Xlimaktum Samuel
26 Titaxtulh kilhtamaku, lakchixkuwin xalak Zif ankgolh kʼGuibeá chu wanikgolh Saúl: «David tatsekgnit kʼaktsu sipi xla Hakilá, kxlakatin Jesimón».* 2 Wa xlakata Saúl kataʼalh akgtutu mil tlakg xalaktlan soldados xalak Israel kxakaskakni xtiyat Zif, xlakata anta naputsa David. 3 Saúl tamakgxtakgli lakatsu ktiji kʼaktsu sipi xla Hakilá, nema wi kxlakatin Jesimón. Chu David, tiku xlama kxakaskakni tiyat, kgaxmatli pi Saúl xminit putsa. 4 Wa xlakata David kamalakgachalh makgapitsi skgalananin xlakata naʼakxilhkgo komo xlikana Saúl anta xwi. 5 Alistalh David alh asta niku xwi Saúl chu akxilhli niku klhtatama chu nachuna xpuxkukan ksoldados, Abner xkgawasa Ner. Saúl lakʼitat xma niku xwilakgolh, chu ksoldados xlitamakgstilikgonit. 6 Alistalh David kgalhskilh Ahimélec tiku hitita xwanit chu Abisái xkgawasa Zeruyá, xtala Joab: «¿Tiku nakintaʼan niku wi Saúl?». Abisái kgalhtinalh: «Akit naktaʼanan». 7 Katsisni, David chu Abisái tanukgolh anta niku xwi chu tekgskgolh pi Saúl klhtatama chu xlanza xya lakatsu kxʼakgxakga. Abner chu ksoldados xmakgolh chu xlitamakgstilikgonit Saúl.
8 Abisái wanilh David: «La uku Dios makamaxkiman mintalatlawana. Katlawa litlan, kakimaxki talakaskin naklimaklakaskin lanza chu naklakgxtokgo kkatiyatni. Kaj makgtum chuna naktlawa». 9 Pero David wanilh Abisái: «Nitu katlawani. ¿Tiku natlawani tuku nitlan xtalaksakni Jehová chu ni nalitawila kuenta?». 10 Chu David wanipa: «Kwaniyan kxlakatin Jehová, xastakna Dios, pi wa Jehová namakgni o namin kilhtamaku nani chuna la niyaw kimputumkan o naʼan talatlawanan chu anta naniyacha. 11 Xlakata kkatsi tuku lakpuwan Jehová, ¡nikxni xaktlawanilh tuku nitlan xtalaksakni Jehová! Wa xlakata katiya lanza nema wi lakatsu kxʼakgxakga chu kxalu niku tajuma xchuchut, chu kaʼaw». 12 Alistalh, David tiyalh lanza chu xalu niku xtajuma xchuchut, nema xwi lakatsu niku xwi xʼakgxakga Saúl, chu taxtukgolh. Niti kaʼakxilhli chu niti katsilh. Putum klhtatamakgolh. Ni lakastakwanankgolh xlakata wa Jehová tiku xtlawanit pi lu klhtatakgolh. 13 Alistalh David alh kxaʼalakgaputu niku xakaxtum xwanit chu tachokgolh kxʼakgspun* lanka sipi, anta niku lu lakgamakgat xkaʼakxilhacha.
14 Chu David pixlanka kakilhanilh soldados chu Abner xkgawasa Ner: «¡Abner! ¡Kakinkgalhti!». Abner kgalhtilh: «¿Tiku litaxtuya wix, xlakata pixlanka nakilhtaniya mapakgsina?». 15 David wanilh Abner: «¿Ni xlikana pi wix chatum chixku tiku ni pekuana? Anta kʼIsrael ni anan tiku xtachuna la wix. Komo chuna, ¿tuku xlakata ni kuentajtlawa mimapakgsina tiku lhuwa kakni kgalhi? Xlakata chatum soldado tanulh anta niku xwilatit xlakata xmakgnilh. 16 Ni makgantaxti tuku lakgayat. Kwaniyan kxlakatin Jehová, xastakna Dios, pi wixin kalakgchanan naniyatit, xlakata ni kuentajtlawatit mimalanakan, xtalaksakni Jehová. ¡Kaʼakxilhti! ¿Niku wi xlanza mapakgsina chu kxalu niku tajuma chuchut nema lakatsu xʼakgxakga xwi?».
17 Alistalh Saúl kgalhlakgapasli David chu wanilh: «David, kinkgawasa, ¿wix tiku chuwinampat?». Chu David kgalhtilh: «Chuna, akit kchuwinama, kimapakgsina tiku lhuwa kakni kgalhi». 18 Chu wampa: «Kimalana, ¿tuku xlakata putsastalanipat uma miskujni? ¿Tuku ktlawanit? ¿Tuku kiliyawakan? 19 Kimapakgsina tiku lhuwa kakni kgalhi, katlawa litlan, kakgaxpatni miskujni. Komo wa Jehová tiku tlawanit nakintalalakatawakaya, nakmakamaxki akgtum tamakamastan xla talhtsi chu xla kamakgamakglhtinalh.* Pero komo wa lakchixkuwin tiku chuna tlawakgonit, kakaʼakgspulalh tuku nitlan kxlakatin Jehová. Xlakata kintamakxtukgonit chu kimamakgkatsinikgonit pi ni kilakgchan naklatama ktiyat nema tapakgsini Jehová. Xtachuna la komo xkiwanikgolh, “¡Kapit, kakakninani atanu dioses!”. 20 La uku ktasaskiniyan pi ni nakimakgnikan anta niku ni wi Jehová. Mapakgsina xalak Israel taxtunit xlakata naputsa kaj tantum akgtsis xtachuna la komo xchipaputulh tantum tsiktsi xalak kakiwin anta kkasipijni».
21 Saúl kgalhtilh: «Klakgalhinanit, kataspitti, kinkgawasa, David, nialh kaktitlawanin tuku nitlan, xlakata la uku lanka xtapalh liʼakxilhnita kilatamat. Chu akit klikatsinit la chatum tonto. Lu nitlan tuku ktlawanit». 22 David kgalhtilh: «Unu wi xlanza mapakgsina. Kamilh putsa chatum misoldado. 23 Wa Jehová tiku nakamaxki chatunu chatunu tuku nakalakgchan komo tlawakgonit tuku xaʼakgstitum o ni, chu komo makgxtakgnankgonit o ni. Xlakata Jehová makamastan la uku kkimakan, pero akit ni ktlawaniputulh tuku nitlan xtalaksakni Jehová. 24 Jehová lu xtapalh kaliʼakxilhli kilatamat chuna la akit lu xtapalh kliʼakxilhli milatamat la uku. Xla kakimakgtayalh xlakata ni nakkgalhi talakgaputsit». 25 Saúl kgalhtilh: «Dios kasikulunatlawan, kinkgawasa, David. Lhuwa tuku wix natlawaya, chu tuku natlawaya tlan nakitaxtuniyan». Alistalh David chuntiya alh kxtiji chu Saúl taspitli kxchik.