji. 24 Pero wixin kaskujnanitit Jehová. Xliputum minakujkan kaskujnanitit chu ni kamakgatsankgananitit. Kalakapastaktit putum tuku lu stlan tlawanit mimpalakatakan. 25 Pero komo chuntiya lu natlawaputunatit tuku nitlan, wixin chu mimapakgsinakan nakamalakgsputukanatit».